1-2. (a) Engtin nge Isua’n a zirtîrte chu a vaukhân? (b) Engvângin nge zirtîrte chuan Isua an thlahthlam? (Milem en bawk rawh.)

 “THLARAU zawngin a peih ngei mai; nimahsela, tisa erawh a chak lo a ni.” a (Mt. 26:41b) Chûng a thusawite aṭang chuan, Isua’n ṭha famkim lo kan ni a, thil kan tisual thei tih a hriatthiamzia a târ lang a ni. Mahse, a thusawiah chuan a lutuka inrintâwkna laka fîmkhur tûra vaukhânna pawh a tel a. Chumi zâna chûng thute a sawi hma lawkin, a zirtîrte chuan an Pu an kal bosan loh tûr thu inring tâwk takin an sawi a ni. (Mt. 26:35) Rilru puthmang ṭha tak an nei ngei a. Mahse, nêksâwrna hnuaia awlsam taka an chak loh theih dân an hre lo. Chuvângin, Isua chuan: “Thlêmnaa in tlûk loh nân inring renga awmin ṭawngṭai reng rawh u,” tiin anni chu a vaukhân a ni.—Mt. 26:41a.

² Lungchhiatthlâk takin, zirtîrte chu inring rengin an awm lo va. Isua man a nih khân, a bulah an awm tlat nge ni a, hlauh avângin an tlân chhiatsan zâwk? Inring renga an awm loh avângin, zirtîrte chuan an sawi ang lo takin Isua chu an thlahthlam ta a ni.—Mt. 26:56.

3. (a) Jehova chunga rinawm reng tûr chuan, engvângin nge a lutuka mahni inrintâwkna chu kan pumpelh ang? (b) He thuziakah hian eng nge kan sawiho vang?

³ Kan inring tâwk lutuk tûr a ni lo. Jehova min hawisantîr thei thil engmah tih kan tum lo ngei mai. Mahse, ṭha famkim lo kan nih avângin, thil dik lo ti tûra thlêm awlsam tak kan ni thei a ni. (Rom 5:12; 7:21-23) Rin loh takin, thil dik lo ṭhenkhat  ti tûra thlêm kan ni thei a. Pathian Jehova leh a Fapa chunga rinawm reng tûr chuan fîmkhur reng tûra Isua min fuihna chu kan zawm a ngai a ni. He thuziak hian chutianga ti tûr chuan min ṭanpui thei a ni. A hmasain, a bîk taka kan fîmkhur a ngaihna dinhmunte kan sawiho vang a. A hnuah thlêmna laka mahni kan invên theih dân kan sawiho vâng a, a tâwpnaah, kan fîmkhur reng theih dânte kan sawiho bawk ang.

FIMKHUR TLAT RAWH—ENG DINHMUNAHTE NGE?

4-5. Engvângin nge thil sual tê tham takah pawh kan fîmkhur ang?

⁴ Thil sual tê tham tak pawhin Jehova nêna kan inlaichînna a tichhe thei a. Chu chuan thil sual lian tak min tihtîr thei bawk a ni.

⁵ Kan vai hian thil sual ti tûra thlêmna kan hmachhawn a. Mahse, thil sual lian tak tihnaah emaw, nungchang bawlhhlawhna ṭhenkhata inhnamhnawihnaah emaw, a nih loh leh khawvêl ngaihtuahna thanga awhnaahte hian chak lohna lai kan nei ṭheuh va ni. Entîr nân, tu emaw chuan mipat hmeichhiatna ang chi, sual lian tak chu a do mai thei a. Mi dangte chuan mahnia châkna inhrîkthlâkna ang chi thil chîn ṭha lo emaw, saruak lem leh thuziak en te emaw chu an do a ngai reng thei a ni. Mi dang lehte chuan mihring hlauhna te, mahni thu thua awm duhna te, thin chhiatna te leh, thil dangte an do a ngai reng thei bawk a. Jakoba chuan, “mi tin mahni châknaa hruai bo leh hîpa an awm chuan thlêmna an tâwk a ni zâwk e,” tiin a sawi a ni.—Jak. 1:14.

6. Eng chungchângah nge kan inenfiah a ngaih?

⁶ Thlêm awlsam tak i nihna dinhmun chu i hria em? Kan chak lohna lai pawm duh lohna leh suala tlu lût thei lo tûra inngaihnate chu thil hlauhawm tak a ni a. (1 Joh. 1:8) A chhan chu, Paula ngei pawhin “thlarau mite” pawh an invên ṭhat loh chuan thlêmna an tâwk thei tih a sawi a. (Gal. 6:1) Ṭha taka mahni kan inenfiah a, kan chak lohna laite kan hriat a ngai a ni.—2 Kor. 13:5.

7. A bîk taka kan fîmkhur lehzualna tûr chu eng nge ni a? Entîrna pe rawh.

⁷ Thlêm awlsam tak kan nihna dinhmunte kan hriat chuan eng nge kan tih ang? Theih tâwp chhuahin kan do vang! Entîr nân, Bible hun laia khawpui beih awlsamna lai ber chu kulh kawngkhârte a ni a. Chuvângin, kulh kawngkhâr awmnaahte chuan vêngtu tam tak dah an ni ṭhîn. Chutiang bawkin, keini pawh thlêm kan awlsam lehzualna dinhmunte kan  hriat chuan, a bîk taka kan fîmkhur lehzual a ngai a ni.—1 Kor. 9:27.

KAN INVEN THEIH DAN

8-9. Thufingte bung 7-a târ lan angin, engtin nge tlangvâl chuan sual lian tak tihna chu a pumpelh theih? (Thufingte 7:8, 9, 13, 14, 21)

⁸ Engtin nge thlêmna pumpelh tûra kan invên theih? Thufingte bung 7-naa târ lan tlangvâl hnên aṭanga kan zir theihte chu i lo ngaihtuah ang u. Ani chuan hmeichhe khawlo nên dik lo takin mipat hmeichhiatna an hmang a. Châng 22 -nain chu tlangvâl chuan hmeichhe khawlo chu “a zui ta nghâl mai a,” tih min hrilh a ni. Mahse, a châng tîr lama târ lan angin, zawi zawia awlsam taka suala a tlûk luh hmain thu tlûkna ṭha lote a lo siam tawh a ni.

⁹ Chu tlangvâl chuan sual lian tak a tih hmain eng nge a tih? A hmasain, tlai lamah “[hmeichhe khawlo] awmna lam hnaih kawtthlêrah chuan a kal ṭan a.” Tichuan, hmeichhe khawlo in lam chu a pan ta a ni. (Thufingte 7:8, 9 chhiar rawh.) A hnuah, chu hmeichhia chu a hmuh chuan a kalsan lo va. Chu aiin, a infawhtîr a, remna thilhlan a hlan chungchâng a sawite chu a ngaithla a, hmeichhe khawlo nia ngai lo tûrin a thlêm pawh a ni thei a ni. (Thufingte 7:13, 14, 21 chhiar rawh.) Chu tlangvâl chuan thil sual tihna thlen thei thil hlauhawmte chu pumpelh ta se, thlêmna leh thil sual tihna lakah a invêng thei ngei ang.

10. Engtin nge chu tlangvâl ang chuan tûn laiah tu emawin thil sual a tih theih?

¹⁰ Solomona thuziak chuan Pathian Jehova betute chunga thilthleng theite a târ lang a. Ani chuan sual lian tak tihnaa a inhnamhnawih hnuah chutiang thil chu “a thleng nghâl” mai niin a hre thei a. A nih loh leh, “chutiang thil chu ka beisei loh takin a thleng,” tiin a sawi thei a ni. Mahse, thil thlen dân dik tak ngun taka a ngaihtuah chuan, thil sual lian tak a tih hmain thu tlûkna âtthlâk tak a lo siam tawh tih a hre ngei ang. Chûng zîngah chuan ṭhian sual kawm te, intihhlimna ṭha lo en te, a nih loh leh intihhlimna hmun ṭha lo chu a takin emaw, online aṭangin emaw ente a tel thei a ni. Ṭawngṭai te, Bible chhiar te a bansanin, inkhâwmnaah leh thu hrilh rawngbâwlnaah a tel tawh lo pawh a ni thei. Thufingte bu-a târ lan tlangvâl ang bawkin, thil sual a tih chu tihpalh thil thua “thleng nghâl” mai a nih a rinawm loh a ni.

11. Thil sual tihnaa tlu lût lo tûrin, eng nge kan pumpelh ang?

¹¹ Eng nge kan zir theih? Thil sual chauh ni lovin, chu thil sual tihnaa min hruai lûttu pawh kan pumpelh tûr a ni. Solomona chuan chu tlangvâl leh hmeichhe khawlo chungchâng a sawi hnuah, kan pumpelh tûr chungchâng chu a târ lang a. Ani chuan chu hmeichhe chungchâng a sawinaah: “A kawngahte chuan kal bo suh,” tiin a sawi a ni. (Thuf. 7:25) “I kawng chu a hnên ata sawn daih la, a kawngkâ va hnaih suh,” tiin hmeichhe sual chungchâng a sawi bawk a ni. (Thuf. 5:3, 8) Ni e, sual lama min hruai lût thei dinhmunte chu hnaih lohvin, kan invêng thei a. b Chutah chuan, dinhmunte, a nih loh leh thiltih ṭhenkhatte chu Kristiante tâna pawi lo angin lang mah se, thlêmnaah min hruai lût thei tih kan hriat avânga kan pumpelhna pawh a tel a ni.—Mt. 5:29, 30.

12. Eng thilah nge Joba’n thuthlung a siam a, engtin nge chu chuan thlêmna laka invêng tûra a ṭanpui theih ang? (Joba 31:1)

¹² Suala min hruai lût thei dinhmunte pumpelh tûr chuan tum ruhna kan neih a ngai a.  Chutiang chuan Joba’n a ti a ni. Ani chuan hmeichhe dang ngaih melh lo tûrin ‘a mit atân thuthlung a siam a ni.’ (Joba 31:1 chhiar rawh.) Chu thuthlung a inthununtîr tlat chuan uirêna chu a pumpelh thei ang. Keini pawh thlêmnaa min hruai lût thei thil eng pawh pumpelh kan tum tlat thei a ni.

13. Engvângin nge kan ngaihtuahna chu kan vênhim ang? (Milem en bawk rawh.)

¹³ Kan ngaihtuahna pawh kan vên a ngai bawk a. (Ex. 20:17) Mi ṭhenkhat chuan châkna ṭha lote suangtuahna chu a taka tihna a awm loh chhûng chuan thil sual lo niin an ngai a. Mahse, chutianga ngaihtuahna chu a dik lo a ni. Châkna ṭha lote ngaihtuah ngut nguttu chuan a taka tih duhna a nei lehzual a. Chutianga tihna chuan, thlêmna chu do a tiharsa lehzual a ni. Chuvângin, ngaihtuahna ṭha lote chu kan rilrua a luh châng a awm ngei ang. Mahse, a pawimawh ber chu, chûng ngaihtuahna ṭha lote chu kan hnâwl nghâl vat a, ngaihtuahna thianghlima kan thlâk a ngai a ni. Chutianga kan tih chuan ngaihtuahna ṭha lote chu tih châkna kan nei lo vang a, sual lian tak tihna lak ata kan invênghim thei ang.—Phil. 4:8; Kol. 3:2; Jak. 1:13-15.

14. Eng thil dangte’n nge thlêmna laka invênghim tûra min ṭanpui thei?

¹⁴ Thlêmna laka invênghim tûrin eng thil dangte nge kan tih theih? Jehova dânte zawmna chu kan hlâwkpui reng ang tih kan rin ngheh tlat a ngai a ni. Pathian duh zâwng nên inmila kan ngaihtuahnate leh kan châknate thunun chu a harsat châng a awm thei a; mahse, chutianga ti tûra theih tâwp kan chhuah chuan hlimna dik tak kan nei ang.

15. Engtin nge châkna ṭha neih chhohna chuan thlêmna laka invêng tûra min ṭanpui ang?

¹⁵ Châkna ṭha kan neih chhoh a ngai a. ‘Sualna huat a, ṭhatna ngainat’ kan zir chuan thil dik tih kan tum tlat ang a, suala min hruai lût thei dinhmunte chu kan pumpelh ang. (Amos. 5:15) Beisei loh taka thlêmna awmtîrtu dinhmuna kan awm hunah pawh châkna ṭhate chuan nghet taka awm reng tûrin min tichak bawk ang.

16. Engtin nge thlarau lam thiltihte chuan invêng reng tûra min ṭanpui? (Milem en bawk rawh.)

 ¹⁶ Engtin nge châkna ṭha chu kan neih chhoh theih? Thlarau lam thiltihnaahte kan theih anga tamin kan inhmang tûr a ni a. Kristian inkhâwmnaah leh rawngbâwlnaa kan tel hian thil dik lo ti tûra awlsam taka thlêm theih kan ni lo. Chu aiin, Pathian Jehova tihlâwm duhna kan nei lehzual a ni. (Mt. 28:19, 20; Heb. 10:24, 25) Pathian Thu kan chhiar a, kan zir a, kan chhût ngun hian, thil ṭha kan ngainatna a nghet lehzual a, sual huatna kan nei lehzual a ni. (Jos. 1:8; Sâm 1:2, 3; 119:97, 101) Isua’n a zirtîrte hnênah: “Thlêmnaa in luh loh nân inring rengin ṭawngṭai rawh u,” tia a sawi chu hre reng ang che. (Mt. 26:41) Kan Pa vâna mi hnêna kan ṭawngṭai hian, min ṭanpui theihna chu kan hmang ṭangkai a, amah tihlâwm duhna kan nei lehzual a ni.—Jak. 4:8.

INVENG RENG RAWH

17. Eng chak lohnain nge Petera chu tibuai fo ṭhîn?

¹⁷ Ṭhil ṭha lo ṭhenkhat kan tih duhnate chu kan paih bo ṭhak thei a. Mahse, kan chak lohna dang ṭhenkhat chuan min la tibuai reng pawh a ni thei a ni. Tirhkoh Petera chungchâng hi lo ngaihtuah ta ila. Ani chuan mihring hlauhna a neih avângin, Isua chu vawi thum a phatsan a ni. (Mt. 26:69-75) Sanhedrin hmaa huaisen taka thu a hrilh khân, chu a hlauhna chu a hneh tawh niin a lang a. (Tirh. 5:27-29) Mahse, kum eng emaw zât hnuah, “serhtan mite chu a hlauh avângin” Jentail Kristiante hnênah hun eng emawti chhûng chaw a ei duh lo va. (Gal. 2:11, 12) Petera chuan mihring hlauhna a nei leh a. Chu chu a hneh pumhlûm ngai lo pawh a ni thei a ni.

18. Do hneh tawh anga kan ngaih thil ṭha lo ṭhenkhat chungchângah eng thil nge thleng thei?

¹⁸ Keini pawh chutiang dinhmunah kan awm ve thei a ni. Engtin nge? Kan paih bo tawh nia kan ngaih thil ṭha lo tih duhna chu kan do leh a ngai pawh a ni thei a. Entîr nân, unaupa pakhat chuan: “Saruak lem leh thuziakte en chu kum sâwm chhûng vêl ka bânsan tawh avângin chumi chungchângah buaina nei tawh lo tûrah ka inngai a. Mahse, chu ka chak lohna chu ramsa hlauhawm tak min bei tûra min châng rengtu ang hi a ni a, dinhmun ṭhenkhatahte chuan chumi en tûra thlêmin ka awm leh a ni,” tiin a sawi. A beidawng mai lo chu a fakawm  hle. Chu a chak lohna do tûr chuan nî tin a do a ngai tih a hre ta a, chu chu he khawvêla a awm chhûng chuan theih tâwp chhuaha a do reng a ngai pawh a ni thei. A nupui leh an kohhran upate ṭanpuinain saruak lem leh thuziakte en lo tûrin a invêng tlat thei a ni.

19. Engtin nge châkna ṭha lo kan la neih reng chu kan do theih?

¹⁹ Thil ṭha lo min tihtîr theitu châkna ṭha lo kan la nei reng a nih chuan, chu chu engtin nge kan do theih? Thlêmna chungchânga ‘inring renga awm’ tûra Isua fuihna chu zâwmin chu chu kan do thei a ni. Chak hle nia i inhriat lai pawhin, thlêmnaa hruai lût theitu dinhmunte chu pumpelh zêl rawh. (1 Kor. 10:12) Châkna ṭha lo dona kawnga ṭanpui theitu thilte chu ti zawm zêl bawk ang che. Thufingte 28:14 chuan: “LALPA ṭih reng mi chu a nihlawh e,” tiin a sawi si a.—2 Pet. 3:14.

INVEN TLATNA KAN HLAWKPUI DAN

20-21. (a) Thlêmna laka kan invên tlat chuan eng malsâwmnate nge kan dawn ang? (b) Thlêmna do tûra theih tâwp kan chhuah chuan, Jehova’n kan tân eng nge min tihsak ang? (2 Korinth 4:7)

²⁰ Thlêmna laka invên tlat chu kan tâna thil ṭha ber a ni tih kan chiang thei a. Sual tihna chuan “rei lo tê atân sual nawmna” min pe thei mah se, Jehova tehnate nunpuina chuan hlimna nasa tak min pe thei a ni. (Heb. 11:25; Sâm 19:8) A chhan chu a kawngte mila nung tûra siam kan nih vâng a ni. (Gen. 1:27) Chutianga kan tih chuan chhia leh ṭha hriatna thiang tak neiin, chatuana nunna kan chang thei dâwn a ni.—1 Tim. 6:12; 2 Tim. 1:3; Jud. 20, 21.

²¹ “Tisa erawh chu a chak lo a ni,” tih chu a dik ngei mai. Mahse, chu chu kan chak lohna chungchângah eng mah tih theih kan nei lo tihna a ni lo. Jehova chu kan mamawh chakna min pe tûrin a inpeih reng a. (2 Korinth 4:7 chhiar rawh.) Mahse, kan chakna pângngai aia thiltithei zâwk Pathianin min pe tih hre reng ang che. Kan chakna pângngai, nî tina thlêmna laka theih tâwp chhuaha invên chu kan mawhphurhna a ni a. Kan tih tûr chin kan tih chuan, Jehova’n kan ṭawngṭainate chhângin, kan mamawh hunah chakna min pêk belh ang tih kan ring nghet tlat thei a ni. (1 Kor. 10:13) Ni e, Pathian Jehova ṭanpuinain thlêmna lakah kan invêng tlat thei a ni.