ZIR TUR THUZIAK 23
HLA 28 Jehova Ṭhian Nih Theih Dân
Jehova Chuan A Mikhualte Ni Tûrin Ropui Takin Min Sâwm
“Ka bâwktê pawh an hnênah a awm ang a, an Pathian ka ni ang.”—EZEK. 37:27.
A TUM BER
Jehova’n entîr nei a puan ina mikhualte ni tûra min sâwmna leh Khual Thlengtu anga min ngaihsak dân kawngte kan ngaihhlutna tihpun.
1-2. Jehova chuan amah betu rinawmte hnênah eng sâwmna nge a pêk?
JEHOVA’N i nunah eng hmun nge a chan? Heti hian i chhâng thei a ni: ‘Jehova chu ka Pa, ka Pathian leh, ka ṭhian a ni,’ tiin. Chu bâkah, nihna dangte pawh a nei a, chûngte chu Jehova chungchâng sawi nân i hmang thei a ni. Mahse, Khual Thlengtu angin i thlîr ngai em?
2 Lal Davida chuan Jehova leh amah betu rinawmte inkâra inṭhian ṭhatna chu khual thlengtu leh a mikhualte inkâra inlaichînna nên a tehkhin a. Ani chuan: “LALPA, i puan inah chuan tu nge lo mikhual ang? I tlâng thianghlimah chuan tu nge lo awm ang?” tiin a zâwt a ni. (Sâm 15:1) He thlarauva thâwk khum thu aṭangin, Jehova mikhualte—a ṭhiante—kan ni thei tih kan hria a. Jehova hnên aṭanga sâwmna ropui tak a ni lâwm ni?
JEHOVA CHUAN A MIKHUALTE NI TURIN MIN DUH
3. Jehova mikhual hmasa ber chu tu nge ni a, Jehova leh a mikhual chuan an inkâra inlaichînna chu engtin nge an ngaih?
3 Jehova chu thil a siam hmain amah chauhvin a awm a. A hnuah entîr nei a puan inah a Fapa piang hmasa ber chu a lâwm lût a. Ani chuan Khual Thlengtu anga a chanvo thar neih chu a ngaihlu hle a ni. Bible chuan A Fapa chu Jehova “lâwmna” a ni tih a sawi a. A mikhual hmasa ber a Fapa chu ‘a bulah a hlim êm êm bawk ṭhîn’ a ni.—Thuf. 8:30.
4. Engtin nge Jehova’n a puan in chu zâwi zâwia a zauh?
4 Jehova chuan vântirhkoh dangte a siam a, anni chu a mikhualte ni tûrin a sâwm bawk. A vântirhkohte chu “Pathian fate” tia koh an ni a, Jehova hmaah an hlim hle a ni. (Job. 38:7; Dan. 7:10) Kum eng emawti chhûng chu, chûng vântirhkohte chauh chu Pathian mikhualte an ni a. A hnuah, leia mihringte tân pawh a puan in a zauh a ni. Chûng a mikhual zîngah chuan Enoka te, Nova te, Abrahama te leh, Joba te an tel a. Chûng betu dikte chu Pathian ṭhiante, a nih loh leh ‘Pathian dik nêna lêng dûn’ anga târ lan an ni.—Gen. 5:24; 6:9; Job. 29:4; Is. 41:8.
5. Ezekiela 37:26, 27-naa kan hmuh hrilh lâwkna aṭangin eng nge kan hriat theih?
5 Kum zabi tam tak chhûngin, Jehova chuan a ṭhiante chu a mikhual ni tûrin a sâwm chhunzawm zêl a. (Ezekiela 37:26, 27 chhiar rawh.) Entîr nân, Pathianin amah betu rinawmte chu amah nêna inlaichînna duhawm tak nei tûrin a duh tak zet tih Ezekiela hrilh lâwkna aṭangin kan hria a ni. Ani chuan ‘anmahni nên remna thuthlung siam’ tûrin a tiam a. Chu hrilh lâwkna chuan vân lam beiseina neitute leh lei lam beiseina neitute chu ‘pâwl khata’ awmin, entîr nei puan in chhûnga inlungrual taka an awm hun tûr a kâwk a ni. (Joh. 10:16) Tûn hi chumi hun chu a ni!
KAN AWMNA HMUN APIANGAH PATHIANIN MIN NGAIHSAK
6. Engtin nge tu emaw chu Jehova puan inah mikhual a nih theih a, a puan in chu khawiah nge a awm?
6 Bible hun lai chuan, puan in chu sik leh sâ laka chawlhna hmun leh invênhimna hmun a ni a. Puan ina thleng mikhual chuan ṭha taka ngaihsakna dawn a beisei thei a ni. Jehova hnêna kan inpumpêk tawh chuan entîr nei a puan ina mikhual kan ni a. (Sâm 61:4) Thlarau lam chaw hnianghnâr takin kan ei a, a mikhual dangte nên inṭhian ṭhatna kan nei bawk a ni. Jehova entîr nei puan in chu khawi hmuna awmte tân pawh a ni a. Special inkhâwmpui chhim tûrin ram dangah i zin tawh mai thei a, chutah chuan Pathian puan ina awm malsâwmna dawngtu mi dangte i tawng ngei ang. Pathian puan in chu amah betu rinawmte awmna apiangah a awm a ni.—Thup. 21:3.
7. Engvângin nge mi rinawm thi tawhte chu Jehova puan inah mikhual an la ni reng tia kan sawi theih? (Milem en bawk rawh.)
7 Mi rinawm thi tawhte chungchâng hi eng nge ni ve? Jehova puan inah mi khual an la ni reng thei ang em? Thei e! Engvângin nge chutianga kan sawi theih? Pathianin anni chu a la hre reng a, a ngaihah chuan an la nung reng a ni. Isua chuan: “Mitthi kaihthawh thu-ah chuan, Mosia pawhin hnimbuk chungchâng thu-ah khân Jehova chu, ‘Abrahama Pathian, Isaaka Pathian leh, Jakoba Pathian,’ tia kovin a hriattîr kha. Ani chu mitthi Pathian a ni lo va, mi nung Pathian a ni zâwk, ani ngaihah chuan an zavaiin an nung vek si a,” tiin a sawi a ni.—Lk. 20:37, 38, NWT.
Mi rinawm thi tawhte pawh Pathian puan ina mikhual anga thlîr an la ni reng thei (Paragraph 7-na en rawh)
JEHOVA MIKHUAL KAN NIH ANGA KAN HLAWKPUINATE LEH KAN MAWHPHURHNATE
8. Engtin nge Jehova mikhualte chuan a puan ina awm chu an hlâwkpui?
8 Puan in tak tak chu sik leh sâ laka chawlhna hmun leh inhumhimna hmun a nih ang bawkin, Jehova puan ina mikhualte chu thlarau lam dinhmun hlauhawm tak leh beisei bo nihna laka vênhim an ni. Jehova kan hnaih reng chuan, Setana’n kan chhiat hlenna tûrin engmah a ti thei lo vang a. (Sâm 31:23; 1 Joh. 3:8) Khawvêl tharah chuan, Jehova’n a ṭhian rinawmte chu thlarau lam dinhmun hlauhawma awmtîr theitu chauh ni lovin, thihna ata pawh a vênghim zawm zêl ang.—Thup. 21:4.
9. Jehova chuan a mikhualte chu eng ti tûrin nge a beisei?
9 Jehova nêna mi mal taka inlaichînna ṭha neia a puan ina mikhual kan ni thei chu chawimawina ropui tak a ni a. A mikhualte nih zawm zêl kan duh chuan engtin nge kan nun ang? Tu emawin a ina kal tûra a sâwm che chuan, mikhual ṭha tak ni tûrin eng nge tih i duh ang? Entîr nân, in chhûnga luh hmaa pheikhawk phelh tûra a duh che chuan chutianga tih chu i duh ngei ang. Chutiang bawkin, Jehova chuan a puan ina mikhual anga thlen zawm zêl duhtute tâna ti tûra a duhte chu hriat i duh ngei ang a. Pathian kan hmangaihna chuan theih tâwp chhuaha “kawng tinrênga amah tilungawi tûrin” min chêttîr a ni. (Kol. 1:10-12) Ani chu Ṭhian anga kan thlîr rualin, kan zah phu tak kan Pathian leh Pa a ni bawk tih kan hria a. (Sâm 25:14) Chu a nihna chu hre rengin, ani chu engtik lai pawha ṭih tûr a ni tih kan theihnghilh ngai lo. Chutianga zahna thûk tak kan neihna chuan a huat zâwng nungchangte pumpelh tûrin min ṭanpui ang a. Kan Pathian nêna “thuhnuairawlh taka lên dun” chu kan duh reng bawk ang.—Mik. 6:8.
THLALERAH KHAN JEHOVA CHUAN DUHSAK BIK A NEI LO
10-11. Engtin nge Jehova chuan Sinai thlalêra Israel mite nêna an indâwrnaah duhsak bîk a nei lo tih a lantîr?
10 Jehova chuan a mikhualte a cheibâwl dân kawngah duhsak bîk a nei lo va. (Rom 2:11) Chu chu Sinai thlalêra Israel mite a cheibâwl dân aṭangin kan hre thei a ni.
11 A mite chu Aigupta bâwih aṭanga an zalen hnuah Jehova chuan biak bûka rawngbâwl tûrin puithiamte a ruat a. Levi-hote chu biak bûk nêna inkûngkaih rawngbâwlna dang thawk tûra ruat an ni. Ani chuan biak bûka rawngbâwltute, a nih loh leh biak bûk hnaiha rawngbâwltute chu mi dangte aiin a ngaihsak bîk em? Ngaihsak bîk lo ve! Ani chuan duhsak bîk a nei lo.
12. Engtin nge Jehova chuan thlalêra Israel mite a cheibâwl dân aṭangin duhsak bîk a nei lo tih a lantîr? (Exodus 40:38) (Milem en bawk rawh.)
12 Biak bûka rawngbâwltute emaw, a bul hnaia rawngbâwltute emaw pawh ni se, Israel mi tu pawhin Jehova ṭhian nih theihna hun remchâng an nei ṭheuh va. Entîr nân, Pathianin chu hnam pumpui chu biak bûk chunga mak tak maia chhûm lo ding ṭhîn leh mei lo awm ṭhîn chu a hmuhtîr a. (Exodus 40:38 chhiar rawh.) Chu chhûm ding a insawn chuan biak bûk aṭanga hla taka awmte pawhin an hmu thei a; chuvângin, an thil neihte chu la khâwmin, an puan inte chu an hlîp a, an hnampuite rualin an chhuak ṭhîn a ni. (Num. 9:15-23) An awmna hmun insawn tûra hriattîr nâna tangkaraw tawtawrâwt pahnih ham a nih chuan mi zawng zawngin an hre thei vek a. (Num. 10:2) Biak bûk hnaiha awmte chu chumi hlata awmte aiin Jehova nêna an inṭhianna a nghet lehzual tihna a ni lo tih a chiang hle. Chu bâkah, a hnam pumin Jehova mikhual an ni thei a; a kaihhruaina leh a vênhimna an dawng thei a ni. Chutiang bawkin, tûn laiah pawh khawvêl khawi hmunah pawh awm mah ila, Jehova hmangaihnate, ngaihsaknate leh, vênhimnate chu kan dawng thei a ni.
Pathian biak bûk ruahmanna chuan duhsak bîk a neih lohzia a târ lang (Paragraph 12-na en rawh)
JEHOVA DUHSAK BIK NEIH LOHNA CHUNGCHANGA TUN LAIA ENTIRNATE
13. Eng kawngin nge tûn laiah Pathian Jehova’n duhsak bîk a nei lo tih a târ lan?
13 Tûn laiah Pathian mite zînga ṭhenkhat chu world headquarters emaw, Jehova Thuhretute branch office emaw hnaihah an awm a. Chûng hmunahte chuan mi dangte chu rawngbâwlin an awm a ni. Chuvângin, anni chu chumi hmuna thiltih tam takah an tel thei a, hmahruaitute nên mi mal takin an inhmêlhriat pawh a ni thei. Mi ṭhenkhat chu bial kantu niin emaw, hunbi kima rawngbâwlna chi hrang hrangah emaw rawng an bâwl a. Chutiang chanvo i dawng lo a nih pawhin, Khual Thlengtu Jehova chuan a mikhual zawng zawngte chu a hmangaih vek tih i chiang thei a ni. Ani chuan mi mal tinte chu a ngaihsak vek a. (1 Pet. 5:7) Jehova mi zawng zawngte chuan an mamawh thlarau lam châwmna te, kaihhruaina te leh, vênhimnate an dawng a ni.
14. Khual Thlengtu a nih angin Jehova’n duhsak bîk a nei lo tih entîrna dang leh chu eng nge ni?
14 Khual Thlengtu a nih angin Jehova’n duhsak bîk a nei lo tih entîrna dang leh chu, tûn laiah khawvêl puma mi zawng zawngin Bible an chhiar thei hi a ni. A tîrah chuan Pathian Lehkha Thu Thianghlim chu ṭawng chi thum: Hebrai, Aramaic leh, Grik ṭawnga ziah a ni a. A tîra ziak Bible ṭawng hman chhiar theitute chu a chhiar thei lotute aiin Pathian nên inlaichînna ṭha lehzual an nei tihna a ni em? Ni lo.—Mt. 11:25.
15. Jehova’n duhsak bîk a nei lo tih finfiahna chu eng nge ni? (Milem en bawk rawh.)
15 Jehova chuan kan lehkha thiamna, a nih loh leh a tîra Bible ṭawng hman kan chhiar thiam avâng chauhvin a ṭhian ni tûrin min pawm lo va. Ani chuan lehkha thiamte chauh ni lovin, lehkha thiam emaw, thiam lo emaw pawh ni se, khawvêl puma mite hmuh theih tûrin a finna chu Bible-ah a dah a ni. Pathian Thu, Bible chu ṭawng sâng têla lehlin a ni tawh a; chuvângin, khawvêl puma mite chuan Bible zirtîrnate chu an hlâwkpui theiin, Pathian ṭhian nih theih dân an zir thei a ni.—2 Tim. 3:16, 17.
Tûn laiah ṭawng sâng têla Bible hmuh theih a nihna chuan engtin nge Pathian duhsak bîk neih lohna chu a târ lan? (Paragraph 15-na en rawh)
JEHOVA “LAWM ZAWNG MI” NI RENG RAWH
16. Tirhkohte 10:34, 35-a sawi angin, engtin nge Jehova lâwm zâwng mi kan nih reng theih?
16 Jehova’n entîr nei a puan ina a mikhual anga min lâwm lût hi chawimawina ropui tak a ni a. Ani chu Khual Thlengtu ngilnei ber, hmangaihna nei ber leh, khualchhâwn thiam ber a ni. Chu bâkah, awmna hmun te, ṭobul te, lehkha thiamna te, hnam leh chi leh kuang te, kum upat lamte chu eng pawh ni se, mipa leh hmeichhia tu mah thlei bîk nei lovin kan vai hian min lâwm ṭheuh va. Mahse, a thu âwihtute chauh a mikhual angin a lâwm lût a ni.—Tirhkohte 10:34, 35 chhiar rawh.
17. Khawiah nge Jehova puan ina mikhual nih dân chungchâng hriattîrnate chu tam lehzuala kan hmuh theih ang?
17 Lal Davida chuan Sâm 15:1-ah: “LALPA, i puan inah chuan tu nge lo mikhual ang? I tlâng thianghlimah chuan tu nge lo awm ang?” tiin zawhna a siam a. Fakna hla phuahtu chu hêng zawhnate chhâng tûra thlarauva thâwk khum a ni. A dawta thuziakah chuan Jehova lâwm zâwng mi ni reng thei tûra kan tih ngai ṭhenkhat sawiho a ni ang.
HLA 32 Jehova Lamah Ṭang R’u!
