ZIR TUR THUZIAK 30
HLA 36 Thinlung Kan Vêng Ṭha
Israel Lalte Hnên Aṭanga Kan Zir Theih Thil Pawimawhte
“Mi fel leh mi suaksual, Pathian rawngbâwltu leh bâwl lotu chu in thliar thei tawh ang.”—MAL. 3:18.
A TUM BER
Jehova’n Israel lalte a thlîr dân chungchâng zirna aṭangin kan laka a thil beiseite hriatthiam.
1-2. Bible-in Israel lal ṭhenkhatte chungchângah eng nge a târ lan?
BIBLE chuan Israel lal 40 aia tam chungchâng a târ lang a. a An zînga ṭhenkhatte thiltih chu dik takin a târ lang bawk a ni. Entir nân, lal ṭha ṭhenkhatte pawhin thil ṭha lo an ti a. Lal ṭha Davida chungchâng hi lo ngaihtuah ta ila, a chungchângah Jehova chuan: “Ka chhiahhlawh Davida . . . zawngin ka thupêkte a pawm a, ka mit hmuha thil ṭha chauh tih tumin a thinlung zawng zawngin mi zui ṭhîn,” tiin a sawi a. (1 Lal. 14:8) Mahse, ani chuan mi nupui a uire bâkah, a pasal chu indonaa tihlum tûrin a phiarru bawk a ni.—2 Sam. 11:4, 14, 15.
2 Kawng leh lamah chuan, lal rinawm lo tam takte pawhin thil ṭha ṭhenkhat an ti a. Rehoboama chungchâng hi han ngaihtuah teh. Jehova mithmuhah “thil ṭha lo” a ti a. (2 Chro. 12:14) Mahse, ani chuan Pathian thu zâwmin, hnam sâwmte chu a lalram aṭangin an inlâk hran a phal a. Chu bâkah, khuate chu din nghetin a mite tân thil ṭha a ti bawk a ni.—1 Lal. 12:21-24; 2 Chro. 11:5-12.
3. Eng zawhna pawimawh tak nge awm a, he thuziakah hian eng chungchâng nge kan sawiho vang?
3 Zawhna pawimawh tak a awm a. Israel lalte’n thil ṭha leh ṭha lote an ti a nih chuan, eng ṭanchhanin nge Jehova’n lal tu emaw chu a mithmuha rinawm tak nia a thlîr? Chu zawhna chhânna chuan, Jehova’n kan laka a thil beisei chu hre thiam tûrin min ṭanpui dâwn a ni. Jehova’n Israel lalte chungchâng a ngaihtuah laia a ṭanchhan thil pathumte kan sawiho vang: an thinlung dinhmun, an inchhîrna leh, biakna dik an vawnna te chu.
AN THINLUNG ZAWNG ZAWNGIN JEHOVA RAWNG AN BAWL
4. Lal rinawmte leh rinawm lote inan lohna pakhat chu eng nge ni?
4 Jehova tilâwmtu lalte chuan an thinlung zawng zawngin a rawng an bâwl a. b Lal ṭha Jehosaphata chuan ‘a thinlung zawng zawngin Jehova a zawng a ni.’ (2 Chro. 22:9) Bible chuan Josia chungchângah: “Thinlung . . . zawng zawnga LALPA pawm, amah ang reng reng a hmaa lal tu mah an awm lo,” tiin a sawi a ni. (2 Lal. 23:25) A upat hnua thil sual titu Solomona chungchâng hi eng nge ni ve? “A thinlung chu a lo ṭha famkim ta lo va.” (1 Lal. 11:4) Lal rinawm lo dang Abijama chungchângah Bible chuan: “A thinlung chu LALPA a Pathian lamah a ṭha famkim ve lo,” tiin a sawi bawk a ni.—1 Lal. 15:3.
5. Thinlung zawng zawnga Jehova rawngbâwl tih awmzia chu hrilhfiah rawh.
5 A nih chuan, thinlung zawng zawnga Jehova rawngbâwl tih awmzia chu eng nge ni? Thinlung zawng zawnga Jehova rawngbâwltu chuan tih tûr a nih avâng maia amah chu be lovin, Jehova a hmangaih avâng leh a zah avângin a rawng a bâwl a. Chu bâkah, chu a hmangaihna leh zahna chu a dam chhûngin a vawng reng a ni.
6. Engtin nge thinlung zawng zawnga Jehova hmangaihna chu kan vawn tlat theih? (Thufingte 4:23; Matthaia 5:29, 30)
6 Engtin nge thinlung zawng zawnga Jehova hmangaihtu lal rinawmte chu kan entawn theih? Thununna ṭha lote pumpelhna hmangin a ni. Entîr nân, intihhlimna ṭha lote, ṭhian ṭha lote leh, sum ngainatnate chuan kan thinlung a hruai pêng thei a. Eng emawin Jehova kan hmangaihna a tidai nia kan hriat chuan, chumi paih bo tûr chuan rang takin hma i la vat ang u.—Thufingte 4:23; Matthaia 5:29, 30 chhiar rawh.
7. Engvângin nge thununna ṭha lote pumpelh chu a pawimawh?
7 Kan thinlung chu hruai pên kan phal tûr a ni lo. Kan fîmkhur loh chuan, thlarau lam thiltiha tam lehzuala kan inhman hian thununna ṭha lote chu kan do a ngai lo tih ngaih dân neiin kan inbum thei a. Thlasik tûk, khaw vâwt tak kâra pâwna awm angin han inmitthla teh. In i thlen hnu chuan mei lum i ai a; mahse, kawngkapui chu inhawng rengin dah ta la, eng thil nge thleng ang? Pâwn boruak vâwt tak chuan i in chhûng chu a rawn tivâwt thuai ang. Chutiang bawkin, Jehova min hnaihtîrtu thilte tih mai chu a tâwk lo va, pâwn boruak vâwt tak in chhûnga a lo luh kan duh loh ang bawkin, he khawvêlin a chawi lâr thil eng pawh lakah kan invên a ngai a. Chuvângin, he khawvêl “boruak” vâwt tak, a nih loh leh Pathian ngaihsak lohna chu kan thinlung chhûnga a luh a, min hruai pên lohna tûrin thununnna ṭha lote chu kan pumpelh a ngai a ni.—Eph. 2:2.
AN THIL TIHSUALAH AN INCHHIR
8-9. Engtin nge Lal Davida leh Lal Hezekia’n zilhna chu an chhân lêt? (A kâwma milem en rawh.)
8 Târ lan tâk angin Lal Davida chuan sual lian tak a ti a. Mahse, zâwlnei Nathana’n a thil tihsual chungchâng a hrilh khân, inngaitlâwm takin a inchhîr a ni. (2 Sam. 12:13) Davida chu Sâm 51-naa a thuziahte aṭangin a inchhîr tak zet tih kan hre thei a. Nathana bum nân emaw, hremna pumpelh nân emaw a dera inchhîr a ni lo.—Sâm 51:3, 4, 17, a chunga thuziak.
9 Lal Hezekia pawhin Jehova lakah thil a tisual a. Bible chuan: “A rilru a lo chapo tâk avângin; chuvângin, a chungah leh Juda-te leh Jerusalem chungah thinurna a lo thleng ta a,” tiin a sawi a ni. (2 Chro. 32:25) Engvângin nge Hezekia chu a lo chapo? A hausakna, Assuria mite chunga hnehna, a nih loh leh mak danglam taka tihdam a nihnate avângin mi dangte aia ropui zâwkah a inngai pawh a ni thei a. A chapona chuan Babulon mite hnênah a hausakna zawng zawng entîr tûrin a chêttîr pawh a ni thei a. Chuvângin, a hnuah zâwlnei Isaia’n ani chu a zilh a ni. (2 Lal. 20:12-18) Davida angin, Hezekia pawhin inngaitlâwm takin inchhîrna a lantîr a. (2 Chro. 32:26) Chuvângin, Jehova’n ani chu ‘thil ṭha tak ti ṭhîn’ lal rinawm tak angin a thlîr a ni.—2 Lal. 18:3.
Lal Davida leh Lal Hezekia te chu an thil tihsual avânga zilh an nihin inngaitlâwm takin an inchhîr (Paragraph 8-9-na en rawh)
10. Engtin nge Lal Amazia’n zilhna chu a chhân lêt?
10 Davida leh Hezekia ang lo takin, Juda Lal Amazia chuan thil ṭha a ti a, “amaherawhchu a rilru a pe famkim lo.” (2 Chro. 25:2) Eng nge a tihsual? Jehova’n Edom mite hneh tûra a ṭanpui hnuah, an pathiante chu chibai a bûk a. c A hnuah, Jehova zâwlnei zilhna chu luhlul takin a hnâwl a ni.—2 Chro. 25:14-16.
11. Korinth thawn hnih 7:9, 11-nain a sawi angin, ngaihdamna dawng tûrin eng nge kan tih ngai? (Milem en bawk rawh.)
11 Chûng entîrnate aṭang chuan eng nge kan zir? Kan thil tihsualahte kan inchhîr a, ti nawn tawh lo tûra theih tâwp kan chhuah a ngai a ni. Thil tê tham anga langah pawh, kohhran upate zilh tâwk ta ila engtin nge ni ang? Jehova leh upate’n min hnâwl angin kan ngai tûr a ni lo. Israel lal ṭhate pawh kha zilh leh fuih an ngai a ni. (Heb. 12:6) Zilh kan nih hunah (1) inngaitlâwm takin kan chhâng lêt tûr a ni a, (2) a ṭûl anga kan inthlâk danglam bâkah, (3) thinlung zawng zawngin Jehova rawng kan bâwl chhunzawm zêl tûr a ni. Kan thil tihsualahte kan inchhîr a nih chuan Jehova’n min ngaidam ang.—2 Korinth 7:9, 11 chhiar rawh.
Zilh kan nih hunah, (1) inngaitlâwm takin kan chhâng lêt tûr a ni a, (2) a ṭûl anga kan inthlâk danglam bâkah, (3) thinlung zawng zawngin Jehova rawng kan bâwl chhunzawm zêl tûr a ni (Paragraph 11-na en rawh) f
BIAKNA DIK AN VAWNG TLAT
12. A bîk takin, engin nge lal rinawmte chu lal rinawm lote laka tihrang?
12 Jehova’n lal rinawm anga a thlîrte chuan biakna dik an vawng reng a. An khua leh tuite pawh chutianga ti tûrin an fuih a ni. Kan hriat tawh angin thil sual tih châng an nei ngei mai; mahse, Jehova biaknaa inpe pumhlûmin milem biakna chu theih tâwp chhuahin an do tlat a ni. d
13. Engvângin nge Jehova’n Ahaba chu Lal rinawm lo anga a thlîr?
13 Jehova’n lal rinawm lo anga a thlîrte chungchâng hi engtin nge ni ve? An thiltih zawng zawng chu thil sual a ni vek lo va. Lal sual Ahaba pawhin inngaihtlâwmna eng emaw chen lantîrin, Nabotha thahnaa a tel ve avângin inchhîrna a lantîr a ni. (1 Lal. 21:27-29) Khuate dinin Israelte tân hnehna a chang bawk a. (1 Lal. 20:21, 29; 22:39) Mahse, Ahaba chuan a nupui thununna avângin biakna dik lo chu nasa takin a chawi lâr a. Chumi chungchângah chuan inchhîrna a lantîr lo a ni.—1 Lal. 21:25, 26.
14. (a) Engvângin nge Jehova’n Lal Rehoboama chu lal rinawm lo anga a thlîr? (b) Lal rinawm lo a tam zâwkte chuan eng inanna nge an neih?
14 Lal rinawm lo dang Rehoboama chungchâng hi lo ngaihtuah ta ila. Târ lan tawh angin, a lal chhûngin thil ṭha ṭhenkhat ti mah se, a lalna tihngheh a nih hnu chuan Jehova dânte chu hnâwlin biakna dik lo chu a zui ta a ni. (2 Chro. 12:1) Chuta chin chu biakna dik leh dik lo inkârah tui lai rapin a awm a. (1 Lal. 14:21-24) Rehoboama leh Ahaba te chu biakna dik aṭanga kal bo lal awm chhun an ni lo. A nihna takah chuan lal rinawm lo tam zâwk chuan, kawng eng emawti takin biakna dik lo an thlâwp a. Chuvângin, Jehova chuan lalte chu biakna dik an vawn leh vawn loh ṭanchhanin lal ṭha emaw, ṭha lo emaw angin a thlîr tih a chiang hle.
15. Engvângin nge biakna dik vawn tlat chu Jehova tân a pawimawh?
15 Engvângin nge biakna chu Jehova tân a pawimawh êm êm? A chhan chu, Pathian mite biakna dika kaihhruai chu lalte mawhphurhna a ni a. Chu bâkah, biakna dik lo chuan sual pawi tak dangte leh rorêl dik lohnate a thlentîr a ni. (Hos. 4:1, 2) Lalte leh an khua leh tuite chu Jehova hnêna inpumpêk tawh an ni bawk a. Chuvângin, Bible-in biakna dik lo nêna an inhnamhnawihna chu uirêna nên a tehkhin a ni. (Jer. 3:8, 9) Uirê tu emaw chuan sual pawi tak tiin a kawppui rilru a tina hle a. Chutiang bawkin, Jehova hnêna inpumpêk tawh a chhiahhlawh tu emaw chu biakna dik lova a inhnamhnawih hian, sual pawi tak tiin Jehova rilru a tina a ni. e—Deut. 4:23, 24.
16. Jehova mithmuhah engin nge a bîk takin mi fel chu mi suaksual laka thliar hrang?
16 Eng nge kan zir theih? Biakna dik lo nêna inkungkaih eng pawh chu kan pumpelh tûr a ni a. Chutih rualin biakna dik kan vawn a, Jehova rawngbâwlnaa kan buai reng a ngai bawk a ni. Zâwlnei Malakia chuan Jehova mithmuhah mi sual laka mi fel tihrangtu chu chiang takin a târ lang a. Ani chuan: “In inlamlêt ang a, mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin a ziak a ni.(Mal. 3:18) Chuvângin, kan ṭhat famkim lohna leh kan thil tihsualnate pawh tiamin, eng thil mahin Pathian râwng kan bâwlna min bânsantîr kan phal tûr a ni lo. Jehova rawngbâwl bânsan chu sual lian tak a ni si a.
17. Engvângin nge kawppui tûr kan thlan hunah kan fîmkhur a ngaih?
17 Kawppui la nei lo i nih chuan, Pathian rawngbâwl chungchânga Malakia thusawite chuan kawppui tûr zawnnaa a ṭanpui theih dân che chu i hmu thei em? Tu emaw chuan mize ṭha tak tak a nei thei a; mahse, Pathian dik rawngbâwltu a nih loh chuan, Jehova mithmuhah mi fel anga thlîr a ni ang em? (2 Kor. 6:14) Lo innei ta ula, ani chuan Jehova chunga rinawm reng tûrin a ṭanpui che ang em? Hei hi han ngaihtuah teh: Lal Solomona nupuite zînga milem betute chuan mize ṭha ṭhenkhat an nei pawh a ni thei a; mahse, Jehova betu an nih loh avângin Solomona chu zawi zawiin biakna dik lovah an hruai pêng ta a ni.—1 Lal. 11:1, 4.
18. Nu leh pate’n an fate chu eng nge an zirtîr ang?
18 Nu leh pate u, Bible-a lalte chanchin chu hmangin in fate chu Jehova rawngbâwl duhna nei chho tûrin in ṭanpui thei a. Jehova’n lal ṭha anga a thlîrte chu amah bia a, mi dangte pawh amah be tûra fuihtute an ni tih hre thiam tûrin ṭanpui ang che u. In fate hnênah in thusawi leh thiltihte hmangin Bible zirna, inkhâwmna leh, thu hrilh rawngbâwlnaa telnate ang chi thlarau lam thiltihte chu thil dang zawng aiin a pawimawh zâwk tih zirtîr ang che u. (Mt. 6:33) Chutianga in tih loh chuan, Jehova Thuhretu nihna chu chhûngte biakna ṭâwmpuina ang lekin an ngai thei a. Biakna dik chu an nuna dah pawimawh ber lovin, an kal bosan hial thei a ni.
19. Jehova rawngbâwl bânsantute tân eng beiseina nge awm? (“ Jehova Hnênah I Kîr Leh Thei!” tih bâwm chu en rawh.)
19 Tu emawin Jehova rawngbâwl bânsan ta se, a ṭhian a ni leh thei tawh ngai lo vang tihna a ni em? Ni lo ve, inlamlêtin Jehova hnênah a kîr leh thei a ni. Chutianga ti tûr chuan, inngaihtlâwmna a neih a, kohhran upate ṭanpuina a pawm a ngai thei a. (Jak. 5:14) Jehova ṭhian nih leh theihna chuan ṭan lâkna eng pawh a phu a ni!
20. Lal rinawmte kan entawn chuan Jehova’n engtin nge min thlîr ang?
20 Israel lalte hnên aṭangin eng nge kan zir theih? Jehova hnêna thinlung famkima kan inpumpêk tlat chuan lal rinawmte ang kan ni thei a. Kan thil tihsualte aṭanga inzîrin, inlamlêtin, a ṭûl angin inthlâk danglamna i siam ang u. Pathian dik awm chhun biakna dik vawn tlat a pawimawhzia i hre reng bawk ang u. Jehova chunga i rinawm tlat chuan a mithmuha thil ṭha titu angin a thlîr dâwn che a ni.
HLA 45 Thinlunga Ka Ngaihtuahna
a He thuziaka “Israel lalte,” tih ṭawngkam hian Juda hnam hnih emaw, Israel hnam sâwm emaw, a nih loh leh hnam 12-te chunga roreltu, Pathian mite chunga lal nia roreltu zawng zawng chu a kâwk a ni.
b ṬAWNGKAM HRILHFIAHNA: Bible chuan “thinlung,” tih thu mal chu mihring nihna pumpui, a duh zâwng te, a thil ngaihtuah te, a rilru put hmang te, a theihna te, amah chettîrtu te leh, a thiltumte sawi nân a hmang ṭhîn a ni.
c Hmân lai chuan milem betu lalte’n an hneh tâk mite pathiante chu an be ṭhîn a ni.
d Lal Asa chuan sual lian tak a ti a. (2 Chro. 16:7, 10) Mahse, Bible chuan a chungchâng chu a ṭha zâwngin a chhinchhiah a ni. A tîrah zilhna chu hnâwl mah se, a hnuah a inlamlêt avângin Jehova chuan a ṭhat lohna aiin a ṭhatna a hmuhsak zâwk a ni thei a. Ani chuan Jehova chauh biain, a lalram ata milem biakna tihbo tumin nasa takin a bei a ni.—1 Lal. 15:11-13; 2 Chro. 14:2-5.
e Mosia dân zînga thupêk hmasa ber pahnihin Jehova lo chu thil dang eng pawh biak a khap avângin, biakna chu Jehova tân a pawimawh tak zet tih kan hre thei.—Ex. 20:1-6.
f MILEM HRILHFIAHNA : Ṭhalai kohhran upa pakhat chuan unaupa zu in dân chungchângah ngaimawhna a lantîr. Unaupa chuan zilhna chu inngaitlâwm takin a pawm a, a ṭûl angin a inthlâk danglam a, rinawm takin Jehova rawng a bâwl chhunzawm.
