1-2. Mi chuan baptisma a chan hmain eng nge a tih ngai?

 KUM nga kal ta chhûng khân, mi maktaduai khat aia tam chu baptisma changin Jehova Thuhretute an rawn ni a. An zînga tam tak chu kum zabi khatnaa zirtîr Timothea angin “naupan têt ata” thutak zirtîr an ni. (2 Tim. 3:14, 15) Ṭhenkhat chuan an puitlin hnuah leh an tar hnuah Jehova chungchâng an zir bawk. Kum rei lo te kal ta khân, Jehova Thuhretute nêna Bible zirtu nu pakhat chuan kum 97 mi a nihin baptisma a chang a ni.

² Bible zirlai, a nih loh leh Thuhretu nu leh pate enkawl seilen i nih chuan baptisma chan i tum em? Chu chu thiltum ṭha tak a ni! Mahse, baptisma i chan hmain Jehova hnêna i inpumpêk phawt a ngai a. He thuziak hian Pathian hnêna inpumpêkna awmzia chu a hrilhfiah ang. Chutianga ti tûra i inpeih tawh a nih chuan, chu rahbi chu zawha baptisma chan i hreh loh nachhan tûr hre tûrin a ṭanpui bawk ang che.

INPUMPEK TIH AWMZIA CHU ENG NGE NI?

3. Jehova hnêna inpumpêkna nei Bible-a mite chungchâng entîrna pe rawh.

³ Bible-ah inpumpêkna chuan Pathian tâna thil eng emaw tak ti tûra tihhranna a kâwk a. Israel mite chu Jehova hnêna inpumpêk tawh hnam an ni a. Mahse, an zîngah chuan Jehova hnêna kawng danglam bîk taka inpumpêkte an awm a ni. Entîr nân, Arona chuan diar, a pang hma lama rangkachak phêk “tihhran chhinchhiahna thianghlim” inbel chu a  khim a. Chu rangkachak phêk chuan chanvo danglam bîk tak, Israel puithiam lal anga rawngbâwl tûra tihhran a nihna chu a entîr a ni. (Lev. 8:9) Nazarit mite pawhin Jehova hnênah kawng danglam bîk takin an inpumpêk a. Hebrai thu mal nazirʹ tih aṭanga lâk “Nazarit mi,” tih thu mal chuan “Tihhran,” a nih loh leh “Inpumpêk,” tih awmzia a nei a. Nazarit mite chu Mosia Dânin an tâna a thil phûtte mila an nun a ngai a ni.—Num. 6:2-8.

4. (a) Jehova hnêna i inpumpêk hnuah eng nge i thiltum pawimawh tak lo ni ta? (b) ‘Mahni hrehawm pawisa lo,’ tih awmzia chu eng nge ni? (Milem en bawk rawh.)

⁴ Jehova hnêna i inpumpêk hian, Isua zirtîr ni tûr leh i nuna Jehova duh zâwng dah pawimawh ber tûrin duh thlanna i siam a. Chutah chuan eng nge tel? Isua chuan, “Tu pawhin mi zui a duh chuan, mahni hrehawm pawisa lovin, . . . mi zui rawh se,” tiin a sawi a ni. (Mt. 16:24) Jehova chhiahhlawh inpumpêk tawh i nih angin a duh zâwng nêna inkalh eng thil pawh i hnâwl a ngai a. (2 Kor. 5:14, 15) Chumiah chuan nungchang bawlhhlawhna ang chi “tisa thiltihte” hnâwl a tel a ni. (Gal. 5:19-21; 1 Kor. 6:18) Chûng thupêkte zawmna chuan i nun a tihrehawm ang em? Jehova i hmangaih a, a dânte chu i ṭhatna tûr a ni tih i rin ngheh tlat chuan a tihrehawm lo vang. (Sâm 119:97; Is. 48:17, 18) Unau Nicholas-a chuan: “Jehova tehnate chu i duh zâwng i tihna tûr dâltu tân in hungna angin emaw, sakeibaknei laka vêngtu che hungna angin emaw i thlîr thei,” tiin a sawi a ni.

5. (a) Engtin nge Jehova hnêna i inpumpêk? (b) Inpumpêkna leh baptisma inan lohna chu eng nge ni? (Milem en bawk rawh.)

⁵ Engtin nge Jehova hnêna i inpumpêk? A hnêna ṭawngṭaiin amah chauh i bia ang tih leh i nunah a duh zâwng i dah pawimawh ber ang tih i tiam a. Jehova hnênah amah chu “i thinlung zawng zawngin, i thlarau zawng  zawngin, i rilru zawng zawngin, i chakna zawng zawngin” i hmangaih chhunzawm zêl ang tih i tiam a ni. (Mk. 12:30) Inpumpêkna chu nangmah leh Jehova inkâra mi mala neih a ni a. Chutih rualin, baptisma chu i inpumpêk tawh tih mi dangte hriattîr nân mipui hmaa chan a ni thung. I inpumpêkna chu thutiam pawimawh tak a ni a, chu thutiam mila nung tûra i inbeisei ang bawkin Jehova pawhin a beisei che a ni.—Thur. 5:4, 5.

ENGVANGIN NGE JEHOVA HNENA I INPUMPEK?

6. Engin nge mi chu Jehova hnêna inpumpêk tûra chêttîr?

⁶ Jehova hnêna i inpumpêk chhan ber chu amah i hmangaih vâng a ni a. I hmangaihna chu rilru vei zâwnga innghat mai a ni lo. Chu aiin, Jehova i hmangaihna tiṭhangtu a chungchânga i thil zir, ‘hriat famkimna leh thlarau lam finnatea’ innghat a ni zâwk. (Kol. 1:9) Bible i zirna chuan (1) Jehova chu mi tak tak a ni tih te, (2) Bible hi a thâwk khum Thu a ni tih te leh, (3) a duh zâwng tihhlawhtlin nân a inawpna pâwl a hmang tihte chu a rin nghehtîr che a ni.

7. Pathian hnêna kan inpumpêk hmain eng nge kan tih ngai?

⁷ Jehova hnêna inpumpêkte chuan Pathian Thu-a zirtîrna bulpuite chu an hriat a ngaih bâkah, Pathian tehnate mila an nun a ngai bawk a. An dinhmun azirin mi dangte hnênah an rinna chu an hrilh chhâwng leh a ni. (Mt. 28:19, 20) Jehova an hmangaihna chu ṭhang chho zêlin a hnêna inpêk pumhlûm chu an rawn duh ta a. Chutiang chuan i awm ve em? Chutiang hmangaihna i neih chuan, inpumpêkna leh baptisma channa chu Bible  zirpuitu che emaw, i nu leh pate emaw tihlâwmna tûr thiltih, a nih loh leh i ṭhiante’n an tih avânga tih ve tûr thil angin i thlîr lo vang.

8. Engtin nge lâwm nachâng hriatna chuan Jehova hnêna inpumpêk tûra a chêttîr che? (Sâm 116:12-14)

⁸ Jehova’n kan tâna a thiltih zawng zawngte ngaihtuah hian, a hnêna inpumpêk duhna neih chu thil pângngai tak a ni a. (Sâm 116:12-14 chhiar rawh.) Dik takin, Bible chuan Jehova chu “thilpêk ṭha leh thilpêk famkim zawng zawng” Petu tiin a ko va ni. (Jak. 1:17) Chûng zînga thilpêk ropui ber chu a Fapa Isua inthawina a ni a. Han ngaihtuah mah teh! Tlanna zârah Jehova nên inlaichînna nghet tak i nei thei a. Chu bâkah, ani chuan chatuana nun beiseina a pe bawk che a ni. (1 Joh. 4:9, 10, 19) Jehova hnêna i inpumpêkna chu a hnên aṭanga malsâwmna tam tak i dawnte pawh tiamin, hmangaihna lantîrna ropui ber avânga i lâwmzia târ lan dân kawng ṭha ber pakhat a ni a. (Deut. 16:17; 2 Kor. 5:15) Chutianga lâwmna lantîrna chungchâng chu Chatuanin I Hlim Thei! tih lehkhabu zirlai 46, point 4-naah hmuh theih a ni a; chutah chuan, Pathian Hnênah I Thilpêkte Hlân Rawh tih minute 3 awh video a tel bawk a ni.

INPUMPEKA BAPTISMA CHANG TURIN I INPEIH TAWH EM?

9. Engvângin nge inpumpêkna nei tûra kan innawr luih loh vang?

⁹ Inpumpêka baptisma chang tûra la inpeih lo niin i inhre thei a. Jehova tehna mila inthlâk danglam ngaihna lai i la nei a ni thei a, a nih loh leh rinna nghet tak nei tûrin hun i mamawh pawh a ni thei bawk. (Kol. 2:6, 7) Zirlai tinte hmasâwn dân a inan loh ang bawkin, ṭhalai zawng zawngte inpumpêka baptisma chang tûra inpeih hun a inang lo va. Chuvângin, mi dangte nêna inkhaikhin lovin, i tih theihte nêna inmilin thlarau lama hma i sâwn theihna lai chu hriat tum ang che.—Gal. 6:4, 5.

10. Inpumpêka baptisma chang tûra la inpeih lo nia i inhria a nih pawhin, eng nge i tih theih? (“ Thutaka Seiliante Tân,” tih bâwm chu en bawk rawh.)

¹⁰ Jehova hnêna inpumpêk tûra la inpeih lo nia i inhria a nih pawhin, chu chu thiltumah nei la. I mamawh inthlâk danglamnate nei tûra i ṭan lâknate malsâwm tûrin Jehova hnênah ṭawngṭai ang che. (Phil. 2:13; 3:16) I ṭawngṭaina a ngaithlain a chhâng ang che tih i chiang thei a ni.—1 Joh. 5:14.

MI ṬHENKHATIN AN HREH CHHAN

11. Engtin nge Jehova’n a chunga rinawm reng tûra min ṭanpui ang?

¹¹ Mi ṭhenkhat chu inpumpêka baptisma chang tûrin inpeih tawh mah se, hrehna an la nei reng thei a. Anni chuan, ‘A hnuah sual pawi tak tiin hnawhchhuah ni ta ila, engtin nge ni ang?’ tiin an ngaihtuah mai thei. Chutiang hlauhna i neih chuan, Jehova’n ‘kawng tinrênga amah tilungawi tûra Lalpa zui tlâka i awm theih nân,’ i mamawh apiang a pe ang che tih i chiang thei a ni. (Kol. 1:10-12) Thil dik ti tûrin chakna a pe bawk ang che. Mi tam tak a cheibâwl dân aṭangin chutianga a tih theihzia chu a lantîr tawh a ni. (1 Kor. 10:13) Chu chu Kristian kohhran aṭanga mi tlêm tê chauh hnawhchhuah an nih chhan a ni a. Jehova’n a mite chu rinawm reng tûrin a ṭanpui a ni.

12. Engtin nge sual pawi tak tih chu kan pumpelh theih?

¹² Mi ṭha famkim lo zawng zawng hi thil dik lo ti tûra thlêm an ni ṭhîn a. (Jak. 1:14) Mahse, thlêm thlûk i nih dâwn leh dâwn loh chu i duh thlanna a ni. Dik tak chuan, i nun dân tûr thununtu ber chu nangmah i ni. Mi ṭhenkhat chuan an rilru vei zâwngte leh thiltihte chu thunun thei lo niin insawi mah se, nang  chuan chûngte thunun dân chu i zir thei a. Thil ṭha lo tih châkna i neih hunah i inthunun thei a ni. Chuvângin, nî tin ṭawngṭai la. Mi mala Pathian Thu zirna hun duan ṭha tak nei ang che. Kristian inkhâwmahte tel ziah la. Mi dangte hnênah i rinna chu hrilh bawk rawh. Chûng rahbite theih tâwp chhuaha zawh zêlna chuan i inpumpêkna thutiam mila nung tûrin a ṭanpui ang che a. Chu bâkah, Jehova’n chutianga ti tûrin a ṭanpui ang che tih hre reng rawh.—Gal. 5:16.

13. Josefa’n kan tân eng entawn tûr ṭha nge a siam?

¹³ A hma aṭangin, thlêmna i tawh huna i chhân lêt dân tûr i lo ngaihtuah lâwk a nih chuan, i inpumpêkna mila nun chu awlsam i ti lehzual ang. Bible chuan ṭha famkim lo an ni chung pawha rinawmna lantîrtu mi tam tak chanchin a târ lang a. Entîr nân, Josefa chu Potiphara nupuiin amah mutpui tûrin vawi tam tak a thlêm a ni. Mahse, ani chu a chhân lêt dân tûrah a chiang a. Bible chuan “ani chuan a duh lo,” tih a sawi a, “Engtin nge he sual lian tak hi tiin Pathian chunga thil ka tihsual theih ang?” tiin Josefa chuan a sawi a ni. (Gen. 39:8-10) Chuvângin, thlêm a nih hma aṭangin a chhan lêt dân tûr a hria tih a chiang hle. Chu chuan a tân thlêmna hmachhawn a tiawlsam lehzual a ni.

14. Engtin nge thlêmna do thei tûra kan inzir theih?

¹⁴ Engtin nge Josefa chu i entawn theih? Tûn aṭangin, thlêmna i tawh huna i chhân lêt dân tûr chu i lo ngaihtuah lâwk thei a. Jehova huat zâwng thilte hnâwl nghâl a, chûngte ngaihtuah reng loh chu zir ang che. (Sâm 97:10; 119:165) Chutianga i tih chuan, thlêm i nih hunah i tlu lo vang a. I chhân lêt dân tûr chu ngaihtuah buai ngai lovin i hre sa dâwn a ni.

15. Engtin nge mi chuan Jehova ‘a zawng’ tih a lantîr theih? (Hebrai 11:6)

¹⁵ Thutak i hmu tawh tih i hriat bâkah, thinlung zawng zawnga Jehova rawngbâwl chu i duh a; mahse, inpumpêka baptisma chan hreh nachhan eng emaw i la nei pawh a ni thei a ni. Lal Davida angin, nang pawhin: “Aw Pathian, ngun takin mi en chhuak la, ka thinlung hi hria ang che: mi fiah la, ka ngaihtuahnate hi hria ang che: tin, keimahah hian suahsualna kawng rêng rêng a awm nge awm lo, en la, chatuan kawngah chuan mi hruai ang che,” tiin Jehova hnênah i dîl  thei a ni. (Sâm 139:23, 24) Jehova chuan ‘amah zawngtute’ chu malsâwmna a pe a. Inpumpêka baptisma chan chu thiltuma neiin amah i zawng tih lantîr ang che.—Hebrai 11:6 chhiar rawh.

JEHOVA HNAIH TLAT RAWH

16-17. Engtin nge Jehova’n thutaka seiliante chu a lama a hîp? (Johana 6:44)

¹⁶ Isua chuan a zirtîrte chu Jehova hîp an ni tih a sawi a. (Johana 6:44 chhiar rawh.) Chu chu thil ropui tak a nihzia leh chumiin i tâna awmzia a neih dân chu ngaihtuah ang che. Jehova chuan mi tinte ṭhatna lai chu a hmuh avângin a lamah a hîp a. Anni chu “a pual bîk” angin a thlîr a. (Deut. 7:6.) Nang pawh chutiang chuan a thlîr che a ni.

¹⁷ Amaherawh chu, ṭhalai thutaka seilian i ni thei a. Jehova rawng i bâwl chhan chu a hîp che vâng ni lovin, i nu leh pate vâng niin i ngai mai thei. Mahse, Bible chuan: “Pathian hnaih rawh u, tichuan anin a hnaih ang che u,” tiin a sawi a ni. (Jak. 4:8; 1 Chro. 28:9) Jehova hnaih tûra hma i lâk hmasak hian ani pawhin a hnaih che a. A huho zînga tel ve ang lekin a thlîr lo che. Thutaka seiliante pawh tiamin mi mal tinte chu a lamah a hîp a ni. Chutiang mite’n amah hnaih tûra hma an lâk hian, Jehova chuan Jakoba 4:8-a kan hmuh angin a chhâng lêt a ni.—2 Thessalonika 2:13 nên khaikhin rawh.

18. A dawta thuziakah eng nge kan sawiho vang? (Sâm 40:8)

¹⁸ Jehova hnêna inpumpêka baptisma i chan hian Isua rilru put hmang ang chu i lantîr a. Ani chu a Pain ti tûra a tih apiang ti tûrin inhuam takin a inpe a. (Sâm 40:8 chhiar rawh; Heb. 10:7) A dawta thuziakah chuan, baptisma i chan hnua rinawm taka Jehova rawngbâwl chhunzawm zêl tûra ṭanpui theitu che chungchâng kan sawiho vang.