Bible kan chhiar hian, kan thu chhiar nêna inkûngkaihna nei thute zir bingna neiin thlarau lam lunghlute kan zawng thei a. Mahse, chu chu engtin nge kan hlâwkpui lehzual theih?

Bible-a thilthlengte chu chipchiar takin zir rawh. Entîr nân, a ziaktu, tu tâna ziah nge a nih, tih leh ziah a nih hunte chu hriat tum ang che. Eng dinhmunahte nge a awm, chumi hma leh chumi hnuah eng thilte nge thleng?

Hêng zawhnate hi zir bingna neiin i thil zir theihte chu hriat tum ang che: ‘Ka thu chhiara mite chu engtin nge an awm? Eng miziate nge an lantîr? Engvângin nge chutiang miziate chu neih emaw, neih loh emaw ka tum ang?’ tiin.

Rawngbâwlna, a nih loh leh mi dangte nêna in indâwrnaah i thu zirte chu nunpui ang che. Chutianga i tih chuan, Bible-in: “Tu pawh fing apiangin chûngte chu an vawng ṭha ang,” tia a sawi angin, Pathian finna chu i lantîr dâwn a ni.—Sâm 107:43.

• Thurâwn: Chawlhkâr chhûng inkhâwma Pathian Thu Aṭanga Rohlute tih inkhâwmin, kan thu zirte nunpui tûra min ṭanpui dân chu chhinchhiah ang che. He section-ah hian mahni kan inzawh theih zawhna te, chhût ngun nâna kan hman theih thu te leh, kan ngaihtuah theih entîrna milemte telh a ni ṭhîn.