Kum 1948-ah Nigeria chhim thlang lama khaw pakhatah ka piang a. Chutih hun lai chuan, ka pate Moustapha-a leh kan upa ber Wahabi-a te chu Jehova Thuhretute niin baptisma an chang a. Kum kua ka nihin ka pain min boral san a, ka rilru a na khawp mai. Wahabi-a chuan thawhlehnaah ka pa kan hmuh leh tûr thu min hrilh a. Chu thu thlamuanthlâk tak chuan Bible zir duhna min neihtîr a ni. Kum 1963-ah baptisma ka chang a. A hnuah, ka unau mipa pathumte pawhin baptisma an chang a ni.

Kum 1965-ah, Lagos khawpuia awm ka u Wilson-a hnênah ka kal a. Igbobi Kohhrana regular pioneer dangte nên hlim takin rawng kan bâwlho a ni. An hlimna leh ṭhahnemngaihnate chuan min tiphûr hle a. Kum 1968 January thlaah pioneer ka thawk ṭan ve ta a ni.

Bethel-a thawk unau Albert Olugbebi-a chuan Nigeria hmâr lama special pioneer mamawhna chungchângah ṭhalaite chu a bîk taka inhmuh khâwmna min neihpui a. Unau Olugbebi-a chuan: “In la ṭhalai a, in hun leh tha leh zungte chu Jehova tân in hmang thei a nia. Rawngbâwlna tûr kawng tam tak a awm!” tia a sawi kha ka la hre reng. Zâwlnei Isaia anga Jehova’n min tirhna  apianga kal ka duh avângin special pioneer anga rawngbâwl tûrin dîlna ka theh lût ta a ni.—Is. 6:8.

Kum 1968, May thlaah Nigeria hmâr lama Kano khawpuiah special pioneer nia rawngbâwl tûra tirh ka ni a. Chu chu Biafran Indopui (1967-1970) hun lai a ni. Chu chuan Nigeria hmâr lam a suasam hnu chuan chhak lam pawh a suasam chhunzawm a. Unaupa pakhat chuan min ngaihtuah êm avângin kal lo tûrin min ti a. Mahse, a hnênah: “Min ngaihtuah avângin ka lâwm e. Mahse, Jehova’n he hmunah a rawngbâwl tûra min duh a nih chuan min awmpui ang tih ka chiang a ni,” tiin ka hrilh a ni.

Kano khawpui dinhmun chu a lungchhiatthlâk hle a. Tualchhûng indona chuan chu khawpui lian tak chu a tichhe nasa hle a ni. Rawngbâwlnaa kan kal laite hian indonaa thi mitthi ruangte hmuh châng kan nei a. Kano khawpuiah chuan kohhran tam tak awm mah se, unau tam zâwkte chu an tlân chhe tawh a. Chuta thuchhuahtu la awmte chu mi 15 pawh an tling tawh lo. Anni chu an hlauthâwngin an lunghnual hle a. Special pioneer paruk kan va thlen chuan an lâwm hle. Kan han fuih chuan an rilru a nuam ta deuh va. Inkhâwm leh thu hrilh rawngbâwlna chhunzawm tûrin kan ṭanpui a ni. Chu bâkah, rawngbâwlna report-te branch-ah thawnin, thu leh hla chhuahte pawh chah tûrin kan ṭanpui bawk.

Keini special pioneer-te chuan Hausa ṭawng chu kan zir ṭan a. Lalram thuchah an ṭawng ngeia an han hriat chuan tualchhûnga mi tam takin an ngaithla a. Mahse, chumi hmuna sakhaw lian bera member-te chuan kan thu hrilh chu an duh lo va. Chuvângin, fîmkhur taka kan chêt a ngai a ni. Ṭum khat chu pa pakhat hian ka thawhpui nên chem kengin min ûm a. Vânneihthlâk takin, kan tlân chak zâwk avângin min ûm phâk ta lo. Dinhmun hlauhawm tak kârah pawh Jehova chuan ‘him taka min awmtîrin’ thuchhuahtute pawh an pung chho ṭan a. (Sâm 4:8) Tûnah chuan Kano kohhran 11-ah thuchhuahtu mi 500 aia tam an awm tawh a ni.

Kano khawpuia thla rei lo tê kan awm hnu kum 1968, August thlaah Niger khawpui Niamey-ah  special pioneer dang pahnih nên min thawn a. Africa khaw thlang lama awm Niger ram chu khawvêla khaw lum ber zînga pakhat a ni tih kan hre ta thuai a. Khaw lum tak tawrh thiam dân zir pahin an ṭawng hman ber French ṭawng chu kan zir a ni. Chutiang harsatna kârah chuan Jehova rinchhanin chu khawpuia awm thuchhuahtu tlêm tê nên rawng kan bâwl ṭan a. A hnu lawkah, Niamey khawpuia lehkha chhiar thiam tawh phawt chuan Chatuan Nunnaa Hruaitu Thutak tih Bible zirna lehkhabu chu an dawng thei ta a. Mite chuan chu lehkhabu an hmuh theih nân min rawn zawng hial a!

A hnu rei vak lovah, thuneitute chuan Jehova Thuhretute chu an duh lo tih kan hre ta a. Kum 1969, July thlaah mi 20 vêl nên Niger rama bial inkhâwmpui hmasa ber kan hmang a. Thuchhuahtu thar pahnihte baptisma chan hun tûr kan nghahhlelh hle laiin inkhâwmpui ni hmasa berah chuan police-te chu lo kalin inkhâwmpui hman an phal ta lo va. Special pioneer-te leh bial kantu chu police station-ah min hruai a. Thute min zawh hnu chuan a tûka inlan leh tûrin min ti a. Buaina thleng thei nia kan hriat avângin tu emaw inah baptisma channa thusawi chu kan ruahman ta a. Thuchhuahtu tharte pahnih chu luia a rûka baptisma chantîr an ni ta bawk.

Chawlhkâr rei lo te hnuah, Ministry of the Interior chuan kei leh special pioneer dang pangate chu ram chhûng aṭangin min hnawt chhuak a. Ram chhuahsan tûra kan inbuatsaih nân dârkâr 48 min pe a ni. An thu chu zâwmin Nigeria branch office ah kan kal ta nghâl a. Chutah chuan chanvo tharte kan dawng a ni.

Nigeria rama Orisunbare khuaah rawngbâwl tûrin chanvo ka dawng a. Chuta awm thuchhuahtu tlêm tête nên thawkhovin rawngbâwlna hlawhtling tak leh hlimawm tak ka nei a ni. Mahse, thla ruk hnuah chuan branch office aṭangin Niger rama keimah chauhva kal leh tûra sâwmna ka dawng a. Ka hriat tirh chuan mak ka tiin ka zâm deuh va; mahse, Niger rama unaute hmuh leh chu ka châk hle!

Niamey khawpuiah ka lêt leh a. Ka thlen nî a tûkah chuan sumdâwng mi pakhatin Thuhretu ka ni tih a hriat chuan, Bible chungchângah zawhnate min zâwt a. Tichuan, Bible ka zirpui ṭan a, a hnuah a zial zûk te leh a lutuka a zu in te bânsanin baptisma a chang ta a ni. Niger rama hmun hrang hranga rawngbâwlin, chuta zawi zawia rawngbâwlna ṭhang chho ka hmu chu ka lâwm tak zet a ni. Ka awm tirh chuan Niger ramah Thuhretu 31 chauh an awm a, chu ram aṭanga ka chhuah chuan Thuhretu 69 an awm tawh a ni.

Kum 1977, December thlaah chuan Nigeria ramah zirtîrna dawng tûrin ka lêt leh a. Chawlhkâr thum zirtîrna kan dawn tâwp lamah chuan, Branch  Committee coordinator, Malcolm Vigo-a chuan Sierra Leone branch aṭanga lehkhathawn pakhat min chhiartîr a. Unaupate chuan Guinea rama bial kantu nia rawngbâwl thei sâp ṭawng leh French ṭawng thiam, nupui nei lo pioneer unaupa hrisêl tak an mamawh a. Unau Vigo-a chuan chu chanvo atâna zirtîrna dawng ka nih thu min hrilh a. Chu chu chanvo awlsam lo tak a nih thu min hrilh bawk. “I pawm hmain ngun takin ngaihtuah rawh,” tia thurâwn min pêk chuan, “Hei hi Jehova min tirhna a nih avângin ka kal ang,” tiin ka chhâng nghâl a ni.

Sierra Leone-ah chuan thlâwkin, chuta branch-a unaupate nên chuan kan inhmu a. Branch Committee member pakhat chuan, “Guinea rama Lalram rawngbâwlna chungchâng chu kan hre tam lo,” tiin min hrilh a. Branch chuan an ṭhenawm Guinea rama rawngbâwlna chu enkawl mah se, ram chhûng sawrkâr buaina avângin chuta thuchhuahtute chu an be pawh thei lo va. Branch chuan chu rama unaute tlawh tûrin vawi tam tak palai tirh an tum tawh a; mahse, an hlawhtling thei lo. Chuvângin, Guinea khawpui Conakry-a kala, chuta dân anga awm theihna dîl tûra tih ka ni.

Conakry ka thlen chuan, Nigerian embassy-ah ambassador va hmuin Guinea rama thu hrilh ka duh thu ka hrilh a. Ani chuan man theih leh tihnat theih reng ka nih avângin chuta awm lo tûr chuan min fuih a. “Nigeria-ah kîrin chutah chuan thu va hril zâwk rawh,” min ti a, kei chuan, “Heta awm ka tum tawh,” tiin ka chhâng thung. Chuvângin, min ṭanpui tûrin Guinean Minister of the Interior hnênah dîlna lehkha min ziahsak a, chu minister chuan min ṭanpui ta a ni.

A hnu rei vak lovah, Sierra Leone-a branch office-ah ka kîr leh a, unaute hnênah chuan minister thu tlûkna siam chu ka hrilh a. Jehova’n ka zin kawng mal a sâwm dân an han hriat chuan an lâwm hle a. Guinea rama dân anga awm phalna pêk ka ni ta!

Kum 1978 aṭanga kum 1989 chhûng chu, Guinea leh Sierra Leone-ah te chuan bial kantu niin rawng ka bâwl a, Liberia ramah pawh bial kantu aiawh angin rawng ka bâwl bawk. A tîr chuan, ka dam lo deuh reng a. Ram pilril taka ka awm hian a ni tlângpui ṭhîn. Mahse, unaute chuan theih tâwp chhuahin damdawi inah min kalpui ṭhîn a ni.

Ṭum khat chu, malaria leh rîl natna ka neih avângin ka na hle a. Ka han dam chhuah chuan, unaute’n min phûmna tûr hmun an lo sawiho tawh hial tih ka hria a. Chûng nunna tiderthâwng thei thilte ka tâwk chung pawhin, ka chanvote bânsan chu ka ngaihtuah ngai lo. Himna dik leh tluantling chu thihna ata min kaitho theitu Pathian hnên aṭang chauh kan hmu thei tih ka ring nghet tlat a ni.

Kum 1988-ah mi inngaitlâwm leh Jehova hmangaih êm êmtu pioneer unaunu Dorcas-i nên kan intawng a. Kan inneih hnu chuan bial kantu nia rawng ka bâwlnaah min thawhpui a ni. Dorcas-i chu hmangaihna nei tak leh mahni inpêkna nei tak  a ni a. Kan bungruate keng chunga kea kalin kilometer 25 (mêl 15-a) hlaa awm kohhrante kan va tlawh dûn ṭhîn a. Chu aia hlaa awm kohhrante erawh chu, kawng bumboh chhe tak leh diak kârah lîrthei kan tawh apiangte chuangin kan tlawh ṭhîn a ni.

Dorcas-i chu huaisen tak a ni a. Entîr nân, awle tam tak awmna lui kan kân a ngaih châng a awm ṭhîn a. Ni nga chhûng awh kan zin laiin, thing leite a chhiat avângin lawnglêng hmanga lui kan kân a ngai a. Dorcas-i chu lawnglêng aṭanga chhuk tuma a han din chuan, lui thûk takah chuan a tla ta a. Chu luiah chuan awlê an awm bâkah tui hleuh kan thiam lo ve ve zui. Mahse, vânneihthlâk takin râwlthar ṭhenkhat chuan luia zuang thlain Dorcas-i chu an chhanchhuak ta a. Chu thilthleng avâng chuan mumang ṭha lo takte kan nei hial a; mahse, kan rawngbâwlna chu kan chhunzawm a ni.

Kum 1992 tîr lamah Dorcas-i’n nau a keng tih kan hriat chuan mak kan ti hle a. Hunbi kima rawngbâwlna kan chawlhsanna tûr a ni ang em? “Jehova’n thilpêk min pe a nih hi!” tia ngaihtuahin, kan fanu hmingah chuan Jahgift kan sa a. Jahgift-i pian hnu kum linaah fapa Eric-a kan nei leh a. Kan fate pahnih chu Jehova hnên aṭanga kan dawn thilpêkte an ni. Jahgift-i chuan Conakry RTO-ah hun eng emaw chhûng rawng a bâwl a, Eric-a chu kohhranho rawngbâwltu a ni.

Dorcas-i chuan special pioneer nia rawngbâwlna chu chawlhsan mah se, kan fate enkawl chungin regular pioneer a thawk a. Kei chuan Jehova ṭanpuinain special pioneer niin rawng ka bâwl zawm a ni. Kan fate an puitlin hnu chuan Dorcas-i pawhin special pioneer niin rawng a bâwl leh thei a. Tûnah chuan, kan nupain Conakry-ah missionary niin rawng kan bâwl a ni.

Jehova min hruaina hmun apiangah ka kal a. Kan nupain a vênhimna leh malsâwmna kan dawng fo ṭhîn. Sum leh pai aia Jehova kan rinchhan tlat avângin buaina leh lungngaihna tam tak kan pumpelh thei a. Dorcas-i nên chuan kan mi mal thiltawn aṭangin “kan chhandamna Pathian,” Jehova chu himna dik tak lo chhuahna bul ber a ni tih kan hria a ni. (1 Chro. 16:35) Jehova chuan amah rinchhantu zawng zawngte nunna chu “nunna têl zinga têl” angin a humhim ang tih ka ring nghet tlat a ni.—1 Sam. 25:29.