PATHIAN thilpêk chi hrang hrang leh chûngte chên tûra zalên taka duhthlan theihna i neih chu i ngaihlu hle ngei ang a. Ngaihvenawm tak chu, Bible-in uain chu Pathian thilpêk anga sawiin: “Ruai siam a ni, hlimhlawp atân, uain chu nun tihnawm nân,” tiin a sawi hial a ni. (Thur. 10:19; Sâm 104:15) Chutih rualin, zû avânga harsatna neite i hriat ngei a rinawm. Chu bâkah, chumi chungchângah khawvêla hnam hrang hrangte chuan ngaih dân leh tehna inang lo tak tak an nei a ni. A nih chuan, Kristiante chu zu chungchângah thu tlûkna fing tak siam tûrin engin nge ṭanpui thei?

Khawi hmunah pawh awmin eng hnam pawh ni mah ila, kan ngaih dân leh thu tlûkna siamte Pathian ngaih dân inkaihhruaitîr chu kan hlâwkpuiin, chu chuan hlimna tluantling min thlen ngei ang.

Mi tam takin zû an in nasa hle ṭhîn tih i hriat ngei a rinawm a. Ṭhenkhat chuan awm hahdam nân an in ṭhîn a. Mi dangte chuan an lungkhamna chhâwktu atân an in ṭhîn a ni. Chu bâkah, hmun ṭhenkhatah chuan zu in tam thei nih chu puitlinna, a nih loh leh chakna angin an thlîr bawk.

Mahse, Kristiante chuan hmangaihna nei tak min Siamtu hnên aṭangin kaihhruaina fing tak kan dawng a. Entîr nân, a lutuka zu innain a thlen nghawng ṭha lo takte chu min hrilh a ni. Thufingte 23:29-35-in zu ruih hmangte leh zûin a thlen theih buainate chungchâng chipchiar taka a sawi chu kan chhiar tawh mai thei a. a Europe rama kohhran upa Daniel-a chuan Kristian dik a nih hmaa a nun chu ngaihtuah lêtin, “A lutuka zu ka inna chuan thu tlûkna ṭha lo takte min siamtîr a, tûn thlengin rilru natna nasa tak min pe,” tiin a sawi a ni.

Engtin nge Kristiante chuan zalên taka duh thlan theihna hmanga a lutuka zu innain a thlen buainate chu an pumpelh theih ang? A pawimawh ber chu, kan ngaih dân leh thiltihte chu Pathian thlîr dân kan kaihhruaitîr a ngai a ni.

Tûnah, Bible-in zu chungchâng a sawite leh mi ṭhenkhatin zû an in chhante chu i lo bih chiang ang u.

Pathian Thu chuan a âwm tâwka zu in chu a dem lo va. Dik tak chuan, uainin hlimna a thlen theih tih a târ lang a ni. “Lâwm takin i chaw ei la, thinlung hlimin i uain in rawh,” tiin a sawi a. (Thur. 9:7) Isua leh Jehova chhiahhlawh rinawm dangte pawhin uain chu in châng an nei a ni.—Mt. 26:27-29; Lk. 7:34; 1 Tim. 5:23.

Chutih rualin, Pathian Thu chuan zû tlêm azâwng in leh zu ruih inan lohna chu chiang takin a târ lang a. “Uain ruiin awm suh u,” tiin a sawi a ni. (Eph. 5:18) “Zu ruih hmangte . . . emawin Pathian ram an luah lo vang,” tiin a sawi hial bawk. (1 Kor. 6:10) Ni e, Jehova chuan a lutuka zu inna leh zu ruihna chu nasa takin a dem a. Mahni hnam tih dân zui mai lovin, Pathian thlîr dân anga thlîr chu kan tum tlat tûr a ni.

Mi ṭhenkhat chuan rui lovin zu tam tak in thei niin an inhria a. Mahse, chu chu thil hlauhawm tak a ni. Bible chuan ‘uain hehnain’ tute pawh Pathian Jehova nêna an inlaichînna tichhe thei thilte a tihtîr theih thu chiang takin a sawi a. (Tit. 2:3-5; Thuf. 20:1) Isua pawhin ‘zu ruihnain’ Pathian khawvêl thara lût lo tûra min dâl thei tih min hrilh bawk. (Lk. 21:34-36) A nih chuan,  zu inna nêna inkûngkaih thil ṭha lote pumpelh tûrin engin nge Kristiante chu ṭanpui thei?

Zu in chungchângah mahni seilenna hnam dân inthununtîr chu thil hlauhawm tak a ni a. Kristiante chuan ei leh in chungchângah Jehova tilâwm tûrin fing takin thil an ti a ni. Bible chuan: “In ei pawhin, in in pawhin, in tih apiangah pawh, Pathian ropuina tûr hlîrin ti rawh u,” tiin min hriat nawntîr a. (1 Kor. 10:31) Kan ngaihtuah theih zawhna ṭhenkhat leh Bible thu bulte chu:

Rual pâwl nân maia in ka ni em? Exodus 23:2 chuan: “A tam . . . lamah chuan i ṭang ve mai tûr a ni hek lo,” tiin a sawi a. Jehova chuan Israelte chu amah tilâwm lotute tih dân zir lo tûrin a vaukhân a ni. Chu chu tûn laia Kristiante tân pawh a ni a. Zu chungchânga kan ngaih dân leh thu tlûkna siamte mi dangte kan thununtîr chuan, zawi zawiin Jehova tehnate chu zâwm lovin amah nêna inlaichînna chu kan chân thei a ni.—Rom 12:2.

Ka chakzia lantîr tuma zu in ka ni em? Hnam dân ṭhenkhatah chuan zû tam taka in fo chu thil pângngai tak a ni a. (1 Pet. 4:3) Mahse, 1 Korinth 16:13-in: “Invêng ula, rinnaah chuan ding nghet ula, intihuai ula, chak takin awm rawh u,” tia min fuih hi hre reng ang che. Zû chuan mi chak tak ni tûrin min ṭanpui thei tak zet em? Thei lo. Zû chuan fîm taka ngaihtuah theihna chu tibuaiin thu tlûkna ṭha lote min siamtîr thei a ni. Chuvângin, zû tam tak taka in chu chakna a nih ahnêkin, chak lohna a ni zâwk a. Isaia 28:7 chuan zû avânga thle thlete chu an pai an pai ṭhîn tih a sawi a ni.

Chakna dik tak chu Jehova hnên aṭanga lo kal a ni a, chutah chuan ‘inring renga awm leh rinnaa nghet taka din’ a tel a ni. (Sâm 18:32) Thil hlauhawmte pumpelh tûra fîmkhurin leh Jehova nêna kan inlaichînna tichhe lo tûr zâwnga thu tlûknate siamin inring rengin kan awm thei a. Isua leia a awm lai khân chutiang chakna chu a lo lantîr tawh a, a huaisenna leh thil dik tih a tum tlatna avângin mi tam takin an zah hle a ni.

Rilru hahnate pumpelh tuma in ka ni em? Fakna hla phuahtu chu: “Ka rilrua ngaihtuah  tam tak ka neih lai chuan i [Jehova] thlamuannate chuan ka nunna hi a tihlim ṭhîn,” tia ziak tûra thâwk khum a ni a. (Sâm 94:19) Harsatnate’n a tlâk buak che a nih chuan chhâwk zângkhai tûr chein zû ni lovin, Jehova pan ang che. Chutianga tih theih dân kawng ṭha tak chu zing lehzuala ṭawngṭai hi a ni. Chu bâkah, kohhrana ṭhian puitling tak hnên aṭanga thurâwn ṭangkai tak lâk chu mi tam takin an hlâwkpui a. A nihna takah chuan, harsatnate hmachhawn huna zu inna chuan nungchang thianghlim vawng tûr leh thil dik ti tûra kan tumna chu a tichau thei a ni. (Hos. 4:11) A tîra târ lan tâk Daniel-a chuan: “Rilru hahna leh mahni inthiam lohna chuan min tibuai hle a. A tihziaawm nân zû ka in a; mahse, chu chuan harsatna tam lehzual min thlen bâkah, ka ṭhiante leh mahni inzahna ka chân phah a ni,” tiin a sawi. Engin nge Daniel-a chu ṭanpui? Ani chuan: “Ka rinchhan tûr zâwk chu zû ni lovin, Jehova a ni tih ka hre chhuak a. A tâwpah chuan, ka harsatna chu hlawhtling takin ka hmachhawn thei ta a ni,” tiin a sawi. Dik tak chuan, kan dinhmun chu beisei bo anga a lan hunah pawh Jehova chu min ṭanpui tûrin a inpeih reng a ni.—Phil. 4:6, 7; 1 Pet. 5:7.

Zu in châng i nei ṭhîn a nih chuan, hêng zawhnate hi inzâwt ang che: ‘Ka chhûngkuaa mi emaw, ka ṭhian kawmngeih takin emaw ka zu in dânah eng emaw sawi a nei tawh em?’ tiin. Chutianga sawi an neih chuan, i hriat mai theih loh chîn dân ṭha lo i nei chho mêk tihna a ni thei a ni. ‘Tûn hma aiin ka in tam sâwt em?’ Zu ngawl la vei lo tu emaw chuan chutiang dinhmunah chuan zu ngawl a vei ṭan thei a ni. ‘Ni hnih thum emaw, chu aia rei emaw zu in lovin ka awm thei em?’ I awm thei lo a nih chuan, zu in chu ngaiah i nei tawh, a nih loh leh a ngawl i vei ṭan tawh a ni thei a. Chumi do lêt thei tûr chuan doctor-te ṭanpuina i mamawh pawh a ni thei a ni.

Kristian ṭhenkhat chuan zûin a thlen theih thil hlauhawmte leh buainate chu ngaihtuahin zu lakah an inthiarfihlîm a. Mi dangte chu tui an tih loh avânga in lo an ni thei a. I ṭhian zînga tu  emawin chutianga thu tlûkna a siam a nih chuan, a thu tlûkna siam chu zahsak a, sawisêl lovin ngilneihna i lantîr thei a ni.

A nih loh leh, in tûr chin tâwk insiam chu thil finthlâk tak a ni thei a. Kristiante chuan in tûr chin tâwk insiamin kâr khatah vawi khat emaw, chaw ei huna a âwm tâwk leka in tûrin emaw bituk chin an insiam thei a. Mi dangte chuan an in tûr chîah bituk chin an insiam a, alcohol tel tam chi emaw, a chawhpawlh emaw chu in lovin beer leh uain chauh an in a ni. Zu chungchânga chiang taka bituk chin kan insiam chuan, chumi zawm chu a awlsam lehzual ang. Chuvângin, Kristian mi puitlingin eng ti zâwng pawha thu tlûkna a siam a, chutianga tih a tum tlat chuan a tân zahna tûr a awm lo.

Zu chungchânga thu tlûkna kan siam hunah mi dangte ngaih dân tûr pawh kan dâwn tel a ngai a. Rom 14:21 chuan: “I unau tlûkna tûr a nih chuan sa ei loh te, uain in loh te, thil eng pawh tih loh a ṭha a ni,” tiin a sawi a ni. Chu fuihna chu engtin nge kan nunpui theih? Unau hmangaihna lantîrin a ni. Zû i in avângin tu emaw rilru nuam lovin a awm dâwn nia i hriat chuan, hmangaihna chuan zu in lo tûrin a chêttîr che ang em? Chutianga a chêttîr che chuan, mahni ṭhatna tûr chauh zawng lovin mi dangte ngaih dân pawh i dâwn telin i zahsak tihna a ni ang.—1 Kor. 10:24.

Chu bâkah, Kristianin a zawm tûr sawrkâr dânte pawh a awm a. Chûng dânte chuan zu in tûra kum tlin ngai zât bithliahin zu in hnua motor khalh emaw, khâwl thil dang hman emaw min khap thei a ni.—Rom 13:1-5.

Jehova chuan a thilpêk tam tak chên tûrin zalênna pein min chawimawi a. Chumiah chuan ei leh in chungchânga duh thlan theihna thilpêk pawh a tel a ni. Chuvângin, kan duh thlanna siamte chuan kan Pa vâna mi tilâwmin zalênna kan neih chu kan ngaihhlutzia lantîr rawh se.