1. Israel mite hnêna zawlnei Isaia thuchah ken chu eng nge ni?

 ZAWLNEI Isaia chuan Jehova chu “thutak Pathian” a nih thu a sawi a. Heta “thutak” tia lehlin thu mal hi “amen” tihna a ni. (Is. 65:16) “Amen” tih chu “ni rawh se,” a nih loh leh “a dik e” tihna a ni a. Bible-in “amen” tih thu mal chu Jehova leh Isua chungchânga a hman hian, thil eng emaw chu a dik tih a nemnghehna a ni. Chuvângin, Israel mite hnêna Isaia thuchah chu a chiang a ni: Jehova hrilh lâwkte chu engtik lai pawhin a rin tlâk a ni tih chu. Jehova’n a thutiam zawng zawngte thlen famkimtîrin chumi dikzia chu a nemnghet a ni.

2. Engvângin nge kan nakin hun atâna Jehova thutiamte chu kan rin theih, eng zawhnate nge kan sawiho vang?

² Kan nakin hun chungchânga Jehova thutiamte chungah chutiang rinna chu kan nei thei em? Isaia hun aṭanga kum 800 dâwn a liam hnuah, tirhkoh Paula chuan Pathian thutiamte kan rin theih chhan chu a hrilhfiah a. Ani chuan “Pathian daw rual lo” a nihna chu a târ lang a ni. (Heb. 6:18) Sunhlu kûnga thei dang a rah thei lo ang bawkin, thutak Hnâr, Jehova chuan dâwt a sawi thei lo. Chuvângin, kan nakin hun  atâna Jehova thutiamte pawh telin a thusawi zawng zawngte chu kan ring tlat thei a ni. He thuziakah hian, hêng zawhna: Jehova’n nakin hun atân eng nge pêk min tiam? Jehova’n a thutiamte a thlen famkimtîr ang tih engtin nge a nemngheh? tihte hi kan enho vang.

3. (a) Pathian chhiahhlawhte’n eng thutiam nge an ngaihhlut? (Thu Puan 21:3, 4) (b) Chu thutiam kan hrilh hunah engtin nge mi ṭhenkhatin an chhân lêt?

³ Kan sawiho tûr thutiam hi khawvêl puma Pathian chhiahhlawhte ngainat tak a ni a. (Thu Puan 21:3, 4 chhiar rawh.) Jehova chuan “thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang,” tiin min tiam a ni. Kan zînga tam tak chuan Paradis chungchâng mi dangte kan hrilh hunah, he Bible châng thlamuanthlâk tak hi kan hmang ṭhîn a. Engtin nge mi ṭhenkhatin chu chu an chhân lêt? Anni chuan, “A ṭha lutuk a, a thlen theih tak tak ka ring lo,” tiin an sawi mai thei.

4. (a) Eng nge Jehova’n a hriat lâwk? (b) Thutiam min pêk mai bâkah, eng nge a tih bawk?

⁴ Jehova’n Paradis-a nun chungchâng thutiam ziak tûra tirhkoh Johana a thâwk khum lai khân, mite hnêna Lalram thuchah kan puannaah he beiseina hi kan hrilh dâwn tih a hria a. Mi tam takin “thil tharte” chungchânga chu thutiam chu rin harsa an ti dâwn tih a hre lâwk bawk. (Is. 42:9; 60:2; 2 Kor. 4:3, 4) A nih leh, engtin nge Thu Puan 21:3, 4-a malsâwmnate chu a lo thleng ngei ang tih keimahni ngeiin kan chian a, mi dangte pawh kan chiantîr theih? Jehova chuan he thutiam thlamuanthlâk tak hi min pêk mai bâkah, a lo thleng ngei ang tih kan rin theih nachhan tûr ṭha takte min pe bawk a ni. Eng chhan ṭha takte nge min pêk?

5. Paradis chungchânga Pathian thutiam rin nachhan tûr eng nge kan neih a, chu chu khawiah nge kan hmuh theih?

⁵ Kan chhiar tâk Bible châng zawmah Jehova tiam Paradis chungchâng kan rin theih chhante kan hmu a. Chutah chuan: “Tin, lalṭhutphaha ṭhu chuan, ‘Ngai teh, thil engkim ka siam thar e,’ a ti a. Tin, ‘Ziak rawh, hêng thu hi a rinawmin a dik si a,’ a ti a. Tin, ka hnênah, ‘A lo thleng ta. Kei Alpha leh Omega, a Bul leh a Tâwp ka ni,’” tiin kan chhiar a ni.—Thup. 21:5, 6a.

6. Engvângin nge Thu Puan 21:5, 6-a thute chuan Pathian thutiam kan rinna a tihngheh?

⁶ Engvângin nge chu Bible châng chuan Pathiam thutiam kan rinna a tihngheh? Chumi chungchângah Revelation Climax tih lehkhabu chuan: “Mi rinawmte tâna nakin hun malsâwmnate chu Jehova ngeiin a nemnghet, a nih loh leh hming ziaka tinghet ang a ni ,” b tiin a sawi. Pathian thutiam chu Thu Puan 21:3, 4-a târ lan a ni a. Mahse, châng 5 leh châng 6-ah chûng thutiamte chu a thlentîr ngei ang tih Pathianin hming ziaka a tihnghehna, a nih loh leh a nemnghehna chu kan hmu a ni. Jehova’n a thutiamte a nemnghehnaa a thu mal hmante chu i lo bih chiang ang u.

7. Châng 5-naah chuan tuin nge thu sawi a, chu chu engvângin nge a chhinchhiah tlâk?

⁷ Châng 5-na chu: “Lalṭhutphaha ṭhu chuan,” tiin a inṭan a. (Thup. 21:5a) Hei hi Jehova ngeiin Thu Puan bu-a inlârnaahte thu a sawi ṭum thum zînga ṭum khat a ni. Chuvângin, he thutiam nemnghehna hi vântirhkoh thiltithei tak emaw, tho leh Isua emaw ni lovin Jehova ngeiin a pêk a ni a. Chu chuan a dawta thute kan rinngheh theih chhan chu a tichiang lehzual a ni. Engvângin nge? Jehova chu Pathian “dâwt sawi thei lova” a nih vâng a ni a. (Tit. 1:2) He thu hian Thu Puan 21:5, 6-a thute rin tlâkzia a târ lang a ni.

8. Jehova chuan a thutiamte a thleng famkim ngei ang tih engtin nge a sawi uar? (Isaia 46:10)

⁸ Tûnah, “Ngai teh” tih thu mal hi i lo ngaihtuah ang u. (Thup. 21:5) “Ngai teh” tih ṭawngkam hi Thu Puan bu-ah vawi eng emaw zât hman a ni a. Hrilhfiahna pakhat chuan he thu mal hi “a zawma chhiar tûr thute ngaihven tûra a chhiartu sâwm nâna” hman a nih thu a sawi. A chhunzawmnaah Pathianin eng nge a sawi? “Thil engkim ka siam thar e,” tiin a sawi a ni. Jehova chuan nakin huna inthlâkthlengna lo awm tûrte chungchâng a sawina ni mah se, chu thutiam chu a thlen famkimtîr ang tih a chian êm avângin thilthleng tawh angin a sawi a ni.—Isaia 46:10 chhiar rawh.

9. (a) Jehova’n, “Thil engkim ka siam thar e,” a tih khân eng a sawina nge ni? (b) Tûna “vân” leh “lei” awmte chungah eng thil nge thleng ang?

⁹ Jehova’n, “Thil engkim ka siam thar e,” a tih khân, eng a sawina nge? Thu Puan bung 21-a chu ṭawngkam chuan Jehova tih tûr thil pahnih—thlâkthlengna leh siam tharna—a kâwk a ni. A hmasain, Jehova’n eng nge a thlâkthleng ang? Thu Puan 21:1-ah chuan: “Vân hmasa leh lei hmasa chu a boral tawh a,” tiin kan chhiar a. “Vân hmasa” chuan Setana leh a ramhuaite thununna hnuaia awm politics sawrkârte a kâwk a. (Mt. 4:8, 9; 1 Joh. 5:19) Bible-in “lei” tih thu mal a hman hian leia chêng mihringte a kâwk bawk. (Gen. 11:1; Sâm 96:1) Chuvângin, “lei hmasa” chuan mihring suaksualte a kâwk a ni. Jehova chuan tûna “vân” leh “lei” hi a siam thar emaw, a siam ṭha emaw mai dâwn lova, a tiboral zâwk dâwn a. Chu chu “vân thar leh lei thar”—sawrkâr thar leh thuawih mihringte—hmangin a thlâk dâwn a ni.

10. Eng nge Jehova’n a siam thar ang?

¹⁰ Thu Puan 21:5 -ah Jehova’n a thil siam thar tûr chungchâng a sawite chu kan hmu thei a. Jehova’n, “Thil tharte ka siam e,” ti lovin, “Thil engkim ka siam thar e,” a tih hi chhinchhiah ang che. Ani chuan leilung leh mihringte hi ṭhat famkimna dinhmuna hlângkaiin a siam thar dâwn a ni. Isaia hrilh lâwk angin leilung pumpui hi Eden huan mawi takah a chantîr ang. Mi mal tak pawhin siam tharin kan awm bawk ang a. Ke baite, mitdelte leh, bengngawngte chu tihdamin an awm ang a, mitthite hial pawh kaihthawh an ni ang.—Is. 25:8; 35:1-7.

11. Jehova’n eng ti tûrin nge Johana thu a pêk a, engvângin nge?

¹¹ Pathianin amah kan rinchhan thei tih min chiantîr tûrin eng thil dang nge a sawi? Johana hnênah: “Ziak rawh, hêng thu hi a rinawmin a dik si a,” tiin a sawi zawm a. (Thup. 21:5) Jehova chuan “ziak” tûra hrilh mai lovin, a ziah chhan tûr pawh a hrilh bawk a ni. Ani chuan: “Hêng thu hi a rinawmin a dik si a,” a ti a—Pathian thute chu a rinchhan tlâk tihna a ni. Johana’n “ziak” tûra thupêk chu a zawm avângin kan lâwm hle a. Chutianga a tih avângin, Pathian tiam Paradis chungchâng chu kan chhiar theiin, malsâwmna kan dawn tûrte chu kan chhût ngun thei a ni.

12. Engvângin nge Jehova’n: “A lo thleng ta,” tia a sawi theih?

¹² A dawtah Pathianin eng nge a sawi? “A lo thleng ta,” tiin a sawi a ni. (Thup. 21:6) Hetah hian thutiam Paradis chungchânga a sawi zawng zawngte chu thleng famkim vek tawh angin a sawi a. Chutianga a sawi theih chhan  chu, a thiltum tihlawhtling lo tûrin eng thil mahin a dâl theih loh vâng a ni. Jehova’n a thutiam kan rin theih chhan thiltithei tak dang a sawi bawk a. Chu chu eng nge?

13. Engvângin nge Jehova’n: “Kei Alpha leh Omega ka ni,” tia a sawi?

¹³ Târ lan tâk angin, Johana hnêna inlârnaah Jehova ngeiin ṭum thum zet thu a sawi a. (Thup. 1:8; 21:5, 6; 22:13) Thu a sawi apiangin, “Kei Alpha leh Omega ka ni,” tih thu hi a sawi tel a. Alpha leh omega chu Grik hawrawpa hmasa ber leh hnuhnûng ber a ni a. Jehova’n “Alpha leh Omega” tih thu malte a hman hian, thil eng emaw bul a ṭan hian a hlenchhuak ngei ṭhîn tih a târ lang a ni.

14. (a) Jehova’n “Alpha” tia a sawi hun leh “Omega” tia a sawi hun tûr entîrna pe rawh. (b) Genesis 2:1-3-naah eng nemnghehna thu nge kan hmuh?

¹⁴ Jehova’n Evi leh Adama te a siam hnuah mihringte leh leilung atâna a tîra a thiltum chu a hrilh a. Bible chuan: “Pathianin anmahni mal a sâwm a; Pathian vêkin an hnênah, ‘Chi tam tak thlaha lo pungin, leilung hi luah khat ula . . . a ti a,’” tiin a ziak a ni. (Gen. 1:28) Chutih lai chuan Jehova chu “Alpha” tia sawi ang a ni. A thiltum chu chiang takin a târ lang a: Evi leh Adama te thlah thuawih leh ṭha famkimte’n leilung hi luah khata Paradis-a an chantîr hun a lo la thleng ang. Chutih hunah chuan Jehova chu “Omega” tia sawi ang a ni dâwn a ni. “Lei leh vân chu an chunga awmho zawng zawngte nên chuan siam zawh” a nih hnuah Jehova chuan a thutiam nemnghehna a pe a. Chu chu Genesis 2:1-3-ah kan hmu thei a. (Chhiar rawh.) Jehova’n ni sarih nî chu serh tûrin a tihrang a ni. Chumi awmzia chu eng nge ni? Mihringte leh leilung atâna a thiltum chu a hlen ngei ang tih a nemnghehna a ni. Ni sarih nî a zawh chuan a  thiltum zawng zawng chu a thleng famkim vek tawh ang.

15. Setana chu mihringte tâna Pathian thiltumte tichhia angin engvângin nge a lan theih?

¹⁵ Evi leh Adama te an hel khân misual an lo niin, sual leh thihna chu an thlahte hnênah an hlân chhâwng a. (Rom 5:12) Chuvângin, leilung hi mihring ṭha famkimte luah khahtîr tûra Pathian thiltum chu Setana’n a tichhe ta angin a lang thei a. Ani chuan Jehova chu “Omega” tia sawi thei lo tûra siam angin a lang a ni. Jehova chu duh thlan tûr dang nei tlêm hle angin a ngai thei a. Duh thlan theih pakhat chu Evi leh Adama te tihboral a, mihringte tâna a thiltum tihlawhtling tûra nupa ṭha famkim dang siam leh hi a ni. Mahse, Pathianin chutiang chuan lo ti ta se, dâwt sawiah a puh ngei ang. Engvângin nge? Genesis 1:28-a chhinchhiah angin, Jehova’n Evi leh Adama te hnênah an thlahte’n lei hi an luah khat ang tia a lo hrilh tawh vâng a ni.

16. Engvângin nge Setana’n Jehova chu hlawhchham nia puh thei tûra a inngaih mai theih?

¹⁶ Setana’n Pathian chu duh thlan tûr dang eng nge nei nia a ngaih mai theih? Jehova’n Evi leh Adama te chu ṭhat famkimna nei ngai lo tûr thlah ṭha famkim lote neihtîr a phal a ring mai thei. (Thur. 7:20; Rom 3:23) Chutianga Pathianin a tih chuan, Diabola chuan hlawhchham niin a puh ngei ang. Engvângin nge? He duh thlanna hian Evi leh Adama thlah ṭha famkim leh thuawihte lei luah khahtîr tûra Pathian thiltum chu a hlawhtlintîr dâwn loh vâng a ni.

17. Engtin nge Jehova’n Setana leh mihring hmasa berte helna chu a chinfel a, chu chuan eng rah nge a chhuah ang? (Milem en bawk rawh.)

¹⁷ Jehova chuan Setana leh mihring hmasa berte helna chu Setana ngaihtuah phâk ngai loh tûr kawngin a chingfel a. (Sâm 92:5) Evi leh Adama te chu fate neihtîr phalna hmangin Jehova chuan dâwt sawitu ni lovin a thusawi anga thil a tihzia a nemnghet zâwk a. Hlawhchham ni lovin hnehna changtu a nihzia a târ lang zâwk bawk. A thiltum tihlawhtling tûrin Evi leh Adama thlahte chhandamtu tûr “thlah” a pe a ni. (Gen. 3:15; 22:18) Setana chuan Jehova tlanna ruahmanna chu mak a ti hle ngei ang! Engvângin nge? Chu chu mahni hmasial lo hmangaihna ṭanchhana siam ruahmanna a nih vâng a ni. (Mt. 20:28; Joh. 3:16) Chu mizia chu Setana neih ve loh mizia a ni a. A nih chuan, tlanna ruahmanna avângin eng thil nge lo thleng ang? A tîra Jehova thiltum angin kum  sâng khat hnuah chuan Evi leh Adama thlah ṭha famkimte’n lei Paradis chu an luah ang. Chutih hunah chuan, Jehova’n “Omega” tiin a sawi tawh ang.

18. Pathianin rinnghehna tûr chhan eng pathum nge min pêk? (“ Jehova Thutiamte Rin Nghehna Tûr Chhan Pathum,” tih bâwm chu en bawk rawh.)

¹⁸ Kan sawiho tawh angin, Paradis chungchânga Jehova thutiam ringhleltute hnênah, a lo thleng ngei ang tih rinnghehna tûr chhan engte nge kan hrilh theih? Pakhatna, Jehova ngeiin thu a tiam a ni. Thu Puan bu chuan: “Lalṭhutphaha ṭhu chuan, ‘Ngai teh, thil engkim ka siam thar e,’ a ti a,” tiin a ziak a. Ani chuan a thiltum thlen famkimtîr tûrin finna te, thiltihtheihna te leh, duhnate a nei a ni. Pahnihna, Jehova tân a thiltumte a thleng famkim ngei ang tih a chian êm avângin, a thlîrna aṭang chuan thleng famkim tawh ang a ni. Ani chuan: “Hêng thu hi a rinawmin a dik si a. . . . A lo thleng ta,” tiin dik takin a sawi thei a ni. Pathumna, Jehova’n thil eng emaw bul a ṭan hian, a hlawhtlintîr ngei ngei ṭhîn, chu chu: “Kei Alpha leh Omega ka ni,” tih thu hian a nemnghet a. Ani chuan Setana chu dâwt sawi hmang leh hlawhchham a nihzia a târ lang dâwn a ni.

19. Mite’n Pathian tiam Paradis an rinhlelh hunah eng nge i tih theih?

¹⁹ Rawngbâwlnaa i mi tawhte hnêna Jehova’n a thutiamte a nemngheh dân i hrilh apiangin, a thutiamte i rinna i tinghet tih hre reng ang che. Chuvângin, Thu Puan 21:4-a thu ang chi Paradis lo thleng tûr chungchânga thutiam thlamuanthlâk tak i chhiar hunah tu emawin, “A ṭha lutuk a, a thlen theih pawh ka ring lo,” ti ta se, eng nge i tih theih? Engvângin nge châng 5 leh châng 6 chu chhiara i hrilhfiah loh vang? Jehova’n a thutiamte a thlentîr ngei ang tih hming ziaka tinghet ang maia a nemngheh dân chu hrilh ang che.—Is. 65:16.