1-2. (a) Jerusalema kîr leh Judate chuan kan dinhmun ang, eng harsatnate nge an hmachhawn? (“ Hagaia, Zakaria Leh, Ezra Hun Lai,” tih bâwm chu en rawh.)

 NAKIN hun atâna lungkham châng i nei em? Hna i chân avângin i chhûngkaw châwmna tûr i lungkham pawh a ni thei a. Politics lama buaina avângte, tihduhdahna avângte leh, thu hrilhna dodâlna avângtein i chhûngkaw himna atân i lungkham pawh a ni thei bawk. Chûng zînga eng emaw ber chu i hmachhawn em? I hmachhawn a nih chuan, chutiang harsatna an tawh laia Jehova’n hmân lai Israel mite a ṭanpui dân ngaihtuahna chu i hlâwkpui ang.

² Babulona seilian Judate tân an nun nuam tak kalsan a, mi a tam zâwkte hriat ngai loh rama kal tûr chuan rinna an neih a ngai a. An thlen hnu rei vak lovah sum leh pai lama harsatnate, politics lama buainate leh, dodâlnate an tâwk a. Chutiang avâng chuan, mi ṭhenkhat tân Jehova biak in sak ṭhat lehna hna chu ngaihven a harsa a ni. Chuvângin, B.C.E. 520 vêlah anni chu chawk phûr tûrin Jehova’n zâwlnei Hagaia leh Zakaria te chu a tîr a. (Hag. 1:1; Zak. 1:1) Kan la hmuh tûr angin, chûng zâwlneite fuihna chu nasa takin an hlâwkpui a ni. Mahse, kum 50 dâwn a liam hnu chuan, Jerusalema kîr leh Judate chuan tihphûr an mamawh leh a. Chuvângin, Dân ziak chhâwngtu thiam tak Ezra chuan Babulon aṭanga Jerusalema kalin, Pathian mite chu biakna dik ngai pawimawh ber tûrin a fuih a ni.—Ezr. 7:1, 6.

3. Eng zawhnate nge kan sawiho vang? (Thufingte 22:19)

 ³ Hagaia leh Zakaria te hrilh lâwknain hmân laia Pathian mite chu dodâlna kârah pawh Jehova rinchhan tlat tûra a ṭanpui ang bawkin, chûngte chuan tûn laiah pawh nuna harsatnate kan tawh hunah Jehova rinchhan tlat tûrin min ṭanpui thei a. (Thufingte 22:19 chhiar rawh.) Hagaia leh Zakaria te hmanga Pathian thuchah leh Ezra entawn tûr siam kan bih chian rualin, hêng zawhnate chhânna hi kan hmu ang: Nuna harsatnate chuan Juda mi kîr lehte chu engtin nge a nghawng? Harsatnate kan tawh laiin engvângin nge Pathian duh zâwng tih chu kan ngaihven tlat ang? Harsatna kan tawh laiin engtin nge Jehova chu kan rinchhan lehzual theih?

4-5. Biak in sa ṭha leh tûra Juda mite phûrna chu engin nge hlohtîr?

⁴ Juda kîr lehte’n Jerusalem an thlen chuan hnathawh tûr an ngah hle a. Jehova maichâm chu sa ṭha leh vatin biak in lungphûmte an rem a ni. (Ezr. 3:1-3, 10) Mahse, an phûrna chu an hloh ta thuai a. Engvângin nge? Biak in sak bâkah, anmahni chênna tûr in sakte, thlai chînte leh, an chhûngkaw châwmte a ngaih vâng a ni. (Ezr. 2:68, 70) Chu bâkah, biak in sak ṭhatna hna tihtâwp tumtu hmêlmate dodâlna an hmachhawn bawk a ni.—Ezr. 4:1-5.

⁵ Juda kîr lehte chu politics lama buaina leh sum leh pai lama harsatnate’n a nghawng bawk a. An ram chu Persian Empire awpna hnuaiah a awm tawh a. B.C.E. 530-a Persia lal Kura a thih hnu chuan, a lalna changtu Cambyses-a chuan Aigupta chu lâk a tum a. Aigupta panna kawnga Israel ram an paltlang lai chuan a sipaite’n Israel mite hnên aṭangin ei leh in tûr leh awmna tûr hmunte an dîl ngei a rinawm a, chûngte chuan an harsatna chu a belhchhah ngei ang. Cambyses-a thlâktu, Daria I-na lal ṭan tirh chuan helna leh politics lama buaina a chhuak nasa hle a. Chûng dinhmunte chuan Juda kîr lehte chu an chhûngkaw châwm dân tûrah lungkhamna a neihtîr ngei ang. An harsatna tawh zawng zawngte avângin Juda ṭhenkhat chuan Jehova biak in sak ṭhat la hun rih lo tûrah an ngai a ni.—Hag. 1:2.

6. Zakaria 4:6, 7-a târ lan angin, Juda mite’n eng harsatna dang nge an hmachhawn a, Zakaria’n anni chu eng nge a hriat nawntîr?

⁶ Zakaria 4:6, 7 chhiar rawh. Juda mite chuan sum leh paia harsatna leh politics lama buaina te mai bâkah tihduhdahna an tuar bawk a. B.C.E. 522-ah chuan Jehova biak in sak ṭhatna titâwp tûra an hmêlmate thiltum chu a hlawhtling ta a. Mahse, Zakaria’n Juda mite chu Jehova’n a thlarau thiltithei tak hmangin harsatna eng pawh a sut kiansak ang tih a hriatnawntîr a ni. B.C.E. 520-ah Lal Daria chuan biak in sak ṭhatna hna chu a chhunzawmtîr a, Juda mite chu sum leh paia a ṭanpui mai bâkah, rorêltute pawh ṭanpui tûrin thu a pe bawk a ni.—Ezr. 6:1, 6-10.

7. Juda kîr lehte’n Pathian duh zâwng tih an ngaih pawimawh khân eng malsâwmnate nge an dawn?

 ⁷ Hagaia leh Zakaria te hmangin Jehova’n a mite chu biak in sak ṭhatna hna an ngaih pawimawh phawt chuan ṭanpui a tiam a. (Hag. 1:8, 13, 14; Zak. 1:3, 16) Zâwlneite fuihna avâng chuan Juda mite’n biak in sak ṭhatna hna chu B.C.E. 520-ah an chhunzawm leh a,  kum nga a ral hmain an sa zo thei ta a ni. Harsatna kârah pawh Pathian duh zâwng an ngaih pawimawh tlat avângin Jehova ṭanpuina chu tisa lam mai bâkah, thlarau lamah pawh an dawng a. Chuvângin, hlim takin Jehova an be thei a ni.—Ezr. 6:14-16, 22.

8. Engtin nge Hagaia 2:4-a thute chuan Pathian duh zâwng tih chu ngaihven tlat tûra min ṭanpui theih? (Footnote en bawk rawh.)

⁸ Hrehawm nasa tak a hnaih zêl rual hian, thu hrilh rawngbâwlnaa tel tûra thupêk chu zawm a hmanhmawhthlâkzia kan hre chiang lehzual a. (Mk. 13:10) Mahse, sum leh pai lama harsatna kan tawh hunah emaw, thu hrilh rawngbâwlnaa dodâlna kan tawh hunah emaw rawngbâwlna ngaihven tlat chu harsa kan ti thei a ni. Engin nge Lalram dah hmasa tlat tûra min ṭanpui thei? “Sipaihote Lalpa” b chuan min awmpui reng ang tih rin ngheh tlatna a ni. Mahni hamṭhatna tûr aia Lalram kan dah hmasak tlat chuan min ṭanpui ang. Chuvângin, engmah hlauh tûr kan nei lo.—Hagaia 2:4 chhiar rawh.

9-10. Engtin nge nupa tuak khat chuan Matthaia 6:33-a Isua thusawite dikzia an tawn?

⁹ Pioneer nupa Oleg-a leh Irina-i c te thiltawn hi lo ngaihtuah ta ila. Hmun danga kohhran pakhat ṭanpui tûra an insawn hnuah, an ram sum leh pai dinhmun a tlâkchhiat avângin an ei zawnna an chân a. Hnathawh tûr mumal nei lovin kum khat dâwn lai awm mah se, Jehova ṭanpuina dawng reng nia an inhriat bâkah, unaute ṭanpuina dawn châng an nei bawk. Engtin nge an harsatna tawh chu an hmachhawn? A tîra lunghnual taka awm Oleg-a chuan,  “Rawngbâwlnaa buai rengna chuan kan nuna thil pawimawh ber chu ngaihven tlat tûrin min ṭanpui a ni,” tiin a sawi. An nupaa hnathawh tûr zawng pahin rawngbâwlnaah an buai reng a ni.

¹⁰ Ni khat chu, rawngbâwlna aṭanga an haw chuan an ṭhian ṭha tak pakhatin kilometer 160 (mêl 100-a) hla aṭanga lo zinin ei tûr ip hnih a rawn pe tih an ṭhenawmte hnên aṭangin an hria a. Oleg-a chuan: “Chumi nî chuan, Jehova leh kohhranin min ngaihsakzia a takin kan tawng leh a. Beisei tûr nei lo angin an dinhmun chu lang mah se, Jehova’n a chhiahhlawhte chu engtikah mah a theihnghilh ngai lo tih kan ring nghet tlat a ni,” tiin a sawi.—Mt. 6:33.

11. Pathian duh zâwng tih kan ngaihven tlat chuan eng nge kan beisei theih?

¹¹ Jehova chuan zirtîra siama nun chhanhimna hna hi ngaihven tlat tûrin min duh a.  Paragraph 7-naa târ lan tâk angin, Hagaia chuan Pathian mite chu biak in lungphûmte rem nawn leh ang maiin an rawngbâwlna thianghlim chu tithar leh tûrin a fuih a. Chutianga an tih chuan, Jehova’n ‘malsâwm’ a tiam a ni. (Hag. 2:18, 19) Keini pawhin Jehova hna min pêk kan ngaih pawimawh tlat chuan theih tâwp kan chhuahna chu mal a sâwm ang tih kan ring nghet tlat thei a ni.

12. Ezra leh sal tâng kîr lehte chuan engvângin nge rinna chak tak an mamawh?

¹² B.C.E. 468-ah, Ezra chu Juda mi Babulon aṭanga Jerusalema a ṭum hnihnaa kîr lehte rualin a kal ve a. Chu zin kawng zawh tûr chuan Ezra leh a zinpuite chuan rinna nghet tak an neih a ngai a ni. Biak in atâna hlan rangkachak leh tangkaraw tam tak kengin kawng hlauhawm takah te an zin dâwn si a. An bungraw phurhte avâng chuan suamhmangte beih châkawm tak dinhmunah an awm a ni. (Ezr. 7:12-16; 8:31) Chu bâkah, Jerusalem pawh a him lo tih an hre ta thuai a. Chuta chêngte chu an tlêm hle a, kulh bangte leh kulh kawngkhârte chu siam ṭhat a ngai bawk a ni. Ezra hnên aṭangin Jehova chunga rinna tihngheh chungchângah eng nge kan zir theih?

13. Engtin nge Ezra’n Jehova chunga a rinna chu a tihngheh? (Footnote en bawk rawh.)

¹³ Jehova’n a mite fiahna kâra a ṭanpui dân Ezra’n a hmu. B.C.E. 484-a Lal Ahasuera’n Persia awpna hnuaia awm Juda mi zawng zawngte tihlum tûra thupêk a chhuah khân Ezra chu Babulonah a awm niin a lang. (Est. 3:7, 13-15) Ezra nun chu dinhmun hlauhawm takah a awm! Lal thupêk a thlenna “ram tawh phawt maiah chuan” Judate chuan lungngai tak leh chaw nghei chungin Jehova hnênah ṭanpuina an dîl a. (Est. 4:3) Judate nuai chimih tumtute zâwk tihboral an nih laia Ezra leh Juda mite awm dân tûr chu han mitthla teh! (Est. 9:1, 2) Chûng hun khirh taktea Ezra thiltawn chuan nakina fiahna a tawh tûrte atân buatsaihin, Jehova’n a mite chu a vênghim thei tih a rinna chu a tinghet lehzual ngei ang. d

14. Hun harsa tak kâra Jehova ngaihsakna a dawnna aṭangin unaunu pakhatin eng nge a zir?

¹⁴ Hun harsa tak kâra Jehova ngaihsakna kan dawn hian amah kan rinna chu a nghet lehzual a. Europe khawchhak lama chêng Anastasia-i thiltawn hi lo ngaihtuah ta ila. Ani chuan tualdawihna a vawn theih nân a hna a bânsan a. “Tûn hmain khatianga pawisa hman tûr nei lo khân ka la awm ngai lo. Mahse, ka dinhmun chu Jehova kutah ka nghat a,  min enkawl dân ka hmu a ni. Hna nei lovin awm leh pawh ni ila, ka hlau lo. Ka Pa vâna miin vawiina min ngaihsak chuan naktûkah pawh min ngaihsak ang,” tiin a sawi a ni.

15. Engin nge Ezra chu Jehova chunga rinna vawng tûra ṭanpui? (Ezra 7:27, 28)

¹⁵ Ezra’n a nuna Jehova khawngaihna a dawnte chu a hria. Tûn hmaa Jehova ṭanpuina a dawnte ngaihtuah lêtna chuan A chunga a rinna vawng tûrin Ezra a ṭanpui ang tih rinhlelh rual a ni lo. “Lalpa ka Pathianin mi khawngaih a,” tia a sawi hi chhinchhiah ang che. (Ezra 7:27, 28 chhiar rawh.) Ezra chuan a hming chuanna buah chutiang ṭawngkam chu vawi ruk lai a hmang a ni.—Ezr. 8:18, 31; 9:8, 9.

16. Eng dinhmunahte nge Jehova’n min ṭanpui tak zet tih kan hriat theih? (Milem en bawk rawh.)

¹⁶ Dinhmun harsa tak kan tawh hunah Jehova’n min ṭanpui thei a. Entîr nân, kan hnathawhna pu hnêna inkhâwmpuia kan tel theih nâna chawlh kan dîl hunah emaw, kohhran inkhâwmtea kan tel theih nâna hnathawh hunduan siamrem kan dîl hunah emaw hian kan nuna Jehova ṭanpuina hmu tûrin hun remchâng kan insiam a ni. Kan beisei aia ṭhain dinhmunte chu a lo inherchhuak thei a. Chutiang hunah chuan, Jehova chunga kan rinna chu a nghet lehzual a ni.

17. Engtin nge Ezra’n dinhmun harsa tak a tawh laiin inngaihtlâwmna a lantîr? (A kâwma milem en rawh.)

¹⁷ Ezra’n inngaitlâwm takin Jehova ṭanpuina a dîl. A mawhphurhna dawnte avânga rilru hahna a neih apiangin, Ezra chu Jehova hnênah inngaitlâwm takin a ṭawngṭai ṭhîn a. (Ezr. 8:21-23; 9:3-5) A rilru put hmang chuan mi dangte chu amah ṭanpui tûr leh a rinna entawn tûrin a chêttîr a ni. (Ezr. 10:1-4) Kan tisa lam mamawhte leh kan chhûngkaw himna atâna lungkhamna kan neih hunah, Jehova chungah rinna nghet tak neiin kan ṭawngṭai tûr a ni.

18. Engin nge Jehova rinchhan lehzual tûra min ṭanpui thei?

¹⁸ Inngaitlâwm taka Jehova ṭanpuina kan dîl a, unaute ṭanpuina kan pawm hian, Pathian chunga kan rinna chu a nghet lehzual a. Fa pathum nei Erika-i chuan chhiatna râpthlâk tak a tawh hunah pawh Jehova a rinna chu a vawng tlat a ni. Hun rei lo te chhûngin an fa la piang lo leh a pasal hmangaih tak chu a chân a. Hun kal tawh chu thlîr lêtin ani chuan: “Jehova’n min ṭanpui dân tûr chu kan hre lâwk thei lo va. Ṭanpuina chu kan beisei loh dân kawngin kan dawng thei a ni. Ka ṭawngṭaina tam tak chu ka ṭhiante thusawite leh thiltihte hmanga chhân ka ni tih ka hria a. An hnêna ka rilrua awmte ka hrilh hian, an tân min ṭanpui a awlsam lehzual a ni,” tiin a sawi.

19-20. Jerusalema kîr ve lo Juda mite hnên aṭangin eng nge kan zir theih?

¹⁹ Jerusalema kîr thei lo Judate hnên aṭang pawhin thil hlu tak zir tûr kan nei a. An zînga  ṭhenkhat chu kum upatna avângte, dam lohna avângte leh, chhûngkaw dinhmun avângtein an kîr thei lo a nih a rinawm. Chuti chung chuan, anni chuan a kîr leh tûrte chu biak in sakna atâna an mamawh tûr thilte phal taka pein an ṭanpui a ni. (Ezr. 1:5, 6) Jerusalema kîr hmasa berte an thlen hnu kum 19 chhûng vêl chu Babulona la châmbângte chuan Jerusalemah thawhlâwmte an la thawn reng niin a lang.—Zak. 6:10.

²⁰ Jehova tâna tih kan duh zawng zawng kan tih theih loh hunah pawh, amah tilâwm tûra theih tâwp chhuaha ṭan kan lâknate chu a ngaihlu tih kan ring tlat thei a. Chu chu engtin nge kan hriat? Zakaria hun lai khân, Jehova’n a zâwlnei chu mite’n Babulon aṭanga an thawn rangkachak leh tangkaruate hmanga lallukhum siam tûrin a hrilh a. (Zak. 6:11) Chu ‘lallukhum ropui tak’ chu phal taka an thawh thawhlâwmte “hriat rengna” atân a ni. (Zak. 6:14) Jehova’n hun harsa tak kârah pawh a rawngbâwl tûra theih tâwp kan chhuahnate chu a theihnghilh ngai lo vang tih kan ring tlat thei a ni.—Heb. 6:10.

21. Engin nge nakin hun chu rinnghehna nêna hmachhawn tûra min ṭanpui ang?

²¹ Ni hnuhnûng chhûng hian dinhmun harsa takte kan hmachhawn zêl dâwn tih leh, dinhmunte chuan chhiat lam a pan zêl ang tih chu rinhlelh rual a ni lo. (2 Tim. 3:1, 13) Mahse, a lutuka kan lungkham a ngai lo. Hagaia hun laia Jehova’n a mite hnêna: “In hnênah ka awm si a. . . hlau suh u,” tia a sawi hi hre reng ang che. (Hag. 2:4, 5) Keini pawhin a duh zâwng ti tûra theih tâwp kan chhuah chhûng chu min awmpui ang tih kan chiang thei a ni. Hagaia leh Zakaria te hrilh lâwkna leh Ezra entawn tûr siam aṭanga kan thil zir theihte chu nunpuiin, eng ang dinhmun harsa pawh hmachhawn dâwn mah ila, Jehova kan rinna chu kan vawng tlat thei ang.