1. Kristian mi puitling ni thei tûrin eng nge kan tih ngai?

 NAUPANGTE an puitlin chakzia kan hmuh hian mak kan ti a. Ṭan lâkna pawh awm lova puitling nghâl mai niin an lang ṭhîn a ni. Mahse, Kristian mi puitling nihna chu awlsam taka neih nghâl mai theih a ni lo. b (1 Kor. 13:11; Heb. 6:1) Kristian mi puitling ni tûr chuan Pathian Jehova nêna inlaichînna nghet tak kan neih a ngai a. Pathian miziate neih chhoh nân te, thiamna ṭangkai tak neih theih nân te leh, nakin huna kan neih mai theih mawhphurhnate atâna kan inbuatsaih theih nânte a thlarau thianghlim ṭanpuina kan mamawh a ni.—Thuf. 1:5.

2. Genesis 1:27-na aṭangin eng nge kan zir a, he thuziakah hian eng nge kan sawiho vang?

² Jehova chuan mihringte chu mipaah leh hmeichhiaah a siam a. (Genesis 1:27 chhiar rawh.) Mipa leh hmeichhia te chu tisa pianhmang inang lo mai ni lovin, kawng dang pawhin inan lohna an nei a ni. Entîr nân, Jehova chuan mipa leh hmeichhia chu an hlen tûr chanvo bîk a pêk avângin, chûng chanvote hlen thei tûra an mamawh miziate leh thiamnate an neih a ngai a. (Gen. 2:18) He thuziakah hian, ṭhalai unaunute’n Kristian mi puitling ni tûra an tih theihte kan sawiho vang a. A dawta thuziakah chuan, ṭhalai unaupate tih theihte kan sawiho bawk ang.

3-4. Ṭhalai unaunute chuan entawn tûr ṭhate chu khawiah nge an hmuh theih? (Milem en bawk rawh.)

³ Bible chuan Jehova hmangaih a, a rawngbâwltu entawn tlâk hmeichhe tam tak a târ lang a. (JW.ORG-a “Women in the Bible—What Can We Learn From Them?” tih thuziak chu en rawh.)  He thuziak ṭanchhan Bible chângin a sawi angin, chûng hmeichhiate chu “insûm thei” leh “engkima rinawm” an ni a. Chu bâkah, ṭhalai unaunute chuan anmahni kohhran chhûng ngeiah entawn tûr ṭha siamtu Kristian mi puitling unaunute chu an hmu thei bawk a ni.

⁴ Ṭhalai unaunute u, in entawn theih Kristian mi puitling unaunute hriat in nei em? An mize duhawm takte chu chhinchhiah ula, chûng miziate in lantîr theih dân ngaihtuah bawk ang che u. Paragraph zawmahte hian Kristian mi puitling ni tûra unaunute neih ngai mize pawimawh tak pathum kan sawiho vang.

5. Engvângin nge Kristian mi puitling hmeichhiate tân inngaihtlâwmna neih chu a pawimawh?

⁵ Inngaihtlâwmna chu Kristian mi puitling ni tûra mize pawimawh tak a ni a. Hmeichhiate chuan inngaihtlâwmna an neih hian Jehova leh mi dangte nên inlaichînna ṭha tak an nei ang. (Jak. 4:6) Entîr nân, Jehova hmangaihtu hmeichhia chuan a Pa vâna miin lû nihna chungchânga ruahmanna a siam chu inngaitlâwm takin a thlâwp a. (1 Kor. 11:3) Chu ruahmanna chu kohhranah leh chhungkaw inrêlbâwlnaah a bîk taka zawm tûr a ni. c

6. Ṭhalai unaunute chuan inngaihtlâwmna chungchângah Rebeki hnên aṭangin eng nge an zir theih?

⁶ Rebeki entawn tûr siam hi lo ngaihtuah ta ila. Ani chuan a dam chhûngin a ṭûlna hmun leh a ṭûl dân azira hma laa thiltih dân a hria a, huaisen taka thu tlûkna siam thei hmeichhe fing tak a ni a. (Gen. 24:58; 27:5-17) Mahse, ani chuan mi dangte zahna a neiin kaihhruainate a zâwm a ni. (Gen. 24:17, 18, 65) Nang pawh Rebeki anga Jehova ruahmanna siamte inngaitlâwm taka i thlâwp chuan, i chhûngkuaah leh kohhranah entawn tûr ṭha i ni ang.

7. Ṭhalai unaunute chuan thuhnuairawlhna lantîrna chungchângah engtin nge Estheri an entawn theih?

⁷ Kristian mi puitling zawng zawngte neih  ngai mize dang leh chu thuhnuairawlhna hi a ni a. Bible chuan, “Thuhnuairawlhte hnênah chuan finna a awm,” tiin a sawi a ni. (Thuf. 11:2, NWT) Estheri chu Pathian ṭih mi, mi thuhnuairawlh tak a ni a. A thuhnuairawlhna chuan lalnu a nih khân chapo lo tûrin a ṭanpui a ni. Ani chuan a unaupa Mordekaia thurâwn pêk chu ngaithlain a zâwm a. (Est. 2:10, 20, 22) Nang pawhin mi dangte hnên aṭang thurâwn ṭhate dîla zâwmin, chutiang thuhnuairawlhna chu i lantîr ve thei a ni.—Tit. 2:3-5.

8. Timothea thawn khat 2:9, 10-naa sawi angin, engtin nge thuhnuairawlhna chuan ṭhalai unaunute chu silhfên leh inchei dân kawngah duh thlanna fing siam tûra a ṭanpui?

⁸ Estheri chuan kawng dang pawhin thuhnuairawlhna a lantîr a. Ani chu a “nalhin a hmêl a ṭha hle mai a”; mahse, mi dangte ngaihvenna lâk tumin thil a ti lo. (Est. 2:7, 15) Engtin nge Kristian hmeichhiate chuan Estheri entawn tûr siam chu an hlâwkpui theih? An hlâwkpui theih dân kawng khat chu 1 Timothea 2:9, 10-ah târ lan a ni. (Chhiar rawh.) Paula chuan Kristian hmeichhiate chu mawihnai tak leh inchawih tâwk taka inthuam tûrin a fuih a. Heta Grik thu malin a sawi tum ber chu, Kristian hmeichhia chuan mi dangte ngaih dân leh rilru awm dân tûr zahna lantîr zâwngin a inthuam tûr tihna a ni. Kristian mi puitling unaunute chu inchawih tâwk taka an inthuam avângin kan va ngaisâng tak êm!

9. Abigaili entawn tûr siam aṭangin eng nge kan zir theih?

⁹ Kristian mi puitling unaunu zawng zawngte lantîr ngai mize dang leh chu hriatthiam theihna a ni a. Hriatthiam theihna chu eng nge ni? Chu chu thil dik leh dik lo hre hranga thu tlûkna fing siam tûra remhriatna hi a ni. Abigaili entawn tûr siam hi han ngaihtuah teh. A pasal chuan a chhûngkuaa thil ṭha lo thlentîr thei thu tlûkna ṭha lo tak a siam khân, Abigaili chuan hma a la vat a. A remhriatna chuan nunna tam tak a chhanhim a ni. (1 Sam. 25:14-23, 32-35) Hriatthiam theihna chuan ṭawng hun leh ngawih hun hre tûrin min ṭanpui bawk a. Chu chuan mi dangte chu an rilru tihrehawm lo tûr zâwnga mi mal ngaihsakna lantîr thei tûrin min ṭanpui bawk a ni.—1 Thes. 4:11.

10-11. Engtin nge ziak leh chhiar ṭha taka thiamna chu nangmah leh mi dangte’n in hlâwkpui theih? (Milem en bawk rawh.)

¹⁰ Kristian hmeichhiate chuan thiamna ṭangkai takte an neih a ngai a. Hmeichhe naupangin a naupan laia thiamna ṭhenkhat a zir chu a dam chhûngin a hlâwkpui ang. Entîrna ṭhenkhat i lo ngaihtuah ang u.

¹¹ Ziak leh chhiar thiam zir rawh. Hnam dân ṭhenkhatah chuan ziak leh chhiar hi hmeichhiate zir tûr thiamna pawimawh tak angin an ngai lo va. Mahse, chûng thiamnate chu Kristian  tinte tâna pawimawh tak a ni. d (1 Tim. 4:13) Chuvângin, eng ang harsatna kârah pawh ziak leh chhiar ṭha taka thiam tûrin zir ang che. Chu chu engtin nge i hlâwkpui ang? Chûng thiamnate chuan i mamawh sum leh pai thawk chhuak tûrin a ṭanpui thei che a. Ṭha lehzualin Bible i zir thiam ang a, mi dangte pawh i zirtîr thiam bawk ang. I hlâwkpui dân tûr ṭha ber chu a Thu i chhiar a, i chhût ngunna chuan Jehova a hnaihtîr lehzual dâwn che hi a ni.—Jos. 1:8; 1 Tim. 4:15.

12. Engtin nge Thufingte 31:26-na chuan mi dangte nêna inbiak pawh dân thiam tûra a ṭanpui theih che?

¹² Midangte nên ṭha taka inbiak pawh dân zir rawh. Chu chu Kristiante tâna pawimawh tak a ni a. Chumi chungchângah zirtîr Jakoba chuan, “Mi tinin ngaihthlâk chuh sela, thusawi chuh lo sela,” tiin thurâwn ṭangkai tak min pe a ni. (Jak. 1:19) Mi dangte thusawi ngun taka i ngaihthlâk hian an chungah ‘lainatna’ i lantîr a ni a. (1 Pet. 3:8) An thusawi emaw, rilru awm dân emaw hre thiam lo nia i inhriat chuan zawhna zawh âwm takte zâwt la. Tichuan, thu i sawi hmain ngaihtuah hmasa ang che. (Thuf. 15:28.) Heti hian inzâwt rawh: ‘Ka thusawi tûr hi a dikin mi dangte tichak thei a ni em? Zahna leh ngilneihna lantîrna a ni em?’ tiin. Ngun taka ngaithlaa ngilnei taka thusawi ṭhîn unaunute hnên aṭangin inzir ang che. (Thufingte 31:26 chhiar rawh.) An thusawi dânte chu ngun takin ngaihven la. Mi biak pawh dân i thiam poh leh, mi dangte nêna in inlaichînna chu a ṭha lehzual ang.

13. Engtin nge in chhûng hnathawh dân chu i zir theih? (Milem en bawk rawh.)

¹³ In chhûng hna thawh thiam zir rawh. Hmun tam takah chuan in chhûng hna tam zâwk chu hmeichhiate’n an thawk ṭhîn a. I nu emaw, i unaunu dangte emaw chuan in chhûng hna ṭha taka thawk thiam tûrin an zirtîr thei che a ni. Unaunu Cindy-i chuan: “Ka nu min pêk thil hlu tak zînga pakhat chu taima taka hnathawhnain hlimna a thlen ṭhîn tih min zirtîr hi a ni a. Ei rawngbâwl te, tihthianghlim te, puan ṭhui te leh, bazâr dânte zir thiamna chuan ka nun a tiawlsamin, Jehova rawngbâwlnaah tam lehzuala inhmang thei tûrin min ṭanpui a ni. Ka nu chuan khualchhâwn thiamna lantîr dân min zirtîr bawk a, chu chuan entawn tlâk unau duhawm takte nên inhmuh theihna min neihtîr a ni,” tiin a sawi. (Thuf. 31:15, 21, 22) Taima tak, khualchhâwn thiam tak leh, in chhûng hna thawh thiam tak hmeichhiate chu an chhûngkaw tân leh kohhran tân malsâwmna an ni tak zet a ni.—Thuf. 31:13, 17, 27; Tirh. 16:15.

14. Unaunu Crystal-i thiltawn aṭangin eng nge i zir theih a, eng nge i ngaihven tlat ang?

¹⁴ Mahni kea din tum rawh. Mahni kea din hi Kristian zawng zawngte tâna thiltum pawimawh tak a ni. (Phil. 4:11) Unaunu Crystal-i chuan: “Ka nu leh pate chuan high school-a kut  them thiamna lam zirnaah ka zir tûr min thlanpui a. Ka pa chuan sum leh pai chhût dân (accounting class) zirnaa tel tûrin min fuih a, chu chu ka tâna ṭangkai tak a ni,” tiin a sawi. Ei zawnna hna hmuh nâna thiamna zir a ngaih mai bâkah, fing taka sum hman dân kan zir a ngai a ni. (Thuf. 31:16, 18) Ṭûl lo taka leiba neih pumpelhin leh, neih tâwka lungâwiin thlarau lam thiltum ngaihven tlat ang che.—1 Tim. 6:8.   

15-16. Engvângin nge pasal nei lo unaunute chu mi dangte tâna an hlut? (Marka 10:29, 30)

¹⁵ Thlarau lam miziate i neih a, thiamna ṭangkai tak i neih chuan i nakin hun atân i inbuatsaih ṭha lehzual thei ang. I tih theih ṭhenkhat i lo ngaihtuah ang u.

¹⁶ Pasal nei lova awm i thlang thei. Isua thusawi nêna inmilin, hmeichhe ṭhenkhat chuan an hnam dânah hmuhsitawm tak ni mah se, pasal nei lova awm chu an thlang a. (Mt. 19:10-12) Mi dangte chu an dinhmunte avângin pasal nei lovin an awm thei bawk. Mahse, Jehova leh Isua chuan Kristian pasal nei lote chu an ngainêp lo tih i chiang thei a. Khawvêl puma kohhrantea pasal nei lo unaunute an awm chu malsâwmna a ni. Mi dangte an hmangaihna leh an ngaihsakna chuan anni chu mi tam tak tân thlarau lama unaunu, a nih loh leh thlarau lama nu a nihtîr a ni.—Marka 10:29, 30 chhiar rawh; 1 Tim. 5:2.

17. Engtin nge ṭhalai unaunu chuan tûn aṭanga hunbi kima rawngbâwl tûra a inbuatsaih theih?

¹⁷ Hunbi kimin rawng i bâwl thei. Khawvêl puma thu hrilh rawngbâwlnaa thawk a tam zâwk chu Kristian unaunute an ni a. (Sâm 68:11) Tûn aṭangin hunbi kima rawngbâwl tûrin ruahmanna i siam thei em? Pioneer emaw, mahni inpein biakna atâna in sakna lamah emaw, a nih loh leh Bethel-a rawngbâwlin emaw i thawk thei a. I thiltum atân ṭawngṭai ang che. Chutiang thiltum hlen tawhtu unaute chu bia la, i thiltum hlen thei tûra i tih ngaite chu zâwt ang che. Chu bâkah, ruahmanna fel tak siam bawk rawh. I thiltum hlenna chuan Jehova rawngbâwlna zauh theihna kawng tam tak a hawnsak thei che a ni.

18. Engvângin nge unaunu chuan fîmkhur taka ngaihtuaha a pasal tûr a thlan ang? (Milem en bawk rawh.)

¹⁸ Pasal neih i thlang thei. Kan sawiho tâk miziate leh thiamnate chuan nupui ṭha tak ni thei tûrin a ṭanpui ang che. Mahse, pasal neih i tum a nih chuan fîmkhur taka ngaihtuahin i kawppui tûr chu thlang rawh. Chu chu thu tlûkna  i siam azawnga pawimawh ber zînga pakhat a ni. I pasal thlan lû nihna hnuaiah i intukluh a ngai tih hre reng ang che. (Rom 7:2; Eph. 5:23, 33) Chuvângin, heti hian inzâwt rawh: ‘Ani chu Kristian mi puitling a ni em? Thlarau lam thil chu a nunah a dah pawimawh ber em? Thu tlûkna fing a siam em? Thil tihsual a neih hunah a pawm em? Hmeichhiate zahna a lantîr em? Ani chuan Pathian nêna inlaichînna nghet tak nei tûrin min ṭanpui theiin, chhûngkua a châwm theiin, ka tân ṭhian ṭha a ni thei ang em? A mawhphurhnate ṭha takin a hlen em? Entîr nân, kohhranah eng chanvote nge a dawn a, engtin nge chu chu a hlen?’ tiin. (Lk. 16:10; 1 Tim. 5:8) Mahse, pasal ṭha tak neih i duh chuan nang pawh nupui ṭha tak i nih a ngai ang.

19. Engvângin nge “ṭanpuitu” nihna chanvo chu chawimawina a nih?

¹⁹ Bible chuan nupui ṭha chu a pasal tân “ṭanpuitu” leh “kawppui âwm mi” a ni tih a sawi a. (Gen. 2:18) Chu chu hmeichhiate hnuaichhiahna a ni em? Ni lo ve! Ṭanpuitu anga nupui chanvo chu chawimawina a ni. Dik tak chuan, Bible chuan Pathian Jehova chu “ṭanpuitu” angin a târ lang fo va. (Sâm 54:4; Heb. 13:6) Pasalin chhûngkaw tâna thu tlûkna a siam hunah a nupuiin a thlâwp a, a ṭanpui hian a pasal tân ṭanpuitu dik tak a ni. Jehova a hmangaih avângin, a pasal chawimawi zâwngin thil a ti a. (Thuf. 31:11, 12; 1 Tim. 3:11) Tûn aṭanga Jehova i hmangaihna tinghetin, chhûngkaw zînga mite leh kohhrana mite ṭanpuina hmangin nupui ṭha tak ni tûrin i inbuatsaih thei a ni.

20. Nu chuan a chhûngkaw tân eng thil ṭha nge a tih theih?

²⁰ Nu i ni thei. Pasal i neih hnu chuan fate in nei thei a. (Sâm 127:3) Chuvângin, chumi atâna ngaihtuah hmasak chu a finthlâk hle a ni. He thuziaka kan sawiho tâk miziate leh thiamnate chuan nupui ṭha tak leh nu ṭha tak ni tûrin a ṭanpui ang che. I hmangaihna te, ngilneihna te leh, dawhtheihnate chuan i chhûngkua chu a tihlimin, i fate chu him tak leh hmangaih tak nia inhriatna a neihtîr thei a ni.—Thuf. 24:3.

21. Engtin nge kan unaunute chu kan ngaih ang a, engvângin nge? (A kâwma milem en rawh.)

²¹ Ṭhalai unaunute u, Jehova leh a mite tâna in thiltih zawng zawngte avângin kan hmangaih tak zet a che u. (Heb. 6:10) Thlarau lam miziate leh thiamnate nei tûra theih tâwp in chhuahna chuan nangmahni leh in chhehvêla awmte chu a tihlimin, nakina in dawn tûr mawhphurhnate atân a buatsaih che u a ni. Jehova inawpna pâwl atân in va hlu tak êm!