1. Engin nge Jehova mite chu harsatnate hmachhawn chung pawha amah be chhunzawm zêl tûra ṭanpui?

 TUN kan hun hi Bible-in “hun khirh takte,” tiin a sawi a. (2 Tim. 3:1) He khawvêla mi tinte tawh harsatnate bâkah, Jehova mite chuan dodâlna leh tihduhdahna an tâwk a ni. Chûng harsatnate kan tâwk chung pawhin, engin nge Jehova be chhunzawm zêl tûra min ṭanpui? Jehova chu “Pathian nung” a ni tih kan hriatna hi a ni.—Jer. 10:10; 2 Tim. 1:12.

2. Jehova chu eng kawngin nge Pathian nung a nih?

² Jehova chu harsatnate kan tawh huna min ṭanpuitu leh min ṭanpui theihna hun remchâng zawng rengtu mi tak tak a ni a. (2 Chro. 16:9; Sâm 23:4) Pathian nung anga amah thlîrna chuan harsatna eng pawh hlawhtling taka hmachhawn thei tûrin min ṭanpui thei a ni. Chutiang chu Lal Davida chunga a thlen dân i lo ngaihtuahho vang u.

3. Davida’n “Lalpa chu a nung reng e” tia a sawi khân, eng a sawi tumna nge?

³ Davida chuan Jehova chu a hriain a rinchhan a. Lal Saula pawh telin a hmêlmate’n an ûm khân, Jehova ṭanpuina dîlin a ṭawngṭai a ni. (Sâm 18:6) Pathianin a ṭawngṭaina chhânga a chhanhim hnuah Davida chuan: “Lalpa chu a nung reng e,” tiin a sawi a. (Sâm 18:46) Hêng thute hian Pathian a awm tih a hriatna mai aia tam a kâwk a ni. Zir chianna pakhat chuan Davida’n Jehova chu “a mite ṭanpui tûra inpeih reng Pathian nung a ni” tih a rinnghehzia a târ lanna a nih thu a sawi a. A thiltawn aṭangin a Pathian chu a nung tih a hria a, chu chuan Jehova rawngbâwl tûr leh fak chhunzawm zêl tûrin a ṭanpui a ni.—Sâm 18:28, 29, 49.

4. Jehova Pathian nung anga thlîrna chu engtin nge kan hlâwkpui?

 ⁴ Jehova chu Pathian nung a ni tih kan rinnghehna chuan ṭhahnemngai taka a rawngbâwl tûrin min ṭanpui thei a ni. Harsatnate tâwk chung pawha Pathian rawngbâwlnaa chhel taka thawk chhunzawm zêl tûrin chakna kan nei thei a. Jehova hnaih reng kan tum bawk ang.

PATHIAN NUNG CHUAN A TICHAK ANG CHE

5. Harsatna kan tawh hunah engin nge huaisenna min pe thei? (Philippi 4:13)

⁵ Jehova chu a nung tih leh min ṭanpui tûrin a inpeih reng tih kan hriatreng chuan kan harsatna tawh chu a lian emaw, a tê emaw pawh ni se kan tuar chhuak thei ang. A nihna takah chuan kan Pathian chinfel theih loh harsatna engmah a awm lo. Engkimtitheia a nih angin, tuar chhuak tûra kan mamawh chakna min pe thei a ni. (Philippi 4:13 chhiar rawh.) Chuvângin, kan harsatnate chu huaisen takin kan hmachhawn thei a. Harsatna tê tham zâwkte kan hmachhawn laia Jehova’n min ṭanpui tih kan hriatna chuan, harsatna lian zâwkte kan hmachhawn hunah pawh min ṭanpui ang tih rinnghehna min pe a ni.

6. Davida tleirâwl laia a thiltawn engin nge Jehova chunga a rinna tinghet lehzual?

⁶ Davida thiltawn pahnihin Jehova chunga a rinna a tihngheh dân hi lo ngaihtuah ta ila. A tleirâwl laia a pa berâm a vên laiin savawm pakhat chuan berâm rual zînga pakhat chu a rawn la a; chutiang bâwkin, sakeibaknei pakhat pawhin a la bawk. Chûng dinhmunahte chuan Davida chuan huaisen takin chûng ramsate chu ûmin a bei a, berâmte chu a chhanchhuak a ni. Mahse, chu chu ama theihna angin a ngai lo. Ani chuan Jehova ṭanpuina vâng a ni tih a hria a ni. (1 Sam. 17:34 37) Chûng a thiltawnte chu a theihnghilh ngai lo va. Chûngte a chhût ngunna chuan nakin hunah pawh Pathian nung chuan a tichak zêl ang tih rinnghehna a neihtîr a ni.

7. Engtin nge thlîr dân dik tak neihna chuan Davida chu Goliatha hmachhawn tûra a ṭanpui?

⁷ A hnuah tleirâwl a la nih lai thovin, Israel mite sipai riahhmun a va tlawh a. Philistia mi hrawl tak, Goliatha an tih chu ‘Israel sipaite cho va’ a lo chhuah avângin anni chuan an hlau hle tih a hmu a ni. (1 Sam. 17:10, 11) Chûng sipaite chuan Goliatha hrawl dân leh a thusawi an hriatte an ngaihven tlat avângin an hlau hle a. (1 Sam. 17:24, 25) Mahse, Davida thlîr dân leh chûng sipaite thlîr dân chu a inang lo hle. Ani chuan chûng thilthlengte chu Israel sipaite chona anga thlîr lovin, ‘Pathian nung sipaite’ chona angin a thlîr a ni. (1 Sam. 17:26) Davida chuan Jehova chu a rilruah a dah hmasa ber a. Chu dinhmunah pawh berâm a vên laia amah ṭanpuitu Jehova chuan a ṭanpui leh ang tih a ring tlat a ni. Ani chuan Pathian rinchhan tlat chungin Goliatha chu a bei a, a hneh ta rêng a!—1 Sam. 17:45-51.

8. Engtin nge fiahna kan hmachhawn hunah Jehova’n min ṭanpui ngei ang tih kan rinngheh tlat theih? (Milem en bawk rawh.)

⁸ Pathian nung chu min ṭanpui tûrin a inpeih reng tih kan hriat chuan keini pawhin fiahnate chu hlawhtling takin kan hmachhawn thei a. (Sâm 118:6) Hun kal tawha a thiltihte ngaihtuahna hmangin Pathian Jehova chunga kan rinna chu kan tinghet thei a ni. Pathianin amah betute a chhanchhuah dân chanchin Bible-a târ lante chu chhiar ang che. (Is. 37:17, 33-37) Tûn laia Jehova’n kan unaute a ṭanpui dân kan website jw.org-a târ lante chu en bawk la. Chu bâkah, Jehova’n a lo ṭanpui tawh dân che chu ngaihtuah bawk ang che. Savawm emaw, sakeibaknei emaw beihna ang chi thiltawn danglam tak i nei lo a nih pawhin pawi ti suh. Engvângin nge? Dik tak  chuan, Jehova’n i nunah thil tam tak a tihsak tawh che a. Amah nêna inlaichînna nei tûrin a lamah a hîp tawh che a ni. (Joh. 6:44) Tûnah pawh, a ṭanpuina azârah thutakah i la awm reng a ni. I ṭawngṭaina a chhân laite, i mamawh hun taka a ṭanpuina i dawnte leh, dinhmun khirh taka i awm laia a ṭanpuina i dawnte hriat chhuahtîr tûr chein engvângin nge a hnênah i dîl loh vang? Chûng thiltawnte ngaihtuah lêtna chuan Jehova’n a ṭanpui zawm zêl ang che tih i rinna chu a tinghet ngei ang.

9. Fiahna kan tawh hunah eng nge kan hriatreng ngai? (Thufingte 27:11)

⁹ Jehova chu mi awm tak tak anga hmuhna chuan kan fiahna tawhte chunga thlîr dân dik nei tûrin min ṭanpui thei a ni. Engtin nge? Kan fiahna tawhte chu Jehova leh Setana inkâra awm thu buai lian zâwk nêna inkûngkaih niin kan hre ṭan a. Diabola chuan harsatna kan tawh hunah Jehova kan kalsan ang tiin a sawi a ni. (Job. 1:10, 11; Thufingte 27:11 chhiar rawh.) Mahse, kan fiahna tawhte hlawhtling taka kan tawrh chhuah hian, Jehova kan hmangaih tih kan târ lang a, Diabola chu dâwt pa a ni tih kan finfiah bawk. Sawrkâr aṭanga dodâlnate, sum leh pai lama harsatnate, thu hrilhnaa chhân lêtna ṭha lote, a nih loh leh fiahna dang eng emaw i tâwk mêk em? I tâwk mêk a nih chuan, Jehova thinlung tihlâwm theihna hun remchâng i nei tih hre reng la; chu bâkah, i tawrh theih tâwk bâk fiahna i tawh a phal ngai lo vang tih hre reng bawk ang che. (1 Kor. 10:13) Ani chuan tuar chhuak tûra i mamawh chakna a pe dâwn che a ni.

PATHIAN NUNG CHUAN LAWMMAN A PE ANG CHE

10. Pathian nung chuan amah betute tân eng nge a tih ang?

¹⁰ Jehova chu amah betute lâwmman pêk hmang a ni a. (Heb. 11:6) Tûnah ani chuan remna leh lungawina min pe a, nakin hunah chatuana nunna min pe bawk ang. Jehova chuan lâwmman min pe tûrin duhna leh thiltihtheihna  a nei tih kan rinngheh tlat avângin, a chungah beiseina kan nghat thei a. Chu rin nghehna chuan hmân laia a chhiahhlawh rinawmte chu theih tâwp chhuaha a rawngbâwl tûra a chêttîr ang bawkin, keini pawh min chettîr thei a. Chutiang chu kum zabi khatnaa Timothea chungah pawh a thleng a ni.—Heb. 6:10-12.

11. Engin nge Timothea chu kohhran tân theih tâwp chhuah tûra chêttîr? (1 Timothea 4:10)

¹¹ Timothea thawn khat 4:10 chhiar rawh. Timothea chuan Pathianin lâwmman a pe ang tih rinna nghet tak a nei a. Chuvângin, Jehova leh mi dangte tân theih tâwp a chhuah a ni. Eng kawngtein nge? Tirhkoh Paula chuan ani chu rawngbâwlnaah leh kohhranah zirtîrtu ṭha lehzual ni tûrin a fuih a. Kristian unau apui apangte tâna entâwn tûr ṭha siam tûrin a fuih bawk a ni. A mamawhte hnêna zilhna thu hmangaihna nei tak leh khauh tak pêk ang chi mawhphurhna harsa takte thawk tûra tih a ni bawk. (1 Tim. 4:11-16; 2 Tim. 4:1-5) Timothea chuan a hnathawh chu mi dangte hriat hlawh loh leh lawm hlawh loh châng awm mah se, Jehova’n lâwmman a pe ang tih a chiang a ni.—Rom 2:6, 7.

12. Engin nge upate chu kohhrana theih tâwp chhuaha an hna thawk tûra chêttîr? (Milem en bawk rawh.)

¹² Tûn laiah, kohhran upate pawhin Jehova’n an hnathawh ṭhate chu a hmuin, a ngaihlu tih an chiang thei a. Upa tam tak chuan berâm tlawhna te, zirtîrna te leh, thu hrilhnate bâkah, in sakna project-te leh chhiat tâwkte ṭanpuina lamah an thawk bawk a. Mi dangte chu Patient Visitation Group, a nih loh leh Hospital Liaison Committee-ah te an thawk bawk a ni. Chutianga thawk rim upate chuan kohhran chu mihring ruahmanna ni lovin, Jehova ruahmanna angin an thlîr a. Chuvângin, an hna chu thinlung zawng zawngin an thawk a, Pathianin lâwmman a pe ang tih an ring nghet tlat a ni.—Kol. 3:23, 24.

13. Engtin nge Jehova’n a rawngbâwlnaa mi mal taka kan thawhrimnate chu a ngaih?

 ¹³ Kan vai hian upa kan ni vek thei lo va. Mahse, kan vai hian Jehova hnênah pêk theih kan nei ṭheuh a ni. Ani chuan theih tâwp chhuaha a rawng kan bâwlna hi a ngaihlu a. Khawvêl pum huap rawngbâwlna atâna kan thawhlâwmte chu a tam tham lo a nih pawhin min hriatsak a. Zâm chung chung pawha theih tâwp chhuaha bân phara chhânna kan pêk hunahte leh mi dangte’n min tihlungnih lohna kan ngaihdam hunahte hian a lâwm a ni. Jehova tân tih theih tam tak nei lo niin inhre mah la, i tih theih chhunte chu a ngaihlu tih ring tlat ang che. Chutianga i tih avângin a hmangaih che a, lâwmman a pe bawk ang che.—Lk. 21:1-4.

PATHIAN NUNG CHU HNAIH RENG RAWH

14. Engtin nge Jehova hnaih tlatna chuan rinawm reng tûra min ṭanpui ? (Milem en bawk rawh.)

¹⁴ Jehova chu kan tân mi tak tak a nih chuan, a chunga rinawm reng chu awlsam kan ti lehzual ang. Chu chu Josefa chungah a thleng dik a ni. Pathian chu a tâna mi tak tak a nih avâng leh amah tihlâwm loh a hlauh avângin nungchang bawlhhlawhna chu a hnâwl ṭhak a. (Gen. 39:9) Jehova chu kan tân mi tak tak ni thei tûr chuan a hnêna ṭawngṭai nân leh a thu zir nân hun kan pêk a ngai a ni. Chutianga kan tih chuan Pathian nêna kan inṭhianna chu a nghet chho zêl ang. Josefa anga Jehova nêna inṭhian ṭhatna kan neih chuan, amah tilâwm lo eng thil mah tih kan duh lo vang.—Jak. 4:8.

15. Thlalêra an awm laia Israelte chunga thilthleng aṭangin eng nge kan zir theih? (Hebrai 3:12)

¹⁵ Jehova chu Pathian nung a ni tih theihnghilhtute chuan awlsam takin amah an hlat thei a. Thlalêra an awm laia Israelte chunga thilthleng hi lo ngaihtuah ta ila. Jehova a awm tih hre mah se, an mamawhte a pe ang tih an ringhlel ṭan a. Anni chuan: “Kan zîngah hian Lalpa chu a awm nge maw awm lo le?” tiin an zâwt hial a. (Ex. 17:2, 7) Chuvângin, Pathian lakah an hel ta a ni. An  entawn tûr ṭha lo chu zui kan duh lo ngei ang.—Hebrai 3:12 chhiar rawh.

16. Engin nge kan rinna fiah thei?

¹⁶ He khawvêl hian kan tân Jehova hnaih reng a tiharsa thei a. Mi tam tak chuan Pathian a awm rêng an ring lo va. Chu bâkah, Pathian thil phût hnâwl tute chu hausa takin an awm ṭhîn a ni. Chûng thilte kan hmuh chuan, kan rinna chu fiahin a awm thei a. Pathian a awm tih chu hnâwl lo mah ila, min ṭanpui ang tih kan ringhlel ṭan thei a ni. Sâm 73-na ziaktu pawhin, hun eng emawti chhûng chutiang ngaihdân chu a nei a. A chheh vêla mite’n Pathian dân hnâwl chunga nuamsa taka an awm chu a hmu a. Chuvângin, Pathian rawngbâwlna hlutna chungah rinhlelhna a nei ṭan a ni.—Sâm 73:11-13.

17. Engin nge Jehova hnaih reng tûra min ṭanpui ang?

¹⁷ A hnuah engin nge fakna hla phuahtu chu thlîr dân dik nei tûra ṭanpui? Jehova theihnghilhtute chunga thilthleng tûrte chu a chhût ngun a. (Sâm 73:18, 19, 27) Pathian rawngbâwlna aṭanga lo awm hlâwknate chu a ngaihtuah bawk. (Sâm 73:24) Keini pawhin, Jehova’n mal min lo sâwm tawh dânte chu kan ngaihtuah lêt thei a. Jehova rawng kan bâwl loh avânga kan nun awm dân tûr chu han mitthla teh. Chutianga tihna chuan rinawm taka awm tûr leh fakna hla phuahtu angin: “Kei atân erawh zawng Pathian hnaih hi a ṭha a ni,” tia thu tâwp siam tûrin min ṭanpui ang.—Sâm 73:28.

18. Engvângin nge huaisen taka hma lam hun kan hmachhawn theih?

¹⁸ He ni hnuhnûng chhûng hian “Pathian nung leh dik tak” rawng kan bâwl avângin fiahna eng pawh chhel takin kan hmachhawn thei a. (1 Thes. 1:9) Kan Pathian chu amah betute ṭanpuitu mi tak tak a ni. Hmân laia a chhiahhlawhte a awmpui angin, tûn laiah pawh min awmpui ang. He leia la awm ngai lo hrehawm nasa tak kan hmachhawn thuai dâwn a. Mahse, mahni chauhvin kan hmachawn lo vang. (Is. 41:10) Chuvângin, “Huai takin, Lalpa chu mi ṭanpuitu a ni, ka hlau lo vang,” tiin i sawi ṭheuh vang u.—Heb. 13:5, 6.