ZIR TUR THUZIAK 21
HLA 107 Entawn Tûr Pathian Hmangaihna
Kawppui Tûr Awm Zawn Hmuh Dân
“Hmeichhe khawsak ṭha tu nge hmu thei ang? A man chu lunghlu ṭha mi aiin a sâng zâwk daih si a.”—THUF. 31:10.
A TUM BER
Tu emawin kawppui tûr âwm a zawn hmuh theih dân leh kohhrana mi dangte’n nupui emaw, pasal emaw neih duh kawppui la nei lote an ṭanpui theih dân târ langtu Bible thu bulte sawiho.
1-2. (a) Kristiante’n ngaihzâwng an neih hmain eng thilte nge ngun taka an ngaihtuah hmasak ang? (b) “Inngaihzâwnna,” tih awmzia chu eng nge ni? (“Ṭawngkam Hrilhfiahna,” tih chu en rawh.)
NUPUI pasal neih i duh em? Hlimna nei tûrin inneihna chu thil pawimawh ber ni lo mah se, kawppui la nei lo Kristian tam tak chuan kawppui tûr an neih hun an nghâkhlel hle a. Chutih rualin, inngaihzâwnna lam i ngaihtuah hmain inneihna atâna sum leh pai, thlarau lam leh, rilru lamah i inpeih phawt a ngai a. a (1 Kor. 7:36) Chutiang a nih chuan inneihna hlawhtling tak i nei thei dâwn a ni.
2 Mahse, kawppui tûr zawn hmuh chu a awlsam reng lo. (Thuf. 31:10) I mi ngainat zâwng i hmu a nih pawhin, inngaihzâwn chu thil awlsam a ni lo thei a. b He thuziakah hian, kawppui la nei lo Kristiante tâna kawppui tûr âwm zawng hmu thei tûr leh an inngaihzâwn chhoh theih nâna ṭanpui theitu sawiho a ni ang a, kohhrana mi dangte’n chûng nupui pasal neih duhte an ṭanpui theih dân kan sawiho bawk ang.
KAWPPUI TUR AWM ZAWN HMUH THEIH DAN
3. Kawppui la nei lo Kristianin kawppui tûr a zawn hunah eng thilte nge a ngaihtuah ang?
3 Nupui pasal neih i duh chuan ngaihzâwng tûr i zawn ṭan hmain, i kawppui tûrin nei se tih i duh miziate i hriat phawt a ngai a. Chutiang a nih loh chuan, kawppui tûr atâna ṭha chu i hmuh hmaih theiin, i mil zâwng ni lo tu emaw chu i ngaizâwng ṭan thei a ni. I kawppui tûr chu baptisma chang tawh Kristian a ni tûr a ni ngei mai. (1 Kor. 7:39) Mahse, baptisma chang tawh an nih avâng maiin kawppui tûr atâna ṭha an ni kher lo. Chuvângin, heti hian i inzâwt thei a ni: ‘Nuna ka thiltumte chu eng nge ni? Ka kawppui tûrin nei tûra ka duh miziate chu eng nge ni? Thil inâwm tak ka beisei em?’ tiin.
4. Mi ṭhenkhatin ṭawngṭainaah engte nge an dîl?
4 Nupui emaw, pasal emaw neih i duh chuan, kawppui tûr i zawn hmuh theih nân i ṭawngṭai tawh ngei ang a. (Phil. 4:6) Jehova chuan nupui emaw, pasal emaw min pêk a tiam lo. Mahse, i mamawhte leh i rilru vei zâwngte chu a ngaihvenin, kawppui tûr zawnna kawngah a ṭanpui thei che a. Chuvângin, i duh zâwngte leh i rilru awm dânte chu hrilh chhunzawm zêl la. (Sâm 62:8) Dawhtheihna leh finna pe tûr chein ṭawngṭai ang che. (Jak. 1:5) United States-a awm kawppui nei lo unaupa John-a c chuan ṭawngṭainaa a thil dîlte chu heti hian a sawi a ni: “Ka kawppui tûrin nei tûra ka duh miziate chu Jehova hnênah ka hrilh a. Kawppui tûr âwm ṭha hmuh theihna hun remchâng min pe tûrin ka dîl a ni. Pasal ṭha tak ni thei tûra ka neih ngai miziate nei chho tûra min ṭanpui tûrin ka dîl bawk,” tiin. Sri Lanka-a unaunu Tanya-i pawhin, “Kawppui tûr âwm ka zawn rualin, Jehova hnênah rinawm tak, a êng zâwnga thil thlîr thei leh, mi hlim thei tak ni thei tûrin ka dîl,” tiin a sawi. Kawppui tûr i zawng hmu mai lo a nih pawhin, Jehova chuan i tisa lam leh rilru lam mamawhte ngaihsak zêl tûrin a tiam che a ni.—Sâm 55:22.
5. Kawppui nei lo Kristiante chuan Jehova hmangaihtu tu emaw tawng tûrin eng hun remchângte nge an neih? (1 Korinth 15:58) (Milem en bawk rawh.)
5 Bible chuan “Lalpa hna ṭhahnemngai taka thawk” tûrin min fuih a. (1 Korinth 15:58 chhiar rawh.) Jehova rawngbâwlnaa buai rengin, unau chi hrang hrangte nêna hun i hman chuan, nangmah tichaktu ṭhiante i neih rualin nangmah ang bawka Jehova rawngbâwlna ngaihven tlattu kawppui nei lote tawn theihna hun remchâng i nei thei a ni. Jehova tilâwm tûra theih tâwp i chhuah chuan, hlimna dik tak i hmu ang.
Jehova rawngbâwlnaa buaiin unau chi hrang hrangte nêna hun i hman chuan kawppui tûr zawng mêk mi dangte chu i tawng thei (Paragraph 5-na en rawh)
6. Kawppui nei lo Kristiante’n kawppui tûr an zawn laiin eng nge an hriat reng ang?
6 Mahse, kawppui tûr zawn chu i nuna thil pawimawh ber nihtîr loh tum ang che. (Phil. 1:10, 11) Hlimna dik tak chu nupui pasal i neih leh neih lovah ni lovin, Jehova nêna in inlaichînnaah a innghat a ni. (Mt. 5:3) Chu bâkah, kawppui i neih loh avângin rawngbâwlna zauh theihna hun remchâng i nei thei a. (1 Kor. 7:32, 33) Chu hun chu a ṭha thei ang berin hmang ang che. Kum 40 hnaih lama pasal nei United States-a awm unaunu Jessica-i chuan, “Rawngbâwlnaah ka buai reng a, chu chuan pasal ka neih hma pawhin lungawina nei tûrin min ṭanpui a ni,” tiin a sawi.
INHRIAT CHIAN NAN HUN PE RAWH
7. Engvângin nge tu emaw ngaihvenna lantîr hmaa amah hriat chian nâna hun pêk chu a finthlâk? (Thufingte 13:16)
7 Tu emaw chu kawppui tûr atâna ṭha nia i hria a nih chuan engtin nge ni ang? Ngaihvenna i lantîr nghâl mai tûr a ni em? Bible-in mi fing chuan a hriat chian hnuah chauh thil a ti ṭhîn tih a sawi a. (Thufingte 13:16 chhiar rawh.) Chuvângin, tu emaw chunga ngaihvenna i lantîr hmain amah hre chiang tûrin hun eng emawti chhûng ṭan i lâk phawt a ṭha ang. Netherlands rama Aschwin-a chuan, “Inveina chu awlsam têa lo awmin awlsam têin a bo leh thei. Chuvângin, tu emaw hre chiang tûra hun i pêk chuan, rilru vei zâwng ṭanchhanin i ngaizâwng mai lo vang,” tiin a sawi. Chu bâkah, amah i hriat chian hnu chuan i kawppui âwm mi a ni lo tih i hre mai thei bawk a ni.
8. Engtin nge inhre chiang tûra hma kan lâk theih? (Milem en bawk rawh.)
8 Engtin nge tu emaw hre chiang tûrin fing taka hma i lâk theih? Kohhran inkhâwmna leh inkawmhonate aṭangin a thlarau lam, a mizia leh, a chetziate chu i hre thei a ni. Tute nge a kawm a, eng chungchângte nge a sawi ṭhin? (Lk. 6:45) Thiltum thuhmun in nei em? An kohhrana upate leh amah hre chiangtu thlarau lama mi puitlingte chu i be thei a. (Thuf. 20:18) An hnênah chuan a chungchâng leh a miziate i zâwt thei a ni. (Rut. 2:11) Amah hre chiang tûra ṭan i lâk rualin, awm nuam lova siam lo tûrin fîmkhur la, a rilru vei zâwng leh a mi mal thilte chu zahsak ang che.
Tu emaw chu i ngaihvenzia i hriattîr hmain, hun eng emawti chhûng amah hre chiang tûrin hma la ang che (Paragraph 7-8-na en rawh)
9. Tu emaw chunga ngaihvenna i lantîr hmain, eng thil nge i hriat chian phawt ngai?
9 Tu emaw chunga ngaihvenna i lantîr hmain engtia rei nge amah hre chiang tûra hun i pêk ang? Ngaihvenna i lantîr hma lutuk a nih chuan, ngaihtuah chiang lova hma la angin a ngai thei che a. (Thuf. 29:20) Kawng leh lamah chuan, hun i la rei lutuk a nih chuan rilru nghet tak pu lo angin i lang thei a, a bîk takin amah i ngaihven tih a hriat hian a ni lehzual a ni. (Thur. 11:4) Chutih rualin, tu emaw chunga ngaihvenna i lantîr hmain amah chu i nei ngei ang tihna ani lo tih hre reng ang che. Mahse, innei tûrin i inpeih tawh tih leh ani chu i kawppui âwm mi a ni tih chian ang che.
10. I chunga ngaihvenna lantîrtu rilru put hmang ang i pu ve lo a nih chuan eng nge i tih ang?
10 Mahse, tu emawin a ngaihven che tih hre ta la, engtin nge ni ang? A rilru put hmang ang i pu ve lo a nih chuan, i thiltih hmangin chiang takin lantîr ang che. Ani chu inlaichînna siampui i duh lo a nih chuan beiseina nei tûr zâwngin thil ti suh.—1 Kor. 10:24; Eph. 4:25.
11. Inngaizâwng tûr emaw, innei tûrte emaw tân ruahmanna i siam dâwn a nih chuan eng thilte nge ngun taka i ngaihtuah ngai?
11 Ram ṭhenkhatah chuan nu leh pate emaw, puitling dang tu emaw ber chu kawppui nei lo an chhûngte tân kawppui tûr zawnsak tûra beisei an ni thei a. Ram dang lehah chuan an chhûngte, a nih loh leh an ṭhiante’n an kawppui tûrte chu zawnsakin an induh dâwn leh dâwn loh hriat nâna inhmu tûrin ruahmanna an siamsak ṭhîn bawk. Chutianga ti tûra beisei i nih chuan an pahnih duh dân leh mamawhte chu ngaihtuah ang che. A tâna kawppui tûr âwm mi i hmu a nih chuan, a miziate leh a bîk takin a thlarau lam dinhmunte chu a tam thei ang bera hriat tum ang che. Jehova nêna inlaichînna neih chu sum te, zirna te leh, khawtlânga nihnate aiin a pawimawh zâwk a ni. Chutih rualin, anmahni ngeiin an inneih dâwn leh dâwn loh chungchângah thu tlûkna an siam tûr a ni tih hre reng ang che.—Gal. 6:5.
INNGAIHZAWN ṬAN DAN
12. Tu emaw chu ngaihzâwng atâna i duh a nih chuan, engtin nge i hriattîr theih?
12 Tu emaw chu ngaihzâwng atân i duh a nih chuan, engtin nge amah i ngaihven tih i hriattîr theih? d Amah nêna vântlâng hmuna inhmu tûrin ruahmanna i siam thei a, a nih loh leh phone hmangin i be thei a ni. I rilru put hmang chu tlang takin hrilh ang che. (1 Kor. 14:9) A ṭûl chuan inngaihtuah nân hun pe la. (Thuf. 15:28) Inlaichînna neihpui che a duh lo a nih chuan a duh dân chu zahsak ang che.
13. Tu emawin a ngaihven che tih a hrilh che chuan eng nge i tih theih? (Kolossa 4:6)
13 Tu emawin a ngaihven che tih hrilh ta che se la, engtin nge ni ang? Chutianga ti tûr chuan huaisenna a neih a ngai ngei ang; chuvângin, ngilnei tak leh zahthiam takin chhâng lêt ang che. (Kolossa 4:6 chhiar rawh.) Inngaihtuah nân hun i mamawh a nih chuan ani chu hrilh la; mahse, a rang thei ang bera chhânna pêk tum ang che. (Thuf. 13:12) I ngaizâwng thei lo a nih chuan ngilnei tak leh tlang takin hriattîr ang che. Austria rama unau Hans-a’n unaunu pakhatin a ngaihvenzia a lantîr hnua a chhân lêt dân hi lo chhinchhiah ang che. “Ka rilru put hmang chu fing thiam tak leh fiah takin ka hrilh a, beiseina der pêk ka duh loh avângin ka hrilh nghâl vat a. Chumi hnu aṭang chuan amah ka biak dânah ka fîmkhur ta hle a ni,” tiin a sawi. Kawng lehlamah chuan, inlaichînna neihpui i duh chuan i rilru put hmang chu hrilh la, a lak aṭanga i beiseite chu sawipui ang che. Hnam dân emaw, thil dang emaw avângin in thil beiseite chu a inang lo thei a ni.
ENGTIN NGE MI DANGTE’N KAWPPUI NEI LO KRISTIANTE CHU AN ṬANPUI THEIH?
14. Engtin nge kawppui nei lo Kristiante chu kan thusawi hmanga kan ṭanpui theih?
14 Engtin nge nupui pasal neih duh Kristiante chu kan zavaia kan ṭanpui theih? Kawng khatah chuan fîmkhur taka thu sawina hmangin a ni. (Eph. 4:29) Heti hian kan inzâwt thei a ni: ‘Nupui pasal neih duh kristiante chu ka fiam ṭhîn em? Nupui pasal la nei lo inbia ka hmuh hian, an inngaizâwng niin ka ngai nghâl mai em?’ tiin. (1 Tim. 5:13) Chu bâkah, kawppui nei lo Kristiante chu nupui pasal an la neih loh avâng maiin kim lo nia inhriatna nei tûrin kan siam tûr a ni lo. Kan târ lan tâk Hans-a chuan: “Unau ṭhenkhat chuan, ‘Engvângin nge nupui i la neih loh? I naupang lutuk tawh si lo,’ tiin min zâwt ṭhîn a. Chûng thute chuan kawppui nei lote chu ngaihhlut loh nia inngaihna a neihtîr bâkah, nupui pasal nei tûra nawrluih nia inhriatna a neihtîr lehzual ṭhîn,” tiin a sawi. Kawppui nei lo Kristiante fak theihna hun remchâng zawn chu a va ṭha zâwk dâwn êm!—1 Thes. 5:11.
15. (a) Rom 15:2-a târ lan thu bul ṭanchhanin, tu emaw kawppui tûr kan zawnsak hmain eng nge kan ngaihtuah ang? (Milem en bawk rawh.) (b) He video aṭang hian eng thu pawimawhte nge i zir?
15 Unaute zîngah nupa tûr atâna inâwm tak hre ta la, engtin nge ni ang? Bible chuan mi dangte rilru vei zâwng ngaihtuah tûrin min hrilh a. (Rom 15:2 chhiar rawh.) Kawppui nei lo tam tak chuan kawppui tûr zawnsak an duh lova; chuvângin, an duhna chu kan zahsak a ngai a ni. (2 Thes. 3:11) Mi dangte chuan kan puihna chu an duh mai thei a; mahse, zâwt hmasa lovin kan inrawlh tûr a ni lo. e (Thuf. 3:27) Nupui pasal la nei lo ṭhenkhat chuan tlang taka inhmêlhriattîrna neih chu an duh lo va. Germany rama pasal la nei lo Lydia-i chuan: “Unaute chu inkawmhonaah i sâwm thei a. An pahniha an inbiak theihna hun remchâng siamsak la, a bâk zawng chu an kutah dah rawh,” tiin a sawi a ni.
Inkawmhona chuan kawppui nei lo Kristiante tân inhmuh theihna hun remchâng a siam (Paragraph 15-na en rawh)
16. Kawppui nei lo Kristiante chuan eng nge an hriat reng ang?
16 Kawppui nei kan ni emaw, ni lo emaw kan zavai hian nun hlimawm tak leh lungawithlâk tak kan nei thei a! (Sâm 128:1) Chuvângin, kawppui tûr âwm mi i la hmu lo a nih pawhin, Jehova rawngbâwlna chu ngaihven chhunzawm zêl ang che. Macao-a awm unaunu Sin Yi-i chuan: “I kawppui nêna Paradis-a hun in hman dun zât tûr nêna khaikhin chuan khawppui nei lova i awm chhûng hi hun tawi tê mai a ni a, chu hun chu nuam tak leh awmze nei takin hmang ang che,” tiin a sawi. Mahse, i kawppui tûr âwm mi i hmu tawh a, in inngaizâwng a nih chuan engtin nge ni ang? A dawta thuziakah inngaihzâwnna hlawhtling tak neih theih dân sawiho a ni ang.
HLA 137 Hmeichhe Rinawm Kristian Unaunute
a Nupui pasal nei tûra i inpeih leh peih loh i hriat theih nân, jw.org-a “Inngaihzâwnna—Ṭhen 1: Ngaihzâwng Nei Tûrin Ka Inpeih Tawh Em?” tih thuziak chu en ang che.
b ṬAWNGKAM HRILHFIAHNA: He thuziak leh a dawta thuziakah, “inngaihzâwnna” tih ṭawngkam chuan mipa leh hmeihchhiate’n innei tûra an inmil dâwn leh dâwn loh hriat nâna an hun hmante chu a kâwk a. Ram ṭhenkhatah chuan ‘dating,’ a nih loh leh inzir chianna hun tiin an ko bawk. Chu hun chu mipa leh hmeichhiate’n an induh tawn tih an inhriattîr aṭanga inṭanin, innei tûra thu tlûkna an siam hun, a nih loh leh inngaihzâwnna an tihtâwp hun thleng a awh a ni.
c Hming ṭhenkhat chu thlâk a ni.
d Hnam dân ṭhenkhatah chuan, unaupate’n unaunute chungah ngaihvenna an lantîr hmasa ṭhîn a; mahse, unaunute pawhin ngaihvenna an lantîr hmasa thei a ni. (Rut. 3:1-13) Hriat belh nân, October 22, 2004 chhuak Awake! magazine-a “Young People Ask . . . How Can I Tell Him How I Feel?” tih thuziak chu en ang che.
e Kan website jw.org-a Rinna Atâna Hlawhtling Taka Beitute—Kawppui Nei Lo Kristiante tih video chu en rawh.
