ZIR TUR THUZIAK 49
Jehova’n Kan Ṭawngṭainate A Chhâng Ang Em?
“Min lam ang a, ka hnênah in rawn ṭawngṭai ang a, ka ngaithla ang che u.”—JER. 29:12.
HLA 41 Ka Ṭawngṭaina Ngaithla Ang Che
THLIR LAWKNA a
1-2. Engvângin nge Jehova’n kan ṭawngṭainate a chhâng lo nia kan ngaih mai theih?
“LALPA chungah chuan lâwm bawk rawh; tichuan i thinlung duh zâwngte chu a pe ang che.” (Sâm 37:4) Thutiam ropui tak a va ni êm! Mahse, Jehova chuan kan dîl apiangte chu min pe nghâl ang tih kan beisei tûr a ni em? Engvângin nge chu zawhna chu kan zawh mai theih? Hêng entîrna ṭhenkhatte hi lo ngaihtuah ta ila. Kawppui nei lo unaunu chu Lalram Chanchin Ṭha Puangtute School-a kal thei tûrin a ṭawngṭai a. Mahse, kum tam tak a liam hnuah pawh, kal tûra sâwm a la ni lo. Ṭhalai unaupa pakhat chu kohhrana tam lehzuala rawng a bâwl theih nân a natna khirh tak tihdamsak tûrin Jehova hnênah a ṭawngṭai a. Mahse, a natna chu a ziaawm chuang lo. Kristian nu leh pa ṭhenkhat chu an fate thutaka awm reng tûrin an ṭawngṭai a. Mahse, an fate chuan Jehova rawngbâwl bânsan an thlang a ni.
2 Nang pawhin Jehova hnêna thil engemaw i dîl chu i la dawng lo pawh a ni thei. Chuvângin, Jehova chuan mi dangte ṭawngṭaina chu a chhângin, nang chu a chhâng lo che niin i ngai thei a. A nih loh leh, thil engemaw tihsual i neih avânga chhâng lo che angin i ngai thei bawk. Unaunu Janice-i’n b chutiang chuan a ngai a ni. A pasal nên chuan Bethel-a rawngbâwl an châk êm avângin Jehova hnênah an dîl a. Ani chuan: “Bethel-a rawngbâwl tûra sâwm kan nih thuai ka ring tlat a ni,” tiin a sawi. Mahse, kum tam tak a liam hnuah pawh sâwm an la ni lo va. Unaunu Janice-i chuan: “Ka rilru a hrehawmin a ngaihna ka hre lo va. Jehova lawm loh zâwng thil ka tih leh tih loh ka ngaihtuah a. Bethel-a rawngbâwl tûrin nasa takin ka ṭawngṭai a. Mahse, engvângin nge ka ṭawngṭaina chu chhân a nih loh?” tiin a sawi a ni.
3. He thuziakah hian eng nge kan sawiho vang?
3 Jehova’n kan ṭawngṭainate ngaithla lo nia ngaihtuah châng kan nei thei a. Hmân lai mi rinawm ṭhenkhatte pawhin chutianga ngaihtuah châng an nei a ni. (Job. 30:20; Sâm 22:2; Hab. 1:2) Engin nge Jehova’n i ṭawngṭainate a ngaithla tih rin nghehtîr thei che? (Sâm 65:2) Chu zawhna chhânna hre tûr chuan, hêng zawhnate chhânna hi kan hriat hmasak a ngai ang: (1) Jehova hnên aṭangin eng nge kan beisei theih? (2) Jehova’n kan lakah eng nge a beisei? (3) Engvângin nge kan thil dîl ṭhenkhat chu kan siamrem a ngaih mai theih? tihte hi.
JEHOVA HNEN AṬANGIN ENG NGE KAN BEISEI THEIH?
4. Jeremia 29:12-a sawi angin, Jehova’n eng nge tihsak min tiam?
4 Jehova chuan kan ṭawngṭainate chu ngaihthlâk min tiam a. (Jeremia 29:12 chhiar rawh.) Kan Pathian chuan rinawm taka amah betute chu a hmangaih êm avângin an ṭawngṭainate ngaihthlâksak lovin a awm lo vang. (Sâm 10:17; 37:28) Mahse, chu chu kan thil dîl eng pawh min pe vek ang tihna a ni lo. Kan thil dîl ṭhenkhat dawng tûrin khawvêl thar a thlen hma loh kan nghah pawh a ngai mai thei a ni.
5. Jehova’n kan ṭawngṭainate a ngaihthlâk hian eng nge a ngaihtuah? Hrilhfiah rawh.
5 Jehova chuan kan dîlnate chu a thiltumte nên a inmil leh mil loh a ngaihtuah a. (Is. 55:8, 9) Chu a thiltum zînga pakhat chu a rorêlna hnuaiah mite chu hlim taka inpumkhata leilung luahkhahtîr hi a ni. Mahse, Setana chuan mihringte chu mahnia ro an inrêl chuan ṭhatpui zâwk tûrin a sawi a. (Gen. 3:1-5) Diabola thusawi chu dâwt a ni tih finfiah nân Jehova chuan mihringte chu mahnia ro inrêl a phalsak a ni. Mahse, mihringte rorêlna chuan tûn laia kan tawh buaina tam takte hi a thlentîr a. (Thur. 8:9) Pathian Jehova’n chûng buaina zawng zawng chu tûnah a chingfel lo vang tih kan hria a ni. Chingfel ta se chuan, mi ṭhenkhatin chûng buainate chu mihringte rorêlnain chingfel thei niin thu tâwp an siam thei a ni.
6. Engvângin nge Jehova’n hmangaihna nei tak leh dik takin thil a ti reng ang tih kan rin ngheh tlat a ngaih?
6 Kan thil dîlte inang mah se, Jehova chhân dân chu a inang lo thei a ni. Entîr nân, Lal Hezekia chu thih ngama a dam loh khân, amah tidam tûrin Jehova hnênah ṭanpuina a dîl a. A dîlna chu chhângin a natna chu a tihdamsak a ni. (2 Lal. 20:1-6) Kawng leh lamah chuan, tirhkoh Paula’n “tisaah hlîng” anga a tawrh natna chu tihbosak tûra Jehova hnêna a ngen khân tihdamsak a ni lo. (2 Kor. 12:7-9) Tirhkoh Jakoba leh Petera te entîrna hi han ngaihtuah bawk teh. Lal Heroda chuan an pahnihin tihhlum a duh a. Kohhrante chuan Petera tâna an ṭawngṭaisak ang bawkin, Jakoba tân pawh an ṭawngṭaisak ngei ang. Mahse, Petera chu vântirhkoh hmanga chhanchhuah a nih laiin, Jakoba erawh tihhlum a ni thung. (Tirh. 12:1-11) ‘Engvângin nge Jehova chuan Petera chu chhanchhuak a, Jakoba erawh a chhanchhuah loh?’ tiin kan ngaihtuah mai thei. Chumi chungchâng chu Bible-in a sawi lo. c Mahse, Jehova kawngte chu “a fel famkim” tih kan chiang thei a ni. (Deut. 32:4) Pathian Jehova chuan Petera leh Jakoba te chu a hmangaih ve ve tih kan hria a. (Thup. 21:14) A châng chuan, kan ṭawngṭainate chu kan beisei dân kawnga chhân a ni lo thei. Mahse, Jehova chuan kan ṭawngṭainate chu hmangaihna nei tak leh dik takin min chhâng ṭhîn tih kan rin tlat avângin, min chhân dân chungchângah rinhlelhna kan nei lo a ni.—Job. 33:13.
7. Eng nge pumpelh kan tum ang a, engvângin nge?
7 Kan dinhmun leh mi dangte dinhmun khaikhin chu pumpelh kan tum tlat a. Entîr nân, Jehova hnênah a bîk taka thil engemaw kan dîl chu chhân kan ni lo thei a ni. A hnuah, tu emawin kan dîl ang chiah chu dîlin, Jehova’n a chhâng niin kan hria a. Unaunu Anna-i chuan chutiang chu a tawng a ni. Ani chuan a pasal Matthew-a cancer natna chu tihdamsak tûrin a ṭawngṭai a. Chutih rual chuan, kum upa lam unaunu pahnihte chuan cancer natna an tuar ve a. Anna-i chu chûng unaunute leh Matthew-a tân chuan tih tak zetin a ṭawngṭai a. Chûng unaunute chu an dam chhuak a; mahse, Matthew-a chu a boral ta a ni. A tîrah chuan, Unaunu Anna-i chuan chûng unaunu pahnihte chu Jehova ṭanpuina avânga ṭha chhuak leh niin a ngaihtuah hial a. Chutiang a nih chuan, engvângin nge a pasal ṭha chhuak leh tûra a ṭawngṭaina chu chhân a nih loh? Chûng unaunute pahnih ṭhat chhuah leh chhan chu kan sawi thei lo ngei mai. Mahse, kan sawi theih chu Jehova’n kan hrehawm tawrhna zawng zawng a titâwpin, a ṭhian thi tawhte chu kaihthawh a châk hle tih hi a ni.—Job. 14:15.
8. (a) Isaia 43:2-a sawi angin, engtin nge Jehova’n min ṭanpui? (b) Engtin nge ṭawngṭaina chuan dinhmun harsa tak kan hmachhawn hunah min ṭanpui theih? (Ṭawngṭaina Chuan Min Ṭanpui tih video chu en rawh.)
8 Jehova chuan min ṭanpui reng ang. Hmangaihna nei tak kan Pa a nih angin, Jehova chuan hrehawm kan tawrh chu a duh lo va. (Is. 63:9) Ani chuan luite, a nih loh leh meialh nêna khaikhin theih kan hrehawm tawrhna zawng zawng chu min dansak lo. (Isaia 43:2 chhiar rawh.) Mahse, chûng harsatnate chu “dai kai” thei tûrin ṭanpui min tiam a ni. Eng ang harsatnate pawh tâwk mah ila, chu chuan amah nêna kan inlaichînna a tihchhiat chu a phal lo vang. Jehova chuan chhel taka tuar chhuak thei tûrin a thlarau thianghlim thiltithei tak min pe bawk a ni. (Lk. 11:13; Phil. 4:13) Chuvângin, chhel taka tuar chhuak thei tûr leh a chunga rinawm reng tûra kan mamawhte min pe reng ang tih kan ring nghet tlat thei a ni. d
JEHOVA’N KAN LAKAH ENG NGE A BEISEI?
9. Jakoba 1:6-8-na nêna inmilin, engvângin nge Jehova’n min ṭanpui ang tih kan rin ngheh tlat a ngaih?
9 Jehova chuan amah rinchhan tlat tûrin min beisei a. (Heb. 11:6) A châng chuan kan hrehawm tawrhte chu tawrh chhuah theih loh tûr angin a lang mai thei. Pathian Jehova’n min ṭanpui dâwn leh dâwn loh chungchângah rinhlelhna kan nei ṭan pawh a ni thei. Mahse, Bible chuan Pathian thiltihtheihna hmangin ‘kulh bang kan zuan khûm’ thei tih min tiam a ni. (Sâm 18:29) Chuvângin, kan rinhlelhnate chu do lêtin, Jehova’n kan ṭawngṭainate a chhâng ang tih ring tlatin rin nghehna neiin kan dîl tûr a ni.—Jakoba 1:6-8 chhiar rawh.
10. Kan ṭawngṭainate mila thil kan tih theih dân entîrna pe rawh.
10 Jehova chuan kan ṭawngṭaina nên inmila thil ti tûrin min beisei a. Entîr nân, unaupa pakhat chuan regional inkhâwmpuia a tel theih nân a hnathawhnaah chawlh la thei tûra ṭanpui tûrin Jehova hnênah a dîl pawh a ni thei a. Engtin nge Jehova’n chu ṭawngṭaina chu a chhân mai theih? Ani chuan a hnathawhna pu hnêna dîl tûra a mamawh huaisenna a pe thei a ni. Mahse, chu unaupa chuan a hnathawhna pu hnênah kalin, amah ngeiin a dîl a la ngai tho a ni. A dîl nawn fo pawh a ngai mai thei. A hnathawhpui dangte nên an hnathawh hun inthlâk tûrin a dîl thei a. Chu bâkah, a ṭûl chuan, a hlawh tûr pawh chân a inhuam thu a hrilh thei a ni.
11. Engvângin nge kan tâna thil pawimawhte chungchângah kan dîl nawn fo vang?
11 Jehova chuan kan tâna thil pawimawhte chungchângah dîl nawn fo tûrin min beisei a. (1 Thes. 5:17) Isua thusawite aṭangin ka thil dîl ṭhenkhat chu pêk kan ni nghâl lo vang tih kan hre thei a ni. (Lk. 11:9) Chuvângin beidawng suh! Tih tak zeta ṭawngṭaiin, dîl nawn fo vang che. (Lk. 18:1-7) Thil engemaw chungchânga kan dîl zawm zêl hian, Jehova hnênah kan dîlna chu kan ngai pawimawh hle tih kan lantîr a. Chu bâkah, min ṭanpui thei tih kan rinzia kan lantîr bawk a ni.
ENGVANGIN NGE KAN DILNA ṬHENKHAT CHU KAN SIAMREM A NGAIH MAI THEIH?
12. (a) Kan ṭawngṭainate chungchângah mahni kan inzawh tûr zawhna pakhat chu eng nge ni a, engvângin nge? (b) Engtin nge kan ṭawngṭainate chuan Jehova zahna a lantîr tih kan chian theih? (“ Ka Dîlnate Hian Jehova Zahna A Lantîr Em?” tih bâwm chu en ang che.)
12 Ṭawngṭaia kan thil dîlte kan dawng lo a nih chuan, hêng zawhna pathumte hi kan inzâwt thei a ni. Pakhatna, ‘Ka thil dîl hi a dik em?’ Kan tâna ṭha ber tûr chu hria niin kan inngai ṭhîn a. Mahse, kan thil dîlte chu kan tâna ṭha ber tûr a ni lo thei. Buaina chungchângah kan dîl a nih chuan, kan dîlna aia ṭhaa chinfel dân kawng a awm thei a ni. Kan dîlnate chu Jehova duh zâwng nêna inmil loh châng pawh a awm thei a. (1 Joh. 5:14) ) Entîr nân, kan sawi tâk nu leh pate entîrna kha, han ngaihtuah ta ila. Anni chuan thutaka an fate awm reng tûrin Jehova hnênah an dîl a ni. Chu chu dîl âwm tak angin a lang a. Mahse, Jehova chuan tu mah hi a rawngbâwl tûrin a tilui lo. Ani chuan kan fate pawh tiamin, kan vai hian duh thlanna avânga amah be tûrin min duh a ni. (Deut. 10:12, 13; 30:19, 20) Chuvângin, nu leh pate chuan an fate chu Jehova hmangaih tûr leh A ṭhian ni tûra an thinlung hmin thei tûra ṭanpui tûrin Jehova ṭanpuina an dîl zâwk thei a ni.—Thuf. 22:6; Eph. 6:4.
13. Hebrai 4:16-a sawi angin, eng hunah nge Jehova’n min ṭanpui ang? Hrilhfiah rawh.
13 Zawhna pahnihna chu, ‘Ka dîlna Jehova min chhân hun a ni em?’ tih hi a ni a. Kan ṭawngṭainate chu chhân nghâl ngai niin kan hre mai thei a. Mahse, Jehova chuan ṭanpui hun tûr dik tak chu a hria a ni. (Hebrai 4:16 chhiar rawh.) Kan thil dîlte kan dawn nghâl loh hunah Jehova’n min chhâng lo niin kan ngai mai thei a. Mahse, a la chhâng rih lo mai pawh a ni thei a ni. Entîr nân, a natna tihdamsak tûra dîltu ṭhalai pakhat chungchâng kha han ngaihtuah leh ta ila. Jehova’n thilmak tihna hmangin tihdamsak ta se, Setana chuan a tihdamsak avâng chauhvin chu unaupa chu Jehova rawngbâwl zawm niin a puh thei a ni. (Job. 1:9-11; 2:4) Chu bâkah, Jehova chuan natna zawng zawng a tihdam hun tûr chu a ruat tawh a. (Is. 33:24; Thup. 21:3, 4) Chumi hun a thlen hma chu, thilmak tihna hmanga tihdam kan beisei thei lo. Chuvângin, chu ṭhalai unaupa chuan Jehova hnênah chakna pe tûr te, rilru thlamuanna neia a natna chhel taka tuar chhuak thei tûr te leh, rinawm taka Pathian rawngbâwl zawm zêl thei tûrtein a dîl thei a ni.—Sâm 29:11.
14. Janice-i thiltawn aṭangin eng nge kan zir theih?
14 Bethel-a rawngbâwlna chungchâng dîltu Unaunu Janice-i thiltawn kha han ngaihtuah leh ta ila. A ṭawngṭaina Jehova chhân dân chu kum 5 a liam hnuah chauh a hre thiam a ni. Ani chuan: “Chumi hun chhûng chuan Jehova’n thil tam tak min zirtîr a, Kristian ṭha lehzual ni tûrin min ṭanpui a ni. Amah ka rinchhan lehzual a ngaihnate leh ka mi mal inzirnaa hmasâwn ka ngaihna laite ka hria a. Chu bâkah, khawi hmunah pawh Jehova rawngbâwl mah ila, hlimna nei thei tûra ka zir a ngai tih ka hria,” tiin a sawi. A hnuah, Janice leh a pasal chu bial kantu nia rawngbâwl tûra sâwm an ni a. A han ngaihtuah lêt chuan, Janice-i chuan: “Jehova’n ka beisei dân lo kawngin ka ṭawngṭaina chu min chhâng a ni. A chhânna duhawm tak hmu thiam tûrin hun ngai deuh mah se, a hmangaihna leh ngilneihna ka dawn avângin ka lâwm tak zet,” tiin a sawi a ni.
Jehova’n i ṭawngṭaina a chhâng lo nia i hriat chuan, thil dang tâna ṭawngṭai chu ngaihtuah ang che (Paragraph 15-na en rawh) f
15. Engvângin nge kan ṭawngṭainaah dîl bîk neih loh châng kan neih a ngaih mai theih? (Milem en bawk rawh.)
15 Zawhna pathumna chu, ‘Thil dangte tân pawh ka dîl tûr a ni em?’ tih a ni a. Ṭawngṭainaa dîl bîk neih chu a ṭha nachungin, a châng chuan dîl bîk kan neih loh hian kan tâna Jehova duh zâwngte kan hre thiam thei a ni. Lalram Chanchin Ṭha Puangtute School kal dîla ṭawngṭaitu pasal nei lo unaunu thiltawn kha lo ngaihtuah ta ila. Ani chuan mamawh zualna hmuna rawng a bâwl theih nân chu school chu kal a duh a. Chuvângin, chu school kal tûra sâwmna dawng tûra a ṭawngṭai zawm zêl rualin, a rawngbâwlna zauh theihna hun remchâng dang a hriat theih nân Jehova hnênah a ṭanpuina a dîl thei bawk a ni. (Tirh. 16:9, 10) Ani chuan a awmna hnaia pioneer mamawh zualna kohhran a awm leh awm loh chu an bial kantu chu zâwtin a ṭawngṭaina milin hma a la thei a. A nih loh leh, ani chuan Lalram thuchhuahtu mamawh lehzualna a awm leh awm loh branch office-ah lehkha ziakin a zâwt thei bawk a ni. e
16. Eng nge kan rin ngheh tlat theih?
16 Kan sawiho tâk angin, kan ṭawngṭainate chu Jehova’n hmangaihna nei tak leh dik takin a chhâng ang tih kan ring nghet tlat thei a. (Sâm 4:3; Is. 30:18) Kan beisei dân kawnga chhânna kan dawn loh châng pawh a awm thei a ni. Mahse, Jehova chuan kan ṭawngṭainate chu ngaithla lovin a awm ngai lo. Min hmangaih hle si a. Min thlahthlam ngai lo vang. (Sâm 9:10) Chuvângin, ṭawngṭaia i thinlung leihbuain “englai pawhin amah chu ring” chhunzawm zêl ang che.—Sâm 62:8.
HLA 43 Lâwm Thu Sawi Ṭawngṭaina
a He thuziak hian kan ṭawngṭainate chu Jehova’n hmangaihna nei tak leh kawng dik takin a chhâng ṭhîn tih kan rin theih chhan min hrilhfiah ang.
b Hming ṭhenkhat chu thlâk a ni.
c Vênnainsâng February, 2022 chhuak p. 3-6-naa “Jehova’n Thil Dik A Ti Reng Ṭhîn Tih Ring Tlat Rawh,” tih thuziak chu en rawh.
d Jehova’n hrehawm tawrhnate chhel taka tuar chhuak thei tûra min ṭanpui dân hriat belh nân, jw.org-a Ṭawngṭaina Chuan Tuar Chhuak Tûrin Min Ṭanpui, tih video chu en ang che.
e Branch rawngbâwlna bial danga rawngbâwl theih dân hriat belh nân, Jehova Duh Zâwng Ti Tûra Kan Inrêlbâwl Dân, tih lehkhabu bung. 10, par. 6-9-na en ang che.
f MILEM HRILHFIAHNA: Unaunu pahnih chu Lalram Chanchin Ṭha Puangtute School kal tûra dîlna an thleh luh hmaiin an ṭawngṭai. A hnuah, pakhat chuan sâwmna a dawng a, a dang pakhat chuan a dawng lo. Sâwmna dawng lo zâwk unaunu chuan lunghnualna nei lovin, a rawngbâwlna zauh theihna remchâng dang hriattîr tûra ṭanpui tûrin Jehova hnênah a ṭawngṭai. Chu bâkah, ani chuan mahni inpe a, mamawh zualna hmuna rawngbâwl tûrin branch office-ah lehkha a ziak.
