1-2. Mi chuan baptisma a chan hnuin eng malsâwmnate nge a dawn?

 BAPTISMA changa Jehova chhûngkaw zînga mi kan nih hian kan hlim hle a. Chu dinhmun hlu taka awmte chuan fakna hla phuahtu Davida’n: “Mi, i biak in hung chhûng kawtlaiahte awm thei tûra i thlana, i kiang i pantîra chu, a eng a thâwl e,” tia a sawi hi an ṭâwmpui ngei ang.—Sâm 65:4.

² Jehova chuan mi zawng zawng chu a biak in hung chhûngah a awmtîr lo va. Thuziak hmasaa kan sawiho tâk angin, ani chuan amah nêna inlaichînna ṭha neih an duhzia lantîrtute chauh a lamah a hîp a ni. (Jak. 4:8) Jehova hnêna inpumpêka baptisma i chan hian kawng danglam bîk takin amah i hnaih lehzual a. Baptisma i chan hnu chuan ‘malsâwmna dawn sên loh khawp hial a vûr’ ang che tih i chiang thei a ni.—Mal. 3:10; Jer. 17:7, 8.

3. Inpumpêka baptisma chang tawh Kristiante chuan eng mawhphurhna lian tak nge an neih? (Thuhriltu 5:4, 5)

³ Baptisma chan chu Jehova rawngbâwl tûra bul ṭanna mai a ni a. Chu rahbi i zawh hnuah thlêmnate leh rinna fiahnate hmachhawn chung pawha i inpumpêkna thutiam mila nung tûra theih tâwp chhuah chu i duh ngei ang. (Thuhriltu 5:4, 5 chhiar rawh.) Isua zirtîr i nih angin, theih tâwp chhuaha  amah entawnin a thupêkte zawm i duh bawk ang. (Mt. 28:19, 20; 1 Pet. 2:21) He thuziak hian chutianga ti tûrin a ṭanpui ang che.

HARSATNATE LEH THLEMNATE HMACHHAWN CHUNG PAWHIN ISUA HNUNG “ZUI” TLAT RAWH

4. Eng kawngin nge Isua zirtîrte chuan “kraws [nghaisakna ban]” an put? (Luka 9:23)

⁴ Baptisma i chan hnuah, i nun chu harsatnate laka a fihlîm beisei suh. Dik takin, Isua chuan a zirtîrte’n “kraws [nghaisakna ban]”chu an pu ang tih chiang takin a sawi a. Chu chu “ni tin” an pu ang. (Luka 9:23 chhiar rawh.) A nih leh, Isua chuan a zirtîrte’n hrehawm an tuar reng ang a tihna a ni em? Ni lo ve. Malsâwmna tam tak an dawn bâkah, harsatnate pawh an hmachhawn ang tih a sawi uarna mai a ni a. Chûng harsatnate zînga ṭhenkhat chu tawrh hrehawm tak a ni thei a ni.—2 Tim. 3:12.

5. Isua chuan inpêkna neite chu eng malsâwmnate nge pêk a tiam?

⁵ Chhûngte dodâlna i hmachhawn tawh emaw, Lalram dah hmasak i duh avângin sum tam tak lâk luh theihna hna i kalsan tawh emaw pawh a ni thei a. (Mt. 6:33) Chutiang a nih chuan, Jehova’n rinawm taka i thiltihte chu a hria tih i chiang thei a ni. (Heb. 6:10) Isua’n: “Tu pawh keimah avâng leh chanchin ṭha avânga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu, tûn dam chhûng la la hian, inte, unaupate, farnute, nute, fate, ramte a leh zain, tihduhdahnate nên, hmu lo tûr tu mah an awm lo; hun lo la thleng tûra chatuana nunna nên,” tia a sawi hi a dikzia i tawng tawh ngei ang. (Mk. 10:29, 30) Chûng malsâwmna i dawnte chu inpêkna i neih eng pawh aiin nasa takin a ṭha zâwk a ni.—Sâm 37:4.

6. Engvângin nge baptisma i chan hnuah pawh “tisa châkna” chu i do zawm zêl a ngaih?

⁶ Baptisma chan hnuah pawh “tisa châkna” chu i do a la ngai reng a. (1 Joh. 2:16) A nihna takah chuan, Adama thlah sual nei i la ni reng a ni. A châng chuan: “Ka rilru tak takin Pathian dân chungah ka lâwm si ṭhîn a; nimahsela, ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn,” tia ziaktu tirhkoh Paula rilru awm dân ang chu i nei ve thei a ni. (Rom 7:22, 23) Thil sual tih châknate avângin lunghnual châng pawh i nei mai thei a. Mahse, Jehova hnêna i inpumpêk laia i thutiamte ngaihtuah lêtna chuan thlêmna do thei tûrin a tichak ang che. A nihna takah chuan, i inpumpêkna thutiam chuan thlêmna i hmachhawn hunah a ṭanpui dâwn che a ni. Engtin nge?

7. Engtin nge Jehova hnêna inpumpêkna chuan a chunga rinawm tlat tûra a ṭanpui ang che?

⁷ Jehova hnêna i inpumpêk hian mahni tân i nung tawh lo va. Chu chu Pathian lawm loh zâwng mahni duhnate leh thiltumte i hnâwl tihna a ni. (Mt. 16:24) Chuvângin, fiahna i hmachhawn hunah i tih tûr ngaihtuah nân hun pêk a ngai lo vang. I duh thlan theih zawng zawng zînga pakhat, Jehova chunga rinawm chu i thlang tawh si a. A lâwm zâwnga nun i tum tlat tawh a ni. Joba angin, fiahna khirh tak i hmachhawn hunah pawh: “Ka dikna ka dah bo lo vang,” tiin i sawi ve thei ang.—Job. 27:5.

8. Engtin nge ṭawngṭaia i inpumpêkna ngaihtuahna chuan thlêmnate do tûra a ṭanpui theih che?

⁸ Jehova hnêna ṭawngṭaia i inpumpêkna ngaihtuahna chuan thlêmna eng pawh do thei tûrin a tichak ang che. Entîr nân, pawm lai nei tu emaw chu i chhai der ang em? Chhai  der lo ngei ang! Chutianga ti lo tûrin Jehova hnênah i tiam tawh a ni. Châkna ṭha lo i neih chu i ṭhan lentîr loh chuan, a hnuah chumi paih bo tûra nasa taka i beih a ngai lo vang a. Tichuan, ‘mi sualsual kawng’ chu i “hawisan” thei ang.—Thuf. 4:14, 15.

9. Engtin nge ṭawngṭaia i inpumpêkna ngaihtuahna chuan thlarau lam thiltihte dah hmasa tlat tûra a ṭanpui theih che?

⁹ Kristian inkhâwma tel ziah tiharsa thei hna thawk tûra sâwm ni ta la, engtin nge ni ang? I pawm lo ngei ang. Sâwmna i dawn hma aṭang tawhin, chutiang hna chu thawk lo tûrin thu tlûkna i siam tawh a ni. Chuvângin, thu tlûkna ṭha lo siam chungin Jehova dah hmasak dân i zawn a ngai lo vang. Isua’n a Pa tihlâwm a tum tlatna chu hre chhuakin, i inpumpêkna Pathian duh loh zâwng eng thil pawh rang tak leh khauh takin i hnâwl ngei ang.—Mt. 4:10; Joh. 8:29.

10. Engtin nge Jehova chuan baptisma i chan hnuah pawh Isua hnung “zui” tlat tûra a ṭanpui ang che?

¹⁰ A nihna takah chuan, harsatnate leh thlêmnate chuan Isua hnung i “zui” tlat tih lantîrna hun remchâng a pe che a. Chutianga ti tûrin Jehova’n a ṭanpui ang che tih i chiang thei a ni. Bible chuan: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin a sawi a ni.—1 Kor. 10:13.

ISUA HNUNG ZUI TLAT DAN

11. Isua hnung kan zui tlat theih dân kawng ṭha ber zînga pakhat chu eng nge ni? (Milem en bawk rawh.)

¹¹ Isua chuan thinlung zawng zawngin Jehova rawng a bâwl a, ṭawngṭaiin amah a hnaih tlat a ni. (Lk. 6:12) Chuvângin, baptisma chan hnua Isua hnung zui tlat dân kawng ṭha tak pakhat chu, Jehova hnaihtîr lehzual theitu  thilte tih zawm zêl hi a ni a. Bible chuan: “Engpawh ni sela, kan thlen chin aṭang khân hma i sâwn zêl ang u,” tiin a sawi a ni. (Phil. 3:16) An rawngbâwlna zauh tûra hma latu unaute thiltawn chu i hre ṭhîn ngei ang. Anni chu Lalram Chanchin Ṭha Puangtute School-a kal emaw, mamawh zualna hmuna rawngbâwl emaw an ni thei a. I dinhmunin azir chuan chutiang thiltum neih chu thil ṭha tak a ni. Jehova mite chuan an rawngbâwlna zauh chu an duh hle a. (Tirh. 16:9) Mahse, tûnah i la ti thei lo a nih chuan engtin nge ni ang? A ti theite aia hnuaihnung zâwkah inngai suh. I beih ṭâng ṭângna chu thil pawimawh tak a ni zâwk. (Mt. 10:22) Jehova chuan i theihna leh i dinhmun azira a rawng i bâwlna chu a ngaihlu tih hre reng ang che. Chu chu baptisma i chan hnua Isua hnung i zui tlat theih dân kawng pawimawh tak a ni.—Sâm 26:1.

12-13. I ṭhahnemngaihna a kiam ṭan a nih chuan, eng nge i tih theih? (1 Korinth 9:16, 17) (“ Intlânsiaknaah Tlân Zawm Zêl Rawh,” tih bâwm chu en bawk rawh.)

¹² Hun eng emawti chhûng chu thinlung takin i ṭawngṭai thei tawh lo emaw, tûn hma angin rawngbâwlnaah i phûr thei tawh lo emaw, a nih loh leh Bible chhiar pawh i tui thei tawh lo a nih chuan, engtin nge ni ang? Baptisma chan hnua chutiang dinhmuna i awm a nih chuan, Pathian thlarau dawng lo niin inngai mai suh. Ṭha famkim lo i nih avângin i rilru vei zâwng chu a inthlâk danglam thei a. I ṭhahnemngaihna a kiam ṭan a nih chuan, tirhkoh Paula entawn tûr siam hi ngaihtuah ang che. Ani chuan Isua entawn a tum nachungin, a tih ngaite ti tûra phûrna neih tâwk loh châng a nei tih a hria a ni. (1 Korinth 9:16, 17 chhiar rawh.) Ani chuan: “Mahni thu thuin a nih si loh chuan chanchin ṭha enkawlna hna mi kawltîr mai a  ni ang,” tiin a sawi a. Thu danga sawi chuan, a rilru awm dân chu eng pawh ni se, Paula chuan a rawngbâwlna hlen chu a tum tlat a ni.

¹³ Chutiang bawkin, i rilru vei zâwng ṭanchhanin thu tlûkna siam suh. I rilru awm dân chu eng pawh ni se, thil dik tih tum tlat rawh. Thil dik i tih tlatna chuan i rilru awm dân chu a ṭha zâwngin a nghawng thei a ni. Chuvângin, thlarau lam hun duan ṭha neih rengna chuan baptisma chan hnuah pawh Isua hnung zui tlat tûrin a ṭanpui ang che a. I tih ṭâng ṭângna chuan i unaute pawh a tichak bawk ang.—1 Thes. 5:11.

“INCHHIN ṬHIN ULA . . . INFIAH ṬHIN RAWH U”

14. Eng nge i en dik ṭhin ang a, engvângin nge? (2 Korinth 13:5)

¹⁴ Baptisma chan hnua mahni inenfiah ṭhin chu thil pawimawh tak a ni. (2 Korinth 13:5 chhiar rawh.) Eng emaw châng chuan nî tina ṭawngṭaina te, Bible chhiarna leh zirna te, inkhâwmah leh rawngbâwlnaa tel ziahnate chu chîn ṭhana i neih leh neih loh fiah ṭhîn la. Chûng thiltihte aṭanga hlâwkna neih lehzual dân zawng ang che. Entîr nân, heti hian i inzâwt thei a ni: ‘Mite hnênah Bible zirtîrna bulpuite chu ka hrilhfiah thei em? Rawngbâwlnaah hlimna ka neih lehzual theih dân kawng a awm em? Ṭawngṭainaahte chuan dîl bîk ka neiin, chu chuan Jehova ka rinchhan pumhlûm tih a târ lang em? Kristian inkhâwmahte ka tel ziah em? Engtin nge inkhâwma rilru pêknaah leh chhânna pêkna kawngah hma ka sâwn lehzual theih?’ tiin.

15-16. Thlêmna hnâwl chungchângah unaupa thiltawn aṭangin eng nge i zir theih?

¹⁵ I chak lohna lai hriat chu a pawimawh hle a. Chu chu unau Robert-a thiltawn hian chiang takin a târ lang a ni, ani chuan: “Kum 20 vêl ka nih chuan hunbi neiin hna ka thawk a. Ni khat chu, hna bân hnuah ka hnathawhpui hmeichhe pakhat hian a ina lêng tûrin min sâwm a. Kan pahnih chauhva ‘hun nuam tak’ kan hman dun theih tûr thu a sawi a. A tîr chuan tlang taka han hnial mai chu harsa ka ti a; mahse, a hnuah ka kal duh loh thu leh ka duh loh chhante chu ka hrilhfiah ta a ni,” tiin a sawi. Unau Robert-a’n thlêmna a do thei chu a fakawm hle. Mahse, a hnua a han ngaihtuah lêt chuan chu aia ṭhaa a chinfel theih dân a hre ta a. Ani chuan: “Josefa’n Potiphara nupui thlêmna chu khauh tak leh rang taka a hnâwl ang khân ka hnâwl lo va. (Gen. 39:7-9) Dik tak chuan, chu thlêmna hnâwl harsa ka ti chu mak ka ti. Chu thilthleng chuan Jehova nêna kan inṭhianna tihngheh  lehzual a ngai tih hre tûrin min ṭanpui a ni,” tiin a sawi.

¹⁶ Nang pawhin Robert-a ang bawkin mahni inen fiah ṭhinna chu i hlâwkpui thei a. Thlêmna i hnâwl hnuah pawh heti hian i inzâwt thei a ni: ‘Thlêmna hnâwl tûrin eng anga rei nge hun ka hman?’ tiin. Hmasâwn i ngaihna lai i hriat chuan, chu chu inthiam loh nân hmang suh. I chak lohna lai i hriat avângin lâwm zâwk la. Chumi chungchâng chu ṭawngṭainaa telhin, nungchang lama Jehova tehnate mila nun i tum tlatna tinghet tûrin hma la ang che.—Sâm 139:23, 24.

17. Engtin nge Robert-a thiltawnah Jehova hming a inhnamhnawih?

¹⁷ Unau Robert-a thiltawn aṭangin zir theih dang a awm a. Ani chuan heti hian a sawi zawm a ni: “Ka hnathawhpuinu sâwmna ka hnâwl hnu chuan, ‘Fiahna i paltlang ta e!’ tiin a sawi a. A sawi awmzia ka zawh chuan, a ṭhian pakhat tûn hmaa Thuhretu lo ni tawh ṭhîn chuan Thuhretu ṭhalai zawng zawng chu nun chi hnihin an nung a, hun remchâng an neih chu an la duh zêl ṭhîn tia a sawi thu min hrilh a. Chuvângin, a sawi chu a dik leh dik loh min chhin ta a ni. Jehova hming ka chawimawi tih ka hriat chuan ka hlim hle a ni,” tiin.

18. Baptisma chan hnuah pawh eng tih nge i tum tlat? (“ I Hlâwkpui Theih Tûr Thuziakte,” tih bâwm chu en bawk rawh.)

¹⁸ Jehova hnêna inpumpêka baptisma i chan hian, eng thil pawh thleng se a hming tihthianghlim i duh tih i lantîr a. Harsatna i tawhte leh thlêmna i dote chu Jehova’n a hria tih i chiang thei a ni. Rinawm tlat tûra theih tâwp i chhuahna chu mal a sâwm ang che a. Chutianga ti tûrin a thlarau thianghlim hmangin chakna a pe ang che tih ring tlat ang che. (Lk. 11:11-13) Jehova ṭanpuinain baptisma chan hnuah pawh Isua hnung i zui tlat thei a ni.