ZIR TUR THUZIAK 35
HLA 123 Rinawm Taka Pathian Kaihhruaina Zâwmin
Upate’n Kohhran Aṭanga Chhuahtîrte An Ṭanpui Theih Dân
“Mi fel 99 sim tûr nei lote chungah aiin, mi sual pakhat sim chungah vâna mite an lâwm zâwk ang.”—LK. 15:7, NWT.
A TUM BER
Mi ṭhenkhat kohhran aṭanga chhuahtîr a ngaih chhan leh upate’n sima Jehova duhsakna dawng leh thei tûra an ṭanpui theih dân.
1-2. (a) Jehova’n thil sual tilui tlattute chu engtin nge a thlîr? (b) Thil sual titute chu eng ti tûrin nge a beisei?
PATHIAN Jehova chuan nungchang ṭha lo chu a ngaihzam loh bâkah, sual chu a hua a. (Sâm 5:4-6) Chuvângin, a Thu hmanga tehna fel min pêkte chu zâwm tûrin min beisei a ni. Chutih rualin, ṭha famkim lo kan nih angin a thupêkte chu famkim takin kan zâwm thei dâwn lo tih a hria a. (Sâm 130:3, 4) Mahse, ‘Pathian ngaihsak lo mi, a khawngaihna hurnaa chantîrtute’ chu a dawh reng lo vang. (Jud. 4) Bible chuan Pathian indona nî, Armageddonah ‘Pathian ngaihsak lo mite chu tihboral’ an ni ang tih a sawi a ni.—2 Pet. 3:7; Thup. 16:16.
2 Mahse, Jehova chuan tu ma boral a duh lo va. He thuziak inzawma kan lo sawiho tawh angin, ‘mi zawng zawng sim tûrin’ a duh a ni. (2 Pet. 3:9) Kohhran upate chuan Jehova entawnin thil sual titute chu an nun kawng thlâk danglam a, Pathian duhsakna dawng leh thei tûrin dawhthei takin an ṭanpui a. Mahse, thil sual titu zawng zawngin sim duhna an nei vek kher lo. (Is. 6:9) Upate’n vawi tam tak an ṭanpui chung pawhin mi ṭhenkhat chuan kawng sual an zawh zawm zêl a ni. Chutiang dinhmunah chuan upate’n eng nge an tih ang?
“MI SUAL CHU . . . CHHUAHTIR RAWH U”
3. (a) Bible-in sim duhna nei lote chungchângah eng kaihhruaina nge a pêk? (b) Engvângin thil sual titu kohhran aṭanga chhuahtîr a nih hian ama duh thlanna a ni tia kan sawi theih?
3 Thil sual tituin sim duhna a neih loh chuan, upate’n 1 Korinth 5:13, NWT-a: “Mi sual chu in zîng aṭangin chhuahtîr rawh u,” tih kaihhruaina hi an zawm a ngai a. Thil sual titu chuan a sim loh chuan kohhran aṭanga chhuahtîr a ni dâwn tih a hria a; chuvângin, kohhran aṭanga chhuahtîra a awm chu ama duh thlanna a ni tiin kan sawi thei a ni. (Gal. 6:7) A chhan chu, upate’n sim tûra vawi tam tak an ṭanpui tawh hnuah pawh inthlâk danglam a duh loh vâng a ni a. (2 Lal. 17:12-15) A thiltihte hmangin Jehova tehnate zawm a duh lohzia a lantîr a ni.—Deut. 30:19, 20.
4. Sim duhna nei lo thil sual titu kohhran aṭanga chhuahtîr a nih hian engvângin nge kohhrana puan a nih ṭhin?
4 Thil sual titu kohhran aṭanga chhuahtîr a nih hian, ani chu Jehova Thuhretu a ni tawh lo tih kohhrana puan a ni ṭhîn a. a Chutianga puan a nih chhan chu amah tihmualpho nân ni lovin, ani chu ‘pâwl lo tûr leh a hnêna ei pawh ei lo tûra’ Bible kaihhruaina pêk chu kohhrana mite’n an zawm theih nân a ni. (1 Kor. 5:9-11) Chu kaihhruaina chu chhan ṭha tak neia pêk a ni a. Tirhkoh Paula’n Korinth thawn khat 5:6-a: “Dawidim tlêm têin chhang hlâwm chu a pumin a fan chhuak ṭhîn,” tia a sawi angin, sim duhna nei lote chuan kohhrana mi dangte’n Jehova tehna felte mila nun an tumna chu an tihchhiatsak theih vâng a ni.—Thuf. 13:20; 1 Kor. 15:33.
5. Engtin nge kohhran aṭanga chhuahtîr kan unau chu kan thlîr ang a, engvângin nge?
5 A nih leh, engtin nge kohhran aṭanga chhuahtîr kan unau chu kan thlîr ang? Berâm bo chu berâm huanga a lêt leh thei ang bawkin, ani chu kâwm tawh lo mah ila, beisei bo anga thlîr lovin berâm bo angin kan thlîr zâwk tûr a ni. Chu kan unau chu Jehova hnêna inpumpêk tawh a ni tih hre reng ang che. Lungchhiatthlâk takin, tûnah rih chuan a inpumpêkna milin a nung lo va; chu chuan dinhmun hlauhawm takah a dah a ni. (Ezek. 18:31) Mahse, Jehova zahngaihna lantîrna hun a tâwp hma chuan a rawn lêt leh chu kan beisei thei a ni. A nih chuan, engtin nge upate’n ani chu an ṭanpui theih?
UPATE’N CHHUAHTIRA AWMTE AN ṬANPUI DAN
6. Kohhran aṭanga chhuahtîr tu emaw ṭanpui tûrin upate’n eng hmalâkna nge an neih ang?
6 Tu emaw kohhran aṭanga chhuahtîr a nih hian upate’n Jehova hnêna kîr leh tûrin an ṭanpui tawh dâwn lo tihna a ni em? Ni lo ve! Kohhran aṭanga chhuahtîr a nih tûr thu an hrilh hnuah kohhran upa committee chuan kohhrana lo kîr leh tûra a tih theihte chu a hrilh a. Chu mai bâkah, upate chuan thil dang pawh an ti a ni. Dinhmun tam takah chuan, thil sual tituin sim duhna a neih leh neih loh an hriat theih nân thla rei lo te hnua kawm leh an duh thu an hrilh a. Rem a tih chuan, an inkawm leh hunah upate chuan sima lo kîr leh tûrin tih tak zetin an ngên ang. Chumi ṭumah pawh, inthlâk danglam duhna a la neih loh chuan ni danga kâwm leh tûrin ruahmanna an siam dâwn a ni.
7. Engtin nge upate’n kohhran aṭanga chhuahtîrte an cheibâwl dânah Jehova khawngaihna an entawn? (Jeremia 3:12)
7 Upate chuan kohhran aṭanga chhuahtîrte an cheibâwl dânah Jehova khawngaihna chu entawn an tum tlat a. Entîr nân, Pathian chuan thuawih lo, a mi Israelte’n sima amah an rawn pan hun chu a nghâk lo va. Sim duhna an neih hma pawhin ṭanpui tumin hma a la hmasa zâwk ṭhîn a ni. He thuziak inzawm pahnihnaa kan zir tawh angin, a khawngaihna ngahzia entîrna atân zâwlnei Hosea chu a nupui a uirê lai rengin hruai haw leh tûrin a hrilh a. (Hos. 3:1; Mal. 3:7) Upate chuan Jehova entawnin thil sual titu a rawn kîr leh chu an duh tak zet a, awlsam taka a kîr leh theih nân an ṭanpui bawk a ni.—Jeremia 3:12 chhiar rawh.
8. Isua sawi fapa tlân bo tehkhin thu chuan Jehova khawngaihna leh zahngaihna chungchâng hre chiang lehzual tûrin engtin nge min ṭanpui? (Luka 15:7)
8 He thuziak inzawm pahnihnaa kan sawiho tâk, Isua sawi fapa tlân bo tehkhin thu kha han ngaihtuah leh teh. Hla tak aṭangin a pa chuan a fapa rawn haw a hmuh chuan “a tlân a, a kuah a, a fâwp ta ngawih ngawih a.” (Lk. 15:20, NWT.) A fapain ngaihdam a dîl hmasak chu a nghâk lo tih chhinchhiah ang che. Chu aiin, a hmangaih êm avângin a va pan zâwk a ni. Upate pawhin thutak aṭanga tawlh bo tawhte chungah chutiang rilru put hmang chu lantîr an tum a. Chûng berâm bote chu “lo haw” leh tûrin an duh a ni. (Lk. 15:22-24, 32) Thil sual titu a rawn kîr leh hian vâna mite an lâwm ang bawkin leia mite pawh an lâwm hle!—Luka 15:7 chhiar rawh.
9. Jehova’n thil sual titute chu eng ti tûrin nge a sâwm?
9 Kan lo sawiho tawhte aṭangin, Jehova’n sim duhna nei lote kohhrana an awm reng chu a phal lo tih a chiang hle a. Chutih rualin, thil sual titute chu a thlahthlam lo va, a hnêna kîr leh tûrin a duh a ni. Sim duhna neite chunga Jehova rilru put hmang chu Hosea 14:4-ah kan hmu thei a, chutah chuan: “An hnungtawlhna hi ka tidam ang a, an lak aṭanga ka thinrimna chu a kian tâk avângin, anni chu ka hmangaih hrim hrim dâwn a ni,” tiin a sawi a ni. Chu chu, chhe tê pawha simna lantîrtute ṭanpui tûra upate chêttîrtu thiltithei tak a va ni êm! Kohhran aṭanga chhuahtîra awmte tân pawh tawi khawmuang lova Jehova hnêna kîr leh tûra chêttîrtu ṭha tak a va ni êm!
10-11. Tûn hmaa kohhran aṭanga chhuahtîr lo ni tawhte chu upate’n engtin nge an ṭanpui ang?
10 A nih leh, kum tam tak kal taa kohhran aṭanga chhuahtîr lo ni tawhte chu upate’n engtin nge an ṭanpui theih? Kohhran aṭanga chhuahtîr an nih chhan thil sualte chu an ti tawh lo pawh a ni thei a. A ṭhen phei chuan chhuahtîr an nih chhan chu an hre tawh lo hial pawh a ni thei. Eng pawh chu ni se, upate’n anni chu zawn chhuaha tlawh an duh a. An va tlawh hunah kohhrana rawn kîr leh tûra ngênin an ṭawngṭaipui hial thei a ni. Kum tam tak chhûng kohhrana awm tawh lo a nih chuan thlarau lamah a chak lo hle ngei dâwn a. Chuvângin, lo kîr leh duhna a lantîr a nih chuan, kohhrana lâk luh leh a nih hma pawhin upate chuan tu emaw nêna Bible zir tûrin ruahmanna an siamsak thei a. Amah Bible zirpuitu tûr chu upate’n an ruat dâwn a ni.
11 Upate chuan Jehova khawngaihna entawnin mi a tam thei ang berte chu ṭanpui a, an rawn kîr leh theih nân kawng a inhawng reng tih hriattîr chu an duh a. Thil sual titu a sim a, a kawng sual zawh a bânsan a nih chuan a rang thei ang bera kohhrana lâkluh leh theih a ni.—2 Kor. 2:6-8.
12. (a) Eng dinhmunahte nge upate chu an fîmkhur lehzual a ngaih? (b) Engvângin nge thil sual titu ṭhenkhat chuan Jehova zahngaihna an dawng ngai lo vang tia thutâwp kan siam loh vang? (Footnote en bawk rawh.)
12 Dinhmun ṭhenkhatah chuan, upate’n tu emaw chu kohhrana an lâk luh leh hmain fîmkhur taka an ngaihtuah phawt a ngai a. Entîr nân, ani chu naupang khawihchhiatna leh enkawl ṭhat lohna te, kalpênna te, a nih loh leh a inneihna tihtâwp tuma hma a lo lâk tawhnate avânga chhuahtîr a nih chuan a sim tak zet tih upate’n an chian phawt tûr a ni. (Mal. 2:14; 2 Tim. 3:6) Pathian berâmte chu an vênhim a ngai a. Chutih rualin, Pathian Jehova’n simna dik tak lantîra an kawng sual zawh bânsantu zawng zawngte chu a lâwm lêt leh ang tih kan hre tûr a ni. Chuvângin, mi dangte chunga dik lo taka thil lo ti tawhtute chungchâng upate’n an ngaihtuah hunah an fîmkhur a ngaih rualin, chutiang mite chuan Jehova zahngaihna an dawng ngai lo vang tiin thutâwp an siam tûr a ni lo. b—1 Pet. 2:10.
KOHHRANIN A TIH THEIH CHU
13. Zilh tâwk tu emaw leh kohhran aṭanga chhuahtîr tu emaw kan cheibâwl dân chu engtin nge a inan loh?
13 Thuziak hmasaa kan sawiho tawh angin, tu emaw zilh a ni tih chu kohhrana puan a ngaih châng a awm thei a. Chutiang dinhmunah chuan, a simin a thil sual tih chu a bânsan tih kan hriat avângin kan kâwm chhunzawm thei a ni. (1 Tim. 5:20) Ani chu kohhran mi leh sa a la ni reng a, unaute fuihna a mamawh a ni. (Heb. 10:24, 25) Amaherawh chu, kohhran aṭanga chhuahtîr tu emaw dinhmun chu a danglam hlak a. Ani chu ‘kan pâwl tawh lo va, a hnênah pawh kan ei tawh lo a ni.’—1 Kor. 5:11.
14. Kristiante’n kohhran aṭanga chhuahtîrte an cheibâwl dânah engtin nge Bible thu bulte ṭanchhana sawizawi an chhia leh ṭha hriatna chu an hman theih? (Milem en bawk rawh.)
14 Kohhran aṭanga chhuahtîr tu emaw chu kan be miah lo tûr tihna a ni em? Ni lo ve. Ani chu kan kâwm tûr a ni lo ngei mai a. Mahse, Kristiante chuan kohhran aṭanga chhuahtîra awm—an chhûngkhat, a nih loh leh tûn hmaa an nêl tak tu emaw—chu inkhâwmnaa lo tel tûra an sâwm dâwn leh dâwn loh chungchângah Bible thu bulte ṭanchhana sawizawi an chhia leh ṭha hriatna chu an hmang thei a ni. An mi sâwm chu lo inkhâwm ta se, engtin nge ni ang? Tûn hma chuan kam khat pawhin kan be lo va. Mahse, hemi chungchângah pawh hian Kristian tinte chuan Bible thu bulte ṭanchhana sawizawi an chhia leh ṭha hriatna chu an hman a ngai a ni. Ṭhenkhat chuan chibaia lo lawm chu an duh pawh a ni thei a. Chutih rualin, rei taka biain kan kâwm lo vang.
Kristiante chuan kohhran aṭanga chhuahtîr tu emaw inkhâwma lo tel tûra an sâwm dâwn leh dâwn loh, a nih loh leh a lo inkhâwm huna chibaia an lo lawm dâwn leh dâwn loh chungchângah Bible thu bulte ṭanchhana sawizawi an chhia leh ṭha hriatna chu an hmang thei (Paragraph 14-na en rawh)
15. Eng ang thil sual titute chungchâng nge 2 Johana 9-11-a târ lan a nih? (“ Johana leh Paula Sawi Chu Sual Thuhmun A Ni Em?” tih bâwm chu en bawk rawh.)
15 Mi ṭhenkhat chuan, ‘Bible-in chutiang mi lo dawngsawngtu chu a thil sual tihah a tel ve a ti lo vem ni?’ tiin an ngaihtuah mai thei. (2 Johana 9-11 chhiar rawh.) Mahse, he Bible châng a chung leh hnuai thute kan en chuan, kalpêngte leh Bible kalh zâwng thiltih chawi lârtute chungchâng a sawina a ni tih kan hre thei a. (Thup. 2:20) Chuvângin, kalpêngte zirtîrna emaw, Pathian duh loh zâwng thiltihte emaw chawi lârtu tu emaw chu upate’n an tlawh lo vang. Chutih rualin, ani chu a la inlamlêt thei tho va. Mahse, a inlamlêt, a nih loh leh a sim hma chu kan be lo vang a, kohhran inkhâwmnaah pawh kan sâwm hek lo vang.
JEHOVA KHAWNGAIHNA LEH ZAHNGAIHNA CHU ENTAWN RAWH
16-17. (a) Jehova’n thil sual titute chu eng ti tûrin nge a duh? (Ezekiela 18:32) (b) Upate’n thil sual titute an ṭanpui hunah Jehova thawhpuitu an ni tih engtin nge an lantîr theih?
16 He thuziak inzawm pangate aṭang hian eng nge kan hriat theih? Jehova chuan tu ma boral a duh lo! (Ezekiela 18:32 chhiar rawh.) Thil sual titute chu amah nêna inrem leh tûrin a duh a ni. (2 Kor. 5:20) Chuvângin, tûn hma aṭangin amah kalsantu a chhiahhlawhte chu sima a hnêna kîr leh tûrin a ṭanpui ṭhîn a. Kohhran upate chuan sual pawi tak titute chu sim tûra ṭanpuiin Jehova thawhpui theihna chanvo hlu tak an nei a ni.—Rom 2:4; 1 Kor. 3:9.
17 Thil sual titute an sim huna vâna mite lâwm dân tûr chu han mitthla teh! Kan Pa vâna mi Jehova chu a berâm bo kohhrana rawn kîr leh an awm apiang hian a hlim êm êm a. A khawngaihna, a zahngaihna leh, a ngilneihna nasa tak chungchâng kan chhût ngun hian Jehova kan hmangaihna chu a nasa lehzual sauh a ni.—Lk. 1:78.
HLA 111 Kan Hlim Chhante
a Chutiang mite chu hnawhchhuah tiin kan ko tawh lo va. 1 Korinth 1:13-a Paula thusawi nêna inmilin kohhran aṭanga chhuahtîrte tiin kan ko tawh a ni.
