1. Kristian unaupate chuan patling tak ni tûrin eng nge an tih ang?

 LAL Davida chuan Solomona hnênah: “Chak takin awm la, patling takin awm rawh,” tiin a fuih a. (1 Lal. 2:1-3) He fuihna thu hi tûn laia Kristian unaupa zawng zawngte’n an nunpui tûr a ni. Chutianga nunpui thei tûr chuan an nun kawng hrang hrangah Pathian dân zâwm tûr leh Bible thu bulte nunpui tûra an zir a ngai a. (Lk. 2:52) Engvângin nge ṭhalai unaupate tân Kristian mi puitling nih chu thil pawimawh tak a nih?

2-3. Engvângin nge ṭhalai unaupate tân Kristian mi puitling nih chu a pawimawh?

² Kristian unaupate chuan chhûngkuaah leh kohhranah mawhphurhna pawimawh takte an nei a. Ṭhalai unaupate u, nakina in la dawn tûr mawhphurhnate chungchâng chu in ngaihtuah tawh ngei ang. Hunbi kima rawngbâwl te, kohhrana rawngbâwltu, leh kohhran upa nihte in tum thei a ni. Nupui fanau neih in duh pawh a ni thei bawk. (Eph. 6:4; 1 Tim. 3:1) Hêng thiltumte tihlawhtling tûr chuan Kristian mi puitling in nih a ngai a ni. b

³ Engin nge Kristian mi puitling ni thei tûra ṭanpui thei che u? In neih chhoh ngai thiamna pawimawh takte a awm a ni. Engtin nge tûn aṭanga nakin huna in la neih mai theih mawhphurhna eng pawh chu hlawhtling taka hlen tûra in inbuatsaih theih?

4. Khawiah nge entawn tûr ṭha i hmuh theih? (Milem en bawk rawh.)

⁴ Entawn tûr ṭha thlang rawh. Bible chuan ṭhalai mipate tâna entawn tûr ṭha tam tak a târ lang a. Chûng entawn tûr ṭha siamtu mipate chuan Pathian an hmangaih avângin a mite ngaihsakna kawngah mawhphurhna chi hrang hrang an chelh a ni. Nang  pawhin chhûngkuaah leh kohhranah entawn tûr ṭha siamtu Kristian mi puitling i hmu thei a. (Heb. 13:7) Isua Krista entawn tûr siam ṭha famkim pawh entawn tûr i nei bawk. (1 Pet. 2:21) Chûng an entawn tûr ṭhate ngun taka i zir hunah, an mize langsâr zualte chu ngaihtuah la. (Heb. 12:1, 2) Chûng mite i entawn theih dânte pawh ngaihtuah bawk ang che.

5. Engtin nge ngaihtuah thiamna i neih theih a, engvângin nge chu chu a pawimawh? (Sâm 119:9)

⁵ ‘Ngaihtuah thiamna dik tak chu neiin, vawng tlat rawh.’ (Thuf. 3:21) Ngaihtuah thiamna dik tak neitu chuan thil a tih hmain ngun takin a ngaihtuah ṭhîn a. Chu thiamna chu nei a, vawng tlat tûrin theih tâwp chhuah ang che. Engvângin nge? He khawvêla ṭhalai mipa tam zâwk chu mahni ngaih dân leh an rilru vei zâwngte thununin an awm a. (Thuf. 7:7; 29:11) TV, film, internet leh, social media te chuan i ngaihtuahna leh thiltihte chungah nghawng a nei thei a ni. A nih leh, ngaihtuah thiamna dik tak nei tûrin eng nge i tih theih? Bible thu bulte zirna leh chumi i hlâwkpui theih dânte ngaihtuahna hmangin i ti ṭan thei a ni. Chûng thu bulte chuan Pathian Jehova tilâwm tûr zâwnga thu tlûkna siam tûrin a ṭanpui thei che a. (Sâm 119:9 chhiar rawh.) Chutiang kawnga ngaihtuah thiam dân i zir chuan Kristian unaupa mi puitling ni tûra rahbi pawimawh tak rap i ni ang. (Thuf. 2:11, 12; Heb. 5:14) Hêng dinhmun pahniha ngaihtuah thiamna i hlâwkpui theih dân hi ngaihtuah ang che: (1) unaunute i cheibâwl dânah leh (2) i lan dân chungchânga thu tlûkna i siamnaah te.

6. Engtin nge ngaihtuah thiamna chuan ṭhalai unaupate chu unaunute chunga zahna lantîr tûra a ṭanpui?

⁶ Ngaihtuah thiamna chuan hmeichhiate chunga zahna lantîr tûrin a ṭanpui ang che. Ṭhalai unaupa pakhatin Kristian unaunu chu hriat chian lehzual a duh avânga a ngaihven chu thil pângngai tak niin, thil âwm tak a ni a. Mahse, ngaihtuah thiamna nei ṭhalai unaupa chuan nupui atâna a duh loh unaunu chu kawppui tûr atâna duh nia ngaih theih tûrin a biain emaw, lehkha thawnin emaw, a nih loh leh thil dang tihna hmangin emaw ngaihvenna a lantîr lo vang. (1 Tim. 5:1, 2) Unaunu  pakhat chu kawppui atâna a duh avânga a lên chhuahpui a nih chuan, a hming chhiatna tûr humhim nân ṭhian dang pakhat hruai tel lovin a fâla hmuh a tum lo vang.—1 Kor. 6:18.

7. Engtin nge ngaihtuah thiamna chuan ṭhalai unaupate chu thuamhnaw hâk dânah leh inchei dân kawnga thu tlûkna an siam hunah a ṭanpui?

⁷ Ṭhalai unaupain ngaihtuah thiamna a lantîr theih dân kawng dang leh chu a thawmhnaw hâk dânah leh a inchei dân kawngah a ni a. Incheina chhuak thar a tam zâwk chu Jehova chunga zahna nei lotute leh nungchang bawlhhlawh taka nungtute chawilâr leh tihchhuah a ni. Nungchang bawlhhlawhna lam an ngaihtuahna chuan an thawmhnaw hâkte chu tâwt lutuk, a nih loh leh mipate pawh hmeichhia angin a lantîr a. Kristian puitlinna lam pan ṭhalai unaupa chuan thawmhnaw hâk tûr a thlan hunah kohhranah entawn tûr ṭha siamin Bible thu bulte a inkaihhruaitîr ngei ang. Heti hian a inzâwt thei a ni: ‘Ka duh thlanna hian rilru dik tak ka puin, mi dangte chungah zahna ka lantîr tih a târ lang em? Ka inthuam dân hian mi dangte chu Pathian rawngbâwl ka ni tih awlsam takin a hriattîr em?’ tiin. (1 Kor. 10:31-33; Tit. 2:6) Ngaihtuah thiamna nei ṭhalai unaupate chu an unaute chauh ni lovin, an Pa vâna mi pawhin a ngaihlu a ni.

8. Engtin nge ṭhalai unaupa chuan rinchhan tlâk ni tûra a zir theih?

⁸ Rinchhan tlâk ni rawh. Ṭhalai rinchhan tlâk tak chuan a mawhphurhna zawng zawng chu taima takin a thawk a. (Lk. 16:10) Isua entawn tûr siam ṭha famkim hi ngaihtuah ang che. Ani chuan a mawhphurhnate chu hlen lo leh, ngaihsak lovin a awm ngai lo va. Chu aiin, Jehova pêk a mawhphurhnate chu a harsat hunah pawh a hlen chhuak a ni. Ani chuan mite—a bîk takin a zirtîrte—a hmangaih a, an tân a nun pêk a inhuam a ni. (Joh. 13:1) Isua entawnin, mawhphurhna i dawn eng pawh chu hlen tûrin theih tâwp chhuah ang che. Tih dân tûr i hre chiang lo a nih chuan inngaitlâwm takin, unaupa puitling takte hnênah ṭanpuina dîl rawh. Ngai pawimawh lo angin thawk satliah mai suh. (Rom 12:11) Chu aiin, i mawhphurhna chu “mihring tân anga ti lovin, Lalpa tân anga” tiin hlen ang che. (Kol. 3:23) Mahse, ṭha famkim i nih loh avângin thil tihsual i neih hun apiangin inngaitlâwm takin pawm ang che.—Thuf. 11:2.

9. Engvângin nge ṭhalai unaupa chuan thiamna ṭangkai takte a neih chhoh theih?

⁹ Kristian mipa puitling tak ni tûr chuan thiamna ṭangkai tak i neih a ngai a. Chûng thiamnate chuan kohhrana mawhphurhnate la thei tûrin a ṭanpui ang che a, mahni leh i chhûngkaw mamawh phuhhrûknaah a ṭanpui theih che bâkah, mi dangte nên inlaichînna ṭha a neihtîr thei che a ni. Chûng thiamna ṭangkai takte zînga ṭhenkhat chu i lo ngaihtuah ang u.   

10-11. Engtin nge ṭhalai unaupa chuan ziak leh chhiar thiam tûra a zirna chu amah leh kohhranin a hlâwkpui? (Sâm 1:1-3) (Milem en bawk rawh.)

¹⁰ Ziak leh chhiar thiam zir rawh. Bible chuan  mi hlim thei tak leh mi hlawhtling tak chuan nî tin Pathian Thu chhiarin, a thu chhiarte chu a chhût ngun ṭhîn tih a sawi a. (Sâm 1:1-3 chhiar rawh.) Nî tina Bible chhiarna chuan ani chu Pathian Jehova ngaihtuah dân kawngte a hriattîrin, chu chuan chiang taka ngaihtuah dân leh Bible thute nunpui dân hre tûrin a ṭanpui a ni. (Thuf. 1:3, 4) Chutiang unaupate chu kohhranah mamawh an ni. Engvângin nge?

¹¹ Kan unaute chuan Bible aṭanga zirtîrna leh thurâwnte pe thei unaupa puitling takte an mamawh a. (Tit. 1:9) Ṭha taka ziak leh chhiar thiam i nih chuan, mi dangte rinna tichak thei chhânnate leh thusawite bâkah, thusawi bengvârthlâk takte pe tûrin i inbuatsaih thei dâwn a ni. Inzirna i neih hunah te, kohhran inkhâwmah te leh, inkhâwmpuia thusawi i ngaihthlâk hunahte pawh ṭha taka ziakin i chhinchhiah thei bawk ang. Chutianga chhinchhiahna chuan i rinna tinghet tûr leh mi dangte fuih tûrin a ṭanpui thei ang che.

12. Engin nge inbiak pawhna ṭha nei tûra ṭanpui ang che?

¹² Mi dangte nên ṭha taka inbiak pawh dân zir rawh. Kristian unaupate chuan inbiak pawhna ṭha nei tûra an zir a ngai a. Inbiak pawhna ṭha neitu chuan mi dangte rilru vei zâwngte leh ngaihtuahna sawi chhuahte chu ṭha taka ngaihthlâksakin, a hriatthiampui a. (Thuf. 20:5) Ani chuan an aw phawi te, mit mei te leh an taksa chêtziate chu a man thiam a ni. Chutianga man thiam tûr chuan mi dangte chu i kawma an tân hun i pêk a ngai a. Mi dangte nên email leh SMS inthawnna ang chi electronic hmanruate chauh hmanga inbiak pawhna i nei ṭhîn a nih chuan, anmahni nêna hmai chhana inbiak pawhna neih chu i tân a harsa thei a ni. Chuvângin, mi dangte nên hmai chhana inbiak pawhna hun remchâng zawng ang che.—2 Joh. 12.

13. Eng thil dang nge ṭhalai unaupa chuan a zir ang? (1 Timothea 5:8) (Milem en bawk rawh.)

¹³ Mahni kea din tum rawh. Kristian mi puitling unaupa chu mahni leh a chhûngte mamawh phuhru thei a ni tûr a ni a. (1 Timothea 5:8 chhiar rawh.) Ram ṭhenkhatah chuan ṭhalai unaupate chuan an pate, a nih loh leh an laichîn hnaite hnên aṭangin thiamnate an zir a. Ram dangah chuan ṭhalai mipate chuan, high school an zir laiin eizawnna atân thiamna ṭhenkhatte an zir a ni. A enga pawh chu ni se, eizawnna hna hmu thei tûra thiamna eng pawh zir chu thil ṭha tak a ni a. (Tirh. 18:2, 3; 20:34; Eph. 4:28) Mi taima tak leh hna i ṭan tawh chu a tâwp thlenga hlen chhuaktu nia hming ṭha neih chu tum ang che. Chutiang mi i nih chuan, i tân hna hmuh leh hna nghet  neih a awlsam ngei ang. Kan sawiho tâk miziate leh thiamnate chu Kristian unaupate’n an la dawn tûr mawhphurhnate an hlen theih nâna pawimawh tak a ni. Chûng mawhphurhna ṭhenkhat chu i lo ngaihtuahho vang u.

14. Engtin nge ṭhalai unaupa chu hunbi kima rawngbâwl tûra a inbuatsaih theih?

¹⁴ Hunbi kima rawngbâwltu. Kristian mi puitling tam tak chu ṭhalai an nih aṭangin hunbi kimin rawng an bâwl ṭan a. Pioneer nia rawngbâwlna chuan mi chi hrang hrangte nêna ṭha taka hnathawh dân thiam tûra a ṭanpui bâkah, fing taka sum hman dân thiam tûrin a ṭanpui bawk a ni. (Phil. 4:11-13) Auxiliary pioneer nia rawngbâwlna chu hunbi kima rawngbâwl tûra bul ṭanna ṭha tak a ni a. Chu chuan mi tam tak chu regular pioneer thawk tûrin a ṭanpui a. Pioneer nia rawngbâwlna chuan in sakna leh Bethel-a rawngbâwlna ang chi hunbi kima rawngbâwlna chi hrang hranga thawk thei tûrin kawng a hawng a ni.

15-16. Engtin nge ṭhalai unaupa chu kohhran rawngbâwltu, a nih loh leh kohhran upa ni tûra a tlin theih?

¹⁵ Kohhran rawngbâwltu, a nih loh leh kohhran upa. Kristian unaupate chuan kohhran upa anga an unaute tâna rawngbâwl tûrin tlin an tum tûr a ni a. Bible chuan chutiang mawhphurhna atâna inpete chu ‘hnathawh ṭha duhtute’ tiin a sawi a ni. (1 Tim. 3:1) Kohhran upa nia rawng a bâwl hmain, unaupa chu kohhran rawngbâwltu ni tûra a tlin a ngai a. Kohhran rawngbâwltute chuan kohhran upate chu kawng tam takin an ṭanpui a ni. Kohhran upate leh kohhran rawngbâwltute chuan inngaitlâwm takin an unaute rawng an bâwlsakin, rawngbâwlnaah ṭhahnem an ngai hle a. Ṭhalai unaupate chu tleirâwl an nih lai aṭangin kohhran rawngbâwltu ni tûrin an tling thei a. Kum 20 vêla upa kohhran rawngbâwltu unaupa tling tak chu kohhran upa nia ruat theih a ni.

¹⁶ Engtin nge chûng chanvote chelh tûra i tlin theih? Bible chuan i neih ngai miziate a târ lang a. Chûng i neih ngai miziate chu Bible, Jehova, i chhûngte leh, kohhran i hmangaihnaah a innghat a ni. (1 Tim. 3:1-13; Tit. 1:6-9; 1 Pet. 5:2, 3) Chûng mize tinte chu hriatthiam tum la. Chûng miziate nei thei tûra ṭanpui tûr chein Jehova hnênah dîl ang che. c

17. Engtin nge ṭhalai unaupa chu pasal leh chhûngkaw lû ni tûra a inbuatsaih theih? (Milem en bawk rawh.)

¹⁷ Pasal leh chhûngkaw lû. Isua sawi angin, Kristian mi puitling ṭhenkhat chuan nupui nei lova awm an thlang a. (Mt. 19:12) Mahse, nupui  neih i thlang a nih chuan, pasal nihna chanvo leh chhûngkaw lû nihna chanvo i neih belh ang. (1 Kor. 11:3) Jehova chuan pasal chu a nupui hmangaih a, a tisa lam, rilru lam leh thlarau lam mamawhte ngaihsak tûrin a phût a ni. (Eph. 5:28, 29) Ngaihtuah thiamna, hmeichhiate zahna leh, rinchhan tlâk nihna ang chi, he thuziaka kan sawiho tâk miziate leh thiamnate chuan pasal ṭha tak ni tûrin a ṭanpui ang che. Pasal leh chhûngkaw lû i nih anga i mawhphurhnate chu ṭha taka hlen thei tûrin i inbuatsaih thei a ni.

18. Engtin nge ṭhalai unaupa chu pa ni tûra a inbuatsaih theih?

¹⁸ Pa. Nupui i neih hnu chuan fate in nei thei a. Jehova hnên aṭangin pa ṭha tak nih dân chungchâng eng nge i zir theih? Zir tûr tam tak a awm a ni. (Eph. 6:4) Ani chuan a Fapa Isua chu a hmangaih tih leh a pawm tih tlang takin a hrilh a. (Mt. 3:17) Pa i nih chuan i fate chu i hmangaih tih hrilh ṭhîn ang che. An thiltih ṭhatte avângin fak ṭhîn bawk ang che. Jehova entawntu pate chuan an fate chu Kristian mi puitling ni tûrin an ṭanpui a ni. Tûn aṭangin i chhûngkuaah leh kohhranah mi dangte chunga hmangaih taka ngaihsakna lantîrin leh anni chu i hmangaihin, i ngaihlu tih lantîr dânte zirin, chûng mawhphurhnate atân i inbuatsaih thei a. (Joh. 15:9) Chutianga inbuatsaihna chuan pasal leh pa anga nakina i dawn theih mawhphurhnate chu hlen chhuak tûrin a ṭanpui ang che. Chumi a thlen hma chuan Jehova, i chhûngkua leh, kohhran tân mi hlu tak i ni thei a ni.

19-20. Engin nge ṭhalai unaupa chu Kristian mi puitling ni tûra ṭanpui ang? (A kâwma milem en rawh.)

¹⁹ Ṭhalai unaupate u, Kristian mi puitling in ni nghâl mai dâwn lo va. Entawn tûr ṭha in thlan a ngai a, ngaihtuah thiamna in neiha rinchhan tlâk in nih a ngaih bâkah, thiamna ṭangkai tak zir a, nakina in la dawn tûr mawhphurhnate atân in inbuatsaih a ngai a ni.

²⁰ Chûng chanvote hlen thei tûra i tih ngaite i ngaihtuah hian huphurh châng i nei thei a. Mahse, i hlawhtling thei a ni. Jehova’n ṭanpui a duh che tih hre reng rawh. (Is. 41:10, 13) Chu bâkah, kohhrana i unaute pawhin an ṭanpui ang che. Kristian mi puitling i nih hunah chuan i nun chu a hlimawmin, a lungâwithlâk hle ang. Ṭhalai unaupate u, kan hmangaih tak zet a che u! Tûn aṭanga Kristian mi puitling ni tûra theih tâwp in chhuahnaah Jehova’n nasa takin malsâwm che u rawh se.—Thuf. 22:4.