Hnam dân ṭhenkhatah chuan hmeichhiate chu mipate’n hnuaihnung takin an cheibâwl a. Entîr nân, Bolivia rama bial kantu Unau Hans-a chuan: “Mipa ṭhenkhat chuan mipate dah chungnunna hnama seilian an nih avângin, hmeichhiate aia indahsânna rilru put hmang nghet tak an nei,” tiin a sawi. Taiwan rama kohhran upa Unau Shengxian-a chuan: “Ka awmna hmuna mipa tam tak chuan hmeichhiate chu mipate thiltihnaah an inrawlh tûr a ni lo tih ngaih dân an nei a. Mipa tu emawin thil engemaw chungchânga hmeichhe ngaih dân a sawi lan hian, a ṭhiante ngaihnêp a hlawh thei,” tiin a sawi bawk. Mipa dangte chuan hmeichhiate chu lang si lovin an ngaih nêpzia an lantîr a. Entîr nân, an chungchâng eng emaw chu fiamthu thawh nâna hmangin zah lo takin an sawi thei a ni.

An seilenna hnam dân chu eng pawh ni se, mipate chuan inthlâk danglamna an nei thei chu lâwmawm tak a ni. Anni chuan hmeichhiate aia chungnung zâwk anga an inngaihna chu an hneh thei a. (Eph. 4:22-24) Chu chu Jehova entawn tûr siamte entawnna hmangin an ti thei a ni. He thuziakah hian, Jehova’n hmeichhiate a cheibâwl dân te, mipate chuan hmeichhiate chu Jehova cheibâwl dân anga cheibâwl tûra an zir theih dânte leh, upate chu unaunute chunga zahna lantîr kawnga hmahruaitu an nih theih dânte sawiho a ni ang.

ENGTIN NGE JEHOVA’N HMEICHHIATE A CHEIBAWL?

Jehova chuan hmeichhiate cheibâwl dân chungchângah entawn tûr ṭha famkim a siam a. Khawngaihna nei tak Pa a nih angin, a mihring chhûngkua chu a hmangaih hle a. (Joh. 3:16) Unaunu rinawmte chu a tâna fanu duhawm tak an ni. A hnuaia târ lan, Jehova’n hmeichhiate chunga hmangaihna leh zahna a lantîr dân kawngte hi ngaihtuah ang che.

 Thlei bîk nei lovin a cheibâwl. Jehova chuan mipa leh hmeichhiate chu a anpuiin a siam a. (Gen. 1:27) Ani chuan mipa chu hmeichhia aia fing zâwk leh thiamna nei zâwka a siam loh mai bâkah, duhsak zâwkna pawh a nei lo. (2 Chro. 19:7) Hmeichhia leh mipa chu Bible thutak hre thiam tûr leh a mize duhawm takte entawn tûrin theihna inang a pe a ni. An beisei chu lei paradis-a chatuan nun emaw, vânah lal leh puithiam nia rawngbâwl emaw pawh ni se, Jehova chuan mipa leh hmeichhe rinawmte chu a ngaihlu ve ve a. (2 Pet. 1:1) Ani chuan hmeichhiate chu a thliar hrang lo tih a chiang hle.

Ani chuan a ngaihthlâksak. Jehova chuan hmeichhiate rilru vei zâwng leh buaina an neihte chu a ngaihven a. Entîr nân, ani chuan Rakili leh Hani ṭawngṭainate chu a ngaihthlâksakin a chhâng a ni. (Gen. 30:22; 1 Sam. 1:10, 11, 19, 20) Bible ziaktute chu hmeichhiate thusawi ngaihthlâksaktu mipate chungchâng pawh telh tûrin a thâwk khum a. Entîr nân, Abrahama chuan a nupui Sari thusawi ngaihthla tûra Jehova kaihhruaina pêk chu a zâwm a ni. (Gen. 21:12-14) Lal Davida chuan Abigaili thusawi chu a ngaihthlâksak a. A nihna takah chuan, ani chuan Abigaili chu chutianga sawi tûra Jehova tirh niin a ngai a ni. (1 Sam. 25:32-35) A Pa mizia ṭha famkima entawntu Isua chuan a nu Mari thusawi chu a ngaithla a. (Joh. 2:3-10) Hêng entîrnate hian, Jehova’n hmeichhiate zahna a lantîr dân kawng khat chu an thusawite ngaihthlâksakna hmangin a ni tih a târ lang a ni.

Anni chu a ring tâwk. Entîr nân, Jehova chuan lei pumpui enkawlnaa ṭanpui tûrin Evi chu a ring tâwk a. (Gen. 1:28) Chutianga tihna chuan, Evi chu a pasal Adama aia hnuaihnung zâwk anga thlîr lovin, a pasal ṭanpuitu angin a thlîr tih a târ lang a ni. Ani chuan zâwlnei Debori leh Huldi te chu rorêltu leh lal pawh telin, a mite thurâwn pe tûrin a ring tâwk a. (Ro. 4:4-9; 2 Lal. 22:14-20) Tûn laiah pawh, Jehova chuan a hnate hlen chhuak tûrin hmeichhiate a ring tâwk a ni. Chûng hmeichhe rinawmte chuan thuchhuahtu te, pioneer te leh, missionary-te angin rawng an bâwl a. Anni chuan Kingdom Hall leh branch sakna tûr ruahmannaah leh saknaahte, a nih loh leh thawm ṭhatnaahte an ṭanpui a ni. Hmeichhe ṭhenkhat chu Bethel-ah rawng an bâwl a; mi dangte chu RTO (remote translation office)-ah rawng an bâwl a. Hêng hmeichhiate hi, Jehova’n a duh zâwng hlen chhuah nâna a hman sipai pâwl lian tak ang an ni. (Sâm 68:11) Jehova chuan hmeichhiate chu chak lo leh thil ti thei lo angin a thlîr lo tih a chiang hle.

ENGTIN NGE MIPATE CHUAN HMEICHHIATE CHU JEHOVA’N A CHEIBAWL DAN ANGA CHEIBAWL TURA AN ZIR THEIH?

Unaupate u, Jehova’n Kristian unaunute a cheibâwl dân anga kan cheibâwl leh bâwl loh hriat nân, kan ngaihtuahna leh thiltihte chu dik taka kan bih chian a ngai ngei ang. Chutianga ti thei tûr chuan ṭanpuina kan mamawh a. Mi tu emaw lung dinhmun chu X-ray khâwlin a hmu chhuak thei angin, ṭhian ṭha leh Pathian Thu chuan chhûng rila lang si lova kan neih mai theih, hmeichhiate chunga kan rilru put hmang ṭha lo eng pawh chu hre thei tûrin min ṭanpui thei a ni. Chu ṭanpuina dawng tûr chuan eng nge kan tih theih?

I ṭhian ṭha chu zâwt rawh. (Thuf. 18:17) Ṭhian rinchhan tlâk tak, ngilnei tak leh, hriat thiamna nei tak hnênah hetiang zawhna hi kan zâwt thei a ni: “Unaunute ka cheibâwl dân hi engtin nge i ngaih? Anni chuan ka zah tih an hria ang em? Anmahni ka dâwr dânah, kawng eng emaw taka hmasâwn ka ngaihna lai a awm em?” tiin. I ṭhian chuan i hmasâwn theih dân kawng ṭhenkhat a hrilh che a nih chuan, chhuanlam siamin thiam inchan tum suh. Chu aiin, inhuam takin a ṭûl angin insiamrem zâwk ang che.

Pathian Thu zir rawh. Unaunute kan cheibâwl dân kawng hriat theihna ṭha ber chu Pathian Thu êng ṭanchhana kan rilru put hmangte leh thiltihte en dik hi a ni a. (Heb. 4:12) Bible kan zir hian, hmeichhiate ṭha taka cheibâwltu leh cheibâwl lotu mipate chungchâng kan hre thei a. Chûng entîrnate chu hmeichhiate kan cheibâwl dân nên kan khaikhin thei a ni. Chu bâkah, hmeichhiate kan thlîr dân dik lo thlâwp zâwnga Bible châng dik lo taka la kawi palh lo tûrin min ṭanpui thei a. Entîr nân, 1 Petera 3:7-a sawi angin, nupui chu ‘bêl keh awl zâwk a ni tih hriaa chawimawi’ b ni tûra ruat a ni a. Hmeichhiate  chu mipate aiin an hnuaihnung—an rilru a chak lo, a nih loh leh, thiamna an nei tlêm—zâwk tihna a ni em? Ni lo ve! Petera thusawite leh Galatia 3:26-29-a târ lante kan khaikhin chuan Jehova chuan vâna Isua nêna rorêl tûrin mipate ang bawkin, hmeichhiate pawh a thlang a. Pathian Thu kan zir hunah leh, hmeichhiate kan cheibâwl dân chungchânga ṭhian ṭhate ngaih dân kan zawh hunah kan unaunute chunga ṭha taka zahna lantîr dân kan zir thei a ni.

ENGTIN NGE UPATE’N UNAUNUTE ZAHNA AN LANTIR?

Kohhrana unaupate chuan hmangaihna nei tak kohhran upate entawn tûr siam zuina hmangin, zahawm taka unaunute cheibâwl dân an zir thei bawk. Kohhran upate chuan unaunute zahna lantîrna kawngah engtin nge entawn tûr an siam? Kawng ṭhenkhat i lo ngaihtuah ang u.

Unaunute chu an fak. Tirhkoh Paula chuan upate tân entawn tûr ṭha a siam a. Ani chuan Rom khuaa kohhran hnêna a lehkhathawnah unaunu tam tak fakna thu a ziak a ni. (Rom 16:12) Chu kohhrana Paula lehkhathawn chhiar a nih huna chûng unaunute hlim dân tûr chu i mitthla thei em? Chutiang bawkin, upate chuan unaunute chu an mize ṭhate leh, Jehova tâna theih tâwp an chhuahnate avângin thinlung takin an fak ṭhîn a. Chu chuan unaunute chu kohhrana mite zah leh hlut nia inhriatna a neihtîr thei a ni. Chutianga upate fakna thu chu unaunute tân rinawm taka Jehova rawngbâwl zawm zêl thei tûra an mamawh tak a ni thei a ni.—Thuf. 15:23.

Kohhran upate’n unaunute an fak hian, a bîk taka an fak duhnate sawiin, an nihna dik tak angin an fak a ni. Engvângin nge? Unaunu Jessica-i chuan: “Unaupate’n unaunute hnênah ‘i ti ṭha lutuk’ tia min hrilh hian hriat a nuam thei hle a. Mahse, unaupate’n kan fate inkhâwmnaa inhlei lova ngawi renga ṭhu tûra zirtîrnate leh, Bible zirpuite inkhâwma lo tel tûra hun pea kan va hruainate ang chi, eng emaw bîk atâna min fak hian kan ngaihlu lehzual,” tiin a sawi. Kohhran upate’n thil eng emaw  bîk atâna unaunute an fak hian, anni chu kohhranah ṭangkaina leh hlutna nei nia inhriatna a neihtîr a ni.

An thusawi an ngaihthlâksak. Kohhran upa inngaitlâwm takte chuan anmahni chauhvin ngaih dân ṭha an nei lo tih an hria a. Chutiang upa inngaitlâwm tak chuan unaunute hnênah thurâwn an dîl a, unaunute thusawi chu ngun takin an ngaihthlâksak a ni. Chutianga tihna chuan, unaunute chu a tihchak bâkah, upate ngei pawhin an hlâwkpui a ni. Engtin nge an hlâwkpui? Bethel-a rawngbâwl kohhran upa Gerardo-a chuan: “Unaunute thurâwn min pêkna avângin ka hnathawh a sâwt lehzual a. Anni chu unaupa a tâm zâwk aiin bethel-ah an lo thawk rei tawh zâwk tlângpui,” tiin a sawi. Kohhrana unaunu tam tak chuan pioneer nia rawng an bâwl avângin tualchhûng mite chungchâng an hre tam hle a. Kohhran upa Bryan-a chuan: “Kan unaunute chuan inawpna pâwlin a mamawh mize ṭhate leh thiamna tam tak an nei a. Chuvângin, an thiltawnte chu hlâwkpui rawh u!” tiin a sawi a ni.

Kohhran upa fing tak chuan unaunute thurâwn pêk chu a hnâwl nghâl mai lo. Engvângin nge? “Unaunute ngaih dân leh thiltawn chuan unaupate chu eng emaw chungchângah zau taka thil thlîr thiam tûra a ṭanpui theih bâkah, mi dangte dinhmun hre thiam tûrin a ṭanpui thei a ni,” tiin kohhran upa Edward-a chuan a sawi. (Thuf. 1:5) Upate chuan unaunute thurâwn pêk chu zawm a rem lo a nih pawhin, an thil hriatte leh hriatthiam dânte an hrilh avângin lâwmthu an sawi thei a ni.

Unaunute chu an zirtîr. Kohhran upa fing tak chuan unaunute zirtîr theihna hun remchâng a zawng a. Entîr nân, anni chuan unaunute chu baptisma chang tawh unaupate an awm loh huna thlawhhma rawngbâwlna inkhâwma kaihhruai dân an zirtîr thei a ni. Anni chuan unaunute chu biakna atâna in sakna leh thawm ṭhatna project-ahte ṭanpui thei tûrin hmanruate leh khâwlte hman dân an zirtîr thei a. Bethel-ah overseer-te chuan unaunute chu thawm ṭhatna te, thil lei dân kawng te, sum enkawl dân te leh, computer programming pawh tiamin mawhphurhna chi hrang hrang thawk thei tûrin an zirtîr a. Upate’n unaunute an zirtîr hian, theihna nei leh rinchhan tlâk nia an thlîrzia an târ lang a ni.

Unaunu tam tak chuan upate hnên aṭanga an dawn zirtîrnate chu mi dangte ṭanpui nân an hmang a. Entîr nân, unaunu ṭhenkhat chuan in sakna lama zirtîrna an dawnte chu leilung chhiatna tâwk unaute in sak ṭhatnaa ṭanpui nân an hmang a ni. Unaunu dangte chuan vântlâng hmuna thu hrilhnaa zirtîrna an dawnte hmangin, he rawngbâwlna bîka unaunu dangte tam lehzuala an tel theih nân an ṭanpui a. A nih leh, engtin nge unaunute chuan anmahni zirtîrtu kohhran upate chu an ngaih? Unaunu Jennifer-i chuan: “Kingdom Hall sakna project-a ka thawh lai chuan, overseer pakhat hian hun pein min zirtîr a. Ka hnathawhte min hriatpuiin, min fak a. Min ngaihlu a, min ring tâwk nia ka hriat avângin hnathawhpui chu nuam ka ti hle,” tiin a sawi a ni.

UNAUNUTE CHU CHHUNGKAW ZINGA MI ANGA CHEIBAWL AVANGA HLAWKNATE

Kan unaunu rinawm takte chu Jehova’n a hmangaih angin kan hmangaih a! Chuvângin, anni chu chhûngkaw zînga mite angin kan cheibâwl a ni. (1 Tim. 5:1, 2) Anmahni nêna rawng kan bâwl thei hi kan chhuangin, kan ngaihlu hle a. Chu bâkah, kan hmangaihin, kan thlâwp tih an hriat hian kan lâwm hle a ni. Unaunu Vanessa-i chuan: “Min tichaktu unaupa tam tak awmna Jehova inawpna pâwla ka tel theih avângin a chungah ka lâwm tak zet a ni,” tiin a sawi. Taiwan rama unaunu pawhin: “Jehova leh a inawpna pâwl chuan hmeichhiate an ngaihlu a, an rilru vei zâwngte an zahsak avângin ka lâwm tak zet a. Chu chuan ka rinna a tinghetin, Jehova inawpna pâwla mi nihna chanvo ka neih chu ngaihhlutna min neihtîr lehzual a ni,” tiin a sawi bawk.

Jehova chuan amah anga hmeichhiate ngaihlu a, zahtu Kristian mipa rinawmte a hmuh hian a va chhuang dâwn tak êm! (Thuf. 27:11) Scotland rama kohhran upa Benjamin-a chuan: “Tûn lai khawvêla mipa tam tak chuan hmeichhiate zahna chhe tê pawh an nei lo va. Chuvângin, Kingdom Hall-a hmeichhiate an rawn kal hian, zah leh hmangaih nia inhriatna neihtîr kan duh a ni,” tiin a sawi. Kan zavai hian kan unaunu duh takte chu an phû ang ngeia hmangaih leh zah taka cheibâwl tûra theih tâwp chhuahin, Jehova i entawn ṭheuh vang u.—Rom 12:10.