1. Engvângin nge Abrahama chuan fapa neih chu a beisei zawm zêl?

 JEHOVA chuan a ṭhian Abrahama hnênah a thlah aṭangin leia hnam zawng zawngte malsâwm an ni ang tih a tiam a. (Gen. 15:5; 22:18) Abrahama chuan Pathian chunga rinna nghet tak a neih avângin a thutiam chu a lo thleng famkim ngei ang tih a ring tlat a ni. Mahse, kum 100 a nih a, a nupui kum 90 a nih thleng pawhin, chu nupa tuak rinawm tak chuan fa an la nei lo va. (Gen. 21:1-7) Chuti chung chuan, Bible-in: “[Abrahama] chuan beisei takin a ring a, chi tam takte pa a lo nih theih nân,” tiin a sawi a ni. (Rom 4:18) Kan hriat angin, Abrahama beisei ang ngei chuan a thleng a. Hun rei tak chhûng a lo beisei tawh angin a fapa Isaaka pa a lo ni ta a ni. Engvângin nge ani chuan Pathian thutiam chu a rin ngheh tlat?

2. Engvângin nge Abraham chuan Jehova thutiam chu a thleng ngei ang tih a rin ngheh tlat?

² Jehova nên inlaichînna nghet tak a neih avângin, Abrahama chuan “[Pathianin] a thutiam chu a hlawhtlintîr thei tih a âwih hle” a. (Rom 4:21) Ani chuan Jehova pawm a hlawh a, a rinna avânga mi fela ruat a ni. (Jak. 2:23) Rom 4:18-in a sawi angin, Abrahama rinna leh beiseina chu a inkûngkaih tlat a. Tûnah, Rom bung 5-naa tirhkoh Paula’n beiseina chungchâng a sawite chu i lo ngaihtuahho vang u.

3. Paula’n beiseina chungchângah eng nge a sawi?

³ Paula’n kan “beiseina chuan min tibeidawng lo” tih kan chian theih chhan a sawi a. (Rom 5:5) Kan Kristian beiseina kan tihngheh chhoh theih dân hre tûrin min ṭanpui bawk a ni.  Rom 5:1-5-a Paula târ lan thute kan bih chian rualin i mi mal thiltawnte ngaihtuah ang che. Chutianga i tih chuan, i Kristian beiseina chu tûn hma zawng aiin a nghet lehzual tih i hre ngei ang. Kan sawihona aṭangin i beiseina chu tûn aia i tihngheh lehzual theih dân i hre bawk ang. Paula sawi beidawnna min thlen lotu tûr beiseina ropui tak chungchâng chu i lo ngaihtuah hmasa ang u.

4. Rom 5:1, 2-ah eng chungchâng nge târ lan a nih?

⁴ Rom 5:1, 2 chhiar rawh. Paula’n hêng thute hi Rom khuaa kohhran hnênah a ziak a. Chuta unaute chuan Jehova leh Isua chungchâng an hre tawh a, rinna lantîrin Kristian an ni tawh a ni. Chuvângin, Pathianin anni chu ‘rinna avângin thiam changah’ a ruat a, thlarau thianghlim hmangin hriak a thih a. Anni chuan beiseina rin tlâk tak leh ropui tak an nei a ni.

5. Hriak thihte chuan eng beiseina nge an neih?

⁵ A hnuah, Paula’n Ephesi khuaa hriak thih Kristiante hnênah Pathian pêk an beiseina chungchâng a sawi a. Chu beiseinaah chuan ‘mi thianghlimho ro luah tûr’ a tel a ni. (Eph. 1:18) Paula chuan Kolossa khuaa mite hnênah an lâwmman dawnna tûr hmun a hrilh a. Chumi chungchângah: “Vânah in tân beiseina an dahsak che u,” tiin a sawi a ni. (Kol. 1:3-5) Hriak thih Kristiante beiseina chu Krista nêna an rorêlna tûr hmun, vâna chatuana nung tûra thawhleh hi a ni.—1 Thes. 4:13-17; Thup. 20:6.

6. Hriak thih unaupa pakhat chuan a beiseina chungchângah eng nge a sawi?

⁶ Hriak thih Kristiante chuan chu beiseina chu an ngaihlu tak zet a. Hriak thih unaupa Frederick Franz-a chuan thinlung takin: “Kan beiseina chu a chiang ngei a, chu chu kan ngaihtuah phâk bâkin, pâwl tlêm tê mi 1,44,000-te chungah a thleng famkim ṭheuh dâwn tih kan chiang a ni,” tiin a sawi. Kum sâwmbi têl rinawm taka Pathian rawng a bâwl hnu, kum 1991-ah unau Franz-a chuan heti  hian a sawi a ni: “Kan beiseina chu kan la ngaihlu reng a. . . . Kan nghah chhûng a rei poh leh kan ngaihlu tial tial a. Kum maktaduai khat pawh nghah ngai dâwn mah se, chu chu nghah manhla tak a ni a. Tûn hma zawng aiin kan beiseina chu ka ngaihlu lehzual a ni,” tiin.

7-8. Jehova rawngbâwltu a tam zâwk chuan eng beiseina nge an neih? (Rom 8:20, 21)

⁷ Tûn laia Jehova betu a tam zâwk chuan beisei tûr dang an nei a. Chu chu Abrahama beisei—Pathian Ram awpna hnuaia leia chatuana nun—hi a ni. (Heb. 11:8-10, 13) Paula chuan chu beiseina ropui tak nghâktute dawn tûr malsâwmna chungchâng chu a ziak a. (Rom 8:20, 21 chhiar rawh.) Nakin hun chungchânga Bible thutiam i hriat tirh khân, chumi chungchângah eng nge i duh ber? Engtik nîah emaw chuan sualna nei lo mi ṭha famkim i ni ang tih thutiam hi a ni em? Nge ni a, i hmangaih thi tawhte lei paradis-ah an lo nung leh ang tih beiseina hian a tiphûr hle zâwk che? Chu chuan “beiseina neiin” nghahhlelh tûr tam tak a pe che a ni.

⁸ Kan beisei chu vâna chatuana nun emaw, leia chatuana nun emaw pawh ni se, chu beiseina ropui tak chuan lâwmna tûr chhan min pe a ni. Lâwmna min neihtîrtu kan beiseina chu kan tinghet lehzual thei a. Chutianga kan tihngheh theih dân chu Paula’n a ziak a ni. Kan beiseina chungchânga a thuziahte chu i lo ngaihtuahho vang u. Chutianga tihna chuan kan beiseina chu tinghet lehzualin, a lo thleng ngei ang tih rinnghehna min neihtîr ang.

9-10. Paula thiltawnin a târ lan angin, Kristiante’n eng nge an beisei theih? (Rom 5:3) (Milem en bawk rawh.)

⁹ Rom 5:3 chhiar rawh. Hrehawmna chuan beiseina a tinghet lehzual thei tih chhinchhiah ang che. Chu chu kan tân thilmak a ni mai thei. Dik tak chuan, Krista hnungzuitu zawng zawng chuan hrehawm tawrh kan beisei thei a. Paula chungchâng hi han ngaihtuah teh. Ani chuan Thessalonika khuaa mite hnênah: “In hnêna kan awm lai khân hrehawm tuar tûr kan ni tih kan hrilh lâwk ngei che  u kha; chutiang ngei chuan a thleng tawh,” tiin a sawi a. (1 Thes. 3:4) Chu bâkah, Korinth khuaa mite hnênah pawh: “Unaute u, . . . kan chunga hrehawm thleng thu kha in hriat loh kan duh lo va, . . . nun rêng pawh beisei lo khawp hiala delh beha kan awm kha,” tiin a ziak a ni.—2 Kor. 1:8; 11:23-27.

¹⁰ Tûn laia Kristiante pawhin hrehawm tawrh kan beisei thei a. (2 Tim. 3:12) Nang engtin nge i nih ve? Isua i rin a, a hnung i zui avângin hrehawm i tuar tawh em? I ṭhiante leh chhûngkhat lainate’n an nuihsawh mai thei che a. Râwng takin an cheibâwl hial che pawh a ni thei. Kawng engkimah dik taka thiltih i tum tlat avângin i hnathawhnaah buaina i tâwk tawh em? (Heb. 13:18) I beiseina chungchâng mi dangte i hrilh avângin sawrkâr thuneitute dodâlna i hmachhawn tawh em? Kan hrehawm tawrh chu eng pawh ni se, Paula chuan kan lâwm tûr a ni tih a sawi a ni. Engvângin nge?

11. Engvângin nge fiahna eng pawh kan tawh chu chhel taka tawrh kan tum tlat ang?

¹¹ Hrehawm tawrhnain mize pawimawh tak min neihtîr theih avângin lâwmna kan nei thei a. Rom 5:3-na chuan, “Hrehawmna chuan chhelna a siam,” tiin a sawi a ni. Kristian zawng zawngin hrehawmna kan hmachhawn dâwn avângin chhelna kan neih ṭheuh a ngai a. Fiahna eng ang pawh tâwk mah ila, chhel taka tawrh kan tum tlat a ngai a ni. Chutianga kan tih chauhvin kan beisei thlen famkimna chu kan hmu ang. Isua’n pialtlêp lei pan hmuna tla thlai chite nêna a tehkhin mite ang nih chu kan duh lo va. Anni chuan a tîrah thu chu lâwm takin pawm mah se, “hrehawmna emaw, tihduhdahna emaw a lo awm veleh” an tlu lehnghâl mai ṭhîn a ni. (Mt. 13:5, 6, 20, 21) Dodâlna emaw, hrehawmna emaw tawrh chu thil awlsam a ni lo ngei mai; mahse, chûngte chhel taka tawrh chhuahna chuan hlâwkna tam tak min thlen a ni. Eng kawngin nge?

12. Engtin nge fiahnate chhel taka tawrh chu kan hlâwkpui?

¹² Zirtîr Jakoba chuan fiahnate chhel taka tawrh chhuahnain a thlen hlâwknate chu a târ lang a. “Eng mah tlachham lova in famkim a, in puma in him theih nân chhelna chuan thawk famkim rawh se,” tiin a ziak a ni. (Jak. 1:2-4) Ani chuan chhelna chu thawh tûr hna nei angin a sawi a. Chhelnain a hlen chhuah tûr hna chu eng nge ni? Dawhtheihna, rinna leh, Pathian rinchhanna ang chi miziate nei lehzual tûrin a ṭanpui thei che a. Chu bâkah, chhelna chu kawng dang pawhin kan hlâwkpui thei bawk a ni.

13-14. Chhelnain eng nge a rah chhuah a, chu chu engtin nge beiseina nên a inkûngkaih? (Rom 5:4)

¹³ Rom 5:4 chhiar rawh. Paula chuan chhelnain “hriatfiahna” [a nih loh leh, “dinhmun pawm tlâk,” NWT] a siam tih a sawi a. I chhelna chuan Jehova pawm a hlawhtîr che a ni. Chu chu fiahna emaw, buaina emaw i tawh hian Jehova a lâwm tihna a ni lo va. Pathian pawm hlawhtu chu nangmah i ni. I chhelna avânga Pathian pawm hlawh i ni a. Chu chu malsâwmna a va ni êm!—Sâm 5:12.

¹⁴ Abrahama chuan fiahnate chhel taka tuar chhuakin Pathian pawm a hlawh tih hre reng ang che. Jehova chuan ani chu a ṭhian anga thlîrin mi felah a ruat a ni. (Gen. 15:6; Rom 4:13, 22) Chutiang chuan keini pawh Pathianin min thlîr ve thei a. Pathian pawm hlawhna chu a rawngbâwlnaa kan thawh tam dânah leh chanvo hlu kan dawnahte a innghat lo va. Rinawm taka kan chhelnaah a innghat zâwk a ni. Kan kumte, kan dinhmunte leh, kan thiamnate chu eng pawh ni se, kan vai hian chhelna kan nei thei a. Fiahna tâwk mêk chungin  Jehova chungah i rinawm tlat em? Chutiang a nih chuan, Pathian pawm i hlawh tih hria ang che. Pathian pawm kan hlawh tih hriatna chuan kan chungah nghawng ṭha tak a nei thei a. Chu chuan kan beiseina chu a tinghet lehzual thei a ni.

15. Rom 5:4, 5-ah Paula’n eng nge a sawi a, engvângin nge chu chu mi ṭhenkhat tân hriatthiam a harsat mai theih?

¹⁵ Paula sawi angin, fiahnate chhel taka kan tawrh chhuah hian Jehova pawm kan hlawh a. “Hriatfiahna chuan beiseina a siam . . . a; . . . beiseina chuan a timualpho [“tibeidawng,” NWT] lo va,” tia a sawi zawm dân hi lo chhinchhiah ang che. (Rom 5:4, 5) Chu chu mi ṭhenkhat tân hriatthiam a harsa thei a ni. Engvângin nge? Paula’n Rom khuaa Kristiante’n an neih tawh beiseina chungchâng chu, “Pathian ropuina beiseiin,” tiin Rom 5:2-ah a lo sawi tawh a. Chuvângin, tu emaw chuan, ‘Kristiante’n beiseina an neih tawh chuan, engvângin nge a thusawi zawmah Paula’n beiseina chungchâng a sawi nawn leh?’ tiin a zâwt mai thei.

16. Engtin nge beiseina chu a ngheh chhoh zêl theih? (Milem en bawk rawh.)

¹⁶ Beiseina chu tihngheh zual zêl theih a ni tih rilrua kan vawn tlat hian Paula sawi tum chu kan hre thiam thei a. Entîr nân, Pathian Thu aṭanga beiseina ropui tak i hriat hmasak ber lai kha i la hre thei em? Chutih lai chuan, lei paradis-a chatuana nun chu duhthusâm mai niin i ngai thei a. Mahse, Jehova leh Bible-a thutiamte chungchâng i hriat tam telh telh hnu chuan, chu beiseina chu a tak a ni tih i ring nghet lehzual a ni.

17. Engtin nge inpumpêka baptisma i chan hnuah i beiseina chu a ngheh zual zêl theih?

¹⁷ Inpumpêka baptisma i chan hnuah pawh i zir belh a, thlarau lama i puitlin chhoh zêl rualin i beiseina pawh a nghet zual zêl a. (Heb. 5:13–6:1) Rom 5:2-4-a sawite hi i tawng tawh ngei ang. Hrehawm tam tak chhel taka tuar chhuakin Pathian pawm hlawh niin i inhria a.  Pathian lawm hlawh i ni tih i hriat avângin, a thutiamte chu i dawng ngei ang tih beiseina tûr chhan ṭha lehzual i nei a ni. I beiseina chu tûn hma zawng aiin a nghet lehzualin, i tân a tak lehzual a. I chungah nghawng a nei lehzualin i nun kawngte chu a thunun a; i chhûngkua i cheibâwl dân te, thu tlûkna i siam dânte leh, hun i hman dânte chu a thlâk danglam a ni.

18. Jehova’n eng nge pêk min tiam?

¹⁸ Tirhkoh Paula chuan Pathian pawm i hlawh hnua i neih beiseina chungchângah thu pawimawh tak a sawi belh a. Ani chuan i beiseina chu a lo thleng ngei ang tih a hriat chiantîr che a ni. Engvângin nge chu chu i chian theih? Paula chuan Kristiante hnênah Pathian hnên aṭanga chu thutiam chungchângah: “Chu beiseina chuan min tibeidawng lo va. Thlarau thianghlim min pêk hmangin kan thinlungah hian Pathian chuan a hmangaihna chu a rawn leih ta si a,” tiin a sawi a. (Rom 5:5, C.L. Re-edited) Nang pawhin chu beiseina—i beiseina—chu a lo thleng ngei ang tih rin nghehna tûr chhan tam tak i nei a ni.

19. Kan beiseina chungchângah eng nge kan chian theih?

¹⁹ Abrahama hnêna Jehova thutiam leh Pathian pawm a hlawha A ṭhiana chhiar a nih dân chu ngaituah ang che. Abrahama beiseina chu a thlâwn lo va. Bible chuan: “Chhel taka a tuar chhuah hnuin thil tiam chu a hmu ta ngei a,” tiin a sawi a ni. (Heb. 6:15; 11:9, 18; Rom 4:20-22) Ani chu tihbeidawnin a awm lo. Keini pawh kan rinawm reng chuan kan beiseina lâwmman chu kan dawng ngei ang tih kan chiang thei a ni. Kan beiseina chu a tak a; beidawnna thlentu ni lovin, lâwmna thlentu a ni zâwk! (Rom 12:12) Paula chuan: “Thlarau thianghlim thiltihtheihna zârah beiseina in ngah theihna tûrin, beiseina Pathian chuan in rin avângin, lâwmna leh remna tinrêngin tikhat che u rawh se,” tiin a ziak a ni.—Rom 15:13.