Unau Nicolas-a leh Unaunu Céline-i te chuan harsatna chi dang an hmachhawn a ni. Anni chuan kohhran thara insawn tûra France branch aṭanga mawhphurhna pêk chu an pawm a. “A tîr chuan kan phûr hle a, a hnuah kan ṭhiante kan ngaih avângin, hrehawm kan ti ta hle a. Kohhran thara unaute nên inlaichînna nghet tak kan la nei lo,” tiin an sawi. a Harsatnate awm mah se, engtin nge kohhran tharah chuan, hlimna leh hlawhtlinna i neih theih? Engtin nge mi dangte chuan an ṭanpui theih? Kohhran thara unaute hnên aṭangin eng thlarau lam malsâwmnate nge i dawn a, chuta unaute chu engtin nge i fuih?

INSIAMREM THEI TURA MIN ṬANPUITU THU BUL PALITE

1. Jehova rinchhan rawh. (Sâm 37:5) Japan rama Unaunu Kazumi-i chu a pasal hnathawhna hmun sawn a nih avângin, kum 20 aia tam a lo awm tawhna kohhran chu a chhuahsan a ngai a. Engtin nge ‘a awm dân chu Jehova chunga a nghah’? Ani chuan: “Jehova hnênah ka manganna te, mal nia ka inhriatna te leh, ka lungkhamna zawng zawngte chu ka hrilh a. Chutianga ka tih apiang chuan ka mamawh chakna min pe ṭhîn a ni,” tiin a sawi.

Engtin nge Jehova i rinchhan lehzual theih? Thlai chuan ṭhang lian tûrin tui te, lei ṭha te a mamawh ang bawkin, kan rinna ṭhang chho tûr chuan entîr nei tui leh lei ṭhate kan mamawh a. Kan târ lan tâk, Unau Nicolas-a chuan, Pathian duh zâwng ti tûra inpêkna nasa tak neitu—Abrahama te, Isua te leh, Paula te—entawn tûr siam chhût ngunna aṭangin Pathian Jehova’n a ṭanpui ang tih a rinna chu a nghet lehzual tih a hmu chhuak a.  Mi mala Bible zirna i neih ziah chuan i nuna harsatna eng pawh i hmachhawn thei ang a, i kohhran thara mite hnêna i hrilh theih thlarau lam thilpêkte nêna thuam i ni bawk ang.

2. Khaikhin suh. (Thur. 7:10) Unau Jules-a chu United States aṭanga Benin rama a insawn chuan hnam dân danglam tak mila a insiamrem a ngai a. Ani chuan: “Ka mi tawh apiangte hnênah ka chanchin ka hrilh zêl a ngai niin ka hria,” tiin a sawi. Chutianga tih chu thil danglam tak a nih avângin, kohhrana unaute lakah a inla hrang ṭan a. Mahse, unaute a hriat chian hnuah chuan, a thlîr dân a thlâk danglam ta a. Ani chuan: “Khawvêl khawi hmunah pawh awm mah ila, mihringte chu kan inang vek tih ka hre thiam ta a. Kan ṭawngte, kan thiltih dânte a inang lo mai a ni. Mite chu an nih dân anga pawm thiam chu thil pawimawh tak a ni,” tiin a sawi. Chuvângin, tûna i awmna kohhran thar leh i lo awm hmasakna kohhran khaikhin chu pumpelh ang che. Pioneer unaunu, Anne-Lise-i’n: “Ka kalsan tâkte ang hmuh tuma insawn ka ni lo va. Thil tharte hmuhchhuah tuma insawn ka ni,” tia a sawi ang chu a ni.

Kohhran upate pawh, kan awmna hmasaa kohhran upate nên khaikhin tûr an ni lo. Thiltih dânte a inan loh avângin an dik lo tihna a ni lo va. Thurâwn pêk hmaa tualchhûng dinhmun hriat hmasak chu thil finthlâk tak a ni. (Thur. 3:1, 7b) Unaute chu mahni ngaihtuah dân anga ngaihtuahtîr tum aiin, entawn tûr siama zirtîr chu thil ṭha tak a ni.—2 Kor. 1:24.

3. Kohhran thiltihahte tel rawh. (Phil. 1:27) Insawn nân hun leh thate sêngin chau hle ṭhîn mah la, i kohhran thara inkhâwmahte a rang thei ang bera—a theih chuan mahni ngei—tel chu thil pawimawh tak a ni. Tihah chuan, i kohhran thara unaute chuan an hmuh ngai loh che a, an hriat ngai loh bawk che chuan, engtin nge an ṭanpui theih ang che? South Africa rama khawpui lian taka a fanu pahnihte nêna insawn Unaunu Lucinda-i chuan heti hian a sawi a ni: “Ka ṭhiante thurâwn min pêk angin, kohhran thara unaute nên chuan inlaichînna nghet tak neih ka tum tlat a, rawngbâwlnaah unaute nên kan thawkho va, inkhâwmahte chhânna ka pe a. Kan in chu thlawhhma rawngbâwlna inhmuhkhâwm nân ka hmantîr bawk a ni,” tiin a sawi.

I kohhran thara unaute nêna thlarau lam thiltiha ‘beih tlânna chu’ “chanchin ṭha rinna” nei tûra ṭanpui dân kawng ṭha tak a ni. Kan târ lan tâk Unaunu Anne-Lise-i chu a kohhran thara upate’n unau tu pawh nêna rawngbâwlnaa thawk tûrin an fuih a. Eng nge a rah chhuah? Ani chuan: “Kohhran thar mila insiamrem dân ṭha ber tih ka hre ta nghâl a ni,” tiin a sawi. Chu bâkah, Kingdom Hall tihthianghlimna leh thawm ṭhatna ang chi, thiltihna anga tlâwmngaia thawhna chuan mahni kohhran ang takin i ngai tih a târ lang a. Kohhran thiltiha i inhnamhnawih tam poh leh unaute nên in inngaina tawlh tawlh ang a, anni chu thlarau lama i chhûngkaw thar angin i pawm thei thuai ang.

4. Ṭhian tharte siam rawh. (2 Kor. 6:11-13) Mi mal ngaihsakna lantîrna chu ṭhian siam dân kawng ṭha ber a nih avângin, inkhâwm hma leh inkhâwm  bânah unaute biak nân leh anmahni hriat chian nân hun ṭha hnem tak hmang ang che. An hmingte chu chhinchhiah tum la. An hmingte i hriat chuan mi dangte tân pan nuam leh nêlawm i ni ang a; chu chuan ṭhian thar siam a tiawlsam ngei ang.

Unaute ṭhian nih theih dân chungchâng ngaihtuah buai aiin, anni chu i nih dân dik tak hriattîr rawh. Unaunu Lucinda-i chuan: “Mi dangte chu kan ina lêng tûra sâwma hma ka lâk hmasak avângin, tûnah chuan ṭhian ṭha tak kan ni tawh,” tiin a sawi a ni.

“INLAWM TAWN RAWH U”

Kingdom Hall-a inkhâwm zawng zawngte zînga hmêl hriat kan neih loh chuan a tîmawm hle thei a. Engtin nge kohhrana mi thar rawn insawnte chu nuam ti tûra i siam theih? Tirhkoh Paula chuan: “Krista chuan . . . a lâwm che u ang bawk khân inlâwm tawn rawh u,” tiin min fuih a ni. (Rom 15:7) Krista entawnin kohhran upate chuan mi thar rawn insawnte chu lawm hlawh nia inhre tûrin an ṭanpui thei a. (“ Ṭha Taka Insawn Thei Tûra Min Ṭanpui Theitu,” tih bâwm chu en ang che.) Mahse, naupang pawh telin kohhrana mi zawng zawng chuan mi thar rawn insawnte chu ṭhian siamnaah an ṭanpui thei a ni.

Inlawm tawnnaah chuan khualchhâwn thiamna pawh telin, ṭanpuina ṭangkai tak pêkna pawh a tel a. Entîr nân, unaunu pakhat chuan mi thar rawn insawn chu khawpui chhûng fankualpuiin leh bus leh rêla vântlâng hmuna veivah dânte hrilhin, hun a hmanpui a ni. Chu unaunu thiltih chuan mi thar unaunu thinlung chu a khawih hle a, chu chuan ani chu a kohhran thar mila insiamrem tûrin a ṭanpui a ni.

PUITLIN LAM PAN THEIHNA HUN REMCHANG

Khaukhuap puitling tawh chuan a thlaa a thlawh theih hmain a vun chu vawi tam tak lipin a thlâk danglam a. Chutiang bawkin, kohhran thara i insawn hunah Jehova rawngbâwlnaa theih tâwp i chhuahna dâl thei lungkhamna eng pawh chu i hlihthlâk a ngai a ni. Unau Nicolas-a leh Unaunu Céline-i te chuan: “Insawnna chu zirtîrna ṭha tak a  ni a. Mi tharte leh dinhmun tharte mila insiamremna chuan mize tharte nei chho tûrin min ṭanpui a ni,” tiin an sawi. Kan târ lan tâk Unau Jean-Charles-a chuan, insawnna chu a chhûngte’n an hlâwkpui dân chungchângah heti hian a sawi a ni: “Kohhran tharah kan fate chu an puitling chho va. Thla rei lo te hnuah kan fanu pawhin chawlhkâr chhûnga inkhâwm atân chanvo a dawng a, kan fapa pawh baptisma la chang lo thuchhuahtu a rawn ni,” tiin a sawi a ni.

Entîr nân, i dinhmunte avânga mamawh zualna hmuna i insawn thei lo a nih chuan engtin nge ni ang? He thuziaka rawtna ṭhenkhat nunpuiin, engvângin nge i awmna hmun kohhranah i intuaithar loh vang? Jehova rinchhan chungin kohhran thiltihnaah tel la, rawngbâwlnaah mi dangte nên thawkhovin, ṭhian tharte siam la, a nih loh leh unau i hmêlhriat tawhte chu tichak ang che. Mi tharte, a nih loh leh ṭanpui ngai tu emaw chu kawng eng emawti takin i ṭanpui thei ang em? Hmangaihna chu Kristian dikte chhinchhiahna a nih avângin mi dangte i ṭanpuinain Pathian Jehova a hnaih lehzualtîr ngei ang che. (Joh. 13:35) “Chutiang inthawina chungah chuan Pathian a lungni êm êm” tih i chiang thei a ni.—Heb. 13:16.

Harsatnate awm mah se, unau tam tak chu an insawnna kohhran tharah an hlimin nuam an ti hle a—nang pawhin nuam i ti thei! Unaunu Anne-Lise-i chuan: “Kohhran thara awmna chuan rilru zau tak pu tûrin min ṭanpui a ni,” tiin a sawi. Tûnah chuan Unaunu Kazumi-i’n kohhran insawnnaah “tûn hma ang lo takin Jehova ṭanpuina kan dawng thei,” tih a hre tawh a ni. A nih leh, Unau Jules-a chungchâng hi eng nge ni ve? Ani chuan: “Ṭhian tharte ka neiin hmun dang ka mamawh tawh lo. Tûnah chuan ka kohhran tharah nuam ka ti tawh a, hmun danga insawn chu ka duh tawh lo,” tiin a sawi a ni.