Chuti chung pawhin, Jehova chuan a hun ruata thil a tih tûr chu dawhthei taka nghâk tûrin min beisei a. Engvângin nge chutianga min beisei? Kan nghah laiin engin nge hlimna nei tûra min ṭanpui thei?

ENGVANGIN NGE JEHOVA’N NGHAK TURA MIN BEISEI?

Bible chuan: “LALPA chuan a khawngaih theihna tûr che uin a nghâk ang a, a lainat theihna tûr che uin chawimawiin a awm ang. LALPA chu rorêl felna Pathian a ni si a; amah nghâktute zawng zawng chu an eng a thâwl e,” tiin a sawi a ni. (Is. 30:18) Chûng Isaia thuziakte chu a tîrah chuan Juda luhlul takte tân a ni a. (Is. 30:1) Mahse, chûng thute chuan Juda mi rinawm ṭhenkhatte chu beiseina a pe a. Chutiang bawkin, tûn laiah pawh chûng thute chuan Jehova chhiahhlawh rinawmte chu beiseina min pe a ni.

Chuvângin, Jehova’n dawhthei taka a nghah avângin keini pawhin dawhthei takin kan nghâk tûr a ni. Ani chuan he khawvêl tâwp hun tûr chu a ruat tawh a, chumi nî leh a thlen hun tûr dârkâr chu a nghâk a ni. (Mt. 24:36) Chutih hunah chuan, Diabola’n Jehova leh a rawngbâwltute chunga a puhna chu a dik lohzia a lang chiang tawh ang. Jehova chuan Setana leh a lama ṭang zawng zawngte chu a tiboral ang a; mahse, ani chuan kan chungah “zahngaihna a lantîr” ang.

Chumi hun a thlen hma chuan, Jehova chuan kan harsatnate chu min tihbosak lo mah se, kan nghah laiin hlimna kan nei thei tih min tiam a. Isaia sawi angin, thil ṭha eng emaw thleng tûr chu kan nghah laiin hlimna kan nei thei a ni. (Is. 30:18) a Engtin nge chu hlimna chu kan neih theih? Min ṭanpui thei kawng li i lo en ang u.

NGHAK CHUNGA HLIMNA KAN NEIH THEIH DAN

A ṭha lam nagihven tlat rawh. Lal Davida chuan a dam chhûngin thil ṭha lo tam tak a hmu a. (Sâm 37:35) Mahse, ani chuan: “LALPA-ah chuan châwl la, amah chu nghâk fan fan rawh; a awm dâna vânneihna dawngtu avângin intilungai duh suh, ngaihtuahna sualte puitlintu avâng chuan,” tiin a ziak  a ni. (Sâm 37:7) Davida ngei chuan chhandam a beiseina chu ngaihven tlatin a ngai pawimawh hle a. Ani chuan Pathian Jehova hnên aṭanga malsâwmna a dawn eng pawh chu a chhinchhiah bawk. (Sâm 40:5) Keini pawhin, kan chhehvêla thil ṭha lo thlengte chu ngaihven lovin, nuna kan thiltawn ṭhate chauh kan ngaihven a nih chuan Jehova nghah chu kan tân a awlsam lehzual ang.

Jehova fak zawm zêl rawh. Sâm 71-na ziaktu nia lang Davida chuan Jehova hnênah: “Kei zawngin ka beisei fo vang a, ka la fak zual deuh deuh vang che,” tiin a sawi a. (Sâm 71:14) Engtin nge ani chuan Jehova chu a fak? Mi dangte hnênah Jehova chungchâng hrilhin, amah fakna hla a sa a ni. (Sâm 71:16, 23) Davida angin, Jehova kan nghah laiin hlimna ka hmu thei a. Ani chu mi dangte hnêna thu kan hrilh hunah te, kan ṭhiante leh chhûngte hnêna a chungchâng kan sawi hunah te kan fak theih bâkah, biakna atâna phuah Lalram hlate sain kan fak thei bawk a ni. Ṭum danga Lalram hlate i sak hunah, engvângin nge hla thute leh chûngte chuan hlimna min pêk dânte chu ngun taka i ngaihtuah loh vang?

Unaute hnên aṭangin chakna hmu rawh. Davida’n harsatna a hmachawn lai khân Jehova hnênah: “I mi thianghlimte mithmuhah chuan i hming chu ka nghâk reng ang,” tiin a hrilh a. (Sâm 52:9) Keini pawhin unau rinawm takte hnên aṭangin chakna kan hmu thei a, kan inkhâwmte leh rawngbâwlnaah chauh ni lovin, unaute nêna kan inkawmho hunahte chakna kan nei thei a ni.—Rom 1:11, 12.

I beiseina tinghet rawh. Sâm 62:5-na chuan: “Ka nunna, Pathian chauh nghâk rawh; ka beiseina hi ama hnên aṭanga chhuak a ni si a,” tiin a sawi a. Beiseina nghet takah chuan beiseina thleng ngei tûra rinna a tel a—chu chu kan beisei anga khawvêl a tâwp mai loh hian a pawimawh hle. Eng anga rei pawh nghâk mah ila, Jehova thutiam chu a thleng ngei ang tih kan ring nghet tlat tûr a ni. Pathian Thu—zâwlneite hrilh lâwkna te, a chhûng thu inmilnate leh, Jehova’n a chungchâng a sawite chipchiar taka zirna chuan kan beiseina a tinghet thei a. (Sâm 1:2, 3) Chu bâkah, chatuan nunna thutiam thlen famkimna kan nghah laiin, Jehova nêna inlaichînna ṭha vawng reng tûrin ‘thlarau thianghlim kan dîl’ zawm zêl a ngai a ni.—Jud. 20, 21.

Lal Davida angin, Jehova chuan amah nghâktute chu en rengin, an chungah hmangaihna rinawm a lantîr tih ring nghet tlat ang che. (Sâm 33:18, 22) I nuna thil ṭhate ngaihven tlat a, a hnêna ṭawngṭai a, unaute hnên aṭanga chakna hmuhnate hmangin leh, beiseina hlu tak i neih chu tinghet tlatin Jehova chu dawhthei takin nghâk ang che.