1. Sâm 18:46-a târ lan angin, Davida chuan Jehova chu eng nên nge a tehkhin?

 BEISEI loh taka kan nun phung tibuaia thlâk danglam thawk theitu thilte thlen theihna khawvêlah kan chêng a. Pathian Jehova ṭanpuina kan dîl theih avângin kan va lâwm tak êm! Thuziak hmasaah khân, Jehova chu Pathian nung a ni tih leh ani chu min ṭanpui tûrin a inpeih reng tih hriat nawntîr kan ni a. A ṭanpuina kan dawn hian, chu thiltawn chuan “LALPA chu a nung reng,” tih kan rinna a tinghet lehzual a ni. (Sâm 18:46 chhiar rawh.) Davida’n chutianga Pathian chungchâng a sawi hnuah ani chu “ka lungpui” tiin a ko va. Engvângin nge Pathian nung Jehova chu nunna nei lo—lungpui—nêna a tehkhin?

2. Engvângin nge Davida’n “ka lungpui” tia Jehova a koh chhan chu kan ngaihven ang?

² He thuziakah hian, Jehova chu lungpui anga sawi a nih chhan leh chu entîr nei ṭawngkamin a chungchâng min zirtîrte chu kan sawiho vang a. Ani chu kan Lungpui anga kan thlîr theih dânte kan hre bawk ang. Chu bâkah, lungpui ang Jehova miziate kan entawn theih dân kawngte pawh kan sawiho bawk ang.

JEHOVA LUNGPUI A NIH CHHAN

3. Engtin nge Bible-in “lungpui” tih thu mal chu a hman ṭhin? (A kâwma milem en rawh.)

³ Bible chuan Jehova miziate kan mitthla thiam theih nân “lungpui” tih thu mal chu a hmang a. Chu thu mal chu tlukpui nei lo nia Pathian fakna Bible chângahte târ lan a ni ṭhîn. Pathian Jehova ‘Lungpui’ anga târ lanna hmasa ber chu Deuteronomy 32:4-ah a ni a. Hani chuan a ṭawngṭainaah “kan Pathian ang lungpui rêng a awm hek lo,” tiin a sawi a ni. (1 Sam. 2:2) Habakkuka’n Jehova chu “Lungpui” tiin a ko va. (Hab.  1:12) Sâm 73-na ziaktu chuan Pathian chu “lungpui nghet tak” tiin a ko bawk. (Sam 73:26, C.L. Re-edited) Chu bâkah, Jehova chuan amah leh amah lungpui angin a insawi a ni. (Is. 44:8) Lungpui ang miziate a lantîr dân kawng thum kan sawiho vang a, ani chu “kan Lungpui” kan nihtîr theih dân pawh kan hre bawk ang.—Deut. 32:31.

4. Engtin nge Jehova chu inhumhimna a nih? (Sâm 94:22)

⁴ Jehova chu inhumhimna a ni. Lungpui lian tak chu thlipui na tak laka inhumhimna a nih angin, Jehova chuan dinhmun hlauhawm takte lak ata min humhim a. (Sâm 94:22 chhiar rawh.) Ani chuan min vênghimin chhiat hlenna min thlen thei thil lakah min humhim bawk. Chu bâkah, chu aia nasa pawh min tiam bawk a ni: Kan muanna leh himna tiderthâwng thei apiang a tiboral ang.—Ezek. 34:25, 26.

5. Engtin nge Jehova chu lungpui ang kan Inhumhimna a nih theih?

⁵ Jehova chu lungpui ang kan Inhumhimna kan nihtîr theih dân kawng khat chu a hnêna ṭawngṭai hi a ni. A hnêna kan ṭawngṭai hian, kan rilru leh kan thinlung min vênhimsak tûrin a “thlamuanna” min pe a. (Phil. 4:6, 7) A rinna avânga tân ina awm Unau Artem-a thiltawn hi lo ngaihtuah ta ila. Tân ina thu zâwt fiahtu chuan dik lo tak leh râwng taka cheibâwlin thu a zâwt ṭhîn a. Unau Artem-a chuan, “Thu zâwt fiahtuin min koh apiang hian ka mangang hle ṭhîn a. . . . Jehova hnênah finna leh rilru thlamuanna min pe tûrin ka ṭawngṭai ṭhîn a ni. Mahse, Thu zâwt fiahtu hmaah chuan ka tlâwm mai lo va. . . . Pathian Jehova ṭanpuinain lung bang nghet tak phêna ding ang mai ka ni,” tiin a sawi.

6. Engvângin nge Jehova chu kan rinchhan reng theih? (Isaia 26:3, 4)

⁶ Jehova chu a rinchhan tlâk. Jehova chu kan tân lungpui nghet tak ang mai a ni a. Ani chu “kum khaw Lungpui” a nih avângin kan rinchhan thei a ni. (Isaia 26:3, 4 chhiar rawh.) A thutiam vawng tûr te, kan ṭawngṭaina ngaithla tûr te leh, kan mamawh ṭanpuina min pe tûrtein a nung reng ang. A rawngbâwltute chunga a rinawm tlat avângin kan rinchhan thei bawk. (2 Sam. 22:26) Ani chuan kan thiltihte chu a theihnghilh ngai lova, mal min sâwm zêl ang.—Heb. 6:10; 11:6.

7. Jehova kan rinchhan chuan engtin nge kan awm ang? (Milem en bawk rawh.)

⁷ Jehova kan rinchhan pumhlûm hian kan Lungpui kan nihtîr a. Hun khirh tak kârah pawh a thu kan âwih chuan kan hlâwkpui ang tih kan ring tlat a ni. (Is. 48:17, 18) A ṭanpuina kan dawn apiangin amah kan rinna pawh a nghet lehzual ang. Tichuan, Jehova chauhvin min ṭanpui thei tih hriain, fiahna eng pawh hmachhawn tûrin kan inbuatsaih ṭha lehzual dâwn a ni. Ṭanpuina dîla pan tûr kan neih loh apiangin Jehova chu rinchhan tlâk a nihzia kan hre chhuak fo ṭhîn. Unau Vladimir-a chuan, “Man ka nih lai chu Jehova ka hnaih ber lai niin ka inhria. Keimah chauhva ka awm avâng leh ka thunun theih loh dinhmuna ka  awm avângin, Jehova rinchhan nasat lehzual dân ka zir a ni,” tiin a sawi.

8. (a) Engvângin nge Jehova chu a danglam ngai lo tia kan sawi theih? (b) Engtin nge Pathian kan Lungpui nihtîrna chu kan hlâwkpui? (Sâm 62:6, 7)

⁸ Jehova chu a danglam ngai lo. Lungpui lian tak angin Pathian Jehova chu nghet tak leh tihchêt theih loh a ni a. A miziate leh a thiltumte chu a danglam ngai lo. (Mal. 3:6) Eden huana helna a lo chhuah pawh khân, mihringte tâna a thiltum chu a danglam lo a ni. Tirhkoh Paula ziah angin, Jehova chuan “amah leh amah a inphat thei si lo.” (2 Tim. 2:13) Chumi awmzia chu eng thil pawh thlengin, mi dangte thiltih chu eng pawh ni se, Jehova chuan a mizia te, a thiltum te leh, a tehnate chu a tidanglam ngai lo vang. Kan Pathian danglam ngai lova chu rinchhan tlatin, hun harsa tak kârah pawh a chhandamna leh a ṭanpuina kan beisei thei a ni.—Sâm 62:6, 7 chhiar rawh.

9. Unaunu Tatyana-i thiltawn aṭangin eng nge kan zir?

⁹ Jehova chu eng ang Mi nge a nih tih ngaihven tlatna leh a thiltumte kan rilrua vawn tlatna hmangin ani chu kan Lungpui kan nihtîr a. Chutianga kan tih chuan fiahnate kan tawh hunah rilru nghet tak puin kan awm thei dâwn a ni. (Sâm 16:8) Chu chu a rinna avânga a chênna ina tântîr unaunu Tatyana-i chungah a thleng dik a ni. Ani chuan “Keimah chauhvin ka awm a, a tîrah chuan hrehawm ka ti hle a. Ka lunghnual ṭhîn hle,” tiin a sawi a. Mahse, a fiahna tawh chu Jehova leh a thiltum nêna inkûngkaih a ni tih a hriat chuan, rilru lamah chakna thar a nei leh a, chhel takin a tuar chhuak thei a ni. Ani chuan: “Chutiang thil a thlen chhan ka hriatthiamna chuan Jehova tâna tuar ka ni tih min hriat chhuahtîr a. Chu chuan mahni chauh inngaihtuah lo tûrin min ṭanpui a ni,” tiin a sawi.

10. Engtin nge tûnah Jehova chu kan Lungpui a nih theih?

¹⁰ Kan hma lawkah, tûn hma zawng aia Jehova rinchhan lehzual a ngaihna hun khirh takte kan hmachhawn dâwn a. Tûn hi rinawm taka tuar chhuak tûra kan mamawh eng pawh min pe ang tih kan rinna tihngheh hun a ni. Chu chu engtin nge kan tih theih? Bible-a thilthlengte leh tûn laia Thuhretute thiltawnte chu chhiar ang che. Pathianin a chhiahhlawhte ṭanpui tûra lungpui ang a miziate a târ lan dân chu hriat tum la. Chûng thilthlengte chu ngun takin ngaihtuah ang che. Chutianga tihna chuan Pathian Jehova chu i Lungpui nihtîr tûrin a ṭanpui ang che.

LUNGPUI ANG JEHOVA MIZIATE CHU ENTAWN RAWH

11. Engvângin nge lungpui ang Jehova miziate chu entawn kan duh? (“Ṭhalai Unaupate Tâna Thiltum,” tih bâwm chu en bawk rawh.)

¹¹ Jehova chu lungpui anga târ lan a nih dân kan hre tawh a. Tûnah, lungpui ang a miziate kan entawn theih dân i lo ngaihtuah ang u. Chutianga Pathian miziate theih tâwp  chhuaha kan entawn chuan kohhrana unaute kan tichak lehzual thei ang. Entîr nân, Isua’n Simona chu Kipha (“Petera” tihna) tih hming a pe a, chumi awmzia chu “Lungpui,” tihna a ni a. (Joh. 1:42) Chu chuan kohhran tinghettu leh thlamuantu a ni ang tih a târ lang a ni. Kohhran upate chu “lungpui lian tak hlim” anga târ lan an ni a. Chu entîrna chuan kohhrana mite an vênhim dân a târ lang a ni. (Is. 32:2) Chuvângin, kan vaia Jehova lungpui ang miziate kan entawn hian kohhranin a hlâwkpui a ni.—Eph. 5:1.

12. Mi dangte tâna inhumhimna kan nih theih dân kawngte chu târ lang rawh.

¹² Inhumhimna ni rawh. Leilung chhiatnate, tualchhûng buainate leh, indonate avânga râltlân kan unaute chu ṭanpui theih châng kan nei a. “Ni hnuhnûngahte” dinhmunte a chhiat zêl rual hian inṭanpui theihna hun remchâng kan nei lehzual ngei ang. (2 Tim. 3:1) Kan unaute rilru lam leh thlarau lam mamawhte pawh kan ṭanpui thei bawk a. Kan tih theih dân kawng khat chu anni chu Kingdom Hall-a ṭha taka lo lawm leh kohhrana boruak nuam tak siam hi a ni. Tûn laia mi tam tak chu râwng takin an incheibâwl a, chu chuan kan unaute chu rilru hahna a neihtîr bâkah, hmangaihna dawng lo nia inhriatna a neihtîr thei a ni. Chuvângin, kan unaute chu inkhâwmnaa an lo tel hian hmangaih nia inhriatna te, rilru hahdam tak leh him nia inhriatna te neihtîr kan duh ṭheuh va ni.

13. Engtin nge kohhran upate chu mi dangte tâna inhumhimna an nih theih? (Milem en bawk rawh.)

¹³ Kohhran upate chu thlipui tak tak emaw, entîr nei thlipui emaw tuartu kohhrana unaute tân inhumhimna an ni thei a. Leilung chhiatna leh rîkrum thilte a lo thlen hian, kohhran upate chuan ṭanpuina ṭangkai tak pe tûrin ruahmanna an siam nghâl a. Thlarau lama ṭanpuina pawh an pe a ni. Unaute  chuan zaidam tak, khawngaihna nei tak leh, ngaihthlâk duhtu kohhran upate chu pan an duh lehzual ngei ang. Chûng miziate chuan mi dangte chu ngaihsak nia inhriatna a neihtîr a; chu chuan, kohhran upain a pêk Bible ṭanchhan kaihhruainate chu an tân zawm a tiawlsam lehzual a ni.—1 Thes. 2:7, 8, 11.

14. Engtin nge rinchhan tlâk kan ni tih kan lantîr theih?

¹⁴ Rinchhan tlâk ni rawh. A bîk takin, hun khirh tak kârah mi dangte tâna rinchhan tlâk nih kan duh a. (Thuf. 17:17) Engtin nge rinchhan tlâk nia hming ṭha kan chher theih? Kan thutiamte vawn rengna leh theih tâwp chhuaha hun vawn dikna hmangin Pathian miziate lantîr reng kan tum thei a ni. (Mt. 5:37) Ṭanpuina mamawh tu emaw kan hriat chuan kan ṭanpui thei bawk. Chu bâkah, kohhrana mawhphurhna kan dawnte chu kaihhruaina kan dawn nêna inmilin kan hlen chhuak tih kan chian thei a ni.

15. Engtin nge kohhran upate rinchhan tlâk an nih hian kohhranin a hlâwkpui?

¹⁵ Rinchhan tlâk upate chu kohhranin a hlâwkpui a. Engtin nge a hlâwkpui? Thuchhuahtute chuan thlawhhma rawngbâwlna group overseer pawh tiamin, kohhran upate chu an mamawh hun apianga an biak pawh theih hian ngaihsak nia inhriatna an nei a.  Upate’n ṭanpui an inhuam reng tih an hriatna chuan ngaihsak nia inhriatna a neihtîr bawk. Chu bâkah, kohhran upate chuan thurâwn an pêk hunah an ngaih dân ni lovin, Bible leh bawih rinawm pâwl thu leh hla chhuahte ṭanchhana an pêk avângin unaute rin an hlawh a ni. Unaute chuan an mi mal thilte sawi chhuak lova vawng tlattu leh an thutiamte hlen ṭhîntu upate chu an rinchhan lehzual a ni.

16. Thutaka nghet taka kan awm hian engtin nge mahni leh mi dangte’n kan hlâwkpui?

¹⁶ Nghet Takin awm rawh. Thu dika kan din ngheh tlat a, Bible thu bulte ṭanchhana thu tlûknate kan siam hian mi dangte tân entawn tûr ṭha kan siam a ni. Rinnaah leh hriatna dik taka kan ṭhan chhoh zêl rualin, thutakah kan ding nghet lehzual a. Rilru bulbâl nei lo, rilru nghet lo, a nih loh leh zirtîrna dik lo leh khawvêl ngaihtuahnain awlsam taka thunun theih kan ni lo. (Eph. 4:14; Jak. 1:6-8) Jehova leh a thutiamte kan rinna chuan chanchin ṭha lo kan hriat hunah chi-ai lo tûrin min ṭanpui a. (Sâm 112:7, 8) Fiahna tâwk mêkte pawh kan ṭanpui thei bawk a ni.—1 Thes. 3:2, 3.

17. Engin nge kohhran upate chu kohhran tinghet tûra ṭanpui?

¹⁷ Kohhran upate chu insûm thei, rilru dik tak pu, fel taka thil ti leh, hriatthiamna nei tak an ni tûr a ni a. Anni chuan ‘thu rinawm chu pawm tlatin,’ kohhran chu an tinghetin an tichak a ni. (Tit. 1:9; 1 Tim. 3:1-3) Upate chuan entawn tûr siamin leh berâm tlawhnate hmangin thuchhuahtute chu inkhâwmnaahte leh, rawngbâwlnaahte tel ziah tûr leh mi mal inzirna nei ziah tûrin an ṭanpui a. Unaute’n buainate an hmachhawn hian upate chuan Jehova rinchhan tlat tûr leh a thiltumte ngaihtuah tlat tûrin anni chu an fuih ṭhîn a ni.

18. Engvângin nge Jehova chu faka hnaih lehzual kan duh? (“ Jehova Hnaih Lehzual Dân Kawngte,” tih bâwm chu en rawh.)

¹⁸ Jehova mize ropui takte kan sawiho hnu chuan, Lal Davida angin: “LALPA ka lungpui chu fakin awm rawh se,” tiin kan sawi ve thei a ni. (Sâm 144:1) Jehova chu kan rinchhan theih Pathian a ni reng a. Kan dam chhûngin, kan târ hunah pawh thlarau lama ṭhang chho zêl tûrin min ṭanpui zawm zêl ang tih kan rin ngheh tlat avângin: “Ani chu ka lungpui a ni,” tia sawi theih nachhan tûr kan nei a ni.—Sâm 92:14, 15.