Jehova tilâwm tûr chuan rinna kan neih a ngai a. Chutih rualin, Bible chuan “mi zawng zawng chuan rinna an nei vek si lo,” tiin a sawi a ni. (2 Thes. 3:1, 2) Chu chu tirhkoh Paula’n amah tiduhdahtu, “mi luhlul leh mi sualte” chungchâng a sawina a ni a. Mahse, rinna tlâkchhamna chungchâng a sawi chu mi dangte tân pawh a dik a ni. Mi ṭhenkhat chuan Siamtu—Pathian—a awm tih finfiahna chiang takte chu an pawm duh lo va. (Rom 1:20) Mi dangte chuan thil eng emaw, a nih loh leh mi thiltithei zâwkte chu an ring tih an sawi mai thei bawk. Mahse, chutiang rinna chu Pathian tilâwm tûra kan mamawh rinna a ni lo.

Pathian Jehova a awm tih leh ani chuan a chunga rinna nghet tak neitute chu lâwmman a pe ṭhîn tih kan rin a ngai a. (Heb. 11:6) Rinna chu a thlarau thianghlim rah hmêlhmang pakhat a ni a. Thlarau thianghlim dawng tûrin a hnênah ṭawngṭaiin kan dîl thei a ni. (Lk. 11:9, 10, 13) Chumi dawng tûra kan tih theih pawimawh tak dang pakhat chu Pathian thlarauva thâwk khum Bible thu chhiar hi a ni a. Chu bâkah, kan thu chhiarte chu ngaihtuaha kan nunpui a ngai bawk. Tichuan, Jehova thlarau chuan kan nun chu thununin a lâwm zâwng rinna nei tûrin min ṭanpui thei a ni.