Tûn kum chhuak Vênnainsâng thuziakte chu ngun takin i chhiar tawh em? A hnuaia zawhnate hi i chhân theih leh theih loh hriat i tum dâwn nia:

‘Rilru a thara awmtîrnaah’ chuan eng nge tel? (Rom 12:2)

Chutah chuan thil ṭha tih mai aia tam a tel a. Chhûng lama kan nihnate bih chian a, Pathian tehna nêna inmila inthlâk danglamna a tel a ni.—w23.01, p. 8-9.

Khawvêla thilthlengte kan ngaihven hunah engtin nge inbûk tâwkna kan lantîr theih?

Tûn laia thilthlengte’n Bible hrilh lâwkna a thlen famkimtîr dân hriat chu kan duh a. Chutih rualin, kan inpumkhatna tichhe thei mi mal ngaih dânte ṭanchhan lovin, Jehova inawpna pâwlin a tihchhuah thu leh hlate ṭanchhanin kan sawiho zâwk tûr a ni. (1 Kor. 1:10)—w23.02, p. 16.

Isua baptisma chan leh a hnungzuitute baptisma chan chu engtin nge a inan loh?

Isua chu Pathian hnêna inpumpêk tawh hnama piang a nih angin, keimahni anga Jehova hnêna a inpumpêk a ngai ve lo va. Ani chu sual nei lo, mi ṭha famkim a nih avângin sual sim tûr a nei lo.—w23.03, p. 5.

Engtin nge inkhâwma chhânna pe tûra mi dangte kan ṭanpui theih?

Chhânna tawi tê pein mi dangte tân chhânna hun remchâng kan siam thei a. Thu pawimawh lai tam tak sawi kan pumpelh thei bawk a. Chutianga kan tih chuan mi dangte tân chhân tûr a la awm thei ang.—w23.04, p. 23.

Isaia 35:8-a târ lan “Thianghlimna Kawng” chuan eng nge a entîr?

A tîr chuan, chu entîr nei kawngpui chuan Judate’n Babulon aṭanga an rama an hawna kawng chu a kâwk a. Tûn laiah eng awmzia nge a neih? Kum 1919 thlen hma kum zabi tam tak chhûngin, chu inbuatsaihna hna chu Bible lehlina chhutchhuahna ang chi thil dangte ruala thawh zawh a ni a. Pathian mite chuan Lalram malsâwmna thlentu thlarau lam paradise lam panin “Thianghlimna Kawng” chu an zawh a ni.—w23.05, p. 15-19.

Thufingte bung 9 chuan eng entîr nei hmeichhe pahnih chungchângah nge thurâwn min pêk?

Thufingte bu chuan a mi sâwmte ‘Seola’ hruaitu “hmeichhe â” leh a mi sâwmte ‘hriatna kawnga’ hruaitu hmeichhia nêna tehkhin “finna” chungchâng a sawi a ni. (Thuf. 9:1, 6, 13, 18)—w23.06, p. 22-24.

Engtin nge Pathian inngaihtlâwmna leh a âwm tâk hriatna chu Lota a dâwr dânah a lan?

Jehova’n Lota chu Sodom khua aṭanga tlânga tlânchhe tûrin a hrilh a. Mahse, Lota’n Zoar khuaa tlânchhiat a dîl chuan, a phalsak a ni.—w23.07, p. 21.

A pasalin saruak lem leh thuziak a en ṭhîn a nih chuan nupuiin eng nge a tih theih?

A inmawhchhiat tûr a ni lo tih a hre reng tûr a ni a. Pathian nêna a inlaichînna chu ngaihven tlatin, Pathian hnên aṭanga thlamuanna hmutu Bible-a chhinchhiah hmeichhe mangang takte chanchin chu a chhût ngun thei a ni. Dinhmun hlauhawmte pumpelh tûrin a pasal chu a ṭanpui thei bawk.—w23.08, p. 14-17.

Kan rinna chungchâng min zawh hunah, engtin nge hriatthiamnain thuhnuairawlh taka chhâng lêt tûra min ṭanpui theih?

An zawhna chu an rilrua awmte leh an ngaihven zâwngte hriat theihna hun remchâng angin kan thlîr thei a. Chutiang chuan thuhnuairawlh taka chhâng lêt thei tûrin kan inpeih ang.—w23.09, p. 17.

Chakna neih dân chungchângah Mari hnên aṭangin eng nge kan zir theih?

Messia nu a ni dâwn tih a hriat hnuah Mari chuan mi dangte hnên aṭangin chakna a hmu a. Gabriela and Elizabeti te chuan Pathian Lehkha Thu hmangin ani chu an fuih a. Chutiang bawkin, keini pawhin kan Kristian unaute hnên aṭangin chakna kan hmu thei a ni.—w23.10, p. 15.

Engtin nge Jehova’n kan ṭawngṭaina a chhân?

Ani chuan kan ṭawngṭaina ngaihthlâksak leh a thiltum nêna a inkûngkaih dân ngaihtuahsak min tiam a. (Jer. 29:12) Ṭawngṭaina thuhmun chu kawng inang lovin a chhâng thei a; mahse, ani chu min ṭanpui tûrin a inpeih reng a ni.—w23.11, p. 21-22.

Rom 5:2 chuan ‘beiseina’ chungchâng a sawi a, engvângin nge châng 4-ah chumi chungchâng tho chu târ lan a nih?

Tu emaw chuan chanchin ṭha a hriatna aṭangin lei paradis-a nun beiseina a nei thei a. Mahse, harsatnate a tawh a, chhel taka a tawrh chhuah a, Pathian duhsakna a dawn hian a beiseina chu a nghet lehzualin, a tân a tak lehzual a ni.—w23.12, p. 12-13.