1. Jehova inawpna pâwla kan tel avânga kan dawn malsâwmna ṭhenkhat chu eng nge ni?

 HE HUN hnuhnûng khirh tak chhûnga Jehova inawpna pâwla kan tel thei hi malsâwmna a ni tak zet a. Khawvêl dinhmunte a chhiat zêl rualin, Jehova chuan min ṭanpui tûrin thlarau lam unau inlungrual takte min pe a ni. (Sâm 133:1) Chhûngkaw hlim tak nei tûrin min ṭanpui bawk a. (Eph. 5:33–6:1) Chu bâkah, chhûngrila thlamuanna dik tak nei tûra kan mamawh hriatthiamna leh finna min pe bawk a ni.

2. Eng nge kan tih ngai a, engvângin nge?

² Eng pawh ni se, rinawm taka Jehova rawng bâwl zawm zêl tûra theih tâwp kan chhuah a ngai a. Engvângin nge? Mi dangte ṭhat famkim lohna avângin lunghnual châng kan neih theih vâng a ni. Chu bâkah, thil pakhat kan tihsual nawn fo hian mahni tlin lohna avângin lunghnualna kan nei thei bawk. Hêng dinhmun pathumahte hian Jehova rawng rinawm taka kan bâwl zawm zêl a ngai a, chûngte chu: (1) unaute’n min tihlungnih loh hunah, (2) kan kawppuite’n min tihlunghnual hunah leh, (3) mahni tlin lohna avânga kan lunghnual hunah a ni. He thuziakah hian chûng dinhmunte chu sawiho a ni ang a. Bible hun laia mi rinawmte hnên aṭanga kan zir theihte kan sawiho bawk ang.

UNAUTE’N AN TIHLUNGNIH LOH CHE HUNAH RINAWM ZAWM ZEL RAWH

3. Jehova mite chuan eng harsatna nge an tawh?

³ Harsatna. Unau ṭhenkhat chuan kan ngainat loh zâwng miziate an nei a. Mi dangte chuan min tilunghnualin, ṭha lo takin min cheibâwl thei a ni. Kohhran upate pawhin thil an tisual thei a. Chûng dinhmunte chuan mi ṭhenkhat chu Pathian  inawpna pâwl chungah rinhlelhna a neihtîr thei a ni. An unaute nêna “thu khat vuaa” Pathian rawngbâwl chhunzawm aiin, an rilru tinatu unaute kawm loh emaw, kohhran inkhâwmtea tel chhunzawm loh emaw chu an thlang zâwk a ni. (Zep. 3:9) Chu chu a finthlâk em? Chutiang harsatna tâwktu Bible hun laia mi pakhat hnên aṭanga kan zir theihte i lo ngaihtuah ang u.

4. Tirhkoh Paula chuan eng harsatnate nge a hmachhawn?

⁴ Bible-a entawn tûr. Tirhkoh Paula chuan a Kristian unaute chu an ṭha famkim lo tih a hria a. Entîr nân, Jerusalem khuaa kohhrana mi ṭhenkhat chuan ani chu Isua zirtîr a nih an ring lo va. (Tirh. 9:26) A hnuah, mi ṭhenkhatin a hming chhiatna thlen thei, a chungchâng dik lo takin an sawi bawk. (2 Kor. 10:10) Paula chuan kohhran upa pakhatin mi dangte tlûkna thlen thei thu tlûkna dik lo a siam chu a hmu bawk a ni. (Gal. 2:11, 12) Chu bâkah, a ṭhian hnai tak Marka chuan a tilunghnual hle a. (Tirh. 15:37, 38) Paula chuan chûng dinhmunte avâng chuan a rilru tinatute kawm loh chu a thlang thei a ni. Mahse, Ani chuan a unaute chu a ṭha zâwnga thlîr tlatin, rinawm takin Jehova rawng a bâwl zawm zêl a ni. Engin nge Paula chu chutianga ti thei tûra ṭanpui?

5. Engin nge Paula chu a unaute chunga beidawng lo tûra ṭanpui? (Kolossa 3:13, 14) (Milem en bawk rawh.)

⁵ Paula chuan a unaute chu a hmangaih a. Mi dangte a hmangaihna chuan an ṭhat famkim lohna ni lovin, an mize ṭhate ngaihven tlat tûrin a ṭanpui a ni. Hmangaihna chuan Kolossa 3:13, 14-a mi dangte ngaidam tûra amah ngeiin a ziah thute nunpui tûrin a ṭanpui bawk. (Chhiar rawh.) Chu chu Marka a cheibâwl dâna a thlen dikzia han ngaihtuah teh. Marka chuan missionary nia an zin ṭum khatnaah kîrsan mah se, Paula chu lungni lovin a awm reng lo va. A hnuah Kolossa khuaa kohhran hnêna a lehkhathawnah Marka chu ‘thlamuantu’ thawhpui duhawm tak angin a fak a ni. (Kol. 4:10, 11) Paula chuan Rom khuaa tân ina a tân laiin, amah ṭanpuitu atân Marka chu tih tak zetin a ngên a. (2 Tim. 4:11) Ani chu a unaupa chungah chuan a beidawng lo tih a chiang hle. Paula hnên aṭangin eng nge kan zir theih?

6-7. Engtin nge an ṭha famkim lo chung pawhin kan unaute chungah hmangaihna kan lantîr zawm zêl theih? (1 Johana 4:7)

⁶ Zir tûr. Jehova chuan kan unaute chungah hmangaihna lantîr zawm zêl tûrin min duh a. (1 Johana 4:7 chhiar rawh.) Tu emawin Kristian miziate a lantîr lo a nih chuan, ani chu Bible thu bulte zâwm duh reng chunga, ngaihtuah chiang lova thil tisual palh niin a ṭha  zâwngin kan ngai thei a ni. (Thuf. 12:18) Pathian chuan a chhiahhlawh rinawmte chu thil tihsual châng an nei chung pawhin a hmangaih a. Thil kan tihsual hunah pawh kan chungah lungni lo leh beidawngin a awm lo. (Sâm 103:9) Ngaihdam peih tak kan Pa entawn chu kan tân a va pawimawh tak êm!—Eph. 4:32–5:1.

⁷ Tâwpna kan hnaih zêl rualin, unaute kan hnaih reng a ngai tih hre reng ang che. Tihduhdahna a nasat chhoh zêl kan beisei thei a. Kan rinna avângin tân ina tântîr pawh kan ni thei a ni. Chutiang thil a thleng a nih chuan tûn hma aiin kan unaute chu kan mamawh lehzual dâwn a ni. (Thuf. 17:17) Spain rama kohhran upa unau Josep-a a chunga thilthleng hi han ngaihtuah teh. Amah leh unau dangte chu tualdâwihna avângin tân ina khung an ni a. Ani chuan: “Tân inah chuan hmun khata awmkhâwm kan nih avângin, unaute chu inhmuh thiam loh a awl hle a. Indawh tawna, kan inngaihdam tawn a ngai a. Chu chuan inlungrual taka awm tûr leh invênghim tawn tûrin min ṭanpui a ni. Jehova be lotute hual vêlin kan awm a. Ṭum khat chu, ka bân ka tihliama, tuam a nih avângin mahni pawh ka insingsa thei lo va. Mahse, ka tânpui unaupa chuan ka thawmhnawte min sûksakin, ka mamawh thil dangte pawh min tihsak a. Ka mamawh hun takah hmangaihna dik tak ka dawng a ni,” tiin a sawi. Unaute nêna buaina kan neih chu tûn aṭanga chinfel chhan tûr ṭha tak a va ni êm!

I KAWPPUI AVANGA LUNGHNUALNA I NEIH HUNAH RINAWM ZAWM ZEL RAWH

8. Eng harsatnate nge nupate’n an hmachhawn?

⁸ Harsatna. Innei zawng zawngte chuan harsatna an nei a. Bible chuan nupate chu “tisaah chuan hrehawm” an tuar ang tih tlang takin a sawi a ni. (1 Kor. 7:28) Engvângin nge? Mizia te, duh zâwng te, duh lo zâwngte inang lo, ṭha famkim lo mi pahnih inneihna a nih vâng a ni. Nupate chu hnam dân inang lo emaw, ṭo bul inang lo emaw an ni thei a. Inneih hmaa hriat theih loh miziate chu inneih hnuah a lang chhuak thei a. Chûng thilte chuan buaina a tichhuak thei a ni. Buaina a lo chhuah hunah mahni tlin lohnate pawma chinfel tum aiin, kawppuite an mawhpuh zâwk thei a ni. Awm hran emaw, inṭhen emaw chu buaina chinfelna niin an ngai thei bawk. A nih leh, chutianga chinfel a nih chuan nupate chu an hlim ang em? b Inneihnaa harsatna nasa tak tâwk chung pawha tuar ṭâng ṭângtu Bible hun laia mi pakhat hnên aṭanga kan zir theihte i lo ngaihtuah ang u.

9. Eng harsatna nge Abigaili chuan a hmachhawn?

⁹ Bible-a entawn tûr. Abigaili chuan Bible-in mi tawh khirh tak leh sual taka a sawi Nabala chu pasalah a nei a. (1 Sam. 25:3) Chutiang mi nêna nun hman dun chu a tân a harsa ngei ang. A nih leh, Abigaili chuan an inneihna chu awlsam taka chhuahsan mai a tum em? Israel lal la ni mai tûr Davida’n amah leh a mite zahpah lo taka a cheibâwl avânga a pasal that tûra a lo kal khân, hun remchâng ṭha tak a nei thei a ni. (1 Sam. 25:9-13) Abigaili chuan Davida chu Nabala thahtîrin a tlân chhuak thei a. Mahse, ani chuan Davida hnênah Nabala nun chu zuahsak tûrin a ngên zâwk a ni. (1 Sam. 25:23-27) Engin nge ani chu chutianga ti tûra chêttîr?

10. Engin nge Abigaili chu nupa inkâra harsatna tâwk chung pawha rinawm tlat tûra chêttîr?

¹⁰ Abigaili chuan Jehova a hmangaih a, inneihna chungchânga a tehnate chu a zah a ni. Ani chuan Jehova’n inneihna hmasa ber a ruahman laia, Adama leh Evi te hnêna a thusawi  kha a hriat ngei a rinawm. (Gen. 2:24) Jehova’n inneihna chu ruahmanna pawimawh tak angin a thlîr tih Abigaili chuan a hria a. Ani chuan Pathian tihlâwm a duh a, chu chuan a pasal pawh tiamin a chhûngte nun chhanhim tûrin a tihtheih apiang ti tûrin a chêttîr a ni. Chuvângin, Davida’n a pasal Nabala a thah loh nân hma a la ta vat a. A tih loh thilsual tihna atân inhuam takin ngaihdam a dîl bawk. Chu hmeichhe huaisen tak leh mahni hmasial lo tak chu Jehova’n a hmangaih tih a chiang hle. Nupate chuan Abigaili entawn tûr siam aṭangin eng nge an zir theih?

11. (a) Jehova’n inneite hnên aṭanga a beisei chu eng nge ni? (Ephesi 5:33) (b) Unaunu Carmen-i’n an inneihna vênghim tûra theih tâwp a chhuah dân kawng aṭangin eng nge i zir? (Milem en bawk rawh.)

¹¹ Zir tûr. Jehova chuan inneite chu an kawppuite nên chên dun harsa an ti a nih pawhin inneihna chu zah tûrin a duh a ni. Pathianin nupate chu an buainate chingfel tûra hma an lâknate leh mahni hmasial lo hmangaihna leh zahna an inlantîr tawnnate a hmuh hian a lâwm tak zet a. (Ephesi 5:33 chhiar rawh.) Unaunu Carmen-i thiltawn hi han ngaihtuah teh. A pasal neih aṭanga kum 6 vêlah Jehova Thuhretute nên Bible zir ṭanin, a hnuah baptisma a chang ta a. Ani chuan: “Ka pasal chuan a duh lo hle a. Jehova chungah a lungni lo hle a ni. Zahpah lo takin min cheibâwl a, chhuahsan tûrin min vau hial a ni,” tiin a sawi. Chutichung chuan Unaunu Carmen-i chuan an inneihna chu a vawng nghet tlat a. Kum 50 chhûng chu a pasal hmangaih tûr leh zah tûrin theih tâwp a chhuah a ni. Ani chuan, “Kumte a liam zêl chuan, ka pasal chungah hriatthiamna ka nei lehzual a, a rilru hmin zâwnga biak pawh dân pawh ka hre thiam chho zêl a ni. Inneihna chu Jehova mithmuhah hlu tak a ni tih ka hriat avângin chu chu vênghim tlat tûrin ka tih theih apiang ka ti a. Jehova ka hmangaih avângin kan inneihnaah ka beidawng ngai lo,” tiin a sawi. c In inneihnaah harsatna a awm a nih chuan, rinawm tlat tûrin Jehova’n a ṭanpui ang che tih i ring tlat thei a ni.

MAHNI TLIN LOHNA AVANGA I LUNGHNUAL HUNAH RINAWM ZAWM ZEL RAWH

12. Thil sual lian tak kan ti a nih chuan eng harsatna nge kan hmachhawn theih?

¹² Harsatna. Sual lian tak kan ti a nih chuan hrehawm kan tiin kan beidawng hle thei a. Bible chuan kan sualnain ‘lungchhia leh inchhîr ngawih ngawihin’ min siam thei tih a sawi a ni. (Sâm 51:17) Unaupa Robert-a chungchâng hi han ngaihtuah teh. Ani chuan kohhran rawngbâwltu ni thei tûrin kum tam tak chhûng theih tâwp a chhuah a. Mahse, sual  pawi tak a ti a, chu chuan Jehova a phatsan tih a hriat chhuahtîr a ni. Ani chuan: “Ka thil tihsualnain ka chhia leh ṭha hriatna a tibuaiin ka rilru a tihrehawm hle a. Jehova hnênah ṭap zawih zawihin ka ṭawngṭai a. Ka tihlungnih loh avângin, ka ṭawngṭainate min ngaihthlâksak tawh ngai lo tûra ngaihtuah chângte ka nei,” tiin a sawi. Thil sual pawi tak kan tih hian thinlung lungchhe taka kan awm avângin kan chungah Jehova beidawng nia rinna kan nei thei a. (Sâm 38:4) Chutianga i awm tawh a nih chuan, sual pawi tak ti chung pawha rinawm taka Jehova rawngbâwl chhunzawm zêltu Bible hun laia mi rinawm pakhat chungchâng hi ngaihtuah ang che.

13. Tirhkoh Petera chuan eng thil sual lian tak nge a tih a, chumi hmain eng thil sual dangte nge a tih?

¹³ Bible-a entawn tûr. Isua tihhlum a nih hma zân khân, tirhkoh Petera chuan thil tam tak a tisual a. Pakhatnaah, ani chuan a lutuka inrin tâwkna neiin tirhkoh dangte’n Isua an phatsan hunah pawh a rinawm tlat tûr thu inchhuang takin a sawi a ni. (Mk. 14:27-29) Pahnihnaah, Gethsemane huana an awm laiin, ani chuan vawi tam tak inring renga awm tûrin a hlawhchham a ni. (Mk. 14:32, 37-41) Tichuan, mipuiho an lo thlen chuan Isua a tlânsan a. (Mk. 14:50) A tâwpah, Isua a hriat loh thu chhe chhamin vawi thum meuh a phat a ni. (Mk. 14:66-71) Petera chuan thil sual lian tak a ti tih a inhriat chhuah chuan engtin nge a awm? Inthiam lohna nasa tak neiin, lungchhe takin a ṭap ta zawih zawih a ni. (Mk. 14:72) Dârkâr tam tak a liam hnua a ṭhian Isua tihhlum a nih huna a rilru hrehawm dân tûr chu han ngaihtuah teh. Petera chuan tlâktlai lo niin a inngai ngei ang!

14. Engin nge Petera chu rinawm taka Jehova rawngbâwl zawm zêl tûra ṭanpui? (en rawh.)

¹⁴ Petera chuan chhan tam tak avângin rinawm takin Jehova rawng a bâwl zawm zêl thei a. Ani chuan inkulh hrang lovin thlarau lama a unaute a bêl a, an hnên aṭangin thlamuanna a dawng ngei ang. (Lk. 24:33) Chu bâkah, tihchak a duh avângin tho leh Isua chu Petera hnênah a inlâr a. (Lk. 24:34; 1 Kor. 15:5) A hnuah, Isua chuan a ṭhian Petera chu a thil tihsualte avânga zilh aiin, mawhphurhna lian zâwk a dawn tûr thu a hrilh a ni. (Joh. 21:15-17) Petera chuan thil sual nasa tak a ti tih inhre mah se, a beidawng lo. Engvângin nge? Ani chuan a Pu Isua chu a chungah a beidawng lo tih a rin tlat vâng a ni. Chu bâkah, thlarau lama a unaute hnên aṭangin ṭanpuina a dawng chhunzawm bawk. Petera entawn tûr siam aṭangin eng nge kan zir theih?

15. Eng nge Jehova’n ring nghet tlat tûra min duh? (Sâm 86:5; Rom 8:38, 39) (Milem en bawk rawh.)

¹⁵ Zir tûr. Jehova chuan min hmangaihin,  ngaihdam a inpeih reng tih kan rin a duh a. (Sâm 86:5; Rom 8:38, 39 chhiar rawh.) Thil kan tihsual hian inthiam lohna kan nei a. Chu chu thil pângngai tak leh hriatthiamawm tak a ni. Mahse, hmangaih phû lo leh ngaihdam tlâk loh niin kan inngai tûr a ni lo. Chu aiin, ṭanpuina kan zawng nghâl tûr a ni. Kan sawi tâk Unau Robert-a chuan: “Thlêmna do thei tûra mahni ka inrinchhan avângin sualah ka tlu a ni,” tiin a sawi. Ani chuan kohhran upate hriattîr a ngaih thu a hre chhuak a. “Kohhran upate ka biak chuan, anni chuan Jehova’n min hmangaih tih hre tûrin min ṭanpui a ni. Kohhran upate chu ka chungah an beidawng lo va. Anni chuan Jehova’n min kalsan lo tih hre thiam tûrin min ṭanpui a ni,” tiin a sawi. Keini pawh, kan thil tihsual avânga inchhîr a, kan mamawh ṭanpuina dîl a, thil tisual nawn lo tûra theih tâwp kan chhuah chuan Jehova chuan min hmangaih tak zetin, min ngaidam ang tih kan ring nghet tlat thei a ni. (1 Joh. 1:8, 9) Chutianga kan rin nghehna chuan thil kan tihsual hunah emaw, kan tlûk hunah emaw beidawng mai lo tûrin min ṭanpui ang.

16. Engvângin nge Jehova rawngbâwl zawm zêl chu i tum tlat ang?

¹⁶ Jehova chuan he ni hnuhnûng hun khirh tak chhûnga a rawngbâwl tûra theih tâwp kan chhuahna chu a ngaihlu tak zet a. Jehova ṭanpuinain lunghnualna kan nei chung pawhin, rinawm takin a rawng kan bâwl zawm zêl thei a ni. Kan unaute’n min tihlungnih loh hunah pawh kan ngaidamin, kan hmangaih chhunzawm zêl thei a. Nupa inkâra buaina lo chhuak eng pawh chu chingfel tûra kan tih theih apiang tiin Pathian kan hmangaihna thûkzia leh a ruahmannate kan zahzia kan lantîr thei a ni. Thil sual kan tih chuan Jehova ṭanpuina kan zawng thei a, a hmangaihna leh ngaihdamna chu dawngin, a rawng kan bâwl zawm zêl thei a ni. ‘Thil ṭha tih kan nin’ loh chuan malsâwmna nasa tak kan dawng thei a ni.—Gal. 6:9.