ZIR TUR THUZIAK 19
HLA 22 Lalram Din A Ni Ta —Lo Thleng Rawh Se!
Nakin Huna Jehova Rorêl Dân Tûr Chungchângah Eng Nge Kan Hriat?
‘Jehova chuan tu ma boral a duh lo.’ —2 PET. 3:9.
A TUM BER
Jehova chuan fel tak leh dik takin ro a rêl ang tih kan chiang thei.
1. Engvângin nge hun phûrawm takah kan awm tia kan sawi theih?
HUN phûrawm takah kan awm a! Bible hrilh lâwk thlen famkimna chu nî tin hian kan hmu thei a ni. Entîr nân, khawvêl thuneihna chan tuma ‘chhim lam lal leh hmâr lam lal’ inbeihna chu kan hmu thei a. (Dan. 11:40) Pathian Lalram chanchin ṭha chu khawvêl pum puiah hrilh mêk a niin, mi maktaduai tam takin Pathian rawngbâwl an thlang a. (Is. 60:22; Mt. 24:14) Chu bâkah, ‘a hun takah’ thlarau lam chaw hnianghnâr takin kan dawng bawk a ni.—Mt. 24:45-47.
2. Eng nge kan chian theih a; mahse, eng nge kan hriat ngai?
2 Jehova chuan kan hma lawka thil pawimawh tak lo thleng tûrte chungchâng chu chiang lehzuala hre thiam tûrin min ṭanpui chhunzawm zêl a. (Thuf. 4:18; Dan. 2:28) Hrehawm nasa tak a inṭan hunah chuan, rinawm taka tuar chhuak tûr leh inpumkhata awm tlat tûrin kan mamawh kaihhruainate chu kan dawng ang tih kan chiang thei a ni. Chutih rualin, lo thleng mai tûr thil ṭhenkhat kan hriat loh a awm tih kan hriat a ngai a. He thuziakah hian chûng thilthleng pawimawhte chungchânga tûn hmaa hrilhfiahna siamrem a nih chhan kan sawiho hmasa ang a. Tichuan, nakin hun chungchânga kan hriat thil ṭhenkhatte leh kan Pa vâna mi thil tih dân tûrte chu kan enho bawk ang.
KAN HRIAT LOHTE
3. Jehova’n mite chu kan zînga an lo tel theihna a khârsak hun tûr chungchângah eng nge kan lo sawi a, engvângin nge chutianga thu tâwp kan siam?
3 Tûn hma chuan hrehawm nasa tak a inṭan veleh, ring lotu mi tu mahin Jehova ringa Armageddona dam khawchhuak tûrin hun remchâng an nei tawh lo vang tiin kan lo sawi ṭhîn a. Chutianga thu tâwp kan siam chhan chu Tuilêt chanchin kha entîr nei hrilh lâwkna nia kan hriatthiam vâng a ni. Entîr nân, Jehova’n Tuilêt hma lawka lawng kawngkhâr a khâr angin, hrehawm nasa tak inṭan veleh ani chuan “kawng a khâr” ang a, Setana khawvêla mite chu chhandam an ni thei tawh lo vang tiin kan lo ngai ṭhîn a ni.—Mt. 24:37-39.
4. Tûnah chuan Tuilêt chanchin chu entîr nei hrilh lâwkna angin kan thlîr em? Hrilhfiah rawh.
4 Tuilêt chanchin chu entîr nei hrilh lâwkna niin kan ngai tûr a ni em? Ni lo ve. Engvângin nge? A chhan chu Bible-ah chutianga chiang taka sawina a awm loh vâng a ni. Isua chuan a lo kal lehna chu “Nova dam lai” nên a khaikhin ngei mai; mahse, Tuilêt chu entîr nei hrilh lâwkna a nih thu emaw, lawng kawngkhâr khâr a nihna chuan entîrna pawimawh tak a neih thu emaw a sawi lo va. Chutih rualin, Nova leh Tuilêt chanchin aṭangin zir tûr kan nei lo tihna erawh a ni lo.
5. (a) Tuilêt hmain Nova’n eng nge a tih? (Hebrai 11:7; 1 Petera 3:20) (b) Thu hrilhna nêna inkûngkaihin, engtin nge tûn laia kan dinhmun chu Nova dam lai nên a inan?
5 Nova chuan Jehova vaukhânna thuchah a hriat chuan lawng tukin rinna a neihzia a târ lang a. (Hebrai 11:7; 1 Petera 3:20 chhiar rawh.) Chutiang bawkin, Pathian Lalram chanchin ṭha hretute chuan an rinzia thiltiha an lantîr a ngai a ni. (Tirh. 3:17-20) Petera chuan Nova chu “felna thu hriltu,” tiin a ko va. (2 Pet. 2:5) Mahse, thuziak hmasaa kan sawiho tâk angin, Tuilêt hmain Nova chuan leia mi zawng zawng hnêna thu a hrilh chhuah leh chhuah loh kan hre lo a ni. Tûn laiah pawh, khawvêl puma mi zawng zawng hnêna thu hril tûrin ṭhahnem kan ngai hle a. Chuti chung pawhin, tâwpna thlen hmain mi zawng zawng hnênah thu kan hril chhuak hman lo vang. Engvângin nge?
6-7. Engvângin nge tâwpna thlen hmain khawvêla mi tinte hnênah chanchin ṭha kan hrilh thei lo vang tia thu tâwp kan siam theih? Hrilhfiah rawh.
6 Kan thu hrilhnain a huam zau dân tûr chungchânga Isua sawi kha han ngaihtuah teh. Chanchin ṭha chu “hnam zawng zawng hriattîrna tûrin khawvêl zawng zawngah” hrilh a ni ang tiin a hrilh lâwk a ni. (Mt. 24:14) Chu hrilh lâwkna chu tûn hma aia nasain a thleng famkim mêk a. Lalram thuchah chu ṭawng 1,000 chuanga tihchhuah a ni tawh a; chu chu kan website jw.org hmangin khawvêla mipui tam zâwk chuan an hmu thei a ni.
7 Mahse, Isua’n a zirtîrte hnênah a lo kal leh hmain “khuate chu [an] fang chhuak” lo vang, a nih loh leh mi tinte hnênah thu an hril chhuak lo vang tih a hrilh a ni. (Mt. 10:23; 25:31-33) Isua thusawite chu kan hun laiah pawh a thleng dik ngei ang. Mi maktaduai tam tak chu nasa taka rawngbâwlna khuahkhirh a nihna hmunahte an awm a. Chu bâkah, minute tin hian nau piang tam tak an awm bawk a ni. Chuvângin, chanchin ṭha chu “hnam tinrêng te, chi tinrêng te, ṭawng tinrêng te” hnêna thlen tûrin theih tâwp kan chhuah a. (Thup. 14:6) Mahse, thu dik chu tâwpna thlen hmain khawvêla mi zawng zawng hnênah chanchin ṭha kan hrilh thei lo vang tih hi a ni.
8. Nakin huna Jehova rorêl dân tûr chungchângah eng zawhnate nge kan neih mai theih? (Milem en bawk rawh.)
8 Hêng zawhnate hi a lo chhuak a ni: Hrehawm nasa tak inṭan hmaa chanchin ṭha hriatna hun remchâng nei lote hi engtin nge ni ang? Engtin nge Jehova leh rorêl tûra a ruat a Fapa chuan an chungah ro an rêl ang? (Joh. 5:19, 22, 27; Tirh. 17:31) He thuziak ṭanchhan Bible chângin a sawi angin, Jehova chuan “tu ma boral” a duh lo va. “Mi zawng zawng lo sim” a duh zâwk a ni. (2 Pet. 3:9; 1 Tim. 2:4) Chutiang chu ni mah se, Jehova’n chanchin ṭha la hre lote chunga ro a rêl dân tûr chu min la hriattîr lo tih kan hriat a ngai a. Mahse, ani chuan a thil tih tawhte leh a la tih tûrte chu min hriattîr tûrin mawhphurhna a nei lo.
Engtin nge Jehova’n hrehawm nasa tak inṭan hmaa chanchin ṭha hriatna hun remchâng nei lote chu ro a rêlsak ang? (Paragraph 8-na en rawh) b
9. Jehova’n Bible hmangin eng nge min hriattîr?
9 Jehova chuan a Thu hmangin a thil tih tûr ṭhenkhat chu min hriattîr a. Entîr nân, Bible chuan chanchin ṭha chhâng lêt a, an nun kawng thlâk danglam tûra hun remchâng la nei lo ‘mi fel lote’ chu Jehova’n a kai tho leh ang tih min hrilh a. (Tirh. 24:15; Lk. 23:42, 43) Chu chuan zawhna pawimawh tak dang a tichhuak a ni.
10. Eng zawhnate nge lo chhuak?
10 Hrehawm nasa tak chhûnga thi zawng zawngte chu thawhleh beiseina nei lova chatuan atâna tihboral an ni ang em? Bible chuan Jehova leh a sipaite’n Armageddon-a an tihboral dodâltute chu an tho leh tawh lo vang tih chiang takin a sawi a. (2 Thes. 1:6-10) Mahse, hrehawm nasa tak chhûng chuan dam lohna te, chêtsualna te leh, mi dangte kut tawrhnate avânga thi lo awm ta se, engtin nge ni ang? (Thur. 9:11; Zak. 14:13) Chûng zînga mi ṭhenkhat chu khawvêl thara tho leh tûr ‘mi fel lote’ zîngah an tel ang em? Chu chu kan hre lo.
KAN HRIATTE
11. Armageddon-ah mite chu eng ṭanchhanin nge rorêlsak an nih ang?
11 Thil lo thleng tûr chungchângah thil ṭhenkhat hriat kan nei a. Entîr nân, Armageddon-ah mite chu Krista unaute an cheibâwl dân ṭanchhanin rorêlsak an ni ang tih kan hria a. (Mt. 25:40) Krista leh hriak thihte an thlâwpzia lantîrtute chu berâm anga rorêlsak an ni ang. Krista unaute zînga ṭhenkhat chu hrehawm nasa tak inṭan hnuah pawh leiah an la awm ang a, Armageddon a inṭan hma lawkin, vânah lâk chhoh an ni ang tih kan hre bawk. Krista unaute leia an la awm chhûng chuan thinlung ṭha pute tân anmahni leh an hnathawhte thlâwp theihna hun remchâng a awm pawh a ni thei a ni. (Mt. 25:31, 32; Thup. 12:17) Engvângin nge chûng chu thil pawimawh tak a nih?
12-13. “Babulon Khaw Ropui” tihchhiat a nihna chu engtin nge mi ṭhenkhatin an chhân lêt mai theih? (Milem en bawk rawh.)
12 Hrehawm nasa tak inṭan hnuah pawh, “Babulon Khaw Ropui” tihchhiatna hmutu mi ṭhenkhat chuan chu thilthleng chu Jehova Thuhretute’n tûn hma aṭangin an lo sawi lâwk tawh tih an hre chhuak thei a. Chûng thilthlengte an hmuh avâng chuan mi ṭhenkhat an inthlâk danglam thei ang em?—Thup. 17:5; Ezek. 33:33.
13 Chutiang thil chu a thleng a nih chuan, Mosia hun laia Aigupta rama thilthleng nên a inang ngei ang. Israel mite Aigupta ram aṭanga an chhuah khân “mipui inpawlhsawp” tam takin an zui ve tih hre chhuak ang che. Chûng zînga mi ṭhenkhat chuan Hri Sâwm chungchânga Mosia vaukhânna a thlen dikzia an hmuh aṭangin Jehova chungah rinna an nei chho pawh a ni thei a. (Ex. 12:38) Chutiang bawkin, Babulon Khaw Ropui tihchhiat a nih hnu, tâwpna thlen hma têa mite kan zîngah an lo tel thei a nih chuan, chu chu thil fel lo niin kan ngai ang em? Ngai lo vang! “Pathian lainatnaa khat, mi khawngaih thei tak, thin nel tak, ngilneihna leh thu tak ngah,” kan Pa vâna mi miziate chu entawn kan duh a ni. a—Ex. 34:6.
“Babulon Khaw Ropui” tihchhiatna hmutu mi ṭhenkhat chuan chu thilthleng chu Jehova Thuhretute’n tûn hma aṭangin an lo sawi lâwk tawh tih an hre chhuak ang (Paragraph 12-13-na en rawh) c
14-15. Tu emaw chatuan hma lam hun chu a thih hun emaw, a awmna hmun emawa innghat a ni em? Hrilhfiah rawh. (Sâm 33:4, 5)
14 A châng chuan mi ṭhenkhatin, “Hrehawm nasa tak inṭan hmain ka chhûngte hi boral ta se a ṭha zâwk ang, thawhleh beiseina an nei thei dâwn si a,” tia an sawi kan hre ṭhîn a. Rilru ṭha tak pua sawi an ni ngei ang. Mahse, tu emaw a chatuan hma lam hun tûr chu a thih huna innghat a ni lo. Jehova chuan Rorêltu ṭha famkim a nih angin, dik tak leh fel takin ro a rêl ang. (Sâm 33:4, 5 chhiar rawh.) Chuvângin, “lei chung zawng zawng Rorêltu” chuan dik takin a ti ang tih kan ring nghet tlat thei a ni.—Gen. 18:25.
15 Tu emaw chatuan hma lam hun tûr chu a awmna hmuna innghat a ni lo tia thu tâwp siam chu thil inâwm tak a ni bawk. Jehova chuan Lalram thuchah chhân lêt theih lohna hmuna chêng mi maktaduai tam tak chu “kêl” angin ro a rêlsak mai lo vang. (Mt. 25:46) Lei chung zawng zawng Rorêltu dik chuan mi tinte chu keini aia nasain a ngaihsak lehzual a ni. Jehova’n hrehawm nasa tak chhûnga thil a thlentîr dân tûr chu kan hre lo va. Hnam zawng zawng hmaa a hming a tihthianghlim hunah chûng mite chuan Jehova chungchâng zirin, amah ringa a lama ṭan theihna hun remchâng an nei pawh a ni thei a ni.—Ezek. 38:16.
Hrehawm nasa tak inṭan hnuah, . . . chûng thilthlengte an hmuh avângin mi ṭhenkhat chu an inthlâk danglam thei ang em?
16. Eng nge Jehova chungchângah kan hriat? (Milem en bawk rawh.)
16 Bible kan zirna aṭangin Jehova’n mihring nunna a ngaihhlutzia kan hria a. Kan vaia chatuana kan nun theihna tûrin a Fapa nunna chu a hlân a ni. (Joh. 3:16) A hmangaihna chu kan zavaiin kan dawng ṭheuh va. (Is. 49:15) Kan hming a hre ṭheuh bawk. Dik tak chuan, mi tinte hi min hriat chian êm avângin lo thi ta pawh ni ila, ani chuan kan mize ngai chiah leh kan hriat rengna zawng zawng min pe lêt lehin nunna min pe thei a ni! (Mt. 10:29-31) Chuvângin, hmangaihna ngah tak kan Pa vâna mi chuan mi tinte chu inbûktâwk tak, dik tak leh, zahngaihna nei takin ro a rêlsak ang tih rin nachhan tûr ṭha tak kan nei a ni.—Jak. 2:13.
Jehova’n mi tinte chu inbûktâwk tak, dik tak leh, zahngaihna nei takin ro a rêlsak ang tih kan ringnghet tlat thei (Paragraph 16-na en rawh)
17. A dawta thuziakah eng nge kan sawiho vang?
17 Chûng hriatthiamna tharte chuan kan thu hrilh rawngbâwlna hmanhmawhthlâkzia a tichiang lehzual a ni. Engvângin nge chutianga kan sawi theih? Engin nge beidawng lova chanchin ṭha chu hril zawm zêl tûra min chêttîr thei? A dawta thuziakah, chûng zawhnate chu chipchiar taka sawiho a ni ang.
HLA 76 Engtin Nge I Awm Ṭhin?
a Babulon Khaw Ropui tihchhiat a nih hnuah, Jehova chhiahhlawh zawng zawngte chu Magog rama Goga beih hun chhûngin fiah an ni ang a. Babulon Khaw Ropui tihchhiat a nih hnua Pathian mite lama ṭang tawh phawt chu fiah an ni bawk ang.
b MILEM HRILHFIAHNA: Hêng milemte hian khawvêl pum huapa kan thu hrilh rawngbâwlna chu mi ṭhenkhatte hnêna a thlen theih loh nachhan tûr a târ lang: (1) Hmeichhe pakhat chu a awmna hmuna sakhaw hruaitute’n thutak zir thei lo tûrin an dâl, (2) nupa tuak khat chu sawrkâr dânin thu hrilh a khapna hmunah an awm, (3) pa pakhat chu tlawh pawh theih lohna hmun pilril takah a awm.
c MILEM HRILHFIAHNA: Thutak chhuahsantu hmeichhe pakhat chuan “Babulon Khaw Ropui” tihchhiatna tûr chungchânga a thu zirte a hre chhuak. Inlamlêtin Thuhretu a nu leh pate hnênah a kîr leh. Chutiang thil a thleng a nih chuan, kan Pa vâna mi zahngaihna leh khawngaihna miziate lantîr leh thil sual ti inlamlêttu chunga lâwmna lantîr chu kan duh a ni.
