1-2. Jehova chhiahhlawh rinawmte’n eng harsatnate nge an tawh theih?

 THILTHLENG râpthlâk tak chuan zan khat thil thu-ah kan nun chu a thlâk danglam thawk thei a. Entîr nân, unau Luis-a a chuan cancer natna vâng tak chi khat a vei a. Doctor chuan thla rei lo te chhûng chauh a dam tûr thu a hrilh a ni. Monika-i leh a pasal chu thlarau lam thiltihnaahte an buai hle a. Mahse, ni khat chu kohhran upa ni bawk, a pasal chu nun chi hnihin a nung tih a hre ta a ni. Kawppui nei lo unaunu Olivia-i chu hurricane thlipui hlauhawm tak a tleh dâwn avângin a in chhuahsan tûra tih a ni a. A kîr leh chuan, a in chu thlipuiin a lo nuai chhe vek tawh a ni. Chûng unaute nun chu hun rei lo te chhûngin nasa takin a inthlâk danglam a. I nun thlâk danglam thawktu thil ṭha lo tak i tawng ve tawh em?

² Jehova chhiahhlawh rinawmte ni mah ila, mi dangte ang bawkin harsatnate leh hrisêl lohnate chu kan la tâwk reng a. Chu bâkah, Pathian mite hawtute hnên aṭangin dodâlnate leh tihduhdahnate kan tuar thei bawk. Jehova’n chûng harsatnate tâwk lo tûrin min vênghim lo mah se, ṭanpui min tiam a ni. (Is. 41:10) Hun harsa ber ber kârah pawh a ṭanpuina hmangin hlimna kan nei thei a, thu tlûkna ṭhate kan siam theiin a chungah kan rinawm reng thei a ni. He thuziakah hian, kan nuna hun thim berah pawh Jehova min ṭanpui dân kawng li kan bih chiang ang a. A ṭanpuina min pêkte hlâwkpui tûra kan tih ngaite pawh kan sawiho bawk ang.

 JEHOVA’N A VENGHIM ANG CHE

3. Thil râpthlâk tak kan tawh hunah, eng nge tih harsa kan tih theih?

³ Harsatna. Thil rapthlâk tak kan tawh hian, ngaihtuahna fîm tak neiha thu tlûkna siam chu a harsa thei a ni. Engvângin nge? Kan rilru a na ngawih ngawihin lungkhamnain min tlâk buak thei a. Kalna tûr chin pawh hmuh theih loh khawpa chhûm chhah mup kâra kal angin kan inhre thei a ni. Kan sawi tâk unaunu pahnihte’n harsatna an tawh laia an tawrh dân hi lo chhinchhiah ang che. Olivia-i chuan, “Hurricane thlipuiin ka in a nuai chhiat hnu chuan engmah nei tawh lo nia ka inhriat avângin ka hrilhhai hle a ni,” tiin a sawi. A pasalin a rinawm lohsanna chungchângah Monika-i chuan: “Sawifiah theih rual lohvin ka beidawng a. Ka rilru hi a na ngawih ngawih a. Nî tina ka tih ṭhinte pawh tih harsa ka ti a. Hetiang thil ka chunga a thlen hi ka ring ngai lo,” tiin a sawi. Hrilhhai taka kan awm hunah, engtin nge Jehova’n ṭanpui min tiam?

4. Philippi 4:6, 7-in a sawi angin, Jehova’n eng nge min tiam?

⁴ Jehova min ṭanpui dân. Ani chuan Bible-in “Pathian thlamuanna” tia a koh chu pêk min tiam a. (Philippi 4:6, 7 chhiar rawh.) He thlamuanna hian amah nêna inlaichînna hlu tak kan neihna aṭanga lo awm rilru hahdamna a kâwk a. Chu chu “rilru rêng rênga hriat sên loh” a nih avângin kan rin phâk bâkin thil a tithei a ni. Jehova hnêna tih tak zeta i ṭawngṭai hnuah hahdam ta huaiin i inhre ngai em? Chutianga inhriatna chu “Pathian thlamuanna” a ni.

5. Engtin nge Pathian thlamuannain kan rilru leh thinlung min vênsak?

⁵ Chu Bible châng vêk chuan Pathian thlamuannain “in thinlung leh in ngaihtuahnate” chu a humhimsak, a nih loh leh “a vênsak” ang che u tiin a sawi a. A tîra ziak “vênsak” tih thu mal hi sipaite tân bîka hman a ni a; beihna lak aṭanga khawpui vênghimtu sipaite tâna hman a ni. Vênhima awm khuaa mite chu thlamuang takin zânah an mu thei a. Chutiang bawkin, Pathian thlamuannain kan rilru leh thinlung min vênsak hian, him nia kan inhriat avângin rilru hahdamna kan nei a ni. (Sâm 4:8) Hani ang khân, keini pawh kan dinhmun chu inthlâk danglam nghâl lo mah se, thlamuanna eng emaw chen kan nei thei a. (1 Sam. 1:16-18) Kan rilru a hahdam hian ngaihtuahna fîm neih a, thu tlûkna fingte siam chu a awlsam lehzual a ni.

6. Pathian thlamuanna dawng tûrin eng nge kan tih theih? (Milem en bawk rawh.)

⁶ Kan tih tûr chu. Harsatna i tawh hunah vêngtu chu ko vang che. Engtin nge? Pathian  thlamuanna i neih hma loh ṭawngṭai ang che. (Lk. 11:9; 1 Thes. 5:17) Kan târ lan tâk Luis-a chuan thla rei lo te chhûng chauh a dam tûr thu a nupui Ana-i nên an hriat hnua an tawrh dân chu, heti hian a sawi a ni: “Hetiang dinhmunah hian hrisêlna leh thil dang chungchânga thu tlûkna siam chu thil harsa tak a ni a. Mahse, kan ṭawngṭai avângin thlamuanna kan nei thei a ni,” tiin. Luis-a te nupa chuan rilru thlamuanna pe tûr leh thu tlûkna ṭhate siam tûra finna pe tûrin, Jehova hnênah tih tak zeta vawi tam tak an ṭawngṭai thu an sawi a. A ṭanpuina dawng niin an inhre bawk a ni. Harsatna i hmachhawn a nih chuan, ṭawngṭai fan fan rawh; tichuan, Jehova thlamuannain i rilru leh thinlung a vênsak ang che.—Rom 12:12.

JEHOVA’N A TINGHET ANG CHE

7. Harsatna khirh tak kan tawh hunah engtin nge kan awm theih?

⁷ Harsatna. Harsatna khirh tak kan hmachhawn hian kan rilru ngaihtuahna leh thil kan chhân lêt dân chu tûn hma ang a ni lo thei a. Kan rilru chu a inthlâk thut thut thei a ni. Kan sawi tâk Ana-i chuan Luis-a thih hnuah chutianga a awm thu a sawi a. Ani chuan: “Ruak huai nia ka inhriat hian ka inkhawngaih ṭan a. Chutih rualin, min kalsan avângin ka thin a rim bawk,” tiin a sawi. Tichuan, mal ngawih ngawih nia a inhriat bâkah, Luis-a’n tlin taka a hlen ṭhin mawhphurhnate atân thu tlûkna a siam a ngai ta chu hrehawm a ti hle a ni. Tuipuia thli na tak tlehna hmuna awm anga inhriat châng a nei bawk. Chutianga kan awm hunah engtin nge Jehova’n min ṭanpui?

8. Sâm 16:8-in a sawi angin, Jehova’n eng nge min tiam?

⁸ Jehova min ṭanpui dân. Ani chuan tihngheh min tiam a. (Sâm 16:8 chhiar rawh.) Tuipuia thli na tak a tleh hian lawng chu nasa takin a inthên ṭhîn a. Chutianga a awm loh nân, lawngahte chuan a bang lehlam lehlamah tinghettu a awm a. Hêng tinghettute hian nasa taka lawng inthên tûr chu an vên mai bâkah, a chhûnga chuangte him tak leh nuam taka an chuan theih nân a ṭanpui bawk a ni. Mahse, lawngin hma lam a pan chauhvin chûng a tinghettute chuan ṭha takin hna an thawk thei a. Chutiang bawkin, harsatna kârah pawh rinawm taka hma lam kan pan chuan Jehova’n min tinghet ang.

9. Kan zir bingna hmanruate chuan kan rilru vei zâwngte thunun thei tûrin engtin nge min ṭanpui theih? (Milem en bawk rawh.)

⁹ Kan tih tûr chu. Thlipui na tak ang rilru hrehawmna i neih hunah, i thlarau lam hunduan vawng tûrin theih tâwp chhuah ang che. Tûn hma anga tamin i ti thei lo pawh  a ni thei; mahse, Jehova chu hriatthiamna nei tak a ni tih hre reng rawh. (Luka 21:1-4 nên khaikhin rawh.) I thlarau lam hunduanah chuan mi mal inzirna leh chhût ngunna atân hun insiam ang che. Engvângin nge? Jehova chuan a inawpna pâwl hmangin kan rilru awm dânte thunun tûra min ṭanpui tûrin thuziakte leh video ṭha tak takte min pe a ni. I mamawh ṭanpuina hmu tûrin JW Library^® app leh Jehova Thuhretute Tâna Zir Bingna Hmanrua chu i hmang thei a. Kan târ lan tak Monika-i chuan thlipui na tak ang rilru hrehawmna a neih apiangin zir bingna hmanruate chu a hmang ṭangkai a ni. Entîr nân, “thinurna” tih thu mal chu a zawng a. Ṭum dangah chuan “phatsanna” tih leh “rinawmna” tih thu malte a zawng bawk. Tichuan, a rilru hrehawmna a ziaawm thlengin chûngte chu a chhiar ṭhîn a ni. Ani chuan: “Zir bingna ka neih tirh chuan ka rilru a la hrehawm hle a. Mahse, ka chhiar zêl rualin, Jehova’n duat taka min kuah ang mai hian ka inhria a. Ka rilru vei zâwng chi hrang hrangte chu a hre thiamin, min ṭanpui tih ka hmu a ni,” tiin a sawi. Thlipui rehna hmuna thleng ang maia i rilru a hahdam thlenga inthunun tûrin Jehova’n a ṭanpui thei che a ni.—Sâm 119:143, 144.

JEHOVA’N A ṬANPUI ANG CHE

10. Thil râpthlâk tak kan tawh hnuah engtin nge kan awm theih?

¹⁰ Harsatna. Thil râpthlâk tak kan tawh hnu hian taksa leh rilru lamah kan chau hle thei a. Infiam mi tûn hmaa chak taka tlân thei, hliam tawrh avânga kal pawh kal ṭha thei tawh lo ang mai niin kan inhre thei a ni. Tûn hmaa awlsam taka kan tih ṭhinte chu tih harsa kan tiin, nuam kan tih ṭhinte pawh tih châkna kan nei tawh lo thei a. Elija angin, tho peih lovin mut mai mai kan duh pawh a ni thei a ni. (1 Lal. 19:5-7) Kan chauh hunah Jehova’n eng nge tihsak min tiam?

11. Jehova min ṭanpui dân kawng dang chu eng nge ni? (Sâm 94:18)

¹¹ Jehova min ṭanpui dân. Ani chuan min ṭanpui a tiam a. (Sâm 94:18 chhiar rawh.) Infiam mi, hliam tuarin tlân leh thei tûra ṭanpuina a mamawh ang bawkin, Jehova rawngbâwlnaa tel leh thei tûrin ṭanpuina kan mamawh thei a ni. Chutiang hunah chuan, Jehova’n: “Kei LALPA in Pathian hian, ‘Hlau suh u, ka ṭanpui dâwn a che u,’ tiin, in kut ding lam chu ka chelh dâwn si a,” tiin min tiam a ni. (Is. 41:13) Lal Davida chuan chutiang ṭanpuina chu a dawng a. Harsatnate leh hmêlmate a hmachhawn khân, Jehova  hnênah: “I kut ding lamin mi kai a,” tiin a sawi a ni. (Sâm 18:35) A nih leh, engtin nge Jehova’n ṭanpuina min pêk?

12. Kan chauh hunah min ṭanpui tûrin tute nge Jehova’n a hman theih?

¹² Jehova chuan min pui tûra mi dangte chêttîrna hmangin ṭanpuina min pe ṭhîn a. Entîr nân, ṭum khat chu Davida a chauh hle laiin, a ṭhian Jonathana chu amah tichak tûr leh fuih tûrin a hnênah a kal a ni. (1 Sam. 23:16, 17) Chutiang bawkin, Elija ṭanpui tûrin Jehova’n Elisa chu a ruat a. (1 Lal. 19:16, 21; 2 Lal. 2:2) Tûn laiah pawh min ṭanpui tûrin kan chhûngkua zînga mite, kan ṭhiante leh, kohhran upate chu a hmang thei a ni. Amaherawh chu, rilru natna kan neih hian mahni chauhva awm kan duh thei a. Chu chu thil pângngai tak a ni. A nih chuan, Jehova ṭanpuina dawng tûrin eng nge kan tih theih?

13. Jehova ṭanpuina hlâwkpui tûrin eng nge kan tih ngai? (Milem en bawk rawh.)

¹³ Kan tih tûr chu. Mahni chauhva awm duhna chu pumpelh ang che. Mahni chauhva kan awm hian kan ngaihtuahna a kal bing theiin, keimahni leh kan buainate chauh kan ngaihven ṭan thei a. Chutiang ngaihtuahna chuan kan thu tlûkna siamte a nghawng thei a ni. (Thuf. 18:1) Thil râpthlâk takte kan tawh hian mahnia awm a ṭûl châng a awm ngei mai. Mahse, mahnia awm nân hun kan hmang tam lutuk a nih chuan, min ṭanpui tûra Jehova mi hmante chu kan hnâwl palh thei a ni. Chuvângin, dinhmun khirh tak i tawh hunah i chhûngte, i ṭhiante leh, upate ṭanpuina chu pawm ang che. Anni chu nangmah ṭanpui tûr chea Jehova mi hmante an ni tih hre bawk ang che.—Thuf. 17:17; Is. 32:1, 2.

JEHOVA’N A THLAMUAN ANG CHE

14. Hlauhna min thlen thei eng dinhmunte nge kan tawh theih?

¹⁴ Harsatna. Hlauhna min thlen thei thilte kan tawng thei a. Bible-ah hian Pathian chhiahhlawh rinawmte’n an hmêlmate leh thil dangte avânga rilru mangang leh hlauva an awm thu an sawite chu târ lan a ni. (Sâm 18:4; 55:1, 5) Chutiang bawkin, keini pawhin school-ah te, hnathawhnaah te, chhûngte hnên aṭang te, leh sâwrkâr hnên aṭangtein dodâlna kan tâwk thei a. Dam lohna avângin thih kan hlau hle pawh a ni thei. Chutiang hunah chuan, naupang engmah ti thei lo ang mai niin kan inhre thei a ni. A nih leh, engtin nge Jehova’n min ṭanpui?

15. Sâm 94:19-in eng nge min tiam?

¹⁵ Jehova min ṭanpui dân. Ani chuan min  thlamuanin min chhâwk zângkhai a. (Sâm 94:19 chhiar rawh.) He Fakna hla thu hian thlî nasa taka a tleh avânga hlauva mu thei lova awm, hmeichhe naupang pakhat chu min ngaihtuahtîr thei a ni. A pa chuan lo kalin a rawn pawm a, a muthilh thleng a kuah lai chu kan mitthla thei a. Thlipui chu la tleh reng mah se, a pa ṭâng laiah thlamuang takin a awm a ni. Hlauhna min thlen thei harsatnate kan tawh hunah, kan hlauhna a reh hma loh kan Pa vâna miin entîr neia a ṭâng laia min kuah chu kan mamawh thei a. Engtin nge Jehova hnên aṭangin chutiang thlamuanna chu kan dawn theih ang?

16. Jehova thlamuanna hlâwkpui tûrin eng nge kan tih theih? (Milem en bawk rawh.)

¹⁶ Kan tih tûr chu. Jehova hnênah ṭawngṭai ziahin leh a Thu chhiar ziahin amah nên hun hmang ṭhîn ang che. (Sâm 77:1, 12-14) Chutianga i tih chuan, rilru hahna nasa tak i neih hunah i Pa vâna mi pan chu i rilruah a lang hmasa ber dâwn a ni. I hlauhnate leh lungkhamnate chu a hnênah hrilh ang che. A Thu chhiarna hmangin a thusawi ngaithla la; tichuan, a thlamuan dân che chu i hmu ang. (Sâm 119:28) Bible thu ṭhenkhat chuan, a bîk takin hlauhna i neih hunah a thlamuan thei che a. Entîr nân, Joba bute, Sâm bute, Thufingte bu leh, Matthaia bung 6-a Isua thusawite aṭangin chakna i hmu thei a. Jehova hnêna ṭawngṭaina leh a Thu chhiarna hmangin a thlamuanna chu i dawng thei a ni.

17. Eng nge kan rin ngheh tlat theih?

¹⁷ Kan nuna hun thim berahte pawh min ṭanpui tûrin Jehova a awm tih kan ring nghet tlat thei a. Engtikah mah kan mal ngai lo vang. (Sâm 23:4; 94:14) Jehova chuan vênhim, tihngheh, ṭanpui leh, thlamuan min tiam a. Jehova chungchângah Isaia 26:3 chuan: “I chunga rilru nghattu chu, nangmah a rin che avângin, thlamuang tak maia awm tûrin i vêng ang,” tiin a sawi a ni. Chuvângin, Jehova chu rinchhan la, a ṭanpuina pêk che chu hmang ṭangkai ang che. Chutianga i tih chuan, hun harsa tak kârah pawh chakna i nei leh thei dâwn a ni.