Isua thisena tlanna inthawina zârah chauh kan sualte ngaihdam theih a ni a. (Eph. 1:7) Mahse, Bible chuan Isua’n inthawina a pêk hma hun chungchângah: “[Pathianin] A dawhtheihnain tûn hmâa sual lo tih tawhte chu a ngaihhnathiamsak a,” tiin a sawi a ni. (Rom 3:25, Baptist Mid-Missions.) A nih leh, engtin nge Pathian Jehova’n chutianga ti chunga rorêl dikna chungchânga a tehna ṭha famkim chu a vawn reng theih?

Jehova thlîrna aṭang chuan, rinna lantîrtu mihringte chhandamtu tûr ‘thlah’ pe tûra ruahmanna a siam aṭang khân, tlanna chu pêk tawh ang a ni a. (Gen. 3:15; 22:18) Jehova hun ruatah, a Fapa mal neih chhun chuan inhuam takin tlanna a pe ang tih a hre chiang a ni. (Gal. 4:4; Heb. 10:7-10) Isua chuan Pathian aiawhtu anga leia a lo kal khân, tlanna a pêk hma aṭang pawhin sual ngaihdam theihna a nei a. Chutianga rinna lantîrtute a ngaihdam theih chhan chu, a pêk tûr tlanna hmangin an sualte ngaihdam a ni dâwn tih a hriat vâng a ni.—Mt. 9:2-6.