1. Jehova chhiahhlawh rinawm ṭhenkhat chuan eng rinhlehna nge an neih mai theih?

 JEHOVA chuan a mite chu a huhovin a lâwm tih hriat chu a va thlamuanthlâk tak êm! Bible chuan: “LALPA chu a mite chungah a lâwm si ṭhîn,” tiin a sawi a. (Sâm 49:4) Mahse, mi ṭhenkhat chuan an lunghnual êm avângin, ‘Jehova lawm hlawh ka ni ve ang em?’ tia ngaihtuah châng an nei a. Bible hun laia Jehova betu mi rinawm ṭhenkhat pawhin chutianga rinhlelhna neih châng chu an nei a ni.—1 Sam. 1:6-10; Job. 29:2, 4; Sâm 51:11.

2. Tute’n nge Jehova lawm hlawh?

² Bible chuan mi ṭha famkim lote’n Jehova lawm an hlawh thei tih chiang takin a târ lang a. Engtin nge? Isua Krista chunga rinna lantîra baptisma kan chan a ngai a ni. (Joh. 3:16) Chutianga tiin, vântlâng hmaah kan sualte kan simin Pathian duh zâwng ti tûrin kan intiam tih kan târ lang a. (Tirh. 2:38; 3:19) Chutianga Jehova nêna inlaichînna ṭha siam kan tumna chuan ani chu a tilâwm a ni. Kan inpumpêkna thutiam mila nung tûra theih tâwp kan chhuah chhûng chuan Jehova lawm kan hlawhin a ṭhian ṭhate kan ni thei ang.—Sâm 25:14.

3. Tûnah eng nge kan sawiho vang?

³ Mahse, engvângin nge mi ṭhenkhatin Pathian lawm hlawh lo nia inhriat châng an neih mai theih? A lawm kan hlawh tih engtin nge Jehova’n a târ lan? Engtin nge Kristiante chuan Pathian lawm an hlawh tih an chian theih?

 MI ṬHENKHATIN JEHOVA LAWM HLAWH LO NIA AN INHRIAT CHHAN

4-5. Hlutna nei lo nia inhriatna kan nei chung pawhin, eng nge kan chian theih?

⁴ Kan zînga tam tak chuan naupan têt aṭangin hlutna nei lo nia inhriatna kan nei a. (Sâm 88:15) Unau Adrián-a chuan: “Hlutna nei lo nia inhriatna ka nei ṭhîn a. Ka naupan lai chuan paradis-a awm tlâk lo nia inhriatna nei chungin ka chhûngte chu chuta an awm theih nân ka ṭawngṭaisak ṭhîn,” tiin a sawi. Thuhretu ni lo chhûngkuaa seilian Tony-a chuan: “Ka nu leh pate chuan min hmangaih thu emaw, min chhuan thu emaw min hrilh ngai lo. Chu chuan, an lawm ka hlawh thei ngai lo vang tih ngaih dân min neihtîr a ni,” tiin a sawi.

⁵ Hlutna nei lo nia inhriatna kan neih chângin, Jehova chuan a lamah min hîp tih kan hre chhuak leh thei a. (Joh. 6:44) Ṭhatna lai kan neih kan hmuh loh chu hmuin, kan thinlung a hria a ni. (1 Sam. 16:7; 2 Chro. 6:30) Chuvângin, kan hlu tia a sawi chu kan ring thei a ni.—1 Joh. 3:19, 20.

6. Tûn hmaa a thil tihsualte avângin tirhkoh Paula chu engtin nge a awm?

⁶ Kan zînga ṭhenkhat chuan thutak an hriat hmaa an thiltihte avângin inthiam lohna an la nei reng thei a. (1 Pet. 4:3) Kristian mi rinawmte pawhin sual tih châkna chu an do reng a ngai a ni. Chutianga inthiam lohna chu i nei ve ngai em? I nei a nih chuan, Jehova chhiahhlawh rinawmte pawhin chutianga inthiam lohna an nei ve tih hriatna chuan a thlamuan ngei ang che. Entîr nân, tirhkoh Paula chuan a ṭhat famkim lohna a ngaihtuah chângin lunghnualna a nei ṭhîn a. (Rom 7:24) Dik takin, ani chuan a sualte simin, baptisma a chang tawh a ni. Chutichung chuan, “tirhkoh zînga tê ber” leh “mi sual ber” angin a la inngai cheu va ni.—1 Kor. 15:9; 1 Tim. 1:15.

7. Tûn hmaa thil sual kan tihna chungchângah eng nge kan hriat reng ang?

⁷ Kan Pa vâna mi chuan inchhîrna kan neih chuan ngaihdam min tiam a. (Sâm 86:5) Chuvângin, thil sual kan tih avânga pawi kan ti tak zet a nih chuan min ngaidam tawh tia a sawi chu kan ring thei a ni.—Kol. 2:13.

8-9. Jehova lawm hlawh ngai lo tûra inhriatna chu engtin nge kan hneh theih?

⁸ Kan vai hian a tam thei ang bera Jehova rawngbâwl kan duh ṭheuh va. Mahse, mi ṭhenkhat chuan, a lawm hlawh tlâk lo nia inhriatna an nei a ni. Unaunu Amanda-i chuan: “Jehova tâna a tam thei ang bera tih rengna chu a hnêna ka neih ṭhat ber pêkna emaw ka ti ṭhîn a. Ka tih theih aia tam ti tûrin ka inbeisei fo ṭhîn a ni. Chutah, ka beisei anga ka ‘tih theih loh’ châng hian, ka beidawn ang bawkin Jehova pawh ka chunga beidawng ve tûrin ka ring ṭhîn,” tiin a sawi.

⁹ Theih tâwp chhuah chung pawha Jehova lawm hlawh thei ngai lo tûra inhriatna chu engtin nge kan hneh theih? Jehova chu khirh tak a ni lo tih hre reng ang che. Ani chuan, kan tih theih aia tam min phût ngai lo. A tâna theih tâwp kan chhuah chhûng chuan kan thiltihte chu min hlutsak a. Chu bâkah, Bible-a an thinlung zawng zawnga Jehova rawngbâwltute chungchâng chu ngaihtuah bawk ang che. Entîr nân, Paula chungchâng hi lo ngaihtuah ta ila. Ani chuan kum tam tak chhûng mêl sâng tam tak hlaa zinin, kohhrante dinin ṭhahnemngai takin rawng a bâwl a. Mahse, a dinhmun avânga, tûn hma anga tama rawngbâwlnaa a inhman theih loh tâkah chuan, Pathian lawm hlawh lovin a awm em? Awm lo ve. A tih theihte a tih chhunzawm zêl avângin Jehova’n mal a sâwm a ni. (Tirh. 28:30, 31) Chutiang bawkin, a châng chuan Jehova tâna kan tih theih chu a tlêm hle thei a. Mahse, kan tih chhan chu a tân a pawimawh  ber zâwk a ni. Tûnah, Jehova’n min lâwm a ni tih a târ lan dân kawng ṭhenkhat i lo ngaihtuahho vang u.

JEHOVA’N A LAWM KAN HLAWH TIH ENGTIN NGE A TAR LAN?

10. Engtin nge Jehova’n min lawmzia a sawi chu kan “hriat” theih? (Johana 16:27)

¹⁰ Bible hmangin. Jehova chuan a hmangaihte chungah a lâwmzia a lantîr ṭhîn a. Isua hnênah A Fapa duh tak, a lawm êm êm a ni tih a hrilhna ṭum hnih lai Bible-ah târ lan a ni. (Mt. 3:17; 17:5) Nang pawhin, Jehova’n a lawmzia che a hrilh che chu i duh ve em? Jehova chuan ṭawngkain min be lo va. Mahse, a Bible Thu hmangin min bia a ni. Chanchin Ṭha Ziaka Isua thusawite kan chhiar hian Jehova’n min lawmzia a sawi chu kan “hre” thei a ni. (Johana 16:27 chhiar rawh.) Isua chuan a Pa mizia chu ṭha famkimin a lantîr a. Chuvângin, Isua’n ṭha famkim lo a hnungzuitu rinawmte a lawmzia a hrilh khân, chûng thute chu Jehova’n kan hnêna sawi angin kan mitthla thei a ni.—Joh. 15:9, 15.

11. Engvângin nge harsatnate tawhna chu Jehova lawm hlawh lohna a nih loh? (Jakoba 1:12)

¹¹ A thiltihte hmangin. Jehova chuan kan tisa lam mamawhte pe a, min ṭanpui chu a châk hle a. Mahse, mi fel Joba anga harsatnate kan tawh phal châng a nei a ni. (Job. 1:8-11) Harsatnate kan tawh hian, Pathian lawm kan hlawh lo tihna a ni lo. Chûngte chuan Pathian kan hmangaihzia leh kan rinchhanzia târ lanna hun remchâng min pe zâwk a. (Jakoba 1:12 chhiar rawh.) Harsatnate chhel taka kan tawrh rualin Jehova min hmangaihna leh min ngaihsakna chu kan hre thei a ni.

12. Unau Dmitrii-a thiltawn aṭangin eng nge kan zir theih?

¹² Asia-a awm unau Dmitrii-a thiltawn hi han ngaihtuah teh. A hna a chân a, thla tam tak chhûng chu hna nei lovin a awm a ni. Chuvângin, Jehova a rinchhanzia lantîr nân rawngbâwlnaah tam lehzuala inhman a tum ta a. Thla tam tak a liam hnuah pawh hna a zawng hmu ta chuang lo va. Chu bâkah, khum betin a nâ bawk. Tichuan, pasal leh pa nih tling lo anga a inhriat mai bâkah, Jehova lawm hlawh tawh lo anga inhriatna a nei ta a. Tlai khat chu a fanuin Isaia 30:15-a thu: “Muang taka awmnaah leh ring taka awmnaah hian in chakna a awm ang,” tih chu lehkha phêkah a print chhuak a. Chu chu a hnêna pein, “A pa, i rilru a nawm loh hunah he Bible  châng hi hre reng rawh aw,” a ti a. Dmitrii-a chuan an chhûngkua chu Jehova zârah ei tûr kham khawp an neiin, thawmhnaw hâk tûr leh chênna tûr in an nei tih a hre thiam ta a ni. Ani chuan: “Ka tih ngai chu, thlamuang taka awm a, Pathian rinchhan zawm zêl hi a ni,” tiin a sawi zawm a. Chutiang harsatna i tâwk ve a nih chuan, Jehova’n a ngaihsak chein, chhel tûrin a ṭanpui ang che tih i ring tlat thei a ni.

13. Tute hmangin nge Jehova’n a lawm kan hlawhzia a lantîr theih a, engtin nge?

¹³ Unaute hmangin. Jehova’n unaute hmangin a lawm kan hlawh tih min hriattîr bawk a. Entîr nân, a hun takah min tichak thei tak thute sawi tûrin a chêttîr thei a. Asia-a awm unaunuin rilru hahna nasa tak a neih laiin chutiang chu a tawng a ni. A hna a chân a, natna khirh tak a vei bawk a ni. A hnuah, a pasal chu sual lian tak a tih avângin upa aṭanga bân a ni bawk a. “Ka chunga hetiang thil a thleng hi a ngaihna rêng ka hre thei lo. Thil sual eng emaw ka tih avângin Jehova lawm hlawh ka ni ta lo nge tiin ka ngaihtuah hial a ni,” a ti a. Kan unaunu chu Jehova’n a lâwm tih hriatnawntîrna dawng tûrin a ṭawngṭai ta a. Jehova’n engtin nge a chhân? Heti hian a sawi a ni: “Kohhran upate’n min kâwm a. Jehova’n min hmangaih tih min hrilh nawn a ni,” tiin. Chumi hnuah pawh, Jehova hnênah ṭanpuina a la dîl zawm a. Heti hian a sawi zawm a ni: “Chumi nî vêk chuan, kohhrana unaute hnên aṭangin lehkhathawn ka dawng a. An thlamuanna thute ka chhiar chuan Jehova’n ka ṭawngṭainate a chhâng tih ka hria,” tiin. Ni e, Jehova chuan mi dangte ṭawngkam ngilnei takte hmangin a lawm kan hlawhzia a lantîr ṭhîn a ni.—Sâm 10:17-18.

14. Jehova’n a lawm kan hlawhzia a lantîrna kawng dang chu eng nge ni?

¹⁴ Jehova’n a lawm kan hlawhzia chu kan  mamawh huna unaute zilhna min pêkna hmangin a lantîr bawk a. Entîr nân, kum zabi khatnaah khân Jehova’n tirhkoh Paula chu unaute tân thlarauva thâwk khum lehkhathawn 14 a ziahtîr a. Chûng lehkhathawnahte chuan zilhna thu hmangaihna nei tak leh khauh takte a chuang a ni. Engvângin nge Jehova’n Paula chu chutiang zilhna thute ziak tûra a thâwk khum? Jehova chu Pa ṭha tak a nih angin, a fa “a lawm a piangte” a zilhhau ṭhîn a ni. (Thuf. 3:11, 12) Chuvângin, Bible ṭanchhan zilhna kan dawng a nih chuan Jehova kan chungah a lungni lo tihna a ni lova, min la hmangaih reng tihna a ni zâwk. (Heb. 12:6) Jehova lawm kan hlawh tih eng thil dangte’n nge târ lang?

JEHOVA LAWM KAN HLAWH TIH TAR LANGTU THIL DANGTE

15. Tute hnênah nge Jehova’n a thlarau thianghlim a pêk a, engvângin nge chu chuan inrintâwkna min neihtîr?

¹⁵ Jehova’n a lawm apiang hnênah a thlarau thianghlim a pe a. (Mt. 12:18) Heti hian kan inzâwt thei a ni, ‘Ka nunah Pathian thlarau rah hmêlhmangte ka lantîr em?’ tiin. Jehova i hriat hma aiin mi dangte chungah dawhthei zâwk niin i inhria em? Dik tak chuan, Pathian thlarau rah hmêlhmangte i lantîr tam poh leh chu chuan Jehova lawm i hlawh tih a târ lang lehzual!—“ Thlarau Rah Hmêlhmangte . . .” tih bâwm chu en rawh.

16. Jehova’n tute nge chanchin ṭha hril tûra a hman a, chu chuan engtin nge a awmtîr che? (1 Thessalonika 2:4)

¹⁶ Jehova chuan a lawm hlawhtute chu chanchin ṭha a kawltîr a. (1 Thessalonika 2:4 chhiar rawh.) Unaunu Jocelyn-i’n mi dangte hnêna chanchin ṭha a hrilhna aṭanga hlâwkna a dawn chu i lo en ang u. Tûk khat chu rilru hah deuhvin a tho va. Heti hian a sawi a ni: “Chakna rêng ka nei lo va. Ṭangkaina rêng nei lo niin ka inhria a ni. Mahse, pioneer ka nih angin rawngbâwlnaa ka chhuah a ngai a. Chuvângin, ka ṭawngṭai a, ka kal chhuak ta a ni,” tiin. Chumi tûk chuan ani chu Bible zirpui theih tûr mi ṭha tak Mary-i nên an intawng a. Thla hnih thum liam hnuah Mary-i chuan Pathian hnêna ṭanpui dîla a ṭawngṭai lai takin Jocelyn-i’n a kawngkhâr a kik thu a sawi a ni. Jocelyn-i’n chu thiltawn a ngaihtuah lêt chuan, “Jehova’n ka lâwm tak zet che tia min hrilh ang maiin ka ngai,” tiin a sawi. Ni e, mi tinte hian kan thu hrilh chu ṭha takin min chhang lêt lo ngei mai. Mahse, theih tâwp  chhuaha mite hnêna chanchin ṭha kan hrilh hian Jehova kan tilâwm tih kan chiang thei a ni.

17. Tlanna chungchânga Vicky-i thusawi aṭangin eng nge i zir theih? (Sâm 5:12)

¹⁷ Jehova chuan a lawm hlawhtute chu tlanna hlutna hmangin an sual a ngaihdamsak a ni. (1 Tim. 2:5, 6) Mahse, tlanna ringa baptisma chang tawh chung pawha, Jehova lawm hlawh lo nia kan la inhre fo a nih chuan engtin nge ni ang? Kan rilru ngaihtuahna chu kan rinchhan reng thei lo va; mahse, Jehova chu kan rinchhan reng thei a ni. Ani chuan, tlanna ringtute chu mi fel angin a thlîr a, malsâwm a tiam bawk a ni. (Sâm 5:12 chhiar rawh; Rom 3:26) Tlanna chhût ngunna chuan Vicky-i chu a ṭanpui a. Ni khat chu, tlanna chungchâng ṭha taka a chhût ngun hnu chuan ani chuan: “Jehova hi ka chungah a va han lo dawhthei tak êm. . . . Mahse, chutichung chuan, ‘I hmangaihna hi ka tân a tâwk lo. I Fapa inthawina pawhin ka sualte a khuh bo thei lo,’ tia sawi ang ka ni,” tiin a sawi. He tlanna thilthlâwn pêk a chhût ngunna aṭangin Jehova hmangaihna dawng nia inhriatna a nei ṭan a. Keini pawhin tlanna chungchâng chhût ngunna aṭangin Jehova hmangaihna dawng nia inhriatna leh a lawm hlawh nia inhriatna kan nei ve dâwn a ni.

18. Kan Pa vâna mi kan hmangaih chhûng chuan eng nge kan rin ngheh tlat theih?

¹⁸ A chunga târ lan thurâwnte theih tâwp chhuaha nunpui kan tum chung pawhin lunghnualna neiin Jehova lawm hlawh lo nia inhriatna kan nei thei a. Chutiang i nih pawhin, ani chuan “amah hmangaihtute” chu a lâwm reng tih hria ang che. (Jak. 1:12) Jehova hnaih zawm zêlin a lawm i hlawhzia hriat tum zêl ang che. Jehova chuan “min hlat lo ṭheuh” tih hi i hre reng ang u.—Tirh. 17:27.