1. Jehova chungchâng i ngaihtuah hian eng nge i rilruah lo lang?

 JEHOVA chu eng ang mi nge a nih tih i ngaihtuah tawh ngai em? Ṭawngṭaia amah i biak hunah eng nge i rilruah lo lang ṭhîn? Ani chu mita hmuh theih loh ni mah se, Bible chuan kawng chi hrang hrangin a târ lang a. Jehova chu “nî leh phaw” leh “kanralhmang mei” tia koh a ni. (Sâm 84:11; Heb. 12:29) Ezekiela chuan ani chu sapphir lung, ṭhihna puak sur ang leh, chhimbâl angin a târ lang a. (Ezek. 1:26-28) Jehova chungchânga chûng târ lanna ṭhenkhat chuan mak min tihtîrin, hlauhna min neihtîr hial thei a ni.

2. Engin nge kan tân Jehova hnaih tiharsa thei?

² Jehova chu kan hmuh theih loh avângin min hmangaih tih rin chu harsa kan ti thei a. Mi ṭhenkhat chuan tûn hmaa nuna an thiltawnte avângin Jehova’n a hmangaih theih an ring lo va. Anmahni hmangaihtu pa an nei lo pawh a ni thei. Jehova chuan kan rilru ngaihtuahnate leh amah hnaih harsa kan tih chhante a hre thiam a. Amah hnaih tûra min ṭanpui tûrin a Thu, Bible-ah a mize duhawm tak takte a târ lang a ni.

3. Engvângin nge Jehova hmangaihna chu ngun taka kan bih chian a ngaih?

³ Jehova nihna târ lanna ṭha ber chu thu mal khata sawi chuan hmangaihna a ni a. (1 Joh. 4:8) Hmangaihna chuan a nihna engkim a hrilhfiah a ni. Chu chuan a thiltih engkim a thunun a. Pathian hmangaihna chu a nasat êm avângin amah hmangaih lotute chungah pawh hmangaihna a lantîr a ni. (Mt. 5:44, 45) He thuziakah hian, Jehova leh a hmangaihna chungchâng ngun takin kan bih chiang ang. Kan Pathian chungchâng chu kan zir tam poh leh amah kan hmangaihna pawh a nasa lehzual ang.

JEHOVA’N MIN HMANGAIH HLE

4. Engtin nge Jehova hmangaihna chuan a awmtîr che? (Milem en bawk rawh.)

⁴ ‘Jehova chu khawngaihnain a khat a.’ (Jak. 5:11) Ani chuan  Bible-ah hmangaihna ngah tak nu nên a intehkhin a ni. (Is. 66:12, 13) Duat taka a fa enkawltu nu pakhat chu han mitthla teh. Ani chuan a fa chu duat taka pawmin, aw nêm tak leh dam takin a bia a. A ṭah hunah emaw, na a neih hunah emaw a ngaihsak vat a ni. Keini pawhin kan mangan hunah Jehova hmangaihna chu kan rinchhan thei a. Fakna hla phuahtu chuan: “Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn,” tiin a ziak a ni.—Sâm 94:19.

5. Jehova hmangaihna rinawm chuan i tân eng awmzia nge a neih?

⁵ Jehova chu a rinawm a ni. (Sâm 103:8) Thil tihsual engemaw kan neih hian kan chungah a beidawng mai lo. Israel mite chuan Jehova chu vawi tam tak an tilungni lo va; mahse, ani chuan: “Ka ngaiha hlu tak in niha, mi zahawm tak in nih bawka, ka hmangaih bawk che u,” tih thute hmangin a mi inlamlêtte chunga a hmangaihna dai ngai lo chu a lantîr a ni. (Is. 43:4, 5) Pathian hmangaihna chu a danglam ngai lo. Chu chu kan rinchhan thei reng a ni. Thil sual lian tak kan tih hunah pawh Jehova chuan min kalsan lo va. Inchhîra a lama kan kîr chuan, min la hmangaih reng tih kan hria ang. Ani chuan min “ngaidam nasa khawp dâwn” tih min tiam a. (Is. 55:7) Bible chuan chu a ngaihdamnain “Lalpa hnên ata harh hunte” a thlen tih a târ lang a ni.—Tirh. 3:19.

6. Zakaria 2:8 chuan Jehova chungchâng eng nge min zirtîr?

⁶ Zakaria 2:8 chhiar rawh. Jehova chuan min hmangaih avângin, kan rilru awm dânte a hriain, min vênhim a duh a. Rilru natna kan neih hunah ani pawhin min tawrhpui a. Chuvângin, keini pawhin: “I mitnaute angin min vêng tlat la,” tiin kan ṭawngṭai ve thei a ni. (Sâm 17:8, C.L. Re-edited.) Kan mit chu kan taksa pêng no tak leh pawimawh tak a ni a. Chuvângin, Jehova’n a mitnautê nêna min khaikhin hian, ‘Ka mite u, nangmahni ti natu chuan ka taksa pêng pawimawh tak a tina a ni,’ tia sawi ang a ni.

7. Engvângin nge Jehova hmangaihna kan rinchhanna chu kan tihngheh a ngaih?

⁷ Jehova chuan mi mal takin min hmangaih tih kan rin chu a duh a. Mahse, tûn hmaa kan thiltawnte avângin min hmangaih theih tak tak leh tak tak loh kan ngaihtuah thei tih a hria a. A nih loh leh, a hmangaihna kan rinchhanna fiah thei dinhmun kan tâwk mêk pawh a ni thei  a ni. Engin nge kan rinchhanna chu tinghet ang? Jehova’n Isua, hriak thihte leh kan zavaia chunga a hmangaihna a lantîr dân zir chian hi a ni.

JEHOVA’N A HMANGAIHNA A LANTIR DAN

8. Engvângin nge Isua chuan a Pa hmangaihna chu a rin ngheh tlat?

⁸ Jehova leh a Fapa duh tak chuan kum chhiar sên loh chhûng hmangaihna thûk tak neiin inlaichînna ṭha tak an lo nei tawh a. An inlaichînna chu lei leh vâna awm hmasa ber leh nghet ber a ni. Matthaia 17:5-a sawi angin, Jehova chuan Isua a hmangaihna chu chiang takin a târ lang a. Ani chuan, ‘Hei hi ka lawm êm êma chu a ni,’ tiin a sawi thei a. Mahse, Isua a hmangaihzia kan hriat a duh avângin, ani chu “ka Fapa duh tak,” tiin a ko va ni. Jehova chuan Isua chu a chhuang tak zet a; a bîk takin, a nun pêk a inhuam avângin a chhuang lehzual a ni. (Eph. 1:7) Isua chuan a Pa hmangaihna chu a ringhlel ngai lo va. Jehova’n a hmangaih tih a chian êm avângin chu hmangaihna chuan a thinlungah hmun thûk tak a luah a ni. A Pa-in a hmangaih tih chu inrin tâwkna nei takin a târ lang fo va ni.—Joh. 3:35; 10:17; 17:24.

9. Hriak thihte chunga Jehova hmangaihna chu eng thu mal hmanga târ lan nge a nih? Hrilhfiah rawh. (Rom 5:5)

⁹ Jehova chuan hriak thihte a hmangaihna pawh a târ lang a. (Rom 5:5 chhiar rawh.) “Leih” tih thu mal hi chhinchhiah ang che. Zir chianna pakhat chuan chu thu mal chu “lui tui angin kan chungah a leih,” tiin a hrilhfiah a ni. Hriak thihte chunga Jehova hmangaihna târ lanna ropui tak a va ni êm! Chûng hriak thihte chuan ‘Pathianin a hmangaih’ tih an hria a. (Jud. 1) Tirhkoh Johana chuan an rilru awm dân chu: “Ngai teh u, Pain min hmangaihna chu a va nasa êm! ‘Pathian faahte’ min vuah tâk hi,” tiin a ziak a ni. (1 Joh. 3:1) Jehova chuan hriak thihte chauh a hmangaih tihna a ni em? Ni lo ve, kan zavaia chungah a hmangaihna a lantîr a ni.

10. Jehova’n a hmangaih che tih a lantîr dân ropui ber chu eng nge ni?

¹⁰ Jehova hmangaihna finfiahna ropui ber chu eng nge? Tlanna—lei leh vâna hmangaihna thiltih ropui ber chu! (Joh. 3:16; Rom 5:8) Ani chuan a fapa duh tak chu kan sualte ngaihdam a nih theih nân leh a ṭhian kan nih theih nân mi zawng zawng tâna thi tûrin a pe a. (1 Joh. 4:10) Jehova leh Isua’n tlanna atâna man an pêk chu kan chhût ngun poh leh mi tinte min hmangaihzia kan hre thiam lehzual thei a ni. (Gal. 2:20) Tlanna chu Jehova rorêl diknain a phût avâng chauhva pêk a ni lo va. Hmangaihna thilpêk a ni. Ani chuan a neih hlu ber—Isua chu hlânin, min hmangaihzia a lantîr a. A Fapa chu kan tâna hrehawm tuar a, thih a phal a ni.

11. Jeremia 31:3-na aṭangin eng nge kan zir theih?

¹¹ Kan hriat tawh angin, Jehova chuan a rilru awm dânte chu ngawihpui mai lovin, min hmangaihzia chu a sawi chhuak a. (Jeremia 31:3 chhiar rawh.) Ani chuan min hmangaih avângin a lamah min hîp a ni. (Deuteronomy 7:7, 8 nên khaikhin rawh.) Eng thil mahin, tu mahin chu hmangaihna ata chu min ṭhen thei lo vang. (Rom 8:38, 39) Chu hmangaihna chuan engtin nge a awmtîr che? Sâm 23 chhiar la, tichuan, Jehova hmangaihna leh ngaihsaknain Davida chunga nghawng a neih dân leh kan zavaia chunga nghawng a neih theih dân hria ang che.

ENGTIN NGE JEHOVA HMANGAIHNA CHUAN A AWMTIR CHE?

12. Sâm 23-na chu engtin nge i khaikhâwm ang?

¹² Sâm 23:1-6 chhiar rawh. Sâm 23-na chu Jehova hmangaihna leh ngaihsakna rinnghehna târ lanna hla a ni a. Fakna hla phuahtu Davida chuan amah leh a Berâmpu Jehova inkâra inlaichînna nghet tak chu a târ lang a ni.  Ani chuan Jehova a inkaihhruaitîr avângin him niin a inhria a. Chuvângin, ani chu a rinchhan pumhlûm a ni. Jehova’n a hmangaihna chu a chungah nî tin a lantîr dâwn tih a hria a. Engin nge Davida chu rinnghehna neihtîr?

13. Engvângin nge Davida chuan Jehova’n a ngaihsak tih a chian?

¹³ “Ka tlachham lo vang.” Jehova’n a mamawh zawng zawng a pêk ṭhin avângin Davida chuan ṭha taka ngaihsak niin a inhria a. Ani chuan Jehova nêna inṭhian ṭhatna neiin a duhsak a hlawh bawk. Chuvângin, nakin hunah eng thil pawh thleng mah se, a mamawhte chu Jehova’n a ngaihsak chhunzawm zêl ang tih a chiang a ni. Davida chuan Jehova’n a hmangaih tih leh a ngaihsak reng dâwn tih a rin tlat avângin, chu chuan lungkhamna nei lova, hlimna leh lungawina nei tûrin a ṭanpui a ni.—Sâm 16:11.

14. Engtin nge Jehova’n hmangaih taka min ngaihsak ṭhin?

¹⁴ Jehova’n hmangaihna nei takin min ngaihsak a; a bîk takin, kan nuna thil ṭha lo a thlen hian a ni lehzual a ni. Bethel-a kum 20 aia tam lo thawk tawh Unaunu Claire-i a chuan a chhûngte’n harsatnate chu a indawta an tawh chuan a hrilhhai hle a. A pa chu a zeng ta thut a, a unaunu chu hnawhchhuah a nih bâkah, an chhûngkaw sumdâwnna leh chênna in pawh an chân a ni. Engtin nge Jehova’n anni chu a ngaihsakzia a lantîr? Unaunu Claire-i chuan: “Ka chhûngte chu nî tina an mamawh apiang a pe ṭhîn a. Ṭum tam tak chu ka ngaihtuah phâk bâk aia tamin min pe ṭhîn! Jehova min ngaihsak dân chu ka ngaihtuah lêt ṭhîn a, min hmangaihzia chu ka theihnghilh ngai lo vang. Chûng ka thiltawnte chuan harsatnate ka tawh  hunah beidawng lo tûrin min ṭanpui a ni,” tiin a sawi.

15. Engvângin nge Davida chu tihharh thara a awm? (Milem en bawk rawh.)

¹⁵ “Ka nunna hi mi siam ṭhat [a tiharh thar leh] ṭhîn a.” Davida chuan buainate leh harsatna a tawhte avângin mangan châng a nei a. (Sâm 18:4-6) Mahse, Jehova hmangaihna leh ngaihsakna chuan a tiharh thar leh ṭhîn a ni. Jehova chuan a ṭhian chau tak chu “hlobet hring dup hmunahte” leh “chawlhna tui kamahte” a hruai ṭhîn a ni. Chuvângin, Davida chuan chakna a nei thar leh a, hlim takin Jehova rawng a bâwl chhunzawm leh thei a ni.—Sâm 18:28-32.

16. Engtin nge Jehova hmangaihna chuan a tihharh tawh che?

¹⁶ Chutiang bawkin, tûn laiah pawh nuna harsatna leh hrehawmnate kan tawh huna ‘tihborala kan awm lo hi LALPA zahngaihna a lo ni.’ (ṬH. 3:22; Kol. 1:10-12) Unaunu Rachel-i thiltawn hi han ngaihtuah teh. Ani chuan COVID-19 hripui a lên chhûng khân a pasalin amah leh Jehova a phatsan avângin a tuar hle a. Eng nge Jehova’n a tân a tihsak? Ani chuan: “Jehova’n hmangaih nia inhre tûrin min ṭanpui a. Min ngaihsaktu ṭhian ṭhate min pe a, anni chuan hunte min hmanpuiin ei tûrte min rawn ken a, min tichak thei Bible châng leh thute min thawn a, min nuihin, Jehova’n min ngaihsak tih min hriat nawntîr ṭhîn a. Jehova’n hmangaihna nei chhûngkaw hung tak min pêk avângin a hnênah lâwmthu ka hrilh ṭhîn a ni,” tiin a sawi.

17. Engvângin nge Davida chuan ‘thil ṭha lo rêng rêng a hlauh loh’?

¹⁷ “Thil ṭha lo rêng rêng ka hlau lo vang; nang ka hnênah i awm si a.” Davida nun chu dinhmun hlauhawm takah a awm ṭhîn a, hmêlma thiltithei tak tam tak a nei bawk. Mahse, Jehova hmangaihna chuan him leh vênhim nia inhriatna a neihtîr a ni. Ani chuan Jehova’n a awmpui reng tih a hria a, chu chuan, thlamuanna a neihtîr a ni. Chuvângin, ani chu: “Ka hlauhzâwng zawng zawng lakah chuan [Jehova’n] mi chhanhim ta a,” tiin a zai thei a ni. (Sâm 34:4) Davida chuan hlauh châng nei mah se, Jehova’n a hmangaih tih a hriat avângin a hlauhnate chu a hneh thei a ni.

18. Hlauhna i neih hunah Jehova’n a hmangaih che tih i hriatna chuan engtin nge a tihchak che?

¹⁸ Dinhmun hlauhawm takte kan hmachhawn hunah Jehova’n min hmangaih tih hriatna chuan engtin nge min tihchak? Pioneer  Unaunu Susi-i chuan an fapa mahni a intihhlum avânga a pasal nêna an tawrh dân chu heti hian a sawi a ni: “Beisei loh taka harsatna râpthlâk tak tawhna chuan nasa takin min nghawng a, chu chuan tih theih engmah nei lo anga inhriatna min neihtîrin, hlauhthâwnna nasa tak min neihtîr a. Mahse, Jehova hmangaihna chuan him leh ngaihsak nia inhriatna min neihtîr a ni,” tiin. Kan târ lan tâk Unaunu Rachel-i chuan: “Zan khat chu ka rilru a nain, ka hlauvin, ka mangang hle a, nasa taka ṭapin Jehova hnênah ka ṭawngṭai a. Chu veleh, nuin a nautê a awi tlei ang maiin ani chuan rilru hahdamna min pe a, ka muhîl thei ta a ni. Chumi hun chu ka theihnghilh thei ngai lo vang,” tiin a sawi a ni. Kohhran upa Unau Tasos-a chu sipaia a ṭan duh loh avângin tân inah kum li chhûng khung a ni a. Engtin nge ani chuan Jehova hmangaihna leh ngaihsakna a dawn? Ani chuan: “Jehova’n ka mamawh aia tam min pe a. Chu chuan amah ka rinchhan pumhlûm thei tih ka rinna chu a tinghet a ni. Chu bâkah, a thlarau thianghlim hmangin Jehova chuan beidawnna hmunah pawh lâwmna min pe a. Chu chuan amah ka hnaih poh leh a hmangaihna ka dawng lehzual dâwn tih min hriat chiantîr a. Chuvângin, tân ina ka awm lai aṭangin regular pioneer angin a rawng ka bâwl ṭan a ni,” tiin a sawi.

HMANGAIHNA PATHIAN CHU HNAIH RAWH

19. (a) Pathianin min hmangaih tih kan hriat chuan engtin nge kan ṭawngṭai ang? (b) Jehova hmangaihna târ lanna zîngah engin nge i rilru khawih ber? (“ Jehova Hmangaihna Duhawm Tak Dawng Nia Inhriatna Nei Tûra Min Ṭanpui Thei Thute,” tih bâwm chu en ang che.)

¹⁹ Kan sawiho tâk thiltawnte chuan ‘hmangaihna Pathian,’ Jehova chuan min awmpui tih a finfiah chiang hle! (2 Kor. 13:11) Ani chuan mi mal takin min ngaihven ṭheuh a ni. A ‘ngilneihna [hmangaihna rinawm, NWT] hual vêlin kan awm’ tih kan ring nghet tlat a ni. (Sâm 32:10) Kan chunga hmangaihna a lantîr dân kan chhût ngun poh leh ani chu kan tân a tak lehzualin, kan hnaih lehzual a. Ani chu zalên takin kan pan thei a, a hmangaihna kan mamawhzia kan hrilh thei bawk a ni. Min hre thiamin, min ṭanpui a duh tih kan rin ngheh tlat avângin, kan manganna zawng zawng kan hrilh thei a ni.—Sâm 145:18, 19.

20. Engtin nge Jehova hmangaihna chuan a lama min hîp?

²⁰ Thlasik khaw vâwt tak kâra lumna min petu mei angin, Jehova hmangaihna chuan harsatnate leh dinhmun khirh takte kan hmachhawn hunah thlamuanna min pe thei a. Chuvângin, thlamuanna leh hahdamna pe theitu Jehova hmangaihna chu pawm ang che. “LALPA chu ka hmangaih a ni,” tia sawiin a hmangaihna chu i chhâng lêt ṭheuh vang u!—Sâm 116:1.