ZIR TUR THUZIAK 28
HLA 123 Rinawm Taka Pathian Kaihhruaina Zâwmin
Thutak Chu I Thliar Hrang Thei Em?
“In kâwng chu thutaka hrêngin, . . . ding rawh u.”—EPH. 6:14.
A TUM BER
Jehova hnên aṭanga kan zir thutak leh Setana leh min dodâltute tihchhuah dâwt thute thliar hrang thei tûra inzir.
1. Thutak chu engtin nge i ngaih?
JEHOVA mite chuan Pathian Thua thutak chu an ngaina hle a. Chu thutakah chuan kan rinna kan nghat a ni. (Rom 10:17) Jehova chuan Kristian kohhran chu “thutak ban leh innghahna” angin a din tih kan ring a. (1 Tim. 3:15) Kan zînga “hotute” chuan Bible aṭanga thutak an hrilhfiah hunah leh Pathian duh zâwng nêna inmila kaihhruaina min pêk hunah inhuam takin kan pawm a ni.—Heb. 13:17.
2. Jakoba 5:19-a sawi angin, thutak kan hriat hnuah pawh eng nge kan chungah thleng thei?
2 Mahse, thutak chu pawmin, Pathian inawpna pâwl aṭanga kaihhruainate kan zawm a ngai tih kan pawm hnuah pawh hruai bovin kan la awm thei a. (Jakoba 5:19 chhiar rawh.) Setana chuan Bible leh Pathian inawpna pâwl aṭanga kan dawn kaihhruainate kan rinna chu hloh tûrin min duh a ni.—Eph. 4:14.
3. Engvângin nge thutak kan vawn ngheh tlat a ngaih? (Ephesi 6:13, 14)
3 Ephesi 6:13, 14 chhiar rawh. Nakin lawkah Setana chuan hnam zawng zawngte’n Jehova an dona tûrin inbumna thiltithei tak a hmang dâwn a. (Thup. 16:13, 14) Jehova mite chu bum a tum nasa lehzual dâwn tih kan beisei thei bawk a. (Thup. 12:9) Chuvângin, thutak leh dâwt thu thliar hrang thei tûra kan inzir a pawimawh tak zet a ni. (Rom 6:17; 1 Pet. 1:22) Chu chu hrehawm nasa taka kan dam khawchhuah theih dân kawng awm chhun a ni si a!
4. He thuziakah hian eng nge kan sawiho vang?
4 He thuziakah hian, Bible thutak hre thei tûr leh Pathian inawpna pâwl aṭanga lo kal kaihhruainate pawm thei tûra min ṭanpuitu mize pahnihte kan hria ang a. Tichuan, thutak vuan nghet chhunzawm zêl thei tûra kan tih ngai thil pathumte kan sawiho bawk ang.
THUTAK THLIAR HRANG THIAM TURA KAN NEIH NGAI MIZIATE
5. Engtin nge Jehova ṭihna chuan thutak thliar hrang thei tûra min ṭanpui?
5 Jehova Ṭihna. Jehova kan ṭih takzet chuan amah kan hmangaih êm avângin, amah tilâwm lotu eng thil mah kan ti lo vang. A pawm kan hlawh theihna tûrin thil dik leh dik lo, thutak leh dâwt thu thliar hrang thei tûra inzir kan duh a. (Thuf. 2:3-6; Heb. 5:14) Mihring tihlâwmnain Jehova a tihlâwm loh ṭhin avângin mihringte kan hlauhna aiin amah kan hmangaihna chu a nasa zâwk tûr a ni.
6. Engtin nge mihring hlauhna chuan Israel hruaitu sâwmte chu thu dik a her danglamtîr?
6 Pathian aia mihring kan hlauh zâwk chuan, thutak aṭanga hruai bovin kan awm thei a. Jehova’n Israel mite hnêna pêk a tiam ram enthla tûra kal mi 12-te chungchâng hi han ngaihtuah teh. An zînga enthlatu sâwmte’n Jehova an hmangaihna aiin Kanaan mite an hlauhna chu a nasa zâwk a. An hnampui Israel mite hnênah chuan: “Kan han hneh thei hlawm lo vang a, kan aiin an chak si a,” tiin an sawi a ni. (Num. 13:27-31) Mihring thlîrna aṭang chuan Israel mite aiin Kanaan mite an chak zâwk tih chu a dik ngei mai. Mahse, an hmêlmate chu Israel mite’n an hneh thei lo vang tia sawitute chuan Jehova an ngaihtuah tel lo va ni. Chûng enthlatu sâwmte chuan Jehova’n Israel mite ti tûra a duhte chu an ngaihven zâwk tûr a ni a, chumi hma lawka an tâna a thiltihte chu an chhût ngun bawk tûr a ni. Chutiang chuan ti ta se, Kanaan mite thiltihtheihna chu Jehova lakah chuan engmah tham a ni lo tih an hre ngei ang. Chûng enthlatu rinawm lote ang lo takin, Josua leh Kaleba chuan Jehova pawm hlawh an duh a. Anni chuan mipuite hnênah: “Kan chunga LALPA a lâwm chuan chu ramah chuan min hruai ang a, min pe ang,” tiin an hrilh a ni.—Num. 14:6-9.
7. Engtin nge Jehova kan ṭih tak zet theih? (Milem en bawk rawh.)
7 Jehova ṭih tak zet tûr chuan thu tlûkna kan siam apiangin amah tihlâwm kan tum a ngai a. (Sâm 16:8) Bible-a thilthlengte i chhiar hunah heti hian inzâwt ang che, ‘Chu dinhmunah chuan awm ta ila, eng thu tlûkna nge ka siam ang?’ Entîr nân, Israel hruaitu sâwmte’n chanchin lâwmawm lo tak an sawi laia ngaithlatute zînga tel ve angah han inchan teh. An thusawi chu ringa mihring hlauhna neih aiin Jehova i rinna leh i hmangaihna chu i tinghet lehzual zâwk ang em? Israel hnam pumpui chuan Josua leh Kaleba thusawi chu thudik a ni tih an ring lo va. Chuvângin, ram tiama luhtîr phal an ni ta lo va ni.—Num. 14:10, 22, 23.
Tute nge i rin zâwk ang? (Paragraph 7-na en rawh)
8. Eng mizia nei chho tûrin nge theih tâwp kan chhuah ang?
8 Inngaihtlâwmna. Jehova chuan mi inngaitlâwmte hnênah thutak chu a puangzâr a. (Mt. 11:25) Thutak hre tûra ṭanpuina chu inngaitlâwm takin kan pawm a ni. (Tirh. 8:30, 31) Chutichung pawhin, chapo lo tûra kan fîmkhur a ngai a. Chapona chuan kan mi mal ngaih dânte chu Bible thu bulte leh Jehova inawpna pâwl kaihhruainate tluka pawimawh angin min ngaihtîr thei a ni.
9. Engtin nge inngaihtlâwmna kan neih reng theih?
9 Inngaihtlâwmna nei reng tûr chuan, Jehova ropuizia nêna inkhaikhinin engmah kan nih lohzia kan hriat a ngai a. (Sâm 8:3, 4) Inngaihtlâwmna nei chho tûr leh zirtîr theih ni tûrin kan ṭawngṭai a pawimawh bawk. Jehova chuan a Thu leh a inawpna pâwl kaltlanga min pêk a ngaihtuahnate chu kan ngaihtuahnate aia ngai pawimawh zâwk tûrin min ṭanpui ang. Bible i chhiar hunah Jehova’n chapona te, invaivungna te, intihveina te aia inngaihtlâwmna a ngainat zâwkzia chu hriat tum ang che. Mite hriat hlawhtîrtu che rawngbâwlnaa chanvo hlu i dawng a nih chuan inngaihtlâwmna nei reng tûrin fîmkhur lehzual ang che.
THUTAK KAN VAWN NGHEH TLAT THEIH DAN
10. Jehova’n a mite hnêna kaihhruaina pe tûrin tute nge a hman?
10 Jehova inawpna pâwl kaihhruaina chu ring tlat rawh. Hmân lai Israel hunah Jehova chuan Mosia leh Josua kaltlangin kaihhruaina a pe a. (Jos. 1:16, 17) Israelte’n chûng mite chu Pathian Jehova aiawh anga an thlîr chuan malsâwm an ni a. Kum za tam tak hnua Kristian kohhran din a nih tirh khân tirhkoh 12-te’n kaihhruaina an pe a ni. (Tirh. 8:14, 15) A hnuah chûng kaihruaitute zîngah chuan Jerusalema upa dangte pawh telh an ni a. Chûng mi rinawmte hnên aṭanga kaihhruaina chu an zawm avângin, “kohhran pâwlte chu rinnaah chuan an nghet ta a, ni tin an pung ta deuh deuh va.” (Tirh. 16:4, 5) Tûn laiah pawh Jehova inawmpna pâwl aṭanga kaihhruainate kan zawm hian malsâwm kan ni a. Mahse, hmahruai tûra a ruatte thu kan âwih loh chuan Jehova chu engtin nge a awm ang? Israelte Ram Tiama hruai luh an nih laia thilthlengte ngaihtuahna aṭangin chu zawhna chhânna chu kan hre thei a ni.
11. Hmân lai Israel hunah Pathianin a mite hruaitu atâna a thlan Mosia dodâltute chungah eng thil nge thleng? (Milem en bawk rawh.)
11 Israel mite’n Ram Tiam an pan laiin, hruaitu ṭhenkhat chuan Mosia leh Jehova’n a hnêna chanvo a pêk chu pawm lovin an dodâl a. Anni chuan: “[Mosia chauh ni lovin] mipuite chu an thianghlim ṭheuh si a, LALPA pawh an zîngah a awm si a,” tiin an sawi a ni. (Num. 16:1-3) Dik tak chuan Pathian mitah “mipuite” chu thianghlim vek mah se, a mite hruaitu atân Mosia chu a thlang tawh a. (Num. 16:28) Chuvângin, Mosia laka helte’n amah an sawichhiatna chu Jehova sawichhiatna a ni. Anni chuan Pathian Jehova duh zâwng ni lovin, an duh zâwng—thuneihna leh mite hriat hlawh nihna—chu an ngaihven zâwk a. Chuvângin, Pathianin chûng helhmang hruaitute leh anmahni thlâwptu mi a sâng têlte chu a tiboral a. (Num. 16:30-35, 41, 49) Tûn laiah pawh Jehova chuan a inawpna pâwl ruahmannate zah lotute chu a lâwm lo tih kan chiang thei a ni.
Tute nge i thlâwp zâwk ang? (Paragraph 11-na en rawh)
12. Engvângin nge Jehova inawpna pâwl chunga kan rinna chu kan vawn tlat theih?
12 Jehova inawpa pâwl chunga kan rinna chu kan vawng tlat thei a. Bible thutak eng emaw kan hriatthiam dân, a nih loh leh Pathian Jehova rawng kan bâwl dân siamrem a nih hunah hmahruaitu unaute chu a ṭûl angin an insiamrem vat ṭhîn a ni. (Thuf. 4:18) Eng dang zawng aiin Jehova tihlâwm chu an ngaih pawimawh ber avângin chutiang chuan an ti a. An thu tlûkna siamte chu Jehova mite zawm tûr tehfung ber, Pathian Thu nêna inmiltîr an duh bawk a ni.
13. “Thu dik dân,” tih chu eng nge ni a, chu chuan thu dik vuan tlat tûrin engtin nge min ṭanpui theih?
13 ‘Thu dik dân chu nei tlat rawh.’ (2 Tim. 1:13) “Thu dik dân,” tih chu Bible-a Kristiante zirtîrna hi a ni a. (Joh. 17:17) Chûng zirtîrnate chu kan thurin engkim innghahna a ni. Jehova inawpna pâwl chuan chu thu dik dân chu vuan tlat tûrin min zirtîr a. Chutianga kan tih chuan malsâwmna kan dawng dâwn a ni.
14. Engtin nge Kristian ṭhenkhatin “thu dik dân” chu an vawn reng loh?
14 “Thu dik dân” chu kan pênsan chuan eng thil nge thleng thei? Entîrna pakhat lo ngaihtuah ta ila. Kum zabi khatna lai khân Kristian ṭhenkhatin Jehova nî a lo thleng tawh tih thu dik lo chu an theh darh a. Chutianga inziahna lehkhathawn—tirhkoh Paula ziah nia ngaih chu—a awm niin a lang. Thu dik chu chhût chiang hmasa lovin, Thessalonika khuaa Kristiante chuan chu thu chu ringin an sawi darh hial a. An bula a awm laia Paula zirtîrnate chu hre reng ta sela chuan, chûng thute bum chuan an awm lo ngei ang. (2 Thes. 2:1-5) A hnuah Paula’n anni chu an thu hriat apiang ring lo tûrin a zilh a. Nakin zêla anmahni ṭanpuitu atân Thessalonika khuaa mite hnêna a lehkhathawn pahnihna chu heti hian a titâwp a ni: “Kei Paulan, keima kut ngeia chibai ka bûkna che u a nih hi; hei hi ka lehkhathawn tinrênga chhinchhiahna a ni, hetianga ka ziak hi,” tiin.—2 Thes. 3:17.
15. Thu dik ang taka lang dâwt thute lakah engtin nge kan invên theih? Entîrna pe rawh. (Milem en bawk rawh.)
15 Thessalonika khuaa mite hnêna Paula thusawi aṭangin eng nge kan zir theih? Bible aṭanga kan thu zir tawhte nêna inmil lo emaw, chanchin danglam tak kan hriat hunah emaw hriatthiam theihna kan hmang tûr a ni. Soviet Union hun laiin, kan hmêlmate chuan unaute hnênah world headquarters aṭanga lo kal ni âwm tak lehkha hi an pe a. Lehkhathawnah chuan unaute chu inkaihhruaina pâwl dang din tûra fuihna a chuang a. Lehkhathawn chu dik ni âwm takin a lang a ni. Mahse, unau rinawmte chu bumin an awm lo. Lehkhathawna thu inziakte leh tûn hmaa an thu lo zir tawhte chu a inmil lo tih an hre chhuak a. Tûn laiah pawh thutak dodâltute chuan, tûn lai thiamnate hmangin inhmuh thiam lohna awmtîrin ṭhen hran min tum a. Chuvângin, kan thu hriatte leh kan thu chhiarte chu thutak kan zir tawhte nêna a inmil leh mil loh ngaihtuahna hmangin, “[kan] rilru a nghîn thuai lohna” tûrin kan invêng thei a ni.—2 Thes. 2:2; 1 Joh. 4:1.
Thu dik anga lang dâwt thute bumin awm suh (Paragraph 15-na en rawh) a
16. Rom 16:17, 18-a sawi angin, mi ṭhenkhatin thutak an pênsan chuan eng nge kan tih ang?
16 Jehova chunga rinawmtute nên inpumkhat tlat rawh. Pathian chuan amah kan biaknaa inpumkhat tûrin min duh a. Thutak kan vawn tlat chhûng chuan inpumkhatin kan awm thei ang. Thutak pênsantute chuan kohhrana inṭhen darhna an awmtîr avângin Pathianin anni chu “hawisan” tûrin min duh a. Chutianga kan tih loh chuan keimahni ngei pawhin thutak kan pênsan ve thei a ni.—Rom 16:17, 18 chhiar rawh.
17. Thutak thliar hrang a, vawn ngheh tlatna chu engtin nge kan hlâwkpui?
17 Thutak chu kan thliar hran theiha kan vawn ngheh tlat chuan, rinnaah kan nghet tlat ang. (Eph. 4:15, 16) Setana zirtîrna dik lo leh a bumna lak aṭanga humhim kan ni ang a, hrehawm nasa tak chhûngin Jehova ngaihsakna hnuaiah him takin kan awm reng ang. Chuvângin thutak chu vuan tlat rawh; tichuan, “thlamuanna Pathian chuan a awmpui ang che.”—Phil. 4:8, 9.
HLA 122 Tihchêt Rual Lohvin Nghet Rawh U!
a MILEM HRILHFIAHNA: Kum sâwmbi tam tak kal taa Soviet Union hun laia unaute’n world headquarters aṭanga dawn ni âwm taka lang; mahse, kan hmêlmate hnên aṭanga lo kal ni si lehkhathawn an dawn lai channawnna. Tûn laiah, kan hmêlmate chuan Internet hmangin Jehova inawpna pâwl chungchâng dâwt thute an thehdarh thei a ni.
