KUM 2023, January 18, Nilainî khân Unau Gage Fleegle-a leh Unau Jeffrey Winder-a te chu Jehova Thuhretute Governing Body member ni tûra ruat an nih thu chanchin thar chu jw.org-ah târ lan a ni a. An pahnih hian hun rei tak chhûng rinawm taka Jehova rawng lo bâwl tawh an ni.

Unau Fleegle-a chu Pathian ṭih mi a nu leh pate’n U.S.A., Pennsylvania khawthlang lamah an enkawl seilian a. A tleirâwl chhoh chuan an chhûngkuain thingtlâng khaw pakhat, mamawh zualna hmunah an insawn a. A hnu lawk kum 1988, November 20-ah baptisma a chang ta a ni.

Unau Fleegle-a chu a nu leh pate chuan hunbi kima rawngbâwl tûrin an fuih ṭhîn a. Bial kantute leh Bethel-a rawngbâwlte chu an inah an sâwm fo ṭhîn a; chuvângin, Unau Fleegle-a chuan chûng unaute hlimzia chu a hmu a ni. Baptisma a chan hnu aṭanga rei vak lo kum 1989, September 1 aṭangin regular pioneer a thawk ṭan a. Kum hnih hnuah chuan, kum 12 mi a nih aṭanga a thil tum—bethel-a rawngbâwl—chu a hlen thei ta a. Kum 1991, October thla aṭangin Brooklyn Bethel-ah rawng a bâwl ṭan ta a ni.

Unau Fleegle-a chuan Bethel-a Service Department-a thawk tûra ruat a nih hmain Bindery (lehkabu khâwr pumna)-ah kum riat a thawk a. Chutih chhûng chuan, Russian ṭawng hmanna kohhranah kum rei lo te chhûng rawng a bâwl a ni. Kum 2006-ah a nupui Nadia-i nên inneiin Bethel-ah rawng an bâwl dûn a. An nupa chuan Portuguese ṭawng hmanna biala an thawh bâkah, kum sâwm chuang Spanish ṭawng hmanna bialah an thawk bawk. Unau Fleegle-a chu Service Department-a rei tak a thawh hnuah, Teaching Committee Office-ah leh, chumi hnuah Service Committee Office-a thawk tûra tih a ni leh a. Kum 2022, March thla aṭang chuan Governing Body Service Committee ṭanpuitu ni tûra ruat a ni.

 Unau Winder-a chu Murrieta, California, U.S.A.-a seilian a ni a. A nu leh pate enkawlna hnuaiah thutaka seilian niin, kum 1986, March 29 khân baptisma a chang a ni. A thla leh aṭang chuan auxiliary pioneer a thawk ṭan nghâl a. Nuam a tih êm avângin a thawk chhunzawm zêl a. Thla eng emaw zât chhûng auxiliary pioneer a thawh hnu kum 1986, October 1 aṭangin regular pioneer a thawk ṭan ta a ni.

A tleirâwl chhoh chuan, Unau Winder-a chuan chutih hun laia bethel-a thawk, a u mipa pahnihte chu a tlawh a. Chu chuan Bethel-a rawngbâwl duhna a neihtîr a. Tichuan, kum 1990, May thla aṭangin Wallkill Bethel-ah thawk tûra sâwm a ni ta a ni.

Unau Winder-a chu Bethel-a Cleaning Department, Farm Department leh, Bethel Office pawh tiamin, department hrang hrangah a thawk a. A nupui Angela-i nên kum 1997-ah inneiin, tûn thlengin Bethel-ah rawng an bâwl dûn a ni. Kum 2014-ah Warwick-ah an insawn a; chutah chuan, Unau Winder-a chuan world headquarters in saknaahte a ṭanpui a. Kum 2016-ah chuan Patterson-a Watchtower Educational Center-ah insawnin, Audio/Video Services-ah a thawk leh a ni. Kum li hnuah, Warwick-ah kîr lehin Personnel Committee Office-a thawk tûra ruat a ni a. Kum 2022, March thla aṭang chuan Governing Body Personnel Committee ṭanpuitu ni tûra ruat a ni.

Jehova’n chûng ‘mihringte hnêna thilpêkte’ chu Lalram rawngbâwlnaa theih tâwp an chhuah zêl ruala nasa taka malsâwm tûrin kan ṭawngṭaisak a ni.—Eph. 4:8.