1-2. (a) Engvângin nge tirhkoh Paula’n hmangaihna chu “a ropui ber” tia a sawi? (b) Eng zawhnate nge kan sawiho vang?

 TIRHKOH Paula’n rinna, beiseina, leh hmangaihna mizia a sawi khân, “hêngahte [miziate] hian a ropui ber chu hmangaihna hi a ni,” tia sawiin a titâwp a. (1 Kor. 13:13) Engvângin nge chutianga Paula’n a sawi theih? Nakin hunah, khawvêl thar chungchânga Pathian thutiam chu a thlen famkim tawh dâwn avângin chumi thlen famkimna chu beisei a, rin a ngai tawh lo vang. Mahse, Jehova leh mite hmangaihna kan neih a la ngai reng ang. Dik tak chuan, anmahni kan hmangaihna chu chatuanin a ṭhangchho zêl dâwn a ni.

² Mite hmangaihna kan neih a ngaih reng dâwn avângin, zawhna pathum kan sawiho vang a. Pakhatna, engvângin nge kan inhmangaih tawn ang? Pahnihna, engtin nge inhmangaih tawnna kan lantîr ang? Pathumna, engtin nge inhmangaih tawnna chu kan tihngheh tlat theih?

3. Inhmangaih tawn nachhan tûr nge nge kan neih?

³ Engvângin nge inhmangaih tawnna chu kan tâna thil pawimawh tak a nih? A chhan tam tak zînga pakhat chu, hmangaihna chu Kristian dikte chhinchhiahna a nih vâng a ni. Isua’n a zirtîrte hnênah: “In inhmangaih chuan mi zawng zawngin ka zirtîrte in ni tih chu miah chuan an hria ang,”  tiin a hrilh a. (Joh. 13:35) Chu bâkah, inhmangaih tawnna chuan min inpumkhattîr a ni. Paula chuan hmangaihna chu “phuar famkimna a ni,” tiin a sawi bawk. (Kol. 3:14) Mahse, kan inhmangaih tawn nachhan tûr pawimawh dang a la awm a. Tirhkoh Johana chuan a Kristian unaute hnênah: “Tu pawhin Pathian a hmangaih chuan a unau pawh a hmangaih bawk tûr a ni,” tiin a ziak a. (1 Joh. 4:21) Kan inhmangaih tawn hian, Pathian kan hmangaihna kan lantîr a ni.

4-5. Pathian kan hmangaihna leh unaute kan hmangaihna inkûngkaih dân entirna pe rawh.

⁴ Eng kawngin nge Pathian kan hmangaihna leh kan unaute kan hmangaihna chu a inkûngkaih tlat? Entîr nân, kan lung leh kan taksa pêng dangte inkûngkaih dân hi lo ngaihtuah ta ila. Doctor chuan kan bân rêka mar phu chak leh chak loh a deh hian kan lung dinhmunte a hre thei a ni. He entîrna aṭang hian hmangaihna chungchângah eng zir tûr nge kan neih?

⁵ Doctor chuan kan mar phu deka kan lung dinhmun a hriat theih ang mai hian, unaute chunga hmangaihna kan lantîr dân aṭangin Pathian kan hmangaihna a ngheh leh ngheh loh a hriat theih a ni. Unaute kan hmangaihna a dai telh telh a nih chuan, chu chuan Pathian kan hmangaihna a dai tih a târ lang thei. Chuvângin, unaute chunga hmangaihna kan lantîr reng hian Pathian kan hmangaihna pawh a nghet tihna a ni.

6. Unaute kan hmangaihna a dai a nih chuan, engvângin nge chu chu kan tân a hlauhthâwnawm? (1 Johana 4:7-9, 11)

⁶ Unaute kan hmangaihna a dai a nih chuan kan tân a hlauhthâwnawm tawh tihna a ni. Engvângin nge? Thlarau lam dinhmun hlauhawma kan awm tawh vâng a ni. Tirhkoh Johana’n: “A unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?” tia min hriatnawntîr khân, chu chu a chiang hle a ni. (1 Joh. 4:20) Eng nge kan zir theih? Kan “inhmangaih tawn” chauhvin Jehova chu kan chungah a lâwm a ni.—1 Johana 4:7-9, 11 chhiar rawh.

7-8. Eng kawngtein nge inhmangaih tawnna chu kan lantîr theih?

⁷ Pathian Thu-ah “inhmangaih tawn” tûra thupêk kan ni fo va. (Joh. 15:12, 17; Rom 13:8; 1 Thes. 4:9; 1 Pet. 1:22; 1 Joh. 4:11) Mahse, hmangaihna chu thinlung, a nih loh leh chhûng ril lam mizia a nih avângin hmuh theih a ni lo. Chuvângin, engtin nge kan inhmangaih tawnna chu hmuh theiha kan lantîr theih? Kan thusawi leh thiltihte hmangin a ni.

⁸ Kan unaute kan hmangaih tih lantîr theih dân kawng tam tak a awm a. Entîrna ṭhenkhat chu hêngte hi a ni: “Mi tinin mahni ṭhenawm hnênah thu dik tak sawi ṭheuh ula.” (Zek. 8:16) “Inngeih rawh u.” (Mk. 9:50) “Chawimawi kawngah chuan” hma hruaitu ni ang che. (Rom 12:10) “Inlâwm tawn rawh u.” (Rom 15:7) “Inngaidam tawn ula.” (Kol. 3:13) “In ritphurhte chu inchhâwk tawn rawh u.” (Gal. 6:2) “Inthlamuan tawn rawh u.” (1 Thes. 4:18) “Intisâwt tawn ṭheuh rawh u.” (1 Thes. 5:11) “Inṭawngṭaisak tawn ṭhîn rawh u,” tihte hi.—Jak. 5:16.

9. Engvângin nge mi dangte thlamuan chu kan hmangaihna lantîr dân kawng pawimawh tak pakhat a nih? (Milem en bawk rawh.)

⁹ Paragraph hmasaa kan sawi tâk zînga mi dangte chunga hmangaihna kan lantîr theih dân kawng khat chu i lo ngaihtuahho vang u. Paula’n: “Inthlamuan tawn rawh u,” tia a sawi  chu kan bih chiang ang a. Engvângin nge mi dangte kan thlamuanna chu anmahni kan hmangaihna lantîr theih dân kawng pawimawh tak a nih? Bible hrilhfiahna lehkhabu pakhat sawi dân chuan, “thlamuan” tih Paula thu mal hman awmzia chu “dinhmun khirh tak tuar, tu emaw chu amah tichak tûra a bula ding” tihna a ni. Chuvângin, hrehawm tuar unaute kan thlamuan hian rinawm taka Jehova rawngbâwl zawm zêl tûrin anni chu kan ṭanpui a ni. Kan unaute kan thlamuan apiang hian hmangaihna kan lantîr a ni.—2 Kor. 7:6, 7, 13.

10. Khawngaihna leh thlamuanna chu engtin nge a inkûngkaih?

¹⁰ Khawngaihna rilru put hmang leh mite thlamuanna chu awmze inhnaih tak a ni a. Eng kawngin nge? Mi khawngaih thei tak chuan hrehawm tuarte chu a thlamuanin, a ṭanpui a ni. Chuvângin, khawngaihna rilru kan neihna chuan mi dangte thlamuan tûrin min chêttîr a ni. Paula’n Jehova mite a khawngaihna leh a thlamuanna a thlun zawm dân hi lo chhinchhiah ang che. Ani chuan Jehova chu “khawngaihnate Pa leh thlamuanna zawng zawng Pathian,” tiin a târ lang a. (2 Kor. 1:3) He Bible chângah hian, Paula chuan mi dangte khawngaihna rilru put hmang târ lan nân “khawngaihnate” tih ṭawngkam a hmang a ni. Chuvângin, Pathian chu khawngaihna lo chhuahna a nih avângin, ani chu khawngaihnate Pa, a nih loh leh Hnâr tia koh a ni. Chu khawngaihna chuan “kan hrehawmna zawng zawngah min thlamuan” tûrin a chêttîr a ni. (2 Kor. 1:4) Tui hna thiang vâwt takin tui hâl tak a tidam huai ang mai hian, hrehawm tuartute chu Jehova’n a tihahdamin, a thlamuan a ni. Engtin nge Jehova khawngaihna rilru put hmang chu entawnin, mi dangte kan thlamuan theih? Kan entawn theih dân kawng khat chu khawngaihna rilru put hmang nei tûr leh mi dangte thlamuan tûra min ṭanpui thei miziate neih chhohna hmangin a ni. Chûng mize ṭhenkhatte chu eng nge ni?

11. Kolossa 3:12-na leh 1 Petera 3:8-naa sawi angin, mi dangte thlamuan tûra min chêttîrtu hmangaihna nei chho tûrin eng mize dangte nge kan neih ngai?

¹¹ Nî tin hian “inthlamuan tawn” tûra kan mamawh hmangaihna nei tûrin engin nge min ṭanpui ang? Inlainat tawnna te, unau anga inhmangaihnate, leh ngilneihnate ang chi mize duhawm tak takte kan neih a ngai a. (Kolossa 3:12; 1 Petera 3:8 chhiar rawh.) Engtin nge chûng miziate chuan min ṭanpui ang? Khawngaihna rilru put hmang leh chumi nêna inkûngkaih miziate chu kan mize pêngte a rawn nih hian, hrehawm tuarte kan hmuh hunah thlamuan duhna nasa tak min neihtîr a ni. Isua’n: “Thinlunga khat liam chu kain a sawi ṭhîn asin. Mi ṭha chuan a ro bâwm ṭha ata thil ṭhate a theh chhuak ṭhîn,” tia a sawi ang hi a ni. (Mt. 12:34, 35) Thlamuanna mamawh tak kan unaute thlamuan chu anmahni kan hmangaihna lantîr dân kawng pawimawh tak a ni.

12. (a) Engvângin nge kan fîmkhur reng a ngaih? (b) Tûnah eng zawhna nge kan sawiho vang?

¹² Kan vai hian “inhmangaih tawn ṭheuh” chu kan duh a. (1 Joh. 4:7) Mahse, “mi tam zâwk hmangaihna chu a la dai ang,” tia Isua vaukhânna hi kan tân hriat reng a pawimawh a ni. (Mt. 24:12) Hei hi a zirtîr tam zâwkte inhmangaih tawnna a dai ang a tihna a ni lo. Mahse, kan chheh vêla awm khawvêl mite hmangaihna tlâk chhamnain min thunun loh nân kan fîmkhur reng tûr a ni. Chu chu rilruah vawng rengin, he zawhna pawimawh tak hi i lo ngaihtuah ang u: Kan unaute kan hmangaihna chu a ngheh leh ngheh loh finfiah dân kawng a awm em?

13. Unaute kan hmangaihna a ngheh leh ngheh loh chu engin nge fiah thei?

 ¹³ Kan hmangaihna tihngheh kan tum tlat dân kawng khat chu nuna thilthleng ṭhenkhat kan chhân lêt dân bih chian hi a ni a. (2 Kor. 8:8) Chutiang dinhmun pakhat chu tirhkoh Petera’n a târ lang a ni: “Eng dang zawng aiin inhmangaih tawn uar rawh u; hmangaihnain sual tam tak a khuh si ṭhîn a,” tiin. (1 Pet. 4:8) Chuvângin, mi dangte chak lohna leh ṭhat famkim lohna chuan kan hmangaihna a ngheh leh ngheh loh a fiah thei a ni.

14. Petera thawn khat 4:8-a sawi angin, eng ang hmangaihna nge kan neih ngai? Entîrna pe rawh.

¹⁴ Petera thusawi hi ngun takin i lo ngaihtuah ang u. Châng 8-na tîr lamah chuan “inhmangaih tawn uar,” tiin kan neih ngai hmangaihna mizia a târ lang a. Petera hman “uar” tih thu mal hian “tipharh” tih a kâwk thei a ni. Chu châng tâwp lamah chuan mi dangte chunga hmangaihna nasa tak kan neih huna kan tih tûrte a târ lang a. Chu chuan kan unaute sualna a khuh a ni. Chu chu hetiang  kawng hian kan ngaihtuah thei a ni: Hmangaihna chu puanthân fân thei angin han mitthla teh, chu chu sual pakhat emaw, pahnih emaw pawh ni lo, “sual tam tak” a khuh thlengin kan tipharh thei a ni. “Khuh” tih chu ngaidam tih sawi nâna hman a ni a. Puanthânin thil bâl a khuh thei ang mai hian, hmangaihnain mi dangte chak lohna leh ṭhat famkim lohnate pawh a khuh thei a ni.

15. Unaute kan hmangaihna chu a nghet tâwk a nih chuan eng nge kan tih theih ang? (Kolossa 3:13)

¹⁵ Mi dangte kan hmangaihna chu unaute ṭhat famkim lohna ngaihdam harsa kan tih hunah pawh ngaidam thei tûr khawpin a nghet tâwk tûr a ni. (Kolossa 3:13 chhiar rawh.) Mi dangte kan ngaihdam hian kan hmangaihna a nghet tih leh Jehova tihlâwm kan duh tih kan târ lang a ni. Lungnih lohna min neihtîr thei unaute chêtzia leh thil tihsualna en kân tûrin engin nge min ṭanpui thei?

16-17. Engin nge mi dangte sual lian tham lo en kân tûra min ṭanpui ang? Entîrna pe rawh. (Milem en bawk rawh.)

¹⁶ I unaute chu an ṭhat lohna lai ni lovin, an ṭhatna laite ngaihven tlat ang che. He khaikhinna hi han ngaihtuah teh. Unaute inkawmhonaa tel angin han inmitthla la. Hun nuam tak in hmang a, inkawmhona tâwp lamah chuan a huhovin thla in la a. A nihna takah chuan, in lâk hmasak ber chu a ṭhat loh avângin vawi hnih lai in la nawn leh a. Vawi thum in la ta a ni. Mahse, thlalâk pakhatah  chuan unaupa pakhat chu a nui ve lo tih i hria a. Chu thlalâk chu engtin nge i tih ang? Chu unaupa nui hmêl telna thlalâk dang pahnih i la neih avângin chu chu i paih bo a ni.

¹⁷ Thlalâk kawl ṭhat kan duhte leh kan hriat reng duhte chu khaikhin ta ila. Kan unaute nêna hun hmanhona chu rilruah a châm reng ṭhîn a. Mahse, unaupa emaw, unaunu emaw thusawi leh thiltihin min tihlungnih loh châng a awm thei a ni. Chu chu kan rilrua a châm reng chuan eng nge kan tih ang? Engvângin nge chûng thlalâk zînga pakhat kan paih bo ang maia paih bo kan tum loh vang? (Thuf. 19:11; Eph. 4:32) Anmahni nêna hun hlimawm hman dunna hriat reng tûr tam tak kan neih avângin, kan unaute sual lian tham lo tak chu theihnghilh kan tum thei a ni. Chûngte chu rilrua vawn tlat a, ngaihhlut kan duhte a ni.

18. He thuziakah hian hmangaihna chungchângah eng thu pawimawhte nge kan zir?

¹⁸ Engvângin nge inhmangaih tawnna tihngheh tlat chu kan duh? Kan sawiho tâk angin, unaute chunga hmangaihna kan lantîr hian Jehova kan hmangaihna kan lantîr a ni. Engtin nge kan unaute kan hmangaih tih kan lantîr ang? Kan lantîr theih dân kawng khat chu anmahni thlamuan hi a ni. Khawngaihna kan neih chuan kan “inthlamuan tawn” thei ang. Engtin nge kan inhmangaih tawnna chu kan tihngheh tlat theih? Mi dangte dik lohna ngaidam tûra theih tâwp kan chhuahna hmangin a ni.

19. Engvângin nge tûn laiah inhmangaih tawnna lantîr chu a pawimawh lehzual?

¹⁹ Tûn laiah, engvângin nge inhmangaih tawnna lantîr chu a pawimawh lehzual? Petera chuan: “Thil zawng zawng tâwpna chu a hnai tawh a; chuvângin, . . . inhmangaih tawn uar rawh u,” tia a sawi chhan hi chhinchhiah ang che. (1 Pet. 4:7, 8) He khawvêl suaksual tak tâwpna a hnaih zêl rualin, eng nge kan beisei theih? A hnungzuitute chungchâng a sawinaah Isua chuan: “Ka hming avângin hnam zawng zawng huat in ni ang,” tiin a sawi lâwk a ni. (Mt. 24:9) Chutiang huatna tuar chhuak thei tûr chuan, kan inpumkhat tlat a ngai a. Chutianga kan tih chuan “phuar famkimna”—hmangaihnaa kan insuihkhâwm avângin Setana ṭhenhran min tumna chu a hlawhchham ang.—Kol. 3:14; Phil. 2:1, 2.