1-2. (a) Ephesi khuaa mite hnêna lehkha a thawn laiin Paula chu eng dinhmunah nge a awm? (b) Eng zawhnate nge kan ngaihtuah ang?

 TIRHKOH Paula chuan Rom khuaa a ina tântîr a nih laiin, unaute chu tihchak a duh a. Anni chu a tlawh theih loh avângin lehkhate a thawn a ni. Chûng a lehkhathawn zînga pakhat chu C.E. 60, a nih loh leh 61 bâwr vêla Ephesi khuaa mite hnêna a thawn a ni.—Eph. 1:1; 4:1.

² Chumi hma kum sâwm vêlah, Paula chu Ephesi khuaa mite hnênah thu hril leh zirtîrin a lo awm deuh reng tawh a. (Tirh. 19:1, 8-10; 20:20, 21) A unaute chu a hmangaih êm avângin Jehova chunga rinawm reng tûra ṭanpui a duh a ni. Mahse, engvângin nge hriak thih Kristiante hnênah thim leh êng chungchâng a ziah? He lehkhathawn aṭangin Kristian zawng zawngte’n eng zir tûr nge an neih? Chûng zawhnate chhânna chu i lo ngaihtuah ang u.

THIM AṬANGIN ENGAH

3. Ephesi khuaa mite hnêna a lehkhathawnah Paula’n eng entîr nei ṭawngkamte nge a hman?

³ Paula’n Ephesi khuaa Kristiante chu: “Hmânah khân thim in ni a, tûnah erawh chuan . . . êng in lo nih tâk hi,” tiin lehkha a thawn a. (Eph. 5:8-10) Hetah hian Paula’n dinhmun inang lo tak pahnih hrilhfiah nân entîr nei ṭawngkam, thim leh  êng chu a hmang a ni. Ani chuan Ephesi khuaa mite chu “hmânah khân thim in ni,” tia a sawi chhan i lo en ang u.

4. Eng kawngin nge Ephesi khuaa mite chu sakhuana lama thimah an awm?

⁴ Sakhuana lama thimna. Ephesi khuaa mite chu thutak an zir hma chuan, sakhaw dik lo zirtîrna leh dâwithiamna bâwihah an awm a. Ephesi khawpuiah chuan chûng hun laia khawvêl thilmak pasarih zînga tel Diani biak in hmingthang tak chu a awm a ni. Mite chu, chutah chuan milem be tûrin an kal ṭhîn a. Diani lemte leh maichâmte siamin sum tam tak an la lût bâwk. (Tirh. 19:23-27) Chu bâkah, dâwi hman lârna khawpui tia hriat a ni bawk a ni.—Tirh. 19:19.

5. Eng kawngin nge Ephesi khuaa mite chu nungchang lama thimah an awm?

⁵ Nungchang lama thimna. Ephesi khuaa mite chu nungchang lama bawlhhlawlh tak leh an thiltihte chunga zah nachâng hre lo mi nia hriat an ni a ni a. Khawpuia lemchan chhuahna hmunah mai ni lovin, sakhaw kût nîahte hial pawh ṭawngkam bawlhhlawhte an hmang nasa hle a ni. (Eph. 5:3) Chu khuaa mi tam tak chuan ‘inhriat chhuah theihna rêng rêng an nei tawh lo va,’ a awmzia chu an thinlung a chawlawl tawh tihna a ni. (Eph. 4:17-19) Thutak an zir hma chuan Jehova duh loh zâwng an thiltihte chuan an rilru a tibuai lovin, thil sual ti nia inhriatna pawh an nei lo va. Chuvângin, Paula chuan: “Pathian nunna lakah ṭhena lo awmin, an hriatnaah chuan an lo thim a ni,” tiin a ziak a ni.

6. Engvângin nge Paula’n Ephesi khuaa mite chu ‘tûnah êng in lo nih tâk hi’ tia a sawi?

⁶ Mahse, Ephesi khuaa mi ṭhenkhat chu thimah an awm reng lo va. Chuvângin, Paula’n “tûnah erawh chuan Lalpaah chuan êng in lo nih tâk hi,” tiin a ziak a. (Eph. 5:8-10) Anni chu Pathian Thu, thutak êngah an awm tawh a ni. (Sâm 119:105) Sakhaw dik lo, chîn dân ṭha lo te leh, nungchang bawlhhlawhte chu an bânsan vek a. “Pathian awm dân latute” niin Jehova tân theih tâwp chhuaha rawngbâwlin amah tilâwmtute an ni.—Eph. 5:1.

7. Eng kawngte in nge Ephesi khuaa Kristiante nên inanna kan neih?

 ⁷ Keini pawh thutak kan zir hma chuan sakhuana lamah leh nungchang lama thimah kan lo awm a. Kan zînga ṭhenkhat chuan sakhaw dik lo kût nîte an lo lâwmin, mi dangte chuan nungchang bawlhhlawhna nun kawng an lo zawh tawh a ni. Mahse, thil dik leh dik lo chungchânga Jehova tehnate kan zir hnu chuan kan inthlâk danglam a. Pathian tehna felte mila nun chu kan tum ṭan a ni. Chuvângin, kan nunah hlâwkna tam tak kan têl a. (Is. 48:17) Amaherawh chu, kan kalsan tâk thim lak ata inthiarfihlîmin ‘êng fate anga kan awm reng’ a ngai a ni. Engtin nge chutiang chuan kan tih theih ang?

THIM CHU PUMPELH RAWH

8. Ephesi 5:3-5-a târ lan angin Ephesi khuaa mite chuan eng nge an pumpelh ngai?

⁸ Ephesi 5:3-5 chhiar rawh. Nungchang lama thimna lak ata inthiarfihlîm tûrin, Ephesi khuaa Kristiante chuan Jehova lawm loh zâwng chîn dânte chu an hnâwl zawm zêl a ngai a ni. Chutah chuan, nungchang bawlhhlawhna chauh ni lovin, ṭawngkam bawlhhlawhte a tel a. Paula chuan Ephesi khuaa mite chu ‘Krista leh Pathian ramah chan an neih theih nân’ chûngte chu pumpelh tûrin a hrilh a ni.

9. Engvângin nge nungchang bawlhhlawhna lam hawi thil eng pawh chu kan hnâwl ang?

⁹ Keini pawh ‘thim thiltih rah nei ngai lote’ chu kan do zawm zêl a ngai a. (Eph. 5:11) Miin nungchang bawlhhlawhna lam hawi thil thianghlim lote a en a, a ngaihthlâk a, a sawi fo chuan awlsam takin sualah a tlu lût ṭhîn tih thiltawnte chuan a târ lang a ni. (Gen. 3:6; Jak. 1:14, 15) Ram pakhatah chuan unaupa eng emaw zâtte chu online-ah “ṭhiana” insiamin an inkâwm ṭhîn a. A tîrah chuan, a tam zâwkin thlarau lam thilte an sawi a. Mahse, hunte a liam zêl chuan an tîtîna chu a thianghlim lo ṭan a. Mipat hmeichhiatna lam hawi thute sawiin an inkâwm ṭan a. A hnuah, chûng zînga unau tam takte chuan chûng an tîti bawlhhlawhte’n nungchang bawlhhlawhnaah a tlûktîr thu an sawi a ni.

10. Engtin nge Setana’n bum min tum? (Ephesi 5:6)

¹⁰ Setana khawvêl chuan Jehova ngaiha thil dik lo leh thianghlim lote chu sual lo nia rintîr min tum a. (2 Pet. 2:19) Chu chu mak kan ti tûr a ni lo! Tûn hma aṭanga Setana hmanraw pakhat chu thil dik leh dik lo thliar hrang thei lo tûra mite bum hi a ni. (Is. 5:20; 2 Kor. 4:4) Chuvângin, film te, T.V show te leh, website tam tak hmanga Jehova tehna felte kalh zâwng ngaih dân tam tak theh lâr a ni chu thil mak a ni lo! Chu bâkah, Setana chuan thil chîn ṭha lo leh nun kawng bawlhhlawh takte chu pawm theih a nih mai bâkah, hlauhawm lo leh nuam tak anga thlîr tûrin min bum a tum a ni.—Ephesi 5:6 chhiar rawh.

11. Engtin nge Angela-i thiltawn chuan Ephesi 5:7-a thurâwn fing tak zawm a pawimawhzia a târ lan? (Milem en bawk rawh.)

¹¹ Setana chuan Jehova tehnate zawm harsa min tihtîrtute nêna inkâwm tûrin min duh a. Paula’n Ephesi khuaa mite chu Pathian mithmuha thil ṭha lo titute chungchângah: “Anmahni ṭâwmpui suh ang che u,” tiin a fuih a ni. (Eph. 5:7) Amaherawh chu tûn laiah chuan, a takah mai ni lovin, social media-ah pawh ṭhian kan siam theih avângin hmân lai Ephesi khuaa mite aiin kan fîmkhur lehzual a pawimawh a ni. Asia rama awm Angela-i a chuan social media hlauhawmzia a hmu chhuak a. Ani chuan, “Zawi zawia  ngaihtuahna tidanglam thei thang a ni a. Bible thu bulte zahna nei lotute “ṭhiana” siam chu pawi ka ti lo ṭan a. A hnuah chuan Jehova tilâwm lo nun dânte hial pawh ka ngai zam ṭan a ni,” tiin a sawi. Mahse, hmangaihna nei tak upate chuan Angela-i chu a ṭûl anga insiam ṭha tûrin an ṭanpui a ni. “Tûnah chuan, social media aiin thlarau lam thilin ka ngaihtuahna ka tikhat tawh,” tiin a sawi.

12. Thil dik leh dik lo chungchânga Jehova tehnate vawng reng tûrin engin nge min ṭanpui ang?

¹² Nungchang bawlhhlawhna chu pawm theih a ni tih khawvêl ngaih dân chu kan hnâwl a ngai a. Chu chu a dik lohzia kan hria a. (Eph. 4:19, 20) Mahse, hêng zawhnate hi kan inzawh a ngai a ni: ‘Jehova tehna felte zâwm lotu hna thawhpuite, school kalpuite leh, mi dangte chu ṭûl lo takin ka kâwm em? Mi ṭhenkhatin mi khirh tak nia min sawi pawhin Jehova tehnate chu huaisen takin ka zâwm tlat em?’ tiin. Timothea thawn hnih 2:20-22-a târ lan angin, Kristian kohhran chhûngah ngei pawh fîmkhur taka ṭhian kan thlan a ngai a. Mi ṭhenkhat chuan rinawm taka Jehova rawngbâwl tûrin min ṭanpui lo thei tih kan hriat reng a ngai a ni.

“ENG FATE ANGIN AWM RAWH”

13. ‘Eng fate anga awm’ tih awmzia chu eng nge ni? (Ephesi 5:7-9)

¹³ Paula chuan Ephesi khuaa Kristiante hnênah thim chu hnâwl tûr mai ni lovin, ‘êng fate anga awm’ tûr pawhin a fuih a. (Ephesi 5:7-9 chhiar rawh.) A awmzia chu eng nge ni? A awlsam zâwnga sawi chuan, Kristian dikte anga thianghlim taka awm reng tûr tihna a ni. Chutianga kan awm theih dân kawng khat chu Bible ṭanchhan kan thu leh hla chhuahte hmanga taima taka Bible chhiar leh zir a ni a. A bîk takin, “khawvêl êntu” Isua Krista entawn tûr siamte leh zirtîrnate chu ngun taka kan zir a pawimawh a ni.—Joh. 8:12; Thuf. 6:23.

14. Engtin nge thlarau thianghlim chuan min ṭanpui theih?

¹⁴ “Eng fate” anga awm reng thei tûr chuan Pathian thlarau thianghlim ṭanpuina kan mamawh bawk a ni. Engvângin nge? He khawvêl bawlhhlawh takah hian thianghlim taka  awm reng a awlsam loh vâng a ni. (1 Thes. 4:3-5, 7, 8) Thlarau thianghlim chuan Pathian thlîr dân kalhtu zirtîrnate leh thlîr dânte pawh tiamin, he khawvêl ngaih dân chu do tûrin min ṭanpui thei a. ‘Felna leh thutak zawng zawng’ nei tûrin min ṭanpui thei bawk a ni.—Eph. 5:8-10.

15. Eng kawngtein nge thlarau thianghlim kan dawn theih? (Ephesi 5:19, 20)

¹⁵ Thlarau thianghlim kan dawn theih dân kawng khat chu ṭawngṭai hi a ni a. Jehova’n “a dîltute chu thlarau thianghlim” a pe dâwn tih Isua’n a sawi a ni. (Lk. 11:13) Chu bâkah, Kristian inkhâwmnaa Jehova kan fak hian a thlarau thianghlim kan dawng bawk. (Ephesi 5:19, 20 chhiar rawh.) Chu thlarau thianghlim kaihhruaina chuan Pathian duh zâwng anga nung tûrin min ṭangpui ang.

16. Engin nge thu tlûkna fingte siam thei tûra min ṭanpui ang? (Ephesi 5:8-10, 17)

¹⁶ Thu tlûkna pawimawh tak kan siam a ngaih hunah “Lalpa duh zâwng eng nge ni tih” hriat kan tum ang a, chumi mil chuan kan ti tûr a ni. (Ephesi 5:8-10, 17 chhiar rawh.) Kan dinhmun nêna inmil Bible thu bulte hriat tumin, chumi chungchânga Pathian thlîr dân chu hriat kan tum a ni. A thu bulte kan zawm chuan thu tlûkna fingte kan siam thei leh zual ang.

17. Kan hun fing taka hmannaah eng nge tel? (Ephesi 5:15, 16) (Milem en bawk rawh.)

¹⁷ Paula’n Ephesi khuaa Kristiante chu an hun fing taka hmang tûrin a fuih bawk a. (Ephesi 5:15, 16 chhiar rawh.) “Mi sual,” kan hmêlma Setana chuan Pathian rawngbâwlnaa hun pe thei lo khawpa he khawvêl thilte ûma buai tûrin min duh a ni. (1 Joh. 5:19) Kristian zawng zawngte tân Jehova rawngbâwlna aiin sum leh pai, ei zawnna leh, zirna sâng ûmte chu dah hmasak a awl hle a. Chutianga titu chuan khawvêl ngaihtuahna thununin a awm tih a târ lang a ni. Chûng thilte chu thil sual ni lo mah se, kan nunah kan dah hmasa ber tûr a ni lo. “Eng fate”  anga awm tûr chuan “remchânnate lei” zêlin thil pawimawh ber chu kan ngaihtuah tlat tûr a ni.

18. Donald-a’n fing taka hun hmang tûrin engte nge a tih?

¹⁸ Jehova rawng tam lehzuala bâwl theihna hun remchâng chu zawng reng rawh. Chutiang chuan South Africa-a awm Donald-a’n a ti a. Heti hian a sawi a ni: “Ka dinhmun chu ka en chiang a, Jehova hnênah rawngbâwlnaa tam lehzuala thawk thei tûrin ṭanpuina ka dîl a. Thu hrilh nâna hun tam lehzual ka hman theihna tûr hna min pe tûrin ka dîl a ni. Jehova ṭanpuinain ka duhthusâm tak hna chu ka hmu a. Tichuan, ka nupui nên hunbi kima rawngbâwlnaah kan thawk dûn thei ta a ni,” tiin.

19. Engtin nge “êng fate” anga kan awm reng theih?

¹⁹ Ephesi khuaa mite hnêna Paula lehkhathawn chuan chumi khuaa awmte chu rinawm taka Jehova rawngbâwl zawm zêl tûrin a ṭanpui a. Keini pawh min ṭanpui ve thei a ni. Kan hriat tawh angin, fing taka intihhlimna thlang tûr leh ṭhian thlang tûrin min ṭanpui a. Chu bâkah, kan thiltih zawng zawnga thutak êngin min kaihhruai reng theih nâna Bible zir ziah tûrin min chêttîr bawk. Tichuan, mize ṭhate min neihtîr theitu thlarau thianghlim pawimawhna a târ lang bawk a ni. Paula lehkhathawn nunpuina chuan Jehova ngaihtuahna nêna inmila thu tlûkna fingte siam thei tûrin min ṭanpui a ni. Hêng thilte hi kan tih chuan khawvêl thim chu hnâwlin êngah kan awm reng thei ang!