Hulda-i’n A Thiltum A Hlen
INDONESIA rama awm, thliarkâr te tak tê Sangir Besar-ah chuan kan unaunu pathum an awm a. Chu thliarkârah chuan an rawngbâwlna—Bible hre thiam tûra mite an ṭanpuina—avânga hriat hlawh an ni a. Mahse, tûn hma chuan hna dang an thawk a ni.
Indonesia hmâr lama Sangir Besar thliarkâr
A hmasain, eng emaw chena hla tui daiin chuta lungte chu tui kamah an la phei ṭhîn a. Lung ṭhenkhat chu ball tiat laia liante a ni. A dawtah, thing ṭhutthlêng têa ṭhuin lungte chu tubohvin rawraah an chhu leh a. Chumi hnuah, lungte chu plastic bâwma dahin kailâwn aṭangin an chênna inah an thiar chho leh ṭhîn a. Tichuan, kawng siam nâna hman atân motor-a hlân kai mai theih tûrin bag lianahte an thun leh ṭhîn.
Hulda-i’n tuipui kama lung a la khâwm
Chûng unaunute zînga pakhat chu Hulda-i a ni. Ani chuan mi dangte aiin hna a thawk rei thei zâwk a. Rim taka a thawh hlawh chu nî tina chhûngkaw mamawhte atân a hmang ṭhîn a. Mahse, tûnah chuan thiltum dang neiin hna a thawk a ni. JW Library® app a hman theih nân tablet lei a tum a. Hulda-i chuan app-a video-te leh thil dangte chuan rawngbâwlnaah leh Bible thute a hriatthiam lehzual theih nân a ṭanpui dâwn tih a hria a ni.
Hulda-i chu truck têin a phurh theih tâwk tûr lung chhuin thla khat leh a chanve chhûng zîng tin dârkâr hnih hna a thawk ṭhîn a. A tâwpah chuan, tablet lei tûra a mamawh tâwk sum chu a nei thei ta a ni.
Hulda-i leh a tablet
Hulda-i chuan, “Lung ka chhut avâng chuan chauvin sil hle mah ila, he tablet hmanga rawngbâwlnaa ṭha lehzuala thu ka hrilh a, Kristian inkhâwmte atân awlsam lehzuala ka inbuatsaih theih tâkah chuan ka taksa nâ leh silte chu ka theihnghilh nghâl mai,” tiin a sawi. Hripui lên chhûng khân a tablet chuan kohhran inkhâwmahte leh rawngbâwlnaahte tel thei tûra a ṭanpui thu a sawi bawk. Hulda-i’n a thiltum a hlen thei hi kan lâwmpui tak zet a ni.
