1. Abrahama rinna chungchâng kan ngaihtuah hian, eng zawhna nge kan zawh mai theih?

 ABRAHAMA tih hming hi tam takin hre mah se, a chanchin hretute erawh tlêm tê an ni. Mahse, Abrahama chanchin chu tam tak i hria a. Entîr nân, Abrahama chu “ringtu zawng zawng pa,” tia koh a ni. (Rom 4:11) Nang pawhin, ‘Abrahama hniak hnung zuiin a neih ang rinna ka nei ve thei em?’ tiin i ngaihtuah mai thei. Ni e, i nei thei a ni.

2. Engvângin nge Abrahama entawn tûr siam chu zir a pawimawh? (Jakoba 2:22, 23)

² Abrahama anga rinna kan neih theih dân kawng khat chu a entawn tûr siamte zir hi a ni a. Ani chu Pathian thupêk angin, ram hla takah a insawn a, kum sâwmbi têl puan inah a awm a; chu bâkah, a fapa duh tak Isaaka hlân tûr pawhin a inhuam a ni. Chûng a thiltih zawng zawngte chuan Pathian chunga rinna nghet tak a neihzia a târ lang a. Abrahama rinna leh thiltihte chuan Pathian pawm a hlawhtîrin, a ṭhian a nihtîr a ni. (Jakoba 2:22, 23 chhiar rawh.) Jehova chuan kan vai hian—nang pawh tiamin—chutiang malsâwmna chu dawng ṭheuh tûrin min duh a. Chuvângin, Abrahama entawn tûr siamte ziak tûrin Bible ziaktu Paula leh Jakoba chu thlaruava thâwk khum an ni. Tûnah, Rom bung 4-na leh Jakoba bung 2-naa thute sawihovin Abrahama entawn tûr siam chu i lo ngaihven ang u. Paula leh Jakoba hian Abrahama chungchânga thu chhinchhiah tlâk takte an târ lang ve ve a ni.

3. Paula leh Jakoba chuan eng Bible châng nge an lâk chhâwn?

 ³ Paula leh Jakoba chuan Genesis 15:6-a: “[Abrahama] chuan LALPA chu a ring a; tichuan, ani chuan chu chu a felnaah a ruatsak ta a,” tih hi an sawi chhâwng ve ve a. Pathianin amah tilâwmtute chu mi fel, a nih loh leh sawisêlbo angin a thlîr a ni. Ṭha famkim lo sual fa mihringte chu sawisêlbo anga Pathianin min thlîr thei chu a va mak tak êm! Chutianga a thlîr che chu i duh ve ngei ang a, chu chu thil ni thei a ni. Pathian Jehova’n Abrahama mi fel tia a koh chhante leh chutianga mi fel ni tûra kan tih ngaite chu i lo ngaihtuahho vang u.

4. Mihringte mi fel ni tûra dâltu chu eng nge ni?

⁴ Rom khuaa mite hnêna a lehkha thawnah, Paula chuan mi zawng zawngin thil an tisual vek tih a sawi a. (Rom 3:23) A nih leh, engtin nge mi tinte chu Pathianin mi fel, a nih loh leh sawisêlbo anga min thlîr a, a pawm kan hlawh theih? Kristian dik zawng zawngin chu zawhna chhânna an hriat theih nân, Paula chuan Abrahama entawn tûr siam chu a hmang a ni.

5. Eng ṭanchhanin nge Jehova chuan Abrahama chu mi fel nia a ruat? (Rom 4:2-4)

⁵ Jehova chuan Abrahama chu Kanaan rama a awm lai khân mi felah a ruat tawh a. Engvângin nge ani chuan Abrahama chu mi fela a ruat? Ani chuan Mosia Dân a zawm famkim vâng a ni em? Ni lo ve. (Rom 4:13) Chu Dân chu Pathianin Abrahama mi fel tia a sawi hnu kum 400 aia tam a liam hnua Israel mite hnêna a pêk a ni a. A nih leh, Pathianin eng ṭanchhanin nge Abrahama chu mi fel tia a sawi? Phû loh A ngilneihna avângin Pathian Jehova chuan Abrahama chu a rinna ṭanchhanin mi felah a ruat a ni.—Rom 4:2-4 chhiar rawh.

6. Engtin nge Jehova’n sualna nei mi tu emaw chu mi fel nia a ruat?

⁶ Paula chuan miin Pathian chunga rinna a neih hian a “rinna chu, ama felnaa ruat a ni,” tiin a sawi a. (Rom 4:5) Ani chuan: “Mi, a thiltih ngaihtuah lova Pathianin fela a ruata chu mal a sâwmsak thu Davida pawhin, ‘An bawhchhiatnate ngaihdama awm leh, an sualte khuha awm chu an eng a thâwl e. Lalpan khawlohna neia a ruat loh chu a eng a thâwl e,’ tia a sawi ang khân,” tiin a sawi belh a ni. (Rom 4:6-8; Sâm 32:1, 2) Pathian chuan amaha rinna nghattute chu an sualnaah a ngaidam a. Anni chu a ngaidam pumhlûm, a nih loh leh an sualnate a hriat sak tawh lo a ni. Mi tinte chu an rinna ṭanchhanin sualna nei lo leh mi fel angin a thlîr a ni.

7. Eng kawngin nge hmân laia Pathian betu rinawmte chu mi fel an nih?

⁷ Abrahama, Davida, leh rinawm taka Pathian betu dangte chu mi fel anga târ lan ni mah se, ṭha famkim lo sual faa piang an ni tho va. Mahse, an rinna avângin Pathianin sawisêlbo angin a thlîr a; a bîk takin, amah be lotute nêna khaikhin an nih hian a ni lehzual a ni. (Eph. 2:12) Paula chuan Rom mite hnêna a lehkha thawnah Pathian ṭhian ni tûr chuan rinna kan neih a ngai tih a sawi a. Abrahama leh Davida pawh an rinna avângin Pathian ṭhiana vuah an ni a, keini pawh Pathian ṭhian kan ni ve thei a ni.

8-9. Mi ṭhenkhatin Paula leh Jakoba thuziakte aṭangin eng thu tâwp dik lo nge an siam a, engvângin nge?

⁸ Kum zabi tam tak chhûng chu rinna leh thiltih inzawmna chungchângah Kristian ram sakhaw hruaitute inkârah inhnialna a awm a. Sakhaw hruaitu ṭhenkhat chuan chhandam ni tûr chuan Lal Isua Krista rin a tâwk tiin an zirtîr a. Nang pawhin, “Isua ring la chhandam  i ni ang,” tia an sawi chu i hre tawh mai thei. Anni chuan: “Mi, a thiltih ngaihtuah lova Pathianin fela a ruata chu,” tia Paula sawi chu an la chhâwng pawh a ni thei. (Rom 4:6) Mahse, mi dangte chuan “chhandam” i nih theih nân sakhaw biakna hmunahte kala, kohhranin ti tûra a phûtte i tih a ngai tiin an zirtîr bawk. Anni chuan Jakoba 2:24-naa: “Rinna avâng ngawt ni lovin, thiltih avâng zâwkin miin thiam a chang ṭhîn,” tih hi la chhâwngin chutianga sawi an ni thei bawk a ni.

⁹ Chutiang zirtîrnate avâng chuan, sakhaw lama mi thiam ṭhenkhat chuan rinna leh thiltih chungchânga Paula leh Jakoba ngaih dân chu a inmil lo niin thu tâwp an siam a. Sakhaw hruaitute chuan Paula’n mi chu thiltih ni lovin, rinna avânga mi fela ruat a ni tia a sawi laiin, Jakoba chuan thiltih chu Pathian pawm hlawh tûra thil pawimawh tak niin a zirtîr thu an sawi bawk. Sakhaw lama mi thiam pakhat pawhin: “Paula’n [mi fel] ni tûr chuan thiltih ni lovin rinna a pawimawh tia a sawi chhan chu Jakoba chuan a hre thiam lo,” tiin a sawi. Mahse, Paula leh Jakoba chuan Jehova thlarauva thâwk khumin an ziak ve ve a. (2 Tim. 3:16) Chuvângin, an thuziakte chu a inmil tih awlsam taka hriat theih dân a awm ngei ang. Chu chu an thuziak a chung leh a hnuaia thu awmte ngaihtuahna aṭanga hriat theih a ni.

10. Paula’n eng “thiltih” chungchâng nge a sawi uar? (Rom 3:21, 28) (Milem en bawk rawh.)

¹⁰ Paula’n Rom bung 3-na leh bung 4-naah eng “thiltihte” chungchâng nge a sawi? Ani chuan a tlângpuiin, Sinai Tlânga pêk Mosia dân, “Dân thiltih” chungchâng a sawi a. (Rom 3:21, 28 chhiar rawh.) Paula hun laia Juda Kristian ṭhenkhat chuan Mosia Dân zawm a ngai tawh lo tih chu pawm harsa an ti niin a  lang. Chuvângin, Paula chuan Pathian mithmuha mi fel nihna chu “Dân thiltih” aṭanga lo awm a ni lo tih hrilhfiah nân Abrahama entawn tûr siamte chu a hmang a. Chu chu rinna aṭanga lo awm a ni. Chu chuan Pathian nêna inlaichînna ṭha kan nei ṭheuh thei tih rin nghehna min neihtîr avângin a thlamuanthlâk hle a ni. Chu chu Pathian pawm min hlawhtîr theitu, Pathian leh Kristaa rinna kan nei chho zêl thei tihna a ni.

11. Jakoba’n eng ang “thiltih” chungchâng nge a sawi?

¹¹ Kawng leh lamah chuan, Jakoba bung 2-naa târ lan “thiltih” hi Paula târ lan “Dân thiltih” a ni lo va. Jakoba chuan an nî tin nuna Kristiante thiltihte leh hnathawhte a sawina a ni. Chutiang thiltihte chuan Kristiante chu Pathian chunga rinna an neih leh neih loh a târ lang a. Jakoba hman entîrna pahnih hi i lo ngaihtuah ang u.

12. Engtin nge Jakoba chuan rinna leh thiltih inkûngkaih dân chu a hrilhfiah? (Milem en bawk rawh.)

¹² Entîrna pakhatnaah, Jakoba chuan Kristiante chu mi dangte an cheibâwlnaah thlei bîk nei lo tûrin a hrilh a. Chumi chungchâng chu mi hausate duh sak bîk a, mi retheite hnuaichhiahtu entîrna hmangin a târ lang a ni. Jakoba chuan chutiang mi chu rinna nei niin inchhâl mah se, a thiltih chuan rinna a neih lohzia a târ lang tih a sawi. (Jak. 2:1-5, 9) Entîrna pahnihnaah chuan, Jakoba chuan ‘unaupa emaw, unaunu emaw, silh tûr nei lo leh, ei tûr tlachhama awm’ chu hmu reng si a, ṭanpui lotu tu emaw chungchâng a târ lang a ni. Chu mi chuan rinna nei niin inchhâl mah se, a thiltihin rinna a neih lohzia a târ lang a. Jakoba sawi angin, “Rinna chu thiltih nei lovin amah chauhvin a awm chuan thi a ni.”—Jak. 2:14-17.

13. Engtin nge Jakoba chuan thiltiha rinna lantîrna chungchângah entîrna a pêk? (Jakoba 2:25, 26)

 ¹³ Jakoba chuan rinna thiltiha lantîrtu Rahabi entawn tûr ṭha siam chu a târ lang a. (Jakoba 2:25, 26 chhiar rawh.) Rahabi chuan Jehova chungchâng leh Israel mite a ṭanpui dân pawh a hria a ni. (Jos. 2:9-11) Chu bâkah, dinhmun hlauhawma awm Israel enthlatu pahnihte chu humhimin, a rinna chu thiltihin a lantîr a. Chuvângin, ani chu ṭha famkim lo leh Israel mi ni lo mah se, Abrahama anga mi fela târ lan a ni a. Rahabi entawn tûr siam chuan rinna chu thiltiha lantîr a pawimawhzia a târ lang a ni.

14. Engvângin nge Paula leh Jakoba thuziakte chu inkalh lo nia kan sawi theih?

¹⁴ Bible ziaktu Paula leh Jakoba chuan rinna leh thiltih chungchâng chu thlîr dân kawng hnihin an hrilhfiah mai a ni. Paula chuan Juda Kristiante hnênah Mosia Dân zawm avâng maiin Jehova lawm an hlawh theih ngai loh tûr thu a sawi a. Jakoba erawh chuan Kristian zawng zawngte tân mi dangte chunga thil ṭha tihna hmanga an rinna lantîr a pawimawhzia a sawi uar a ni.

15. Rinna chu thiltiha kan lantîr theih dân kawng ṭhenkhat chu eng nge ni? (Milem en bawk rawh.)

¹⁵ Jehova chuan mi fel nia ruat kan duh chuan Abrahama tih ang chiah kan ti tûr a ni tiin a sawi lo. Dik tak chuan, rinna chu thiltiha lantîr theih dân kawng tam tak a awm a ni. Kohhranah mi tharte kan lâwm theiin, ṭanpui ngai unaute kan ṭanpui theih bâkah, kan chhûngte chunga ngaihsakna kan lantîr chuan Pathian kan tilâwmin, malsâwm kan ni ang. (Rom 15:7; 1 Tim. 5:4, 8; 1 Joh. 3:18) Kan rinna chu thiltiha kan lantîr theih dân kawng pawimawh tak pakhat chu ṭhahnemngai taka  mi dangte hnêna chanchin ṭha hrilh hi a ni a. (1 Tim. 4:16) Kan vai hian Jehova thutiamte chu a lo thleng ngei ang tih leh a kawngte chu a ṭha ber tih kan rinzia thiltihin kan lantîr ṭheuh thei a. Chutianga kan tih chuan Pathianin mi fel ang leh a ṭhian angin min thlîr ang tih kan chiang thei a ni.

16. Engtin nge Abrahama rinna chu beiseina nên a inkûngkaih?

¹⁶ Abrahama hnên aṭanga kan zir theih pawimawh dang leh chu Rom bung 4-naah târ lan a ni: beiseina pawimawhna chu. Jehova chuan Abrahama aṭangin “hnam tin” malsâwm an ni ang tih a tiam a. Abrahama’n beisei tûr ropui tak a neih chu han mitthla teh! (Gen. 12:3; 15:5; 17:4; Rom 4:17) Mahse, Abrahama kum 100 a nih a, Sari kum 90 a nih pawhin, thutiam fapa chu an la nei si lo va. Mihring thlîr dân aṭang chuan an tân fapa neih chu thil theih loh angin a lang a ni. Chu chu Abrahama tân chuan fiahna a ni tak zet a. “Beiseina âwm a awm loh pawhin ani chuan beisei takin a ring a, chi tam takte pa a lo nih theih nân.” (Rom 4:18, 19) A hnuah a beisei ang ngei chuan a thleng ta a ni. Hun rei tak chhûng a lo beisei tawh fapa neiin, Isaaka pa a ni ta a ni.—Rom 4:20-22.

17. Engtin nge mi fela ruat, Pathian ṭhian kan ni thei tih kan hriat?

¹⁷ Abrahama angin Pathian lawm kan hlawh thei a, Pathian ṭhian niin mi fela ruat kan ni thei a ni. Chuvângin, Paula chuan: “A rinna chu a felnaa ruat a ni tih hi amah [Abrahama] avâng chauhva ziak a ni lo va, keimahni avâng chauhva ziak a ni. Isua kan Lalpa mitthi zîng ata kaithotu chu ringtu kan ni a, kan rinna chu felnaa ruat a ni dâwn,” tia ziakin a târ lang a. (Rom 4:23, 24) Abrahama ang bawkin, rinna chu thiltiha kan lantîr a ngai a, Jehova thutiamte a lo thleng ngei ang tih kan beisei tlat a ngai bawk. Paula chuan Rom bung 5-naah, kan beiseina chungchâng a sawi zawm a, chumi chungchâng chu a dawta thuziakah kan sawiho vang.