Kum 1929, December 22-ah Belgian Ardennes biala awm, Bastogne khaw bula leilet hmun pakaw awmna Noville khaw te tak têah ka piang a. Ka naupan laia ka nu leh pate nêna leilet hmuna hlim taka kan thawhho laite chu ka theihnghilh thei lo. Ka nau Raymond-a nên chuan nî tin kutin bâwng hnutê kan sâwr ṭhîn a, buh seng hunah pawh kan ṭanpui ṭhîn. Kan khawho chu hnathawhnaah kan inlâwm ṭhîn a ni.

Ka nu leh pa Emile-a leh Alice-i te chu Catholic ruh tak an ni a, Chawlhnî apiang hian Mass an hmang ṭhîn a ni. Mahse, kum 1939 bâwr vêl chuan England ram aṭangin pioneer unaupa ṭhenkhat chu kan khuaah lo kalin, ka pa hnênah Consolation magazine (tûna Awake! tia koh) chu thla tina a dawn theih nân an rawn pe a. Ka pa chuan thutak a ni tih hriain, Bible a chhiar ṭan ta nghâl a. Ka pa’n Mass a hman duh tawh loh tâkah chuan kan vênga a ṭhian ṭha tak takte chuan nasa takin an dodâl ta a. Ka pa chu Catholic kohhran chhuahsan lo tûra an duh avângin an hnial nasa ṭhîn hle.

Chutianga ka pain nêksâwrna nasa tak a tawrh avangin ka rilru a nuam lo hle a. Chu chuan he thuziak ṭan tirha ka sawi angin Pathian hnêna thinlung taka a ṭanpuina dîla ṭawngṭai tûrin min chêttîr a ni. Kan ṭhenawmte dodâlna chu zawi zawia a reh chho tâkah chuan, ka lâwm hle a. Jehova chu “ṭawngṭaina Ngaithlatu” a ni tih ka ring nghet ta a ni.

Kum 1940, May 10-ah Nazi Germany-in Belgium a rûn avângin mipui tam takin ram chhûng an chhuahsan a. Kan chhûngkuain France chhim lamah kan râl tlân a. German sipaite leh French sipaite indona hmunte kan pal tlang a ngai a ni.

A hnua kan lova kan lêt leh chuan thlâma kan thil neih zawng zawng chu a lo awm tawh lo va.  Min hmuak tûr awm chhun chu kan ui tê, Bobbie-a chauh a ni. Chûng ka thiltawnte chuan, ‘Engvângin nge indona leh hrehawm tawrhna nasa tak a awm?’ tih ngaihtuahna min neihtîr a ni.

Chutih hun lai chuan, pioneer leh kohhran upa rinawm tak ni bawk unau Emile Schrantz-a a chuan min rawn tlawh a, chu chuan min tichak tak zet a ni. Ani chuan hrehawm tawrhna a awm chhan leh nuna zawhna ka neihte chu Bible aṭangin chiang takin min hrilhfiah a. Chuvângin, Jehova nêna inlaichînna nghet tak ka nei chho va, hmangaihna Pathian a ni tih chu ka ring nghet ta a ni.

Indopui a tâwp hma pawhin kan chhûngkuain unau dangte nên inhmuin, kan inbe ziah thei a. Kum 1943, August thlaah chuan unau José-Nicolas Minet-a chuan thusawina nei tûrin kan lo chu a rawn tlawh a. Ani chuan, “Baptisma chang duh in awm em?” tiin min zâwt a. Ka pa leh kei chuan bân kan phar a. Tichuan, kan lo bula lui tê-ah baptisma kan chang ta a ni.

Kum 1944, December thlaah chuan German sipaite chuan Khawvêl Indopui II-na tâwpna atân Europe Khaw thlang lamah beipui an thlâk a. Chu chu Bulge Indona tia hriat a ni. Indona hmun bul hnaia kan awm avângin thla khat chhûng vêl chu lei hnuai pindanah kan awm a. Ni khat chu ran chaw pe tûra ka chhuah chuan, laipui hian kan lo a rawn dêng a, kan chhêk in chung chu a chhe ta vek a. Ran in bula awm American sipai chuan “Bawk khup rawh!” tiin min rawn au va. A bul lam panin ka bawk khup ta nghâl a, ani chuan ka him nân a sipai lukhum chu min khumtîr a ni.

Indopui a zawh hnu chuan, kan awmna aṭanga hmâr lam kilometer 90 (mêl 56) vêla hlaa awm, Liège khuaa kohhran pakhat nên inbiak pawhna ṭha tak kan nei reng a. A hnuah, Bastogne khuaah group tê nau pakhat kan din thei ta a. Chhiah pêkna hmunah hna ka thawk a, dân lam chungchâng zirna hun remchâng ka nei bawk a ni. A hnuah sawrkâr office pakhatah clerk (ziaktu) niin hna ka thawk leh a. Kum 1951-ah chuan Bastogne khawpuiah mi tlêm tê telna bial inkhâwmpui kan nei a. Chu inkhâwmpuia tel chu mi za vêl kan ni a, pioneer unaunu ṭhahnemngai tak Elly Reuter-i pawh a tel a ni. Ani chuan chu inkhâwmpui rawn  chhim tûrin thîr sakawrin kilometer 50 (mêl 31) vêl a rawn kal a. Rei lo têah, kan inhmangaih êm avângin, innei tûrin inhualna kan nei ta a. Elly-i chu United States-a Gilead School kal tûra sâwmna a dawn hlim a ni a. Chuvângin, ani chuan world headquarters-ah lehkha ziakin, sâwmna a hnâwl chhan chu a hrilhfiah a ni. Chutih hun laia Jehova mite zînga hmahruaitu Unau Knorr-a chuan ngilnei takin, engtikah emaw chuan a pasal nêna Gilead School an kal mai theih tûr thu hrilhin a lo chhâng lêt a. Tichuan, kum 1953, February thlaah kan innei ta a ni.

Chumi kum vêk chuan Elly-i nên New York khawpui, Yankee Stadium-a neih New World Society Assembly chu kan chhim a. Chutah chuan, unaupa pakhatin hna ṭha tak min pêk tumin, United States-a pêm tûrin min sâwm a. Jehova hnêna chumi chungchâng kan ṭawngṭai hnuah Elly-i nên chuan unaupa sâwmna chu hnâwlin, Bastogne khawpuia thuchhuahtu sâwm lek awmna group chu ṭanpui tûrin Belgium-ah kan kîr leh ta a ni. A kum lehah chuan fapa, Serge-a kan neih avângin kan hlim hle a. Mahse, lungchhiatthlâk takin, thla sarih a tlin hnuah Serge-a chu dam lovin a borâl ta a. Kan sûnna chu Jehova hnênah ṭawngṭaiin kan thlen a, thawhleh beiseina nghet tak chuan min tichak a ni.

Kum 1961, October thlaah chuan pioneer thawk paha hunbi neia thawh theih hna ka hmu ta a. Mahse, chumi nî vêk chuan Belgium branch kaihruaitu unaupa pakhatin min rawn phone a. Circuit servant (tûna bial kantu tia koh) chu kan thawh theih dâwn leh dâwn loh min rawn zâwt a. “Chu chanvo kan pawm hmain pioneer kan thawk hmasa phawt thei ang em?” tiin ka zâwt a. Ka dîlna chu pawmsak ka ni a, thla riat chhûng pioneer nia rawng kan bâwl hnu kum 1962, September thlaah chuan bial kantu niin rawng kan bâwl ṭan ta a ni.

Kum hnih chhûng bial kan hna kan thawh hnu chuan Brussel Bethel-a rawngbâwl tûra sâwm kan ni a. Chutah chuan kum 1964, October thlaah rawng kan bâwl ṭan a ni. Chu kan chanvo tharah chuan malsâwmna nasa tak kan dawng a. Kum 1965-a unau Knorr-a’n kan Bethel a rawn tlawh hnu lawka branch kaihruaitu ni tûra ruat ka ni chu mak ka ti hle. A hnuah, Elly-i nên chuan Gilead School vawi 41-na kal tûra sâwm kan ni a. Kum 13 kal taa Unau Knorr-a sawi chu a thleng dik ta! School kan zawh chuan Belgium Bethel-ah kan kîr leh ta a ni.

Europe leh a chhehvêla awm Jehova mite’n amah be tûra zalenna an neih chu humhim tûrin dân lama ka zirna chu kum tam tak chhûng ka hmang ṭangkai thei a. (Phil. 1:7) Chutianga ka thawhna aṭang chuan kan rawngbâwlna khapbeh emaw, khuahkhirh emaw a nihna ram 55 chuanga thuneitute nên kan inbe thei a ni. Dân lama ka tawn hriatte târ lan aiin, “Pathian rawngbâwltu” angin ka inhmêlhriattîr ṭhîn a. “Lal [rorêltu]  thinlung chu LALPA kutah a awm a, tui luanna kawng angin, a duh duhnaah a tikawi ṭhîn,” tih ka hriat avângin ṭawngṭaiin Jehova kaihhruaina ka zawng ṭhîn a ni.—Thuf. 21:1.

Ka thiltawn pakhat ka rilru khawih êm êmtu chu European Parliament member pakhat nêna kan inbiakna a ni a. Amah be tûra vawi tam tak dîlna ka theh luh hnu chuan ka va hmu thei ta a. Ani chuan, “Minute nga chauh hun ka pe ang che, minute khat pawhin a chuang tûr a ni lo,” min ti a. Tichuan, kûnin ka ṭawngṭai ta a. Ani chuan mak ti takin ka thiltih chu min zâwt a. Amah chu enin, “Pathian rawngbâwltu pakhat i nih avângin a hnênah lâwmthu ka hrilh a,” tiin ka chhâng a. Ani chuan “I sawi awmzia chu eng nge ni?” tiin min zâwt leh a. Tichuan, Rom 13:4-na chu ka hmuh a. Protestant kohhran a nih avângin, chu Bible châng chu a ngaihven ta hle a. Chuvângin, dârkâr chanve lai hlawhtling takin inbiakna kan nei thei a ni. Kan rawngbâwlna chu zahawm a tih thu a sawi hial bawk.

Kum tam tak chhûng chu Europe-ah Jehova mite chuan Kristian tualdawihna, naupang inchuhna, chhiah pêkna leh, thil dang chungchângahte thubuai an nei a. Chûng dinhmun tam takah chuan Jehova’n hlawhtlinna leh hnehna min pêk dân mi mal taka ka hmu thei chu chanvo ropui tak a ni. Vawiin nî thlengin Jehova Thuhretute chuan European Court of Human Rights-ah thubuai 140 aia tamah hnehna an chang tawh!

Kum 1990 chho bâwr vêl chuan world headquarters-a Unau Philip Brumley-a leh Italy rama Unau Valter Farneti-a te nên, kan Kristian rawngbâwlna khuahkhirh a nihna Cuba rama kan unaute’n sakhuana lama zalenna an neih lehzual theih nân hna kan thawkho va. Belgium-a awm Cuban embassy-ah lehkha ka ziak a; tichuan, min buaipui tûra ruat thuneitu chu kan va hmu ta a ni. Kan inhmuh hmasak ber ṭum chuan, khuahkhirhna thlentu inhriatthiam lohna chu kan chingfel thei meuh lo.

Ṭawngṭaia Jehova kaihhruaina kan dîl hnu chuan, Cuba rama Bible bu 5,000 thawn tûra kan dîlna chu phalsak kan ni a. Bible chu kan unaute hnêna him taka a thlen theih avângin Jehova’n theih tâwp kan chhuahna chu mal a sâwm tih kan hre ta a ni. Tichuan, Bible bu 27,500 thawn belh kan dîl a. Chu pawh chu phalsak kan ni leh a. Cuba rama kan unaute chu Bible nei thei tûra kan ṭanpui theih avângin ka hlim hle a ni.

Cuba rama kan rawngbâwlnain dân lam nêna inkûngkaiha hma a sâwn theih nân, chu ramah  chuan vawi tam tak ka zin a. Chutianga ka tihna aṭang chuan sawrkâr thuneitu tam tak nên inlaichînna ṭha ka siam thei a ni.

Kum 1994-ah Rwanda rama Tutsi hnam chunga insuatna thlengah mi 1,000,000 aia tamin nunna an chân a. Lungchhiatthlâk takin, kan unau ṭhenkhat pawh tihhlum an ni bawk. Rei lo têah, unaupa ṭhenkhat chu chumi ram ṭanpuina atâna ruahmanna siam tûra ruat an ni.

An khawpui Kigali kan va thlen chuan, translation office leh thu leh hla chhuahte dahna hmun chu silaia kahna hnu hma kaw chek chuka khatin kan va hmu a. Chempuia thah kan unaute chanchin lungchhiatthlâk takte kan hre bawk a. Chutih rualin, unaute hmangaihna inlantîr tawn dân chanchinte pawh kan hre bawk. Entîr nân, Thuhretu Hutu chhûngkhaw khatin ni 28 chhûng lei hnuai pûka an thuhrûk Tutsi unaupa kan va hmu a. Kigali khawpuia inkhâwmna pakhatah unau 900 aia tamte hnênah thlarau lam fuihna leh thlamuanna thu kan sawi a ni.

A hnuah Goma khawpui bula awm refugee camp-a tlân chhia Rwanda rama unau tam takte zawngin Zaire (tûna Democratic Republic of the Congo tia hriat)-ah chuan kan lût a. Kan zawn hmuh mai theih loh avângin Pathian Jehova hnênah a kaihhruaina kan dîl a. Tichuan, mi tu emaw kan lam pana lo kal hi kan hmu a, ani chu Jehova Thuhretu tu emaw hriat a neih leh neih loh kan zâwt a. Ani chuan, “Kei pawh, Thuhretu ka ni alâwm. Chhawmdâwltu pâwl (relief committee) hnênah ka hruai ang che u,” tiin min chhâng a. Relief committee nêna sawihona ṭha tak kan neih hnuah, chuta râl tlân mi 1,600 bâwr vêl hnênah thlarau lam thlamuanna leh fuihna thu kan sawi thei a ni. Governing Body hnên aṭanga lehkhathawn pawh kan chhiarsak bawk. “Ṭawngṭainaah kan hre reng che u a, Jehova’n a kalsan ngai lo vang che u tih kan hria,” tih thu thlamuanthlâk takte chuan unaute rilru chu a khawih hle a ni. Governing Body thusawi chu a dik tak zet a. Tûnah chuan Rwanda ramah Jehova Thuhretu mi 30,000 chuangin hlim takin Jehova rawng an bâwl mêk a ni!

Kum 58 dâwn lai kan inneih hnuah ka nupui duh tak Elly-i chuan kum 2011-ah khân min boralsan a. Ka tawrh nasatzia ṭawngṭaia Jehova hnêna ka hrilh chuan min thlamuan a. Ka ṭhenawm khawvêngte hnêna Lalram chanchin ṭha hrilhna aṭangin thlamuanna ka hmu bawk a ni.

Kum 90 ka chuang tawh a; mahse, chawlhkâr tin Kristian rawngbâwlnaah ka la tel ziah thei a. Belgium branch-a Legal Department ka la ṭanpui theih bâkah, mi dangte hnêna ka thiltawnte hrilhna leh Bethel-a awm ṭhalaite ka fuihna aṭangin hlimna ka hmu bawk.

Kum 84 kal taa ka ṭawngṭaina kha, Pathian Jehova hnêna ka ṭawngṭai hmasak berna a ni a. Chu chu Jehova hnaih tlat tûra kan nun kawng bul ṭanna a ni. Ka nuna ka ṭawngṭainate Jehova’n min ngaihthlâksak avângin ka lâwm tak zet a ni.—Sâm 66:19. b