1-2. Zadoka chu tu nge a nih? (1 Chronicles 12:22, 26-28)

 HEI hi han mitthla teh. Mipa hlîr mi 3,40,000 pung khâwmin Davida chu Israel zawng zawng lalah an siam a. Anni chu Hebron bula lung khawkrawk tlângah ni thum chhûng an awm a, phûr taka an ṭawng ri te, an nui ri te leh, hlim taka Jehova fakna hla an sa thâwmte chu a khâwk ring hle a ni. (1 Chro. 12:39) Chûng mipui zînga tam tak chuan ṭhalai Zadoka chu an hre lo niin a lang. Mahse, Jehova chuan ani chu a hre chiang a, keini pawh hre tûrin min duh a ni. (1 Chronicles 12:22, 26-28 chhiar rawh.) A nih leh, Zadoka chu tu nge a nih?

² Zadoka chu Puithiam Lal Abiathara rawngbâwlpui, puithiam a ni a. Ani chu Pathian duh zâwng hriat theihna leh finna mak danglam tak nei hmu theitu a ni bawk. (2 Sam. 15:27) Mite chuan thurâwn fing an mamawh hunah Zadoka chu an pan ṭhîn a. Mi huaisen tak a ni bawk a ni. He thuziakah hian Zadoka’n huaisenna a lantîr dân kan sawiho vang.

3. (a) Engvângin nge Jehova betute chuan huaisenna an mamawh? (b) He thuziakah hian eng nge kan sawiho vang?

³ Tûn hun hnuhnûng chhûng hian, Setana chuan tûn hma zawng aiin Pathian mite chu a bei nasa lehzual a. (1 Pet. 5:8) Chuvângin, Setana leh a khawvêl suaksual tak titâwp tûra Pathian Jehova kan nghah lai hian huaisenna kan mamawh a ni. (Sâm 31:24) Zadoka huaisenna kan entawn theih dân kawng thumte chu i lo ngaihtuahho vang u.

PATHIAN RAM CHU THLAWP RAWH

4. Engvângin nge Pathian Jehova mite chuan Pathian Ram thlâwp tûra huaisenna an mamawh? (Milem en bawk rawh.)

⁴ Pathian Jehova mite kan nih angin, Pathian Ram chu thinlung zawng zawngin kan thlâwp a; mahse, chutianga ti tûr  chuan huaisenna kan mamawh ṭhîn a ni. (Mt. 6:33) Entîr nân, he khawvêl suaksual takah hian Jehova tehnate nunpui tûr leh Lalram chanchin ṭha hril tûrin huaisenna kan mamawh a. (1 Thes. 2:2) Politics avânga inṭhen darhna khawvêla kan awm avângin, tualdâwiha awm reng tûr chuan huaisenna kan neih a ngai fo ṭhîn. (Joh. 18:36) Pathian mite zînga tam tak chu politics thila an inhnamhnawih duh loh avâng leh sipaia an ṭan duh loh avângin, sum leh pai lamah harsatna an tâwkin, kut thlâknate an tuar a; chu bâkah, tân inahte khung an ni bawk a ni.

5. Engvângin nge Zadoka chuan Davida thlâwp tûra huaisenna a mawmawh?

⁵ Zadoka chu Davida lal nihna lawmpui tûr chauhva Hebrona kal a ni lo. Râlthuamte inbelin, râl do tûrin a kal a ni. (1 Chro. 12:38) Ani chuan indonaa Davida zui a, hmêlmate laka Israel mite humhim tûrin a inhuam a. Indonaah thiltawn la nei tlêm hle mah se, mi huaisen tak a ni.

6. Engtin nge Davida chu Zadoka tân huaisenna kawnga entawn tûr ṭha tak a nih? (Sâm 138:3)

⁶ Zadoka ang puithiam pakhat chuan huaisenna nasa tak nei tûrin khawi aṭangin nge a zir ang? Ani chu mi chak tak leh mi huaisen takte hual vêlin a awm a. An entawn tûr siam chu a hlâwkpui ngei ang tih rinhlelh rual a ni lo. Entîr nân, huaisenna kawnga ‘indonaa Israel mite hruaitu’ Davida entawn tûr siam chuan Israel mi zawng zawngte chu thinlung taka amah thlâwp tûrin a chêttîr a ni. (1 Chro. 11:1, 2) Davida chuan a hmêlmate laka ṭanpui tûrin engtik lai pawhin Jehova a rinchhan a. (Sâm 28:7; Sâm 138:3 chhiar rawh.) Zadoka chuan Jehoiada leh a fapa sipai huaisen Benaia leh Davida thlâwptu rinchhan tlâk tak sipaihotu dang 22 te ang chi mi huaisente entawn tûr siam aṭangin a zir bawk. (1 Chro. 11:22-25; 12:26-28) Chûng mipa zawng zawngte chuan Davida lalna thlâwpin hma an la a ni.

7. (a) Tûn laiah huaisenna kawnga tute entawn tûr siam nge kan zir theih? (b) Video-a târ lan angin, unaupa Nsilu-a entawn tûr siam aṭangin eng nge i zir theih?

 ⁷ Jehova rorêlna thlâwptu mi huaisen takte entawn tûr siam kan ngaihtuah hian chakna leh huaisenna kan nei a ni. Kan Lal, Krista Isua chuan Setana khawvêla politics thiltiha inhnamhnawih tûra nawrluihna chu a hnâwl ṭhak thei a. (Mt. 4:8-11; Joh. 6:14, 15) Ani chuan chakna nei reng tûrin Jehova a rinchhan a ni. Tûn laiah pawh sipaia ṭang duh lo, a nih loh leh politics thiltiha tel duh lo ṭhalai unaupate entawn tûr siam tam tak kan nei bawk a. Engvângin nge an thiltawn ṭhenkhat chu kan website jw.org-a i en loh vang? a

I UNAUTE ṬANPUI RAWH

8. Kohhran upate chuan an unaute hnêna ṭanpuina ṭangkai tak pe tûrin eng hunah nge huaisenna an neih a ngaih mai theih?

⁸ Jehova mite chu an inṭanpui tawn ṭhîn a. (2 Kor. 8:4) Mahse, chutianga inṭanpui tawn tûr chuan huaisenna neih a ngaih châng pawh a awm a ni. Entîr nân, indona a thlen hian tualchhûng kohhran upate chuan an unaute’n tihchak, thlâwp leh, thlarau lam leh tisa lamah ṭanpuina an mamawh tih an hria a. Kohhran upate chuan an berâmte chu an hmangaih êm avângin an nunna atâna dinhmun hlauhawm takah pawh an mamawhte an pe a. (Joh. 15:12, 13) Chumi chungchângah huaisenna kawnga Zadoka entawn tûr siam chu an zui a ni.

9. Samuela pahnihna 15:27-29-a sawi angin, Davida chuan Zadoka chu eng ti tûrin nge a hrilh? (Milem en bawk rawh.)

⁹ Davida nun chu dinhmun hlauhawm takah a awm a. A fapa Absaloma chuan a lalram chu chhuhsak a tum a. (2 Sam. 15:12, 13) Ani chu Jerusalem aṭanga a tlân chhuah vat a ngai ta! A chhiahhlawhte hnênah: “Tho ula i tlân chhuak ang u, tu mah Absaloma lakah hian kan chhuak thei âwm si lo,” tiin a hrilh a ni. (2 Sam. 15:14) Chûng chhiahhlawhte chu Davida rualin  an tlân chhuak a; mahse, Davida chuan Absaloma ruahmanna siamte a hnêna hriattîrtu tûr mi ṭhenkhat Jerusalema an châmbân a ngai tih a hre chhuak a. Chuvângin, Zadoka leh mi dangte chu enthlatu anga a rawngbâwl tûrin khawpuiah kîrtîr leh an ni. (2 Samuela 15:27-29 chhiar rawh.) Anni chu fîmkhur taka an awm a ngai ngei ang. Davida’n an hnêna mawhphurhna a pêk chu an nunna atân a hlauhawm hle dâwn si a. Absaloma—mi duhâm tak, phubâ lâk hmang leh mi rinawm lo, bum hmang tak—chuan Zadoka leh puithiam dangte chu Davida humhim tûra enthlatute an ni tih a hre chhuak a nih chuan, an tâna a hlauhawm dân tûr chu han mitthla teh!

10. Engtin nge Zadoka leh a hnêna awmte chuan Davida an vênhim?

¹⁰ Davida chuan Zadoka leh a ṭhian rinawm dang, Husaia telna ruahmanna pakhat a ngaihtuah chhuak a. (2 Sam. 15:32-37) Chu ruahmanna ang chuan Husaia chu Absaloma mi rin tak a rawn ni a, râldona atân thurâwn a pe ṭhîn a, chu chuan Davida tân tlân chhuahna hun a siamsak ṭhîn a ni. A thurâwn pêk chu Absaloma’n a pawm hnuah, Husaia chuan Zadoka leh Abiathara a hriattîr a. (2 Sam. 17:8-16) Anni chuan chu thuchah chu Davida hnênah an thawn ṭhîn a ni. (2 Sam. 17:17) Jehova ṭanpuinain Zadoka leh puithiam dangte chuan Davida nun vênhimnaah kawng pawimawh tak an chelh thei a ni.—2 Sam. 17:21, 22.

11. Engtin nge kan unaute kan ṭanpui hunah Zadoka huaisenna kan entawn theih?

¹¹ Hun hlauhawm tak kârah kan unaute’n ṭanpuina min dîl ta se, engtin nge Zadoka anga huaisenna kan lantîr theih? (1) Kaihhruaina chu zâwm rawh. Chutiang dinhmuna kan inpumkhat tlat chu thil pawimawh tak a ni. Chuvângin, in tualchhûng branch aṭanga kaihhruaina in dawnte chu zâwm ang che. (Heb. 13:17) Kohhran upate chuan chhiatna thleng theite atâna inbuatsaih dân leh chhiatna a thlen huna tih tûrte chungchânga inawpna pâwlin a pêk kaihhruainate chu an ennawn  ṭhîn tûr a ni. (1 Kor. 14:33, 40) (2) Huaisen la; mahse, fîmkhur rawh. (Thuf. 22:3) Thil i tih hmain ngaihtuah hmasa rawh. Ṭûl lo takin i nun hlauhthâwnawmah dah suh. (3) Jehova rinchhan rawh. Jehova chuan nangmah leh i unaute ṭhatna tûr a ngaihsak tak zet tih hre reng ang che. Ani chuan i unaute him taka ṭanpui thei tûrin a pui thei che a ni.

12-13. Unaupa Viktor-a leh Unaupa Vitalii-a te thiltawn aṭangin eng nge i zir? (Milem en bawk rawh.)

¹² Ukraine rama an Kristian unaute hnêna ei leh in tûr pêknaa thawk kohhran upa Unau Viktor-a leh Unau Vitalii-a te chungchâng hi han ngaihtuah teh. Unau Viktor-a chuan, “Inkahna kârah hmun tinah ei tûr kan zawng a. Unaupa pakhat hian a ei tûr dahkhâwlsa a rawn thawh a. Chu chu thuchhuahtu tam tak tân hun eng emawti chhûng dam khawchhuak tûra an mamawhte a ni. Kan motor-a unaute thilpêk kan hlân lai chuan, kan awmna aṭanga meter 20 (66 ft) vêla hlaah bomb lian tak a rawn tla a. Chumi nî chuan, Pathian Jehova hnênah unaute ṭanpui zawm zêl thei tûra ka neih ngai huaisenna min pe tûrin nilêngin ka dîl a ni,” tiin a sawi.

¹³ Unaupa Vitalii-a chuan: “Huaisenna nasa tak neih a ngai a. Ka zin hmasak ber ṭum chuan dârkar 12 chhûng kan kal a. Kawng tluanin Pathian Jehova hnênah ka ṭawngṭai,” tiin a sawi. Vitalii-a chu huaisen tak ni mah se, a fîmkhur hle bawk a ni. Ani chuan: “Jehova hnênah finna leh thuhnuairawlhna nei tûrin ka dîl ṭhîn a. Thuneitute’n kal an phalna kawngah chauh ka kal ṭhîn a ni. Unaute nêna kan inṭanpui tawn dân ka hmuhna chu ka hlâwkpui hle a. Unaute’n kan kalna tûr kawngte min thenfaisak a, bungruate chu an dahkhâwmin motor-ah min hlânsak a, kal kawnga kan ei tûrte min pein, kan chawlhna hmun tûrte min ruahmansak a ni,” tiin a sawi belh a ni.

JEHOVA CHUNGAH RINAWM RENG RAWH

14. Kan hmangaih tak tu emawin Jehova a kalsan hian, engtin nge min nghawng mai theih?

¹⁴ Kan chhûngkaw zînga mi emaw, kan ṭhian ṭha takin emaw Jehova a kalsan hian, chu chu kan tân tawrh hrehawm tak a ni thei a. (Sâm 78:40; Thuf. 24:10) Kan hmangaih takte an nih avângin, chu chu kan tân pawm a harsa hle thei a ni. Chutiang thiltawn hrehawm tak i tawng a nih chuan rinawmna kawnga Zadoka entawn tûr siam chuan a tichak thei che a ni.

15. Engvângin nge Zadoka chuan Jehova chunga rinawm reng tûra huaisenna a neih a ngaih? (1 Lalte 1:5-8)

¹⁵ A ṭhian ṭha tak Abiathara’n a rinawm lohsan hnuah pawh Zadoka chu Jehova chungah a la rinawm reng a. Chu chu Davida rorêl tâwp dawn lama thilthleng a ni. Davida chu a lo upat a, a thih dâwn hnaihah Pathian Jehova’n Solomona tâna a thutiam lal ṭhutthlêng chu Adonija chuan chuh a tum ta a. (1 Chro. 22:9, 10) Abiathara’n Adonija chu a thlâwp ta a ni. (1 Lal. 1:5-8 chhiar rawh) Chutianga Abiathara thiltih chu Davida chungah chauh ni lovin, Pathian Jehova chunga rinawm lohna pawh a ni. Chu chu Zadoka tâna a lungchhiatthlâk dân tûr leh a beidawnthlâk dân tûr chu i ngaihtuah thei em? Ani chuan Abiathara nên kum sawmli aia tam puithiam niin rawng an lo bâwl dûn tawh a. (2 Sam. 8:17) Anni chuan “Pathian bâwm chu” an enkawl dun ṭhîn a ni. (2 Sam. 15:29) A tîrah, an pahnih chuan Davida lalna chu an thlâwp a—Pathian rawngbâwlnaah thil dang tam tak an ti a ni.—2 Sam. 19:11-14.

16. Engin nge Zadoka chu rinawm reng tûra ṭanpui?

¹⁶ Abiathara chuan Jehova chu phatsan mah se, Zadoka chu Jehova chungah a rinawm reng a. Davida chuan Zadoka rinawmna chu a ringhlel ngai lo a ni. Adonija ruahmannate chu a lan chhuah tâkah chuan, Davida chuan Zadoka, Nathana leh, Benaia te chu lal atâna  Solomona siam tûrin thu a pe a. (1 Lal. 1:32-34) Jehova betu rinawmte—Nathana leh Lal Davida thlâwptu dangte ang chi—an awm chu Zadoka tân chakna leh huaisenna a ni ngei ang. (1 Lal. 1:38, 39) Solomona chu lal a nih chuan, “puithiam Zadoka chu lalin Abiathara ai a awhtîr” a ni.—1 Lal. 2:35.

17. I hmangaih tak tu emawin Jehova a kalsan chuan engtin nge Zadoka i entawn theih?

¹⁷ Engtin nge Zadoka i entawn theih? I hmangaih tak tu emawin Jehova kalsan a thlan chuan, Pathian Jehova chunga rinawm i duhna chu lantîr ang che. (Jos. 24:15) Ani chuan i mamawh chakna leh huaisenna a pe ang che. Ṭawngṭaiin amah rinchhan la, betu rinawmte chu hnaih tlat ang che. Ani chuan i rinawmna chu a ngaihluin, mal a sâwm ngei dâwn che a ni.—2 Sam. 22:26.

18. Marco-a leh Sidse-i te thiltawn aṭangin eng nge kan zir theih?

¹⁸ An fanu puitling tawh pahnih thutak kalsantu, Unau Marco-a leh a nupui Sidse-i te thiltawn hi han ngaihtuah teh. Unau Marco-a chuan: “Kan fate chu an pian tirh phat aṭangin kan hmangaih hle a. Anmahni tina thei eng pawh lakah vênhim kan duh a. Chuvângin, Jehova kalsan an thlang chu a lungchhiatthlâk hle a ni.” tiin a sawi. Mahse, ani chuan: “Jehova chuan tuar chhuak thei tûrin min ṭanpui a. Ka chak loh hunah ka nupui chakna a neihtîr a, ka nupui chak loh hunah chakna min neihtîr ve thung a ni,” tiin a sawi zawm a ni. Unaunu Sidse-i chuan: “Pathian Jehova’n kan mamawh chakna min pe lo ta se, he dinhmun hi ka tuar chhuak thei lo vang. Ka fanute’n Jehova rawngbâwl an bânsan chu ka thiam lohna nia ka hriat avângin ka rilru a hrehawm hle a, ka tawrh dânte chu Pathian hnênah ka hrilh a. Rei vak lovah, kum tam tak chhûng ka hmuh tawh loh unaunu pakhat hian ka dâra min kuah chunga ka mita min en pah hian: ‘Hei hi chhinchhiah rawh, Sidse, i thiam loh a ni lo!’ tiin min hrilh a. Jehova ṭanpuinain a rawngbâwlnaah hlim takin ka tel chhunzawm thei a ni,” tiin a sawi.

19. Eng nge tih kan tum tlat ang?

¹⁹ Jehova chuan amah betu zawng zawngte chu Zadoka anga huaisen tûrin min duh a. (2 Tim. 1:7) Mahse, ani chuan mahni chakna rinchhan lova, amah rinchhan tûrin min duh a ni. Chuvângin, huaisen a ngaihna dinhmuna i awm hunah Pathian Jehova rinchhan ang che. Zadoka ang bawkin, huaisenna a pe ang che tih i chiang thei a ni!—1 Pet. 5:10.