Chhiartute Zawhna
Isaia 60:1-na hi tu chungchâng sawina nge ni a, engtin nge ani chuan ‘thova’ “êng” a chhuah?
Isaia 60:1-na chuan: “Tho la, êng rawh; i êng chu a lo thleng a, LALPA ropuina chu i chungah a lo chhuah tâk hi,” tiin a sawi a. He châng hian chutih hun laia Judai ram khawpui Jerusalem, a nih loh leh Zion chungchâng a sawi a ni. (Is. 60:14; 62:1, 2) Chu khawpui chuan Israel hnam pumpui ai a awh a. Isaia thusawite chuan zawhna pahnih a tichhuak a ni: Pakhatna, engtik khân nge Jerusalem chuan ‘thova’ thlarau lam êng a chhuah? Pahnihna, Isaia hrilh lâwknate chuan kan hun laiah thlen famkimna ropui zâwk a nei em?
Engtik khân nge Jerusalem chuan ‘thova’ thlarau lam êng a chhuah? Babulona Juda mite kum 70 sala an tân chhûng khân, Jerusalem leh biak in chu ram takin a awm a. Mahse, Media leh Persia kuta Babulon a tlâwm hnu chuan Babulon Empire-a awm Israel mi zawng zawng chu an rama kîr a, biakna dik tungding leh tûrin chhuah zalen an ni ta a. (Ezr. 1:1-4) B.C.E. 537 aṭangin hnam 12-a mi rinawm la bângte chu an kîr ṭan a. (Is. 60:4) Jehova hnênah hâlral thilhlan an hlân a, kûtte an buatsaih a, biak in pawh an sa ṭha bawk a ni. (Ezr. 3:1-4, 7-11; 6:16-22) Jehova ropuina chuan Jerusalem—tundin leha awm Pathian mite—chungah thla a zâr leh ta a. Tichuan, anni chu thlarau lama thima awm hnam zawng zawngte tân êng lo chhuahna an ni ta a ni.
Mahse, tundin lehna chungchânga Isaia hrilh lâwkna chu hmân lai Jerusalem chungah a thleng famkim vek lo. Israel mi a tam zâwkte chuan Jehova thu an âwih chhunzawm lo va. (Neh. 13:27; Mal. 1:6-8; 2:13, 14; Mt. 15:7-9) A hnuah Messia, Isua Krista hial pawh an hnâwl a. (Mt. 27:1, 2) Chuvângin, C.E. 70-ah Jerusalem leh biak in chu a ṭum hnihna atân tihchhiatin a awm leh a ni.
Jehova’n chutiang chu a thleng ang tih a lo hrilh lâwk tawh a. (Dan. 9:24-27) Chuvângin, Isaia bung 60-naa tundin lehna chungchânga hrilh lâwkna zawng zawng lei lam Jerusalem chunga thlen famkimtîr chu a thiltum a ni lo tih a chiang hle.
Isaia hrilh lâwknate chuan kan hun laiah thlen famkimna ropui zâwk a nei em? Nei e. Mahse, chu chu “chung lam Jerusalem” chungah a thleng mêk a ni. Tirhkoh Paula chuan: “Chu ngei chu keini nu a ni,” tiin a saw a. (Gal. 4:26) Chung lam Jerusalem chu thlarau thilsiam rinawmte hmanga din Jehova inawpna pâwl vân lam pêng a ni. A fate zîngah chuan Isua leh Paula anga thlarauva hriak thih Kristian vân lam beiseina neitu mi 1,44,000 an tel a. Hriak thih Kristiante chu “hnam thianghlim”—“Pathian Israelte”—an ni.—1 Pet. 2:9; Gal. 6:16.
Engtin nge Jerusalem chuan ‘thova’ thlarau lam êng a chhuah? Leia hriak thih a fate hmangin chutiang chuan a ti a ni. An thiltawnte chu Isaia bung 60-naa hrilh lâwkna nên lo khaikhin ta ila.
Hrilh lâwk a nih angin, tirhkohte thih hnu C.E. kum zabi hnihnaa kalpênna a darh khân, hriak thih Kristiante chu thlarau lama thima an awm avângin an ‘thawh’ a ngai a. (Mt. 13:37-43) Chutih hun lai chuan khawvêl sakhaw dik lo lalram, Babulon Khaw Ropui hnênah sal an tâng a ni. Hriak thihte chu “khawvêl tâwpna” inṭan kum 1914 thlengin an tâng a. (Mt. 13:39, 40) A hnu lawk, kum 1919-a chhuah zalen an nih chuan thu hrilh rawngbâwlnaa nasa taka thawkin thlarau lam êng an chhuah ṭan nghâl a. a A hnu kumahte chuan, Isaia 60:3-naa “lalte” tia koh Pathian Israel la bângte pawh tiamin, hnam zawng zawnga mite chuan chu êng chu an rawn zawh ve ta a ni.—Thup. 5:9, 10.
Nakin hunah hriak thih Kristiante chuan Pathian êng chu ropui lehzualin an chhuah ang. Engtin nge? An lei lam nun an hman zawh hnuah chuan “Jerusalem Thar,” a nih loh leh Krista mo lal leh puithiam 1,44,000-te chu an fin dâwn a ni.—Thup. 14:1; 21:1, 2, 24; 22:3-5.
Jerusalem thar chuan Isaia 60:1-a thute thlen famkimnaah hmun pawimawh tak a chang ang a. (Isaia 60:1, 3, 5, 11, 19, 20 leh Thu Puan 21:2, 9-11, 22-26 khaikhin rawh.) Lei lam Jerusalem kha hmân lai Israel ram rorêlna hmunpui a nih ang bawkin, Jerusalem Thar leh Krista chu khawvêl thara rorêltute an ni ang. Engtin nge Jerusalem Thar chu ‘Pathian hnêna mi vân ata a lo chhuk’? Lei lam rawn ngaihsakna hmangin a ni. Hnam zawng zawnga Pathian ṭihtute chu “a êngah chuan an awm ang.” Sual leh thihna bawih ata chhuah zalen an ni ang a. (Thup. 21:3, 4, 24) Isaia leh zâwlnei dangte hrilh lâwk angin “engkim siam ṭhat” pumhlûm a ni ang. (Tirh. 3:21) Chu siam ṭhatna hna ropui chu Krista Lal a nih aṭang khân a inṭan a, a Kum Sâng Rorêlna zawhah thawh zawh a ni dâwn a ni.
a Kum 1919-a thlarau lama siam ṭhatna chu Ezekiela 37:1-14 leh Thu Puan 11:7-12-ah târ lan a ni a. Ezekiela chuan hun rei tak chhûng sal tânna aṭanga hriak thih Kristian zawng zawng thlarau lama siam ṭhat an nih hun tûr a hrilh lâwk a. Thu Puan bu-a hrilh lâwkna chuan dik lo taka rorêlsak an nih avânga hun rei lo te chhûng Jehova rawngbâwl thei lo va awm, hmahruaitu hriak thih unau tlêm tête thlarau lama siam ṭhat, a nih loh leh kaihthawh an nih tûr chungchâng a târ lang thung a ni. Anni chu kum 1919-ah “bâwih rinawm leh fing tak” ni tûra ruat an ni.—Mt. 24:45; Pure Worship of Jehovah—Restored At Last!, p. 118-na en rawh.
