Chhiartute Zawhna
Sâm 12:7-a kan hmuh “Nangin anni chu i vawng ṭha ang,” tih thu hi (châng 5-naa) “retheite” sawina nge ni a, (châng 6-naa) “LALPA thute” sawina zâwk?
A chung leh a hnuia thute chuan he châng hi mite sawina a ni tih a târ lang a ni.
Sâm 12:1-4-naah “mihring fate zîng ata hi mi rinawm chu an bo ta si a,” tiin kan chhiar a. A hnuah, Sâm 12:5-7-na chuan heti hian a sawi a ni:
“LALPA chuan, ‘Retheite an hnehchhiah avâng leh,
pachhiate rûm avângin,
Ka tho nghâl mai ang a;
An nuihsana chu him takin ka awmtîr teh ang,’ a ti a.
LALPA thute hi thu thianghlim tak a ni;
Tangka, lei chunga rawhtuina meia fiah a, vawi sarih tihthianghlim tawh hnu ang hi a ni.
Aw LALPA, nangin anni chu i vawng ṭha ang a,
Hêng ṭhangtharte lakah hian kumkhuain i humhim ang.”
Châng 5-na chuan mi retheite chungchânga Pathian thusawite chu a târ lang a. Anni chu a chhanhim ang.
Châng 6-na chuan ‘tangkaraw fiah tawh hnu’ angin “LALPA thute hi thu thianghlim tak a ni,” tih a sawi a. Chu chuan Jehova Thu kan thlîr dân chu a târ lang a ni.—Sâm 18:30; 119:140.
Tûnah chuan a dawta châng hi lo ngaihtuah ta ila, Sâm 12:7-na chuan: “Aw LALPA, nangin anni chu i vawng ṭha ang a, hêng ṭhangtharte lakah hian kumkhuain i humhim ang,” tiin a sawi a ni. Heta “anni” tih thu mal hian eng nge a kawh?
“LALPA thute” chungchâng târ lanna châng 6-na zawha châng 7-na chu a awm avângin, mi ṭhenkhat chuan “anni” tih chu Pathian thute sawina niin an ngai thei a. Chu bâkah, Pathianin Bible chu dodâltute’n vawi tam tak khap beh leh tihboral an tumna lakah a lo humhim tawh tih kan hria a ni.—Is. 40:8; 1 Pet. 1:25.
Chutih rualin, Jehova’n châng 5-naa târ lante pawh chu a humhim a. Tûn hma ang bawkin “retheite” leh ‘hnehchhiaha awmte’ chu a ṭanpuiin a chhanhim zêl ang.—Job. 36:15; Sâm 6:4; 31:1, 2; 54:7; 145:20.
Chuvângin, châng 7-naa “anni” tih thu mal chuan eng nge a kawh?
He Fakna hla ngun lehzuala zirna aṭangin “anni” tih chu mihringte sawina a ni tih chiang takin kan hre thei a ni.
Sâm 12:1-na chuan mi suaksualte buma awm ‘mi rinawmte’ dinhmun a târ lang a. A hnuah, an lei hmang sualtute chunga Pathian rorêl dân tûr târ lanna chu kan hmu a ni. Fakna hla chuan Pathian thute chu a thianghlim avângin, a mite tâna hma la tûrin Ani chu kan rinchhan thei tih min tiam a ni.
Chuvângin, châng 7-na chuan Pathian Jehova’n “anni” tihin a kawh, mi suaksualte avânga tihretheiha awmte chu a kaihruaiin a vênghim ang tih a sawina a ni.
Hebrai Masoretic lehkhabu-ah “anni” tih ṭawngkam chu hman a ni a. Grik Septuagint chuan châng 7-naah “keimahni” tiin ṭum hnih a hmang a, chu chu tihretheih leh hnehchhiaha awm mi rinawmte a sawina a ni. A tâwpah, châng 7-na chuan mi rinawm zawng zawngte chu “hêng ṭhangtharte,” mi suaksualte laka vênhim an ni ang tih a sawi a. (Sâm 12:7, 8) Aramaic Targums chuan châng 7-na chu: “AW LALPA, nang chuan mi felte chu i humhim ang a, he chhuan suaksual tak lak aṭang hian anni chu kumkhuain i vênghim ang,” tiin a târ lang a. Hei hian Sâm 12:7-naa thute chuan Pathian thute a kâwk lo tih rinnghehna tûr chhan dang min pe a ni.
Chuvângin, he châng hian ‘mi rinawmte’ chu Pathianin hma a la ang tih beiseina a pe a ni.
