Tirhkoh Paula chuan Thessalonika khuaa Kristiante chu: “Tu pawhin he lehkhathawna kan thu hi a zawm loh chuan, chu mi chu . . . chhinchhiah rawh u,” tiin a hrilh a. (2 Thes. 3:14) Tûn hma chuan, he fuihna hi upate tih tûr angin kan lo hre thiam a. Tu emaw chuan vawi tam tak zilh a nih hnu pawha Bible thu bulte kalh zâwnga thil a tih zawm zêl chuan, upate chuan kohhranah vaukhânna thusawi an nei ṭhîn a. A hnuah, kohhrana thuchhuahtute chuan ani chu thlarau lam thiltihte tih lovah chuan thil dangah an kâwm tawh lo ṭhîn.

Mahse, hemi chungchânga kan hriatthiam dân hi siamrem a ngai a ni. Paula sawi chu chutiang dinhmuna Kristian tinte hmalâk dân tûr ni ngeiin a lang. Chuvângin, upate’n vaukhânna thusawi an neih a ngai tawh lo tihna a ni. Engvângin nge kan hriatthiam dân chu siamrem a ngaih? Paula thusawia a chung a hnuai thute hi lo ngaihtuah ta ila.

Paula chuan chu kohhranah chuan “dân lo anga awm” mi ṭhenkhat an awm tih a sawi a. Chûng mite chuan thlarau thâwkkhuma zilhna a pêkte chu an pawm lo a ni. Paula’n kohhran a tlawh hmasak ṭum chuan: “Tu pawhin hna a thawh duh loh chuan ei pawh ei suh se,” tih thupêk a pe a. Chutichung chuan, mi ṭhenkhat chuan mahni inchâwmna atân hna thawk thei reng siin, an thawk duh lo a ni. Chu bâkah, mi dangte nunah an inrawlh buai bawk. Chûng dân lo anga awmte chu Kristiante’n engtin nge an cheibâwl ang?—2 Thes. 3:6, 10-12.

Paula chuan: “Chu mi chu . . . chhinchhiah rawh u,” tiin a sawi a. Heta Grik thu mal hman hian chu mi chu hriaa a laka fîmkhur a ngai tih a kâwk a. Paula’n chu kaihhruaina chu upate hnênah chauh ni lovin, kohhrana mi tinte hnênah a pe a ni. (2 Thes. 1:1; 3:6) Chuvângin, unau tu emawin Bible thu bulte kalha thil a ti tih an hriat chuan Kristian tinte chuan mi mal takin chu mi chu ‘pâwl loh,’ a nih loh leh kawm tawh loh an thlang thei a ni.

A nih leh, chu mi chu kohhran aṭanga chhuahtîrte anga cheibâwl tûr tihna a ni em? Ni lo ve. Paula chuan: “Unau angin zilh zâwk rawh u,” a ti a. Chuvângin, Kristiante chuan chhinchhiaha awm tu emaw chu kohhran inkhâwmnaah leh rawngbâwlnaahte thawhpuiin la kâwm zawm zêl mah se, inkawmhonaahte leh intihhlimnaahte tel tûrin an sâwm tawh lo thei a ni. Engvângin nge? Paula chuan: “A zah theihna tûrin,” tiin a sawi. Chutianga chhinchhiah a nih avângin, a thiltih chu zahpuiin insiam ṭhat duhna a rawn nei thei a ni.—2 Thes. 3:14, 15.

Kristiante’n tûn laiah he fuihna hi engtin nge an zawm theih? Tu emaw thiltih chu Paula sawi angin, kaihhruaina zâwm lova ‘dân lo anga’ tih a ni ngei tih kan chian hmasa phawt tûr a ni. Paula chuan chhia leh ṭha hriatna nêna inkaihhnawih thil emaw, mi mal duh dân emawa kan laka thlîr dân dang neitute chungchâng a sawi lo va. Rilru naa min siamtu tu emaw chungchâng a sawina pawh a ni hek lo. Chu aiin, Bible-a Pathian pêk kaihhruaina chiang tak zâwm duh lotute chungchâng chu a sawi zâwk a ni.

Tûn laiah, kan Kristian unau tu emawin chutianga thuawih lohna a a lantîr tih kan hriat chuan inkawmhonaahte leh intihhlimnaahte lo tel tûra sâwm lo tûrin mi mal takin thu tlûkna kan siam ang. Chutianga tih chu mi mal thu tlûkna a nih avângin chumi chungchâng chu ina kan chênpui kan chhûngte tiam lohvin, mi dangte chu kan sawipui lo vang. Inkhâwmnaahte leh rawngbâwlnaahte pawh ani chu thawhpuiin kan la kâwm zawm zêl thei a. A insiam ṭhat hnuah chuan tûn hma angin pângngai takin kan kâwm leh thei a ni.