1. Hmân lai aṭangin Jehova betute chuan eng rilru put hmang duhawm tak nge an lo lantîr?

 JEHOVA nêna in inlaichînna chu i ngaihlu em? I ngaihlu ngei ang! Chutianga ngaihlutu chu nangmah chauh i ni lo. Hmân lai aṭangin nangmah anga ngaihlutu tam tak an lo awm tawh a ni. (Sâm 104:33, 34) Mi tam tak chuan Jehova be tûrin inpêkna nasa tak an lo nei tawh a. Chutiang chuan hmân lai Israel rama Nazarit mite chuan an ti a ni. Tute nge an nih a, an entawn tûr siam aṭangin eng nge kan zir theih?

2. (a) Nazarit mite chu tute nge an nih? (Numbers 6:1, 2) (b) Engvângin nge Israel mi ṭhenkhat chuan Nazarit mi ni tûra thu an tiam?

² “Nazarit mi,” tih chu “tihhran,” a nih loh leh “thlan bîk,” tih awmze nei Hebrai thu mal aṭanga lâk a ni a. Nazarit mite chu kawng danglam bîk taka Jehova rawngbâwl tûra mi mal inpêkna nei Israel mi, ṭhahnemngai takte an ni. Mosia Dânah chuan a hmei a pate chu Jehova hnêna thutiam danglam bîk tak siama hun eng emawti chhûng Nazarit mi anga rawngbâwl tûra phalsak an ni a. a (Numbers 6:1, 2 chhiar rawh.) Chu thutiamah chuan Israel mi dang zawngte’n an zawm a ngaih loh kaihhruainate zâwm tûra intiamna a tel a ni. A nih leh, engvângin nge Israel mi tu emaw chuan Nazarit mi ni tûra thu a tiam ang? Jehova a hmangaihna thûk tak leh A malsâwmna chhiarsên lohte chunga lâwmna nasa takin a chêttîr vâng a ni ngei ang.—Deut. 6:5; 16:17.

3. Engtin nge tûn laia Pathian mite chu Nazarit mite nêna an inan?

 ³ Mosia Dân chu “Krista dân” hmanga thlâk a nih khân, Nazarit mi nihna ruahmanna chu tihtâwp a ni a. (Gal. 6:2; Rom 10:4) Mahse, tûn laia Jehova mite chuan Nazarit mite ang bawkin an thinlung, thlarau, rilru leh, chakna zawng zawnga Jehova rawngbâwl duhna nasa tak an nei a. (Mk. 12:30) Jehova hnêna kan inpumpêk hian inhuam taka chutianga ti tûrin thu kan tiam a ni. Chu thutiamah chuan Jehova duh zâwng mila nun leh inpêknate neih a tel a. An thutiam mila Nazarit mite nun dân chu kan zir rualin, kan thutiam mila kan nun theih dân tûr chungchângah zir tûr pawimawh tak kan zir thei a ni. b (Mt. 16:24) Entîrna ṭhenkhat i lo ngaihtuahho vang u.

INPEKNA NEIH INHUAM RAWH

4. Numbers 6:3, 4-in a sawi angin, Nazarit mi chuan eng inpêkna nge a neih?

⁴ Numbers 6:3, 4 chhiar rawh. Nazarit mite chuan zu lam chi rêng rêng leh grape rah leh a pho rote chu an eiin an in thei lo va. Chûng thilte chu thil ṭha lo a nih loh avângin an chhehvêla mite chuan zalên takin an eiin an in thei a ni. Bible chuan “mihring thinlung tihlâwmna uain” chu Pathian thilpêk angin a sawi a. (Sâm 104:14, 15) Chûng thilte chuan mihring nunah lâwmna tam tak thlen thei mah se, Nazarit mite chuan inhuam takin an eiin an in lo a ni. c

5. Unau Madián-a leh Marcela-i te chuan eng inpêkna nge an neih a, engvângin nge?

⁵ Nazarit mite angin, Jehova rawng tam lehzuala kan bâwl theih nân inpêknate kan nei a. Unau Madián-a leh Marcela-i  d te thiltawn hi han ngaihtuah teh. Anni chuan nun nuam tak an chên a. Madián-a chuan hna ṭha tak neiin in nuam takah an khawsa a. Mahse, Jehova rawng tam lehzuala bâwl an duh avângin insiamremna ṭhenkhat an nei ta a ni. Anni chuan: “Kan sum hman zât kan titlêm a. In tê zâwka insawnin kan motor pawh kan hralh a ni,” tiin an sawi. Madián-a leh Marcela-i te tân chutianga inpêkna neih chu ngai kher lo mah se, rawngbâwlna zauh an duh avângin chutiang chuan an ti a. An thu tlûkna siamte chuan lungawina leh hlimna a pe a ni.

6. Engvângin nge tûn laia Kristiante chuan inpêkna an neih? (Milem en bawk rawh.)

 ⁶ Tûn laiah pawh Kristiante chuan theocratic thiltihnatea tam lehzuala an inhman theih nân inhuam takin inpêknate an nei a. (1 Kor. 9:3-6) Jehova chuan chûng inpêknate nei tûrin min phût lo va; chu bâkah, kan thil kalsan tâkte chu thil ṭha lo a ni kher lo bawk. Entîr nân, ṭhenkhat chuan an hna tui zâwng te, an inte, a nih loh leh an ranvulhte chu an kalsan a. Mi tam tak chuan nupui pasal neih hrih loh emaw, chhûngkaw din hrih loh emaw chu an thlang bawk. Mi dangte chuan an hmangaih takte hlata awm ngai dâwn mah se, mamawh zualna hmunah rawng an bâwl a ni. Kan zînga tam tak chuan Jehova hnêna kan neih ṭhat ber pêk kan duh avângin inhuam takin chutiang chuan kan inpe a. A rawngbâwl tûra inpêkna i neih eng pawh, a lian emaw a tê emaw pawh ni se, Jehova’n a ngaihlu tak zet tih i chiang thei a ni.—Heb. 6:10.

MI DANGTE LAKA DANGLAM INHUAM RAWH

7. Nazarit miin a thutiam a vawnna kawngah eng harsatna nge a tawh mai theih? (Numbers 6:5) (Milem en bawk rawh.)

⁷ Numbers 6:5 chhiar rawh. Nazarit mite chuan lu mêt lo tûrin an intiam a. Chu chu Jehova thuneihna hnuaia an intukluh pumhlûmzia lantîr dân kawng khat a ni. Nazarit mi a nihna a rei dân azirin Israel mi sam chu mi dangte hriat theih khawpa sei a ni thei a. A chhehvêla awmte’n a thutiam vawng tûra an thlâwp a nih chuan, chutianga tih chu a tân thil harsa a ni lo thei. Mahse, lungchhiatthlâk takin Israel ramah Nazarit mite’n lawm leh thlâwp an hlawh loh lai a awm a ni. Zâwlnei Amosa hun laiin kalpêng Israelte chuan ‘Nazarit mite hnênah uain in tûr an pe’ ṭhîn a, chu chu uain laka inthiarfihlîm tûra an thutiam bawhchhiattîr tumna a nih a rinawm. (Amos. 2:12) Nazarit mi tân a thutiam vawng tûr leh mi dangte laka danglam tûr chuan huaisen a ngaih châng a awm ngei ang.

8. Engtin nge Benjamin-a thiltawn chuan a tihchak che?

⁸ Mi zakzum tak kan nih pawhin, Jehova ṭanpuinain mite laka danglam tûrin huaisenna kan nei thei a. Norway rama kum sâwm mi, Thuhretu naupang Benjamin-a thiltawn hi lo ngaihtuah ta ila. An school-ah Ukraine rama indona avângin, Ukraine mipuite thlâwpna lantîrna hun an hmang a. Naupangho chu Ukraine ram flag rawnga inthuama zai tûra tih an ni. Chu hnam hmangaihna lantîrna thiltiha a tel ve loh nân, Benjamin-a chu fing thiam takin chumi hmun aṭanga hla ve tâwk takah a awm a. Mahse, zirtîrtu pakhat chuan lo hmuin: “Rawn zai ve rawh. Kan nghâk reng tawh che!” tiin ring takin a au va. Chutah,  Benjamin-a chuan an zirtîrtu chu panin: “Ka tualdawih a, politics nêna inkûngkaih thilah ka tel ngai lo. A nihna takah chuan, Jehova Thuhretu tam tak chu indonaa an tel loh avângin tân inah an tâng mêk,” tiin an zirtîrtu hnênah chuan huaisen takin a hrilh a. Zirtîrtu chuan a hrilhfiahna chu pawmsakin, thiltihnaa tel ve loh chu a phalsak ta a ni. Mahse, a classmate-te chuan an thiltihnaa a tel ve loh chhan chu an zâwt veleh a. Benjamin-a chu a zâm êm avângin a ṭap lek lek a; mahse, zirtîrtu hnêna a sawi ang chiahin class pumpui hmaah a sawi leh a. A hnuah, a nu leh pate hnênah chuan a rinna humhim tûra Jehova’n a ṭanpui nia a hriat thu a sawi a ni.

9. Eng kawngin nge Jehova thinlung kan tihlâwm theih?

⁹ Jehova duh zâwng tih kan duh avângin kan chhehvêla mite lakah kan danglam a. Kan hnathawhnaah emaw, school-ah emaw Jehova Thuhretu anga inhriattîr tûrin huaisenna kan mamawh a ni. He khawvêla mite rilru put hmang leh nungchangin chhiat lam a pan zêl rual hian, Bible thu bulte mila nun leh mi dangte hnêna chanchin ṭha hriattîr chu harsa kan ti lehzual thei a. (2 Tim. 1:8; 3:13) Mahse, amah be lotute laka kan danglamzia huaisen taka kan lantîr hian, ‘Jehova thinlung kan tilâwm’ tih i hre reng ang u.—Thuf. 27:11; Mal. 3:18.

I NUNAH JEHOVA DAH HMASA TLAT RAWH

10. Engtin nge Numbers 6:6, 7-a thupêk chu Nazarit mite tân zawm a harsat mai theih?

¹⁰ Numbers 6:6, 7 chhiar rawh. Nazarit mite chu mitthi ruang hnaiha an awm a thiang lo va. Bible hun lai chuan, Nazarit mi tân a chhûngkhat laina tu emaw a thih hian chu thu chu zawm a harsa thei a. Chûng hun laia mitthi vuinaah chuan a ruang an kîl ṭhîn a ni. (Joh. 19:39, 40; Tirh. 9:36-40) Mahse, Nazarit mi chuan chutiang hnam dân chu a zui ve thei lo. Chhûngkuaa lû sûna dinhmun hrehawm tak an tawh hunah pawh, Nazarit mite chuan an thutiam chu vawngin rinna nghet tak an lantîr a ni. Chutiang dinhmun khirh takte hmachhawn thei tûrin Jehova’n chûng mi rinawmte chu a tichak ngei ang.

11. Chhûngkua nêna inkaihhnawih thilahte Kristian chuan eng nge tih a tum tlat ang? (Milem en bawk rawh.)

¹¹ Kristian kan nih angin, Jehova hnêna kan inpumpêkna thutiam chu kan ngai pawimawh hle a. Chu chuan chhûngkaw kaihhnawih thila kan thu tlûkna siamte leh kan thiltihte chungah nghawng a nei a ni. Bible pêk chhûngkaw mawhphurhnate chu ṭha taka hlen kan duh rualin, kan chhûngte duh zâwng chu Jehova  thil phûtte aiin kan dah pawimawh zâwk ngai lo. (Mt. 10:35-37; 1 Tim. 5:8) Jehova tilâwm tûrin kan chhûngte lawm loh zâwng thu tlûknate kan siam a ngaih châng a awm thei a ni.

12. Alexandru-a chuan chhûngkaw dinhmun khirh tak a hmachhawn rualin eng nge a tih a, eng nge a tih loh?

¹² Unau Alexandru-a leh a nupui Dorina-i te chungchâng hi lo ngaihtuah ta ila. Kum khat vêl Bible an zir hnu chuan Dorina-i chuan zir zawm a duh tawh lo va, a pasal pawh zir tawh lo tûrin a duh a ni. Mahse, a pasal chuan zaidam tak leh fing thiam takin a zir chhunzawm tûr thu a hrilh a. Dorina-i chu a lungawi lo hle a, zirna bânsan tûr chuan tihluih a tum a ni. Alexandru-a chuan a nupui ngaih dân chu hriat thiam tum mah se, a tân a awlsam loh thu a sawi a. A nupuiin a sawisêl a, na tak taka a ṭawng khum chângte hian Bible zirna bânsan duhna a nei ṭhîn a ni. Mahse, Alexandru-a chuan Jehova dah hmasa tlat chungin a nupui chungah hmangaihna leh zahna thûk tak a lantîr a. A hnuah chuan, a entawn tûr ṭha siam chuan a nupui chu Bible zir leh tûr leh, thutak pawm tûrin a chêttîr a ni.—Kan website jw.org-a “Truth Transforms Lives,” tih thuziak inzawma Alexandru and Dorina Văcar: “Love Is Patient and Kind,” tih video chu en rawh.

13. Engtin nge Jehova leh kan chhûngte kan hmangaih tih kan lantîr theih?

¹³ Jehova chu chhûngkaw dintu a ni a, chhûngkaw hlim tak nei tûrin min duh a ni. (Eph. 3:14, 15) Hlimna dik tak neih kan duh chuan Jehova’n ti tûra min duhte kan tih a ngai a. I chhûngkua i ngaihsak a, hmangaih tak leh zah taka i cheibâwl ruala, amah be tûra inpêkna i neihte chu Jehova’n a ngaihlu tih ringhlel ngai suh.—Rom 12:10.

NAZARIT MI ANG NI TURIN INFUIH TAWN RAWH U

14. A bîk takin, tute nge kan thusawia tihchak kan tum ang?

¹⁴ Tûn laia Jehova betute chuan amah an hmangaih avângin inhuam taka inpêk duhna an neih a ngai a. Mahse, chutianga tih chu a awlsam reng lo. Engtin nge Jehova tâna inpêkna nei tûra kan inṭanpui tawn theih? Kan thu sawia infuihna hmangin a ni. (Job. 16:5) Rawngbâwlnaa tam lehzuala an inhman theih nâna nun tihsamkhai tum unaute in kohhranah an awm em? An tâna harsa tak a ni chung pawha school-a mi dangte laka an danglamzia huaisen taka lantîrtu ṭhalai naupang hriat i nei em? Chhûngte dodâlna avânga rinawm reng harsa ti mai thei Bible zirpui emaw, unaute emaw an awm em? Chûng unau duhawm takte chu inpêkna leh huaisenna an lantîrnate  avânga kan hlutzia hrilhin, hun remchâng kan neih apiangah tihchak i tum ang u.—Philm. 4, 5, 7.

15. Engtin nge mi ṭhenkhatin hunbi kima rawngbâwl unaute chu an ṭanpui?

¹⁵ Hunbi kima rawngbâwl kan unaute chu ṭanpuina ṭangkai tak pêk theihna hun remchâng kan nei thei a. (Thuf. 19:17; Heb. 13:16) Sri Lanka-a awm kum upa lam unaunu rinawm tak pakhatin chutianga tih chu a duh a. A pension hlawh a pun avângin, sum leh pai lama harsatna tâwk mêk pioneer unaunu pahnihte chu an rawngbâwlna an chhunzawm theih nân ṭanpui a duh a. Chuvângin, thla tina an telephone bill chu a pêk tûr zât bitukin a ṭanpui ta a ni. Chu unaunu rilru put hmang chu a va duhawm tak êm!

16. Hmân laia Nazarit mi nihna ruahmanna aṭangin eng nge kan hriat theih?

¹⁶ Hmân laia Nazarit mi ni tûra inpete entawn tûr ṭha siam aṭangin thil tam tak kan zir thei ngei mai! Chutih rualin, an chanchin zirna chuan kan Pa vâna mi, Jehova chungchâng hre tûrin min ṭanpui bawk. Ani chuan amah tihlâwm kan duh tak zet tih leh, kan inpumpêkna thutiam mila nung tûra inpêk kan inhuam tih a hria a. Mi mal taka amah kan hmangaihzia lantîrna hun remchâng pein min chawimawi a ni. (Thuf. 23:15, 16; Mk. 10:28-30; 1 Joh. 4:19) Nazarit mi nihna ruahmanna chuan Jehova’n a rawngbâwl tûra inpêkna kan neihte chu a hriain, a ngaihlu tih a târ lang a. Chuvângin, Jehova hnênah inhuam taka kan neih ṭhat ber hlânin, a rawng i bâwl chhunzawm zêl ang u.