ZIR TUR THUZIAK 22
HLA 127 Eng Ang Mi Nge Ka Nih Ang?
Inngaihzâwnna Hlawhtling Tak Neih Dân
“Thinlunga mihring thurûk chu. . . a hlu êm êm a ni.”—1 PET. 3:4.
A TUM BER
Inngaizâwngte’n inngaihzâwnna hlawhtling tak an neih theih dân leh kohhrana mi dangte’n an ṭanpui theih dân.
1-2. Engtin nge mi ṭhenkhatin inngaihzâwnna chu an ngaih?
INNGAIHZAWN lai chu hun hlimawm tak leh phûrawm tak a ni thei a. Ngaihzâwng i nei a nih chuan nuam taka hun hman dun in duh ngei ang. Inngaizâwng tam tak tân, chu chu hun hlimawm tak a ni. Ethiopia rama awm unaunu Tsion-i a chuan: “Ka pasal nêna kan inngaihzâwn lai chu ka nuna hun hlimawm berte zînga pakhat a ni a. Thil pawimawh takte sawi dun châng kan nei ṭhîn a, kan hlim thei hle bawk. Ka hmangaih tak leh min hmangaihtu tak ka tawng tih ka hriat chuan ka hlim tak zet a ni,” tiin a sawi.
2 Chutih rualin, Netherlands rama awm unau Alessio-a chuan: “Kan inngaihzâwn laia ka nupui chungchâng tam lehzuala hriat chu nuam hle mah se, harsatnate pawh kan nei bawk,” tiin a sawi. He thuziakah hian inngaizâwngte tawh theih harsatna ṭhenkhatte leh Bible thu bulte’n inngaihzâwnna hlawhtling tak nei thei tûra a ṭanpui theih dân kan sawiho vang a. Kohhrana mi dangte’n an ṭanpui theih dân pawh kan sawiho bawk ang.
INNGAIHZAWNNAIN A TUM
3. Inngaihzâwnnain a tum chu eng nge ni? (Thufingte 20:25)
3 Inngaihzâwnna chu thil hlimawm tak a nih rualin, inneihna thlen thei rahbi pawimawh tak a ni bawk a. An inneih nîah, nupate chuan an dam chhûnga inhmangaiha inzah tawn tûrin Jehova hmaah thu an tiam a. Thu eng pawh kan tiam hmain ngun takin kan ngaihtuah hmasa tûr a ni. (Thufingte 20:25 chhiar rawh.) Chu chu inneihna thutiam atân pawh a dik hle a. Inngaihzâwnna chuan inkawpte chu inhre chiang tawn tûr leh thu tlûkna fing tak siam tûrin a ṭanpui a. Chu thu tlûkna chu inneih emaw, inṭhen emaw a ni thei a ni. Inngaizâwngte an inṭhen hian an inngaihzâwnna a hlawhchham tihna a ni lo va. Chu aiin, inngaihzâwnnain a tum angin an inneih dâwn leh dâwn loh chungchângah thu tlûkna an siam thei tihna a ni.
4. Engvângin nge inngaihzâwnna chungchângah thlîr dân dik kan neih ang?
4 Inngaihzâwnna chungchânga thlîr dân dik neih chu engvângin nge a pawimawh? Kawppui nei lote’n thlîr dân dik an neih chuan nupui pasal atâna an duh loh tu emaw chu an ngaizâwng lo vang. Mahse, anni chauh chu hemi chungchânga thlîr dân dik nei tûr awmchhun an ni lo. Kan zavai hian thlîr dân dik kan neih a ngai a ni. Entîr nân, mi ṭhenkhat chuan inngaizâwngte chu innei ngei ngei tûr niin an ngai a. Chu thlîr dân chuan kawppui nei lo Kristian-te chu engtin nge a nghawng? United States-a kawppui nei lo unaunu Melissa-i chuan heti hian a sawi a ni: “Thuhretu inngaizâwngte chu innei ngei ngei tûra beisei an ni ṭhîn a. Chuvângin, mi ṭhenkhat chu inmil lo chungin an inkawp reng a. Mi dangte chuan ngaihzâwng neih an hreh phah bawk. Chu chuan rilru hahna nasa tak a thlen thei a ni,” tiin.
INHRE CHIANG TAWN RAWH U
5-6. Inngaizâwngte chuan an inngaihzâwn chhûngin eng thilte nge an inhriatsak tawn ang? (1 Petera 3:4)
5 Ngaihzâwng i nei a nih chuan, engin nge kawppui atâna ṭha a nih leh nih loh hre tûra ṭanpui ang che? Inhriat chian tawnna a ni. In inngaihzâwn hma aṭangin a chungchâng eng emaw chen i hre tawh ngei ang a. Mahse, tûnah chuan “thinlunga mihring thurûk” chu hre tûrin hun remchâng i nei a ni. (1 Petera 3:4 chhiar rawh.) Chutah chuan a thlarau lam dinhmun, a miziate leh, a ngaihtuah dânte tam lehzuala hriat a tel a. Eng emaw chen hnuah, hêng zawhnate hi i chhâng thei dâwn a ni: ‘Ani hi ka tân kawppui tûr ṭha a ni ang em?’ (Thuf. 31:26, 27, 30; Eph. 5:33; 1 Tim. 5:8) ‘Kan mamawh angin hmangaihna leh ngaihsakna kan inlantîr tawn thei ang em? Kan tlin lohnate kan inhriatthiamsak thei ang em?’ (Rom 3:23) In inhriat chian zêl rualin, hei hi hre reng ang che: A pawimawh ber chu in inanna ni lovin, in inan lohnate mila in insiamrem theihna hi a ni.
6 In inngaihzâwn chhûng chuan eng thil dangte nge in inhriatsak tawn ang? In inhmangaih tak tak hmain, thiltuma in neih ang chi thil pawimawh ṭhenkhat chu in sawi dûn thei a. Mahse, hrisêl lohna, sum leh pai lama buaina leh, tûn hmaa thiltawn ṭha lo ang chi mi mal thilte hi engtin nge ni ang? Inngaihzâwn tirh chuan thil engkim sawi dun a ngai chuang lo va. (Johana 16:12 nên khaikhin rawh.) I mi mal thil ṭhenkhat hrilh tûra a la hma nia i hriat chuan i la hrilh theih loh thu hriattîr ang che. Chutih rualin, ani chuan thu tlûkna inbûk tâwk tak siam tûrin i mi mal chungchâng chu a hriat a ngai a ni. Chuvângin, engtik hunah emaw chuan chûng thilte chu dik taka i hrilh a ngai ang.
7. Engtin nge inngaizâwngte chu an inhriat chian lehzual theih? (“ Hmun Hla Aṭanga Inngaizâwngte,” tih bâwm chu en bawk rawh.) (Milem en bawk rawh.)
7 Engtin nge in inhriat chian tak tak theih ang? Tih dân ṭha tak pakhat chu inhawng tak leh tlang taka inbiak hi a ni. (Thuf. 20:5; Jak. 1:19) Chutianga ti thei tûr chuan thil ei dunte, vântlâng hmuna lên dunte leh, rawngbâwlnaa chhuah dun ang chi thilte chu in ti thei a. Ṭhiante leh chhûngte nêna hun in hman dun hunah pawh in inhre chiang lehzual thei a ni. Chu bâkah, mi chi hrang hrang a cheibâwl dân leh dinhmun hrang hrang a hmachhawn dân târ langtu thiltihte chu ruahman ang che. Netherlands rama awm Aschwin-a tih dân hi lo chhinchhiah ang che. Alicia-i nêna an inngaihzâwn lai chungchângah heti hian a sawi a ni: “Kan inhriat chian lehzual theih nân thil chi hrang hrang kan ti dûn ṭhîn a. Ei rawngbâwlte leh thil dang tih ngaite chu kan ti dûn tlângpui a. Chutianga kan tihna aṭang chuan kan chakna laite leh chak lohna laite chu kan inhriatsak thei a ni,” tiin.
Tîtîna awmtîr theitu thilte in tih dun chuan in inhre chiang lehzual thei (Paragraph 7-8-na en rawh)
8. Engtin nge inngaizâwngte chuan zir dunna chu an hlâwkpui theih?
8 Bible thute zir dunna hmangin in inhre chiang thei bawk a. In innei a nih chuan, in inneihnaah Pathian chu pêng pawimawh tak a nih theihna tûrin chhûngkuaa Pathian biakna in neih ṭhin a ngai ang. (Thur. 4:12) Chuvângin, in inngaihzâwn lai aṭangin Bible in zir dun theih nân engvângin nge hun duan in siam loh vang? Inngaizâwngte chu an la inneih loh avângin unaupa chu hmeichhe lu a ni lo ngei mai. Chutih rualin, zir dun ziahna hmangin in thlarau lam dinhmunte chu in inhriatsak thei a ni. United States-a awm Max-a leh Laysa-i te nupa chuan zir dunna chu kawng dangin an hlâwkpui a. Max-a chuan: “Kan inngaihzâwn tirhin, inngaihzâwnna, inneihna leh, chhûngkaw nun chungchâng târ lanna thu leh hla chhuahte chu kan zir dûn a. Chûng thu leh hla chhuahte chuan sawi chhuah harsa ka tih thilte pawh sawi dun theihna hun remchâng min pe a ni,” tiin a sawi.
THIL DANG NGAIHTUAH TURTE
9. Inngaizâwngte chuan mi dangte hnêna an inngaihzâwnna chungchâng an hriattîr hmain eng nge an ngaihtuah hmasak ang?
9 In inngaihzâwnna chungchâng chu tute nge in hrilh ang? Chu chu in pahniha thu tlûkna siam tûr a ni a. In inngaihzâwn tirh chuan mi tlêm tê hnênah chauh in hrilh pawh a ni thei. (Thuf. 17:27) Chutianga tiin, ṭûl lo taka nawr luihna leh zawhnate chu in pumpelh thei ang. Mahse, tu mah in hrilh loh chuan mi dang hriat lohva a hranga in inhmuh a ngai thei a. Chu chu in tân a hlauhawm thei a ni. Chuvângin, thurâwn ṭha leh ṭanpuina pe theitu che u hriattîr chu a finthlâk a. (Thuf. 15:22) Entîr nân, chhûngkuaa mite, ṭhian puitlingte, a nih loh leh kohhran upate in hriattîr thei a ni.
10. Engtin nge inngaizâwngte’n an inngaihzâwnna chu zahawm tak an nihtîr theih? (Thufingte 22:3)
10 Engtin nge in inngaihzâwnna chu zahawm tak in nihtîr theih? In inngainatna a zual zêl rualin, in inhîp tawnna pawh a nasa lehzual dâwn a. Engin nge nungchang thianghlimna vawng tûra ṭanpui thei che u? (1 Kor. 6:18) Thil thianghlim lo sawi dun te, a fâla awm dun te leh, zu ruihte chu pumpelh ang che u. (Eph. 5:3) Chûng thilte chuan mipat hmeichhiatna hman châkna a tisosâng theiin thil dik tih a tiharsa thei a ni. Engvângin nge in inngaihzâwnna chu zahawm tak in nihtîr theih dânte in sawi dun fo loh vang? (Thufingte 22:3 chhiar rawh.) Ethiopia rama Dawit-a leh Almaz-i te tih dân hi lo chhinchhiah ang che. Anni chuan: “Mi tamna hmun, a nih loh leh kan ṭhiante bulah hun kan hmang dûn ṭhîn a. Motor chhûngah emaw, inah emaw kan pahnih chauhvin kan awm ngai lo. Chuvângin, thlêmna awmtîr thei dinhmunte chu kan pumpelh thei a ni,” tiin an sawi.
11. Inngaizâwngte chuan hmangaihna lantîrna chungchângah eng nge an ngaihtuah ang?
11 Hmangaihna lantîrna chungchâng hi engtin nge ni ang? In inhmangaihna a ngheh chhoh zêl rualin kawng ṭhenkhata hmangaihna inlantîr tawn in duh thei a. Mahse, mipat hmeichhiatna hman châkna a sosâng a nih chuan, i ngaihzâwng chungchângah thu tlûkna fing siam a harsa thei a ni. (HTK. 1:2; 2:6) Chu bâkah, hmangaihna lantîrnate chuan mahni inthunun a tiharsa theiin, Jehova lawm loh zâwng thilte a tihtîr thei che u a. (Thuf. 6:27) Chuvângin, in inngaihzâwn tirh aṭangin Bible thu bulte nêna inmila hmangaihna in inlantîr tawn dân tûr chin tâwk chu sawi dûn ang che u. b (1 Thes. 4:3-7) Heti hian inzâwt ang che u: ‘Kan chênna hmuna mite hian hmangaihna lantîrnate chu engtin nge an thlîr? Hmangaihna lantîrna chuan kan pahnih inkârah mipat hmeichhiatna hman châkna a chawk tho thei ang em?’ tiin.
12. Inngaizâwngte chuan inngaihzâwn laia ngaih dân inan lohnate chungchângah eng nge an ngaihtuah tel ngai?
12 Engtin nge ngaih dân inan lohna chu in chinfel theih? Ngaih dân inan loh châng nei ta ula engtin nge ni ang? Chu chu in inmil thei dâwn lo tihna a ni em? Ni lo ve; inngaizâwng zawng zawngte chuan ngaih dân inan loh châng an nei ṭhîn. An inmil lohnaa insiamrem tûra theih tâwp chhuahtute chuan inneihna hlimawm tak an nei thei a. Chuvângin, tûn aṭanga in inmil lohnate in chinfel dân chuan inneihna hlimawm tak in neih dâwn leh dâwn loh a târ lang thei a ni. Heti hian inzâwt ang che u: ‘Kan inmil lohnate chu zaidam tak leh inzah thiam takin kan sawi dûn thei em? Mahni tlin lohnate chu pawmin insiam ṭhat kan inhuam em? A tlâwm zâwka ṭan, ngaihdam dîl leh, inngaihdam kan peih em?’ (Eph. 4:31, 32) Chutih rualin, in inngaihzâwn lai aṭanga in intithiam lo fo a nih chuan in dinhmun chu in inneih hnuah pawh a ṭhat chhoh a rinawm loh. In inmil thei dâwn lo tih in hriat chuan inngaihzâwnna tihtâwp chu in pahnih tâna thil ṭha ber a ni thei a ni.
13. Inngaizâwngte’n inngaihzâwn rei zâwng tûr an hriat theih nân engin nge ṭanpui thei?
13 Engtia rei nge in inngaihzâwn ang? Hmanhmawh taka thu tlûkna siamna hian nghawng ṭha lo tak a nei ṭhîn a. (Thuf. 21:5) Chuvângin, in inngaihzâwn hun chhûng chu inhriat chian theih nâna hun rei tâwk a ni tûr a ni. Mahse, ṭûl lo takin hun in pawt sei tûr a ni lo. Bible chuan: “Beiseina tihkhawtlai hian thinlung a tinâ,” tiin a sawi a ni. (Thuf. 13:12) Chu bâkah, hun in hman dun tam poh leh mipat hmeichhiatna lama thlêmna a nasa lehzual thei a. (1 Kor. 7:9) Chuvângin, inngaihzâwn rei zâwng chauh ngaihtuah lovin, ‘Thu tlûkna siam tûrin a chungchângah eng nge ka la hriat ngai?’ tiin i inzâwt thei a ni.
ENGTIN NGE MI DANGTE’N INNGAIZAWNGTE CHU AN ṬANPUI THEIH?
14. Eng kawngtein nge mi dangte’n inngaizâwngte chu an ṭanpui theih? (Milem en bawk rawh.)
14 Inngaizâwng hriat kan neih chuan engtin nge kan ṭanpui theih? Chaw ei tûr te, chhûngkuaa Pathian biaknaa tel tûr te leh, intihhlimnaa tel tûrtein kan sâwm thei a. (Rom 12:13) Chutiang hunahte chuan an inhre chiang lehzual thei a ni. An bula awm tûr te, an kal duhna hmuna hruaitu tûr te, a nih loh leh a hranga an inbiak theihna tûr hmunte an mamawh em? Chutiang a nih chuan, kan ṭanpui thei ang em? (Gal. 6:10) Kan târ lan tâk Alicia-i chuan an nupaa an lâwm êm êm nachhan pakhat chu heti hian a sawi a ni: “Unau ṭhenkhatin mi dangte bula hun hman dun kan duh phawt chuan an ina kan kal theih thu min hrilh avângin kan lâwm hle a ni,” tiin. Inngaizâwngte’n an bula awm tûra an sâwm che chuan, anmahni ṭanpui theihna hun remchâng angin thlîr ang che. Mahse, an pahnih chauhva a fâla awmtîr lo tûrin fîmkhur la; chutih rualin, an pahnih chauhva an inbiak theihna tûr hun leh hmun ken nachâng hria ang che.—Phil. 2:4.
Inngaizâwng hriat kan neih chuan anmahni ṭanpui theih dân kawng kan zawng thei (Paragraph 14-15-na en rawh)
15. Inngaizâwngte chu eng kawng dangin nge kan ṭanpui theih? (Thufingte 12:18)
15 Kan sawi tûrte leh sawi loh tûrte thliar thiamin inngaizâwngte chu kan ṭanpui thei bawk a. Insûm theihna kan neih a ngaih châng pawh a awm thei a ni. (Thufingte 12:18 chhiar rawh.) Entîr nân, an inngaihzâwnna chungchâng chu mite hnêna hrilh kan châk hle thei a; mahse, anmahni ngeiin mi dangte hrilh chu an duh thei a ni. Anni chu kan rêlin an mi mal thil chungchângah kan sawisêl tûr a ni lo. (Thuf. 20:19; Rom 14:10; 1 Thes. 4:11) Chu bâkah, innei tûra nawr luih nia inhriatna neihtîr thei thute sawi emaw, zawhnate zawh emaw chu kan pumpelh tûr a ni. Unaunu Elise-i te nupa chuan: “Inneih chungchâng kan sawi dun hma pawha mite’n min zâwt fo ṭhîn chu hrehawm kan ti thei hle,” tiin an sawi a ni.
16. Inngaizâwngte an inṭhen hian engtin nge kan lo chhân lêt ang?
16 Inngaizâwngte an inṭhen a nih chuan engtin nge ni ang? Lo dîlchhût chiam emaw, ṭan lam lo neih emaw chu kan pumpelh tûr a ni. (1 Pet. 4:15) Unaunu Lea-i chuan: “Unaupa pakhat nên kan inngaihzâwnna kan tihtâwp hnuah mite’n rin thua thil an lo sawi tih ka hriat chuan ka rilru a na lutuk,” tiin a sawi. A tîra kan sawi tawh angin, inngaizâwngte an inṭhen hian an hlawhchham tihna a ni lo. Inngaihzâwnnain a tum chu inngaizâwngte’n thu tlûkna fing an siam hi a ni. Chutih rualin, inṭhenna chuan rilru na leh mal nia inhriatna a neihtîr thei a. Chuvângin, anmahni ṭanpui theih dân kawng kan zawng thei a ni.—Thuf. 17:17.
17. Inngaizâwngte chuan eng nge an tih zawm zêl ang?
17 Kan sawiho tâk angin inngaihzâwnnaah chuan harsatnate awm thei mah se, thil hlimawm tak a ni thei a. Jessica-i chuan: “Dik tak chuan, inngaihzâwn chhûng hian tih tûr a tam hle a. Mahse, inhre chiang lehzual tûra hun leh thate kan hman avângin ka lâwm hle,” tiin a sawi a ni. Ngaihzâwng i nei a nih chuan, inhre chiang lehzual tûrin hma la zawm zêl ang che u. Chutianga in tih chuan, inngaihzâwnna hlawhtling tak—thu tlûkna fing siam tûra ṭanpuitu che u—chu in nei thei ang.
HLA 49 Jehova Thinlung Tilâwm Rawh
a Hming ṭhenkhat chu thlâk a ni.
b Serh inkhawihsak chu nungchang bawlhhlawhna chi khat a nih avângin, kohhran upate’n judicial committee an din a ngai a. Dinhmun azirin, hnute inkhawihsak leh SMS emaw, phone emaw hmanga inbiakna thianghlim lote chu judicial committee hmanga chinfel a ngai thei bawk.
