1. Kan Hruaitu Jehova hnung kan zuina tûr chhan entîrna pe rawh.

 RAM ngaw taka kawng bo angin han inmitthla teh. Thil hlauhawmin a hual vêl che a; ram sakawlhte, tûr nei rannungte leh hlobette bâkah, lung khawhrawk tak takte a awm a ni. Mahse, hlauhawm awmna hria a, chumi hmun pumpelh tûra ṭanpui theitu, tawn hriat ngah tak tu emawin a hruai che avângin i va lâwm dâwn tak êm! He khawvêl hi chu ram ngaw tak ang chu a ni a. Thlarau lama min tichhe thei thil hlauhawmtein a khat a ni. Mahse, Hruaitu ṭha famkim, Jehova kan nei a. Ani chuan thil hlauhawmte pumpelh tûr leh kan tum ram, khawvêl thara chatuana nung tûrin min kaihruai a ni.

2. Engtin nge Jehova’n min kaihhruai?

² Engtin nge Jehova’n min kaihhruai? Min kaihhruai dân ber chu a Thu, Bible hmangin a ni a. Mahse, mihringte hmangin min kaihruai bawk. Entîr nân, thu tlûkna fingte siam tûra min ṭanpuitu thlarau lam chaw min pe tûrin “bawih rinawm, fing tak” chu a hmang a. (Mt. 24:45) Min kaihruai tûrin mi tling tak dangte pawh a hmang bawk. Entîr nân, bial kantute leh kohhran upate chuan hun khirh takte kan pal tlang theih nân fuihnate leh kaihhruainate min pe a. He hun hnuhnûng khirh takah hian kaihhruaina rin tlâk takte kan dawn avângin kan va lâwm tak êm! Chu chuan Jehova lawm hlawh reng tûr leh nunna kawnga kal reng thei tûrin min ṭanpui si a.

3. He thuziakah hian eng nge kan sawiho vang?

³ Mahse, a bîk takin mihring ṭha famkim lote hmanga kaihhruaina min pêk hunah Jehova kaihhruaina chu zawm harsa kan ti thei a ni. Engvângin nge? Kaihhruaina chu kan ngaih dân nên a inmil lo thei a. A nih loh leh, a finthlâk lo nia kan hriat avângin Jehova hnên aṭanga lo kal a nih leh nih loh  kan ringhlel thei a ni. Chutiang hunah chuan, a mite kaihruaitu chu Jehova a ni tih leh kaihhruaina zawmna chuan malsâwmnate min thlen tih kan rin ngheh a ngai lehzual a ni. Kan rinna tinghet tûrin he thuziakah hian (1) Bible hun laia Jehova’n a mite a kaihhruai dân, (2) tûn laia min kaihhruai dân leh, (3) a kaihhruaina zawm tlatna kan hlâwkpui dânte kan sawiho vang.

JEHOVA’N ISRAEL HNAM A KAIHHRUAI DAN

4-5. Jehova’n Mosia hmangin Israel mite a kaihruai tih engtin nge a lantîr? (Milem en rawh.)

⁴ Jehova chuan Aigupta aṭanga Israel mite hruai chhuak tûrin Mosia a ruat a. Mosia hmangin a kaihruai tih Israel mite’n an rin ngheh theih nân, mita hmuh theih finfiahnate a pe a ni. Entîr nân, chhûnah chhûm ding leh zânah meialh ding a pe a. (Ex. 13:21) Mosia’n chhûm ding chu a zui a, chu chuan amah leh Israel mite chu Tuipui Senah a hruai thleng a ni. Mite chu tuipui leh an mahni ûmtu Aigupta sipaite inkâra dan chêp nia an inhriat chuan an chiai nasa hle a. Mosia’n Tuipui Sen lama a hruai chu tisual ta angin an ngai a ni. Mahse, Mosia chuan a tisual lo. Jehova’n amah hmangin a mite chu tum rêng vângin chutah chuan a hruai zâwk a. (Ex. 14:2) A hnuah, Pathianin mite chu mak danglam takin a chhanchhuak a ni.—Ex. 14:26-28.

⁵ Chumi hnu kum 40 chhûng chu, thlalêrah Mosia’n Pathian mite chu chhûm ding rinchhanin a kaihruai zawm zêl a. a Mosia puan in chungah hun eng emawti chhûng Jehova’n chhûm ding chu a awmtîr a, chu chu Israel mi zawng zawngin an hmu thei a ni. (Ex. 33:7, 9, 10) Chhûm ding aṭang chuan Jehova’n Mosia a be ṭhîn a; ani chuan Pathian kaihhruainate chu mite hnênah a hrilh chhâwng leh ṭhîn a ni. (Sâm 99:7) Israel mite chuan Jehova’n Mosia hmangin a kaihruai tih finfiahna chiang tak an nei a ni.

6. Engtin nge Israel mite’n Jehova kaihhruaina chu an chhân lêt? (Numbers 14:2, 10, 11)

⁶ Lungchhiatthlâk takin, Israel mi a tam zâwk chuan Jehova’n a aiawh atân Mosia a hmang tih finfiahna chiang takte chu an hnâwl a. (Numbers 14:2, 10, 11 chhiar rawh.) Mosia chanvo chu vawi tam tak an pawm duh loh avângin, chumi chhuan chu Ram Tiama luh phalsak an ni lo.—Num. 14:30.

7. Jehova kaihhruaina zâwmtute entîrna pe rawh. (Numbers 14:24) (Milem en bawk rawh.)

⁷ Mahse, Israel mi ṭhenkhat chuan Jehova kaihhruaina chu an zâwm a. Entîr nân, Jehova chuan: “Kaleba erawh hi chuan . . . mi zui tak zet,” tiin a sawi a ni. (Numbers 14:24 chhiar rawh.) Pathianin Kaleba chu Kanaan rama a duhna hmuna awm theihna pein mal a sâwm a. (Jos. 14:12-14) Israel mi chhuan tharte chuan Jehova kaihhruaina zâwmin entawn tûr ṭha an siam bawk. Josua chu Mosia aiawha Israel mite hruaitu atâna ruat a nih khân, anni chuan “a dam chhûng zawng chuan an ṭih ta a.” (Jos. 4:14) Chuvângin, Jehova chuan anni chu Ram Tiamah hruai lûtin mal a sâwm a ni.—Jos. 21:43, 44.

8. Lalte rorêl laia Jehova’n a mite a kaihhruai dân chu hrilhfiah rawh. (Milem en bawk rawh.)

⁸ Kum eng emaw zât hnuah, Jehova chuan a mite kaihruai tûrin rorêltute a ruat a. Chumi hnu, lalte rorêl hun laiin a mite kaihruai tûrin zâwlneite a ruat bawk. Lal rinawmte chuan zâwlneite thurâwn pêk chu an zâwm a ni. Entîr nân, Lal Davida chuan zâwlnei Nathana zilhna thu chu inngaitlâwm takin a pawm a. (2 Sam. 12:7, 13; 1 Chro. 17:3, 4) Lal Jehosaphata chuan zâwlnei Jahaziela kaihhruaina  chu a rinchhan a, “[Pathian] zâwlneite chu ring ula,” tiin Juda mite chu a fuih bawk. (2 Chro. 20:14, 15, 20) Dinhmun khirh tak a tawh laiin Lal Hezekia chuan zâwlnei Isaia ṭanpuina a dîl a. (Is. 37:1-6) Lalte’n Jehova kaihhruaina an zawm apiangin malsâwm an ni a, a hnam puma vênhim an ni bawk a ni. (2 Chro. 20:29, 30; 32:22) Jehova’n a mite kaihruai tûrin a zâwlneite a hmang tih mi zawng zawng tân chiang taka hriat theih a ni a. Mahse, lal a tam zâwk leh mipuite chuan Jehova zâwlneite thusawi chu an hnâwl a ni.—Jer. 35:12-15.

JEHOVA’N KRISTIAN HMASATE A KAIHHRUAI DAN

9. Kum zabi khatnaa Kristiante kaihruai tûrin Jehova’n tute nge a hman? (Milem en bawk rawh.)

⁹ C.E. kum zabi khatnaah, Jehova’n Kristian kohhran chu a din a. Engtin nge chûng Kristian hmasate chu a kaihhruai? Isua chu kohhran lû ni tûrin a ruat a. (Eph. 5:23) Mahse, Isua’n a zirtîrte chu mi mal takin kaihhruaina a pe lo va. Kaihruaitu atân Jerusalema tirhkohte leh upate chu a hmang a ni. (Tirh. 15:1, 2) Kohhran upate chu kohhran kaihruaitu atâna ruat an ni bawk.—1 Thes. 5:12; Tit. 1:5.

10. (a) Engtin nge kum zabi khatnaa Kristian a tam zâwk chuan an kaihhruaina dawnte chu an chhân lêt? (Tirhkohte 15:30, 31) (b) Engvângin nge Bible hun laia mi ṭhenkhat chuan kaihruaitu atâna Jehova mi hmante chu an pawm loh? (“ Mi Ṭhenkhatin Finfiahna Chiang Tak An Hnâwl Chhan,” tih bâwm chu en rawh.)

¹⁰ Kum zabi khatnaa Kristiante chuan tirhkohte kaihhruaina chu an pawm em? A tam zâwk chuan kaihhruaina an dawnte chu lâwm takin an pawm a ni. A nihna takah chuan, an dawn “thlamuanna thu avâng chuan an lo lâwm ta hle a.” (Tirhkohte 15:30, 31 chhiar rawh.) A nih leh, engtin nge Jehova’n tûn laia a mite chu a kaihhruai?

TUN LAIA JEHOVA MIN KAIHHRUAI DAN

11. Tûn laia hmahruaitute chu Jehova’n kaihhruaina a pêk dân entîrna pe rawh.

¹¹ Tûn laiah pawh Jehova chuan a mite chu a kaihruai chhunzawm zêl a. Ani chuan a Thu leh Kohhran lû, a Fapa hmangin a kaihruai a ni. Pathianin a aiawhtu atân mihringte a la hmang chhunzawm zêl tih finfiahna kan nei em? Aw, nei e. Entîr nân, kum 1800 hnu lama thilthleng hi lo ngaihtuah ta ila. Charles  Taze Russell-a leh a ṭhiante chuan Pathian ram dinna nêna inkûngkaihin, kum 1914 chu kum pawimawh tak a ni dâwn tih an hre thiam ṭan ta a. (Dan. 4:25, 26) Bible hrilh lâwknate ṭanchhanin chutiang chuan thu tlûkna an siam a ni. Bible hmanga zir bingna an neih chu Jehova’n a kaihruai em? A kaihruai tak zet a ni. Kum 1914-ah, khawvêl thilthlengte chuan Pathian Ramin ro a rêl ṭan tih a finfiah a. Chumi kumah chuan Khawvêl Indopui I-na a lo chhuak a; chu chu hri lêngte, lîrnghîngte leh, ṭamte’n a zui a ni. (Lk. 21:10, 11) Jehova’n chûng rilru dik tak pu Kristian mipate chu a mite ṭanpui tûrin a hmang tih a chiang hle.

12-13. Indopui II-na chhûngin thu hrilh leh zirtîr siamna hna zauh a nih theih nân eng ruahmannate nge siam a nih?

¹² Indopui II-na chhûnga thilthleng hi lo ngaihtuah leh ta ila. Thu Puan 17:8 an zir chian hnuah, world headquarters-a unaupate chuan indopui chu Armageddon-in a zui nghâl dâwn lo va; chu aiin, thu hrilh rawngbâwlna zauh theihna tûr hun muanawm tak a rawn awm zâwk dâwn tih an hre thiam a ni. Chutih hun lai chuan, thil tih âwm niin lang lo mah se, Jehova inawpna pâwl chuan khawvêl hmun hrang hranga thu hrilh leh zirtîr siamnaa thawk tûra Missionary-te zirtîrna pe tûrin Watchtower Bible College (School) of Gilead chu a din a ni. Indo hun lai pawhin Missionary-te chu tirh chhuah an ni a. Chu bâkah, bawih rinawm fing chuan kohhrana mi zawng zawngte chu thu hriltu leh zirtîrtu thiam lehzual an nih theih nân, Course in Theocratic Ministry b chu a ruahman a. Chutiang kawngte chuan, Pathian mite chu an hnathawh tûr atâna buatsaih an ni.

¹³ Tûn laiah, Jehova’n a mite chu hun harsa tak kârah pawh a kaihruai tih chiang takin kan hmu thei a. Indopui II-na hnu lam aṭang chuan, Jehova mite chuan ram tam takah zalên takin thu an hril a. Thu hrilhna chu nasa takin a ṭhang chho va ni.

14. Engvângin nge Jehova inawpna pâwl leh thlarau thianghlima ruat upate hnên aṭanga lo kal kaihhruaina chu kan rin tlat theih? (Thu Puan 2:1) (Milem en bawk rawh.)

 ¹⁴ Tûn laiah, Governing Body member-te chuan kaihruaitu atân Krista an rinchhan chhunzawm zêl a. Unaute hnêna an kaihhruaina pêkte chu vân lam thil thlîr dân nên inmiltîr an duh a ni. Tichuan, bial kantute leh kohhran upate hmangin kohhran hnênah kaihhruaina an pe a. c Kohhran upate chu Krista ‘kut ding lamah’ an awm a ni. (Thu Puan 2:1 chhiar rawh.) Mahse, chûng kohhran upate chu ṭha famkim lo an nih avângin thil tihsual chângte an nei a. Mosia leh Josua chuan tirhkohte ang bawkin thil tihsual châng an nei a ni. (Num. 20:12; Jos. 9:14, 15; Rom 3:23) Mahse, Krista chuan bawih rinawm fing leh thlarau thianghlima ruat kohhran upate chu fîmkhur takin a kaihruai a. “Khawvêl tâwp thleng pawhin” chutiang chuan a ti zawm zêl ang. (Mt. 28:20) Chuvângin, kaihruai tûra a ruatte hmanga kaihhruaina min pêkte chu rinna tûr chhan ṭha tak kan nei a ni.

JEHOVA KAIHHRUAINA ZAWM TLATNA CHU KAN HLAWKPUI

15-16. Jehova kaihhruaina zâwmtute thiltawn aṭangin eng nge i zir?

¹⁵ Jehova kaihhruaina zawm tlatna chu tûnah pawh kan hlâwkpui a. Entîr nân, Andy-a leh Robyn-i te chuan an nun tisamkhai tûra fuihna chu an zâwm a. (Heb. 13:5) Chuvângin, mahni inpein biakna atâna insakna project-ahte an tel thei a ni. Robyn-i chuan: “Chaw chhumna pawh awm lo room zîm têa awm châng kan nei a. Chu bâkah, ka hna ngainat tak thlalâkna atâna ka hman ṭhin hmanruate chu ka hralh a ngai bawk a. Ka ui lutuk chu ka ṭap hial a ni. Mahse, Abrahama nupui Sari angin ka kalsan tâkte chu ngaihtuah lovin hma lam thlîr tlat ka tum a ni,” tiin a sawi. (Heb. 11:15) Engtin nge anni chuan an thu tlûkna siam chu an hlâwkpui? Unaunu Robyn-i chuan: “Jehova hnênah kan neih zawng zawng kan pe tih kan hriat avângin lungawina nasa tak kan nei a. Theocratic chanvo kan dawntea kan thawh hian khawvêl thara nun awm dân tûr chu kan tem lâwk ṭhîn,” tiin a sawi a. Andy-a pawhin: “Lalram tâna kan inpêk pumhlûmna chuan lungawina min pe,” tiin a sawi bawk.

¹⁶ Jehova kaihhruaina zawm tlatna chu eng kawng dangin nge kan hlâwkpui? Marcia-i chuan high school a zawh hnu chuan pioneer thawk tûra fuihna chu zawm duhna nasa tak a nei a. (Mt. 6:33; Rom 12:11) Ani chuan: “Scholarship dawnga university-a kum  li chhûng kal tûrin duh ka thlang thei a. Mahse, ka thlarau lam thiltumte tihhlawhtlin chu ka duh a. Chuvângin, ka rawngbâwlnaa min puitu tûr kut themthiamna zirna school-ah chuan ka kal ta zâwk a ni. Chu chu thu tlûkna ka siam tawh azawnga ṭha ber a ni. Tûnah chuan regular pioneer ka thawk a. Chu bâkah, ka hnathawh dân ka siamrem theih avângin, Bethel-ah commuter angin ka thawk a, chanvo hlu dangte pawh ka dawng bawk,” tiin a sawi.

17. Jehova kaihhruaina zawm tlatna chu eng kawng dangtein nge kan hlâwkpui? (Isaia 48:17, 18)

¹⁷ Hausak âtchilhna leh Pathian dân min bawhchhiattîr thei thiltihte laka min vênghimtu kaihhruainate dawn châng kan nei ṭhîn a. Chutiang hunah pawh chuan, Pathian kaihhruainate zawm chu kan hlâwkpui thei a. Chhia leh ṭha hriatna thiang neiin buaina tam tak kan pumpelh thei a ni. (1 Tim. 6:9, 10) Tichuan, lâwmna, remna leh, lungawina nasa tak min neihtîrtu Pathian rawngbâwlnaah thinlung zawng zawngin kan thawk chhunzawm thei ang.—Isaia 48:17, 18 chhiar rawh.

18. Engvângin nge Jehova kaihhruaina chu zawm kan tum tlat ang?

¹⁸ Jehova’n mihringte hmangin hrehawm nasa takah leh Kum Sâng Rorêl chhûngin min kaihruai zawm zêl ang tih chu a chiang hle a. (Sâm. 45:16) Chûng kaihhruainate chu kan ngaih dân nên a inmil loh hunah pawh kan zâwm tlat ang em? Tûn aṭanga Jehova kaihhruainate kan zawm chuan nakinah pawh chutianga tih chu a awlsam lehzual ang. Chuvângin, min vêng tûra ruat upate kaihhruaina pawh tiamin, Jehova kaihhruaina chu i zâwm zêl ang u. (Is. 32:1, 2; Heb. 13:17) Amah nêna kan inṭhianna tichhe thei thilte pumpelh tûr leh kan tum ram, khawvêl thara chatuana nunna nei thei tûra min Kaihruaitu Jehova chu rinna tûr chhan tam tak kan nei a ni.