1. Kum 2023-a neih kum tin inkhâwm (annual meeting)-ah eng nge kan hriat?

 KUM 2023-a neih kum tin inkhâwm a (annual meeting)-ah kan thurin ṭhenkhat siamremna leh kan rawngbâwlna chungchânga thupuan chhuah phûrawm takte kan hria a. Entîr nân, mi ṭhenkhat chuan Babulon Khaw Ropui tihchhiat a nih hnuaah pawh Jehova mite lama ṭan theihna hun remchâng an nei mai thei tih kan hria a ni. Kum 2023, November thla aṭangin Lalram thuchhuahtute chuan rawngbâwlnaa an thiltih zawng zawng an report a ngai tawh lo tih kan hre bawk. Chutianga inthlâk danglamna siam a nih avângin kan rawngbâwlna chu tûn hma angin a pawimawh tawh lo tihna a ni em? Ni lo ve!

2. Engvângin nge a ni têl hian kan rawngbâwlna chu a hmanhmawhthlâk lehzual? (Marka 13:10)

² A ni têl hian, kan rawngbâwlna chu a hmanhmawhthlâk lehzual a ni. Engvângin nge? Hun a tam tawh loh vâng a ni. Isua’n ni hnuhnûnga thu hrilh rawngbâwlna chungchâng a sawi lâwk kha han ngaihtuah teh. (Marka 13:10 chhiar rawh.) Matthaia ziakah, Isua’n “tâwpna” a lo thlen hmain chanchin ṭha chu khawvêl zawng zawngah hrilh a nih tûr thu a sawi a. (Mt. 24:14) Chu chu Setana khawvêl tâwp hlenna tûr sawina a ni. Jehova chuan lo thleng mai tûr tâwpna atân “a nî leh a hun” a ruat tawh a. (Mt. 24:36; 25:13; Tirh. 1:7) Chumi nî chu nî tin hian kan hnaih tawlh tawlh a ni. (Rom 13:11) Chutih  rualin, tâwpna a thlen hma loh chu thu kan hrilh zawm zêl a ngai a ni.

3. Engin nge thu hril tûra min chêttîr?

³ Kan rawngbâwlna chungchâng kan ngaihtuah hian, zawhna pawimawh tak lo chhuak chu: Engvângin nge chanchin ṭha kan hril? A awlsam zâwnga sawi chuan, hmangaihnain thu hril tûra min chêttîr vâng a ni. Thu hrilh rawngbâwlnaa kan telna hian kan hmangaihna a târ lang a—chanchin ṭha kan ngainatna te, mite kan hmangaihna te leh, a pawimawh ber Jehova leh a hming kan hmangaihna te chu. Chûngte chu a mal tê têin i lo ngaihtuah ang u.

CHANCHIN ṬHA KAN NGAINAT AVANGIN THU KAN HRIL

4. Engtin nge thu lâwmawm kan dawn hian kan chhân lêt ṭhin?

⁴ Thu lâwmawm eng emaw i hriat tirha i awm dân kha i ngaihtuah lêt thei em? Chu chu chhûngkaw zînga tu emawin fa a neih emaw, tu emawin a mamawh tak hna a hmuh hun emawa a hlim dân ang hi a ni mai thei a. Chu thu lâwmawm chu i chhûngte leh i ṭhiante hnêna hrilh i châk hle ngei ang. Chanchin ṭha azawnga chanchin ṭha ber—Pathian Ram chanchin ṭha i hriat tirhin chutiang chuang i awm em?

5. Pathian Thu aṭanga thutak i hriat tirh lai khân engtin nge i awm? (Milem en bawk rawh.)

⁵ Pathian Thu aṭanga thutak i hriat ṭan tirh laia i awm dân kha han ngaihtuah lêt teh. I Pa vâna mi chuan a hmangaih che a, amah betu chhûngkaw zînga tel tûrin a duh che tih te, natna leh hrehawm tawrhna tihtâwp a tiam te, leh khawvêl thara i hmangaih thi tawhte lo tho leh hmuh beiseina i neih mai bâkah, thil dang tam tak i hriat belh a. (Mk. 10:29, 30; Joh. 5:28, 29; Rom 8:38, 39; Thup. 21:3, 4) Chûng thutak i hriatte chuan i thinlung a khawih hle a ni. (Lk. 24:32) I thu hriatte chu i ngainain, chumi chungchâng chu mi dangte hnêna hrilh i duh tak zet a ni.—Jeremia 20:9 nên khaikhin rawh.

6. Unau Ernest-a leh Unaunu Rose-i te thiltawn aṭangin eng nge kan zir?

 ⁶ Thiltawn pakhat han ngaihtuah ta ila. Unau Ernest-a b chu kum sâwm vêl a nih laiin a pain a boralsan a. Ani chuan: “‘Ka pa chu vânah a kal ang em? A nih loh leh chatuanin a boral ta a ni ang em?’ tiin ka ngaihtuah a. Pa nei naupangte chu ka awt thei hle,” tiin a sawi. Ani chu thlânmualah kal ziahin a pa thlânah chuan ṭhingṭhiin: “Khawngaih takin, aw ka Pathian, ka pa hi khawiah nge a awm hriat ka duh a ni,” tiin a ṭawngṭai ṭhîn a. A pa thihna kum 17 vêl hnuah Ernest-a chu Bible zir tûra sâwm a nih chuan a pawm nghâl a ni. Mitthite chu tui taka muhîl angin engmah an hre lo va, nakinah kaihthawh an ni ang tih Bible thutiamte a hriat chuan a phûr hle a. (Thur. 9:5, 10; Tirh. 24:15) A tâwpah, tûn hmaa a lo hriat duh tak zawhnate chhânna chu a hmu chhuak ta! Bible thutak chungchâng a zirte chuan Ernest-a chu a tihlim hle a. A nupui, Rose-i pawh Bible zirnaah a tel ve ṭhîn a, ani pawhin Lalram thuchah chu a ngaina ta hle a. Kum 1978-ah an nupain baptisma an chang a ni. Anni chuan an chhûngte, an ṭhiante leh, mi dang ngaithla duhte hnênah ṭhahnemngai takin thu an hril ṭhîn a. Chutiang chuan, Unau Ernest-a te nupa chuan baptisma chang thei tûr khawpin mi 70 aia tam an ṭanpui a ni.

7. Kan thinlunga Bible thutak kan hmangaihnain zung a kaih tawh chuan engtin nge kan awm? (Luka 6:45)

⁷ Kan thinlunga Bible thutakin zung a kaih tawh chuan mite hnêna sawi lovin kan awm thei lo tih a chiang hle. (Luka 6:45 chhiar rawh.) Kum zabi khatnaa: “Keini zawng thil kan hmuh leh kan hriatte kha sawi lovin kan awm thei lo,” tia sawitu Isua zirtîrte angin kan awm a. (Tirh. 4:20) Thutak kan hmangaih êm avângin mi a tam thei ang berte hnêna hrilh kan duh a ni.

MITE KAN HMANGAIH AVANGIN THU KAN HRIL

8. Engin nge mi dangte hnêna chanchin ṭha hril tûra min chêttîr? (“ Mite Hmangaih La—Zirtîrahte Siam Rawh,” tih bâwm chu en ang che.) (Milem en bawk rawh.)

⁸ Jehova leh a Fapa angin, mite kan hmangaih a. (Thuf. 8:31; Joh. 3:16) ‘Beiseina rêng nei lo leh Pathian lova awmte’ chu kan khawngaih tak zet a ni. (Eph. 2:12) Anni chu nuna harsatna khûr thûk takah an tla lût a, an mamawh—Pathian Ram chanchin ṭha—nun chhanhimna kawr kan nei a ni. Chutiang mite kan hmangaihna leh khawngaihna chuan theih tâwp chhuaha chanchin ṭha hril tûrin min chêttîr a. Chu thuchah hlu tak chuan an thinlungah beiseina a neihtîr a, chu chuan tûnah pawh nun ṭha ber a neihtîr bâkah, “nuna tak tak”—Pathian khawvêl thara  chatuana nun beisei theihna pawh a pe a ni.—1 Tim. 6:19.

9. Nakin hun chungchângah eng vauhkhânna nge kan pêk a, engvângin nge? (Ezekiela 33:7, 8)

⁹ Mite kan hmangaihna chuan khawvêl suaksual tak tâwpna kan hnaih tawhzia an hnêna vaukhân tûrin min chêttîr bawk. (Ezekiela 33:7, 8 chhiar rawh.) Jehova be lotu kan chhûngte pawh tiamin, mi zawng zawng chungah khawngaihna kan nei a. Mi tam tak chuan lo thleng mai tûr ‘hrehawm nasa tak, leilung pian tirh ata tûn thlenga la awm ngai lo, awm pawh engtikah mah awm leh tawh lo’ tûr chu hre lovin nî tin nun an hmang a. (Mt. 24:21) Chuvângin, anni chuan rorêlna nîa thil lo theng tûrte—sakhaw dik lo tih boral a nih tûr chungchângte leh a hnua Armageddon-ah he khawvêl suaksual tak tihboral a nih tûr chungchângte chu hria se kan duh a ni. (Thup. 16:14, 16; 17:16, 17; 19:11, 19, 20) Mi a tam thei ang berin vaukhânna chhâng lêt a, kan ruala Jehova be ve tûrin kan ṭawngṭai a. A nih leh, kan hmangaih tak kan chhûngte pawh tiamin, tûn thlenga chu vaukhânna ngaihsak lotute chungchâng chu engtin nge ni ang?

10. Engvângin nge vaukhânna kan puanchhuah chu hmanhmawhthlâk tak a nih?

¹⁰ Thuziak hmasaa kan sawi tâk angin, Babulon Khaw Ropui tihchhiatna an hmuh huna inthlâk danglamtute chhandam chu Jehova duh zâwng a ni thei a. Chutiang a nih chuan, vaukhânna kan puanchhuah chu tûn hma zawng aiin a hmanhmawhthlâk lehzual a ni. Hei hi han ngaihtuah teh: Tûna kan thu hrilhte hi nakinah an hre chhuak mai thei a ni. (Ezekiela 33:33 nên khaikhin rawh.) Kan hnên aṭanga an hriat vaukhânnate chu hre rengin chu chuan a tlai lutuk hmaa kan ruala Jehova be tûrin a chêttîr thei a. ‘Lîr nasa tak a nghîn’ hnuah chauh a thu hriatte avânga inthlâk danglamtu Philippi khuaa tân in vêngtu angin, mi ṭhenkhat chu Babulon Khaw Ropui tihchhiatna avânga khawvêl tihnghîn a nih hnuah an inthlâk danglam mai thei a ni.—Tirh. 16:25-34.

JEHOVA LEH A HMING KAN HMANGAIH AVANGIN THU KAN HRIL

11. Engtin nge Jehova chu ropuina te, chawimawina te leh, thiltihtheihnate kan pêk? (Thu Puan 4:10-11) (Milem en bawk rawh.)

¹¹ Chanchin ṭha kan hrilh chhan pawimawh ber chu Pathian Jehova leh a hming thianghlim kan hmangaih vâng a ni a. Kan rawngbâwlna chu kan hmangaih tak Pathian chawimawina kawng khat angin kan thlîr a. (Thu Puan 4:10-11 chhiar rawh.) Pathian Jehova chu amah betu rinawmte hnên aṭangin ropuina te, chawimawina te, thiltihtheihnate  hmu tlâk a ni tih chu thinlung takin kan pawm a ni. Ani chuan ‘thil engkim a siam a,’ amah avânga awm kan ni tih rinchhan tlâk finfiahnate chu mi dangte hnêna kan hrilh hian a hnênah ropuina leh chawimawina kan pe a ni. Rawngbâwlnaah kan dinhmun azira a tam thei ang bera kan hun te, kan chakna te leh, kan thil neihte kan hman hian Pathian hnênah kan theihna—kan thiltihtheihna—pe ang kan ni. (Mt. 6:33; Lk. 13:24; Kol. 3:23) A awlsam zâwnga sawi chuan, Pathian kan hmangaihzia sawi chhuah kan duh a. A hming leh a nihnate chu mi dangte hnêna hrilh kan duh bawk. Engvângin nge?

12. Engtin nge kan rawngbâwlnaah Jehova hming kan tihthianghlim theih?

¹² Jehova kan hmangaihna chuan a hming tithianghlim tûrin min chêttîr a. (Mt. 6:9) Setana’n Jehova a sawi chhiatna zawng zawngte chu dâwt a nihzia mi dangte hnêna hrilh kan duh a ni. (Gen. 3:1-5; Job. 2:4; Joh. 8:44) Kan rawngbâwlnaa kan thu ngaithlatu zawng zawngte chu Pathian chungchâng thu dik hrilhin a lamah kan ṭang tlat a. Mi zawng zawng hnênah Jehova mize ropui ber chu hmangaihna a ni tih te, a rorêlna chu a felin a dik tih te leh, rei lo têah a Lalramin mihringte hrehawm tawrhna zawng zawng a titâwp ang a, remna leh hlimna a thlentîr ang tihte chu hriattîr kan duh a ni. (Sâm 37:10, 11, 29; 1 Joh. 4:8) Kan rawngbâwlnaah Jehova hming ṭhatna kan humhim hian a hming kan tithianghlim a. Kan hming phûin kan nung tih hriatna chuan lungawina min neihtîr bawk. Engtin nge chutianga kan sawi theih?

13. Engvângin nge Jehova Thuhretute tia koh kan nih chu chawimawina anga kan ngaih? (Isaia 43:10-12)

¹³ Jehova chuan amah “hriatpuitute” a nih loh leh, a “Thuhretute” tiin min ko va. (Isaia 43:10-12 chhiar rawh.) Kum eng emaw kaltaa,  Governing Body hnên aṭanga lehkhathawnah chuan: “Jehova Thuhretute tia koh kan ni thei hi chawimawina ropui ber a ni,” tih a chuang a. c Engvângin nge chutianga an sawi theih? Entîrna pakhat han ngaihtuah ta ila. Rorêlna court-ah thuhretu atân tu emaw i mamawh a nih chuan, i mi hriat chian leh rin tak, rinchhan tlâk nia hming ṭha nei tu emaw chu i thlang ngei ang. Jehova chuan a Thuhretute nia min thlangin min hriat chianzia leh ani chu Pathian dik awmchhun a ni tih mi dangte hnêna hriattîr tûra min rinchhanzia a târ lang a. A Thuhretute kan ni thei hi chawimawina nasa tak anga kan ngaih avângin hun remchâng kan neih apiangin a hming kan hriattîr a, a chungchâng dâwt thu tam tak chu kan do lêt a ni. Chutianga tiin, Jehova Thuhretute nia kan hming phûin kan nung a ni.—Sâm 83:18; Rom 10:13-15.

TAWPNA A THLEN HMA LOH THU KAN HRIL ZEL ANG

14. Kan hma lawkah eng thil phûrawm takin nge min hmuak?

¹⁴ Kan hma lawka thil lo thleng tûrte hmuh chu kan va nghâkhlel tawh êm! Jehova malsâwmnain, mi tam takin hrehawm nasa tak inṭan hmaa thutak an pawm kan beisei a ni. Mihring chanchina hun thim ber—hrehawm nasa tak—chhûngin mi tam tak chu Setana khawvêl borâl mêk aṭanga lo chhuakin, Jehova faknaa kan zînga an tel kan hmu thei tûr chu a va phûrawm tak êm!—Tirh. 13:48.

15-16. Eng nge tih kan tum tlat ang a, chu chu engtik hun thleng nge ni ang?

¹⁵ Chutih rualin, hnathawh tûr kan nei a. Kan puan nawn leh ngai tawh loh tûr khawvêl pum puia Pathian Ram chanchin ṭha hrilh theihna chanvo hlu kan nei a ni. Chu bâkah, thil lo thleng mai tûrte chungchângah mite kan vaukhân bawk. Mite chuan he khâwvêl tâwpna kan hnaih tawh hle a ni tih an hriat a ngai a. Tichuan, rorêlna nî a lo thlen hunah, anni chuan kan thuchah puan chu Pathian Jehova hnên aṭanga lo chhuak a ni tih an hre thei ang.—Ezek. 38:23.

¹⁶ Chuti a nih chuan, eng nge tih kan tum tlat ang? Chanchin ṭha kan ngainatna te, mite kan hmangaihnate leh, a pawimawh ber Pathian Jehova leh a hming kan hmangaihnate chuan Jehova’n “a tâwk ta e!” tia a sawi hma loh phûr tak, hmanhmawh tak leh, ṭhahnemngai taka thu hril zawm zêl tûrin min chêttîr a ni.