Bethel-a unaupate chuan New York Khawpui, Staten Island-a WBBR radio station sakna chu kum khat chuang an lo kalpui tawh a. A hmunhmate an thenfai hnuah hnathawktute awmna tûr in lian tak an sa a, hmanraw dah khâwmna tûr in a hranin an sa bawk a ni. In sak zawh a nih chuan, unaute chuan radio-a thu puanna atâna hmanraw mamawhte chu an la khâwm ṭan a. Mahse, harsatna ṭhenkhatin a hmuak a ni.

Unaute chuan station atâna antenna vuah chu thil awlsam a ni dâwn lo tih an hre ta thuai a. Meter 91-a (ft 300) sei antenna chu meter 61-a (ft 200) sâng ban pahnih inkâra khai a ngai a. A vawikhatnaah chuan an hlawhchham a ni. Mahse, a tâwpah chuan Jehova ṭanpuina rinchhanin an hlawhtling ta a. Chumi project-a tel Calvin Prosser-a chuan: “A vawikhatnaah lo hlawhtling ta ila chu, ‘Kan thil siam hi han en teh u!’ tiin kan inchhuang hle ngei ang,” tiin a sawi. Unaupate chuan nasa takin Jehova an chawimawi a; mahse, harsatna dang an la nei a ni.

Radio-a thu puan chhuah chu thil thar a la nih avângin hmanraw mamawh lei mai tûr a awm lo va. Chuvângin, unaute chuan tualchhûnga siam current watt 500 hmang radio pêk chhuahna khâwl hlui chu an hmang a. Microphone lei lovin phone pângngaia aw mantu chu an hmang bawk a ni. February thla zan khat chu, unaute chuan an hmanraw lâk khâwmte chu hman chhin an tum a. Program puan tûr an mamawh avângin Lalram hlate chu an sa ta mai a. Unau Ernest Lowe-a chuan chumi ṭuma thilthleng nuihzatthlâk tak chu a sawi a, an zai lai chuan an awmna aṭanga kilometer 25-a (mêl 15) hlaa awm, Brooklyn-a a radio  aṭanga an zai lo ngaithlatu Judge Rutherford-a b chuan a rawn phone ta thut mai a ni.

“In zai ngaihnawm loh zet kha titâwp rawh u! A hrâmin in hrâm alâwm mawle,” tiin a rawn sawi a. Unaute chuan inthlahrung deuhvin program chu an titâwp vat a; mahse, radio aṭanga thu puang tûrin an inpeih tawh tih an hria a ni.

Kum 1924, February 24-a a ṭum khatna atâna radio-a thu puanna an neihnaah Unau Rutherford-a chuan radio station chu “Messia lalram zauhnaa hman tûrin” a hlân a. Radio station din a nih chhan chu “mi zawng zawngin Bible thutak leh kan chênna hun pawimawhna an hriat theih nân” a nih thu a sawi a ni.

Radio hmanga thupuan chhuahna hmasa ber chu a hlawhtling hle a. WBBR chu Jehova mite thupuan chhuahna atân kum 33 chhûng hman a ni ta a ni.

Kum 1924, July thlaah Bible Zirlaite chu Ohio, Columbus-ah inkhâwmpui hmang tûrin an inhmu khâwm a. Khawvêl hmun hrang hrang aṭanga rawn kal khâwmin, thusawite chu Arabic, English, French, German, Greek, Hungarian, Italian, Lithuanian, Polish, Russian, Scandinavian ṭawngte leh, Ukrainian-tein an ngaithla a ni. Thusawi ṭhenkhat chu radio-a tihchhuah a nih bâkah, unaute chuan Ohio State Journal chu nî tina inkhâwmpuia thilthlengte chungchâng chanchin bua chhuah tûrin an ti bawk a ni.

July 24, Nilaithawhṭanni chuan inkhâwmpuia lo tel mi 5,000 chuangte chu thu hrilin an chhuak a. Lehkhabu 30,000 dâwn lai sem chhuakin Bible zirna sâng têl an ṭan thei a. Vênnainsâng chuan chu nî chu “inkhâwmpuia hun hlimawm ber” tiin a ko a ni.

July 25, Zirtâwpnia a thusawiah Unau Rutherford-a chuan sakhaw hruaitute demna chungchâng inziahna lehkha chu huaisen takin a chhiar chhuak a. Politics, sakhuana leh, sum dâwnna lama hruaitute chuan “Pathianin mihringte malsâwmna pêk nâna a hman tûr Pathian Ram chungchânga thutak chu mite’n an zirna tûr an dâl” thu a sawi a ni. Chu bâkah, chûng mite chuan “League of Nations chu thlâwpin ‘he leia Pathian ram sawrkârna lan chhuahna’ a ni,” tia an sawi thu demna lehkhaah chuan târ lan a ni bawk a. Bible  Zirlaite chuan mite hnêna chu thuchah puang chhuak tûr chuan huaisenna leh tumruhna an mamawh ngei ang.

Chu inkhâwmpuiin nghawng a neih dân chu Vênnainsâng chuan heti hian a sawi a ni: “He Lalpa sipai pâwl tlêm tê Columbus Inkhâwmpuia inhmu khâwmte hi an rinna tihchakin a awm a. . . , hmêlmate thiltihtheihna, a nih loh leh beihna eng mahin a tichhe thei lo,” tiin. Inkhâwmpuia tel Leo Claus-a chuan: “Chu inkhâwmpui aṭang chuan kan bial chhûnga demna thu puang chhuak tûra tihthathovin kan awm a ni,” tiin a sawi.

October thlaah Unau Rutherford-a chhiar chhuah tâk demna thu telna Ecclesiastics Indicted tih tract chu Bible Zirlaite chuan copy maktaduai chuang print chhuakin an sem ṭan a. Oklahoma-a khaw te tak tê Cleveland-ah chuan Frank Johnson-a’n unaute an lo thlen hma minute 20 vêlah tract chu a sem zo mai a. Mahse, a khaw mi, a thu hrilhna avânga lungawi lote’n an zawn avângin a tân mi veivâk tamna hmuna awm chu a him lo va. Chuvângin, Unau Johnson-a chu a bul hnaia church-ah a biru ta a. A chhûngah chuan tu mah a hmuh loh avângin Ecclesiastics Indicted tih tract chu thu hriltu Bible kârah a zep a, ṭhutna tinah a dah bawk. Rang takin church chu a chhuahsan a. Hun tlêm azâwng a la neih avângin church dang pahniha kal lehin chutiang bawk chuan a ti leh a ni.

Tichuan, Frank-a chu unaute nêna an inhmuhna tûr hmunah chuan rang takin a kal a. Amah zawngtu mite thlîthlaiin petrol station hnungah a biru leh a. A bul lawkah motor-in an rawn tlân a; mahse, an hmu lo. An kal liam veleh, a chheh vêla thu hrila awm unaute nên chuan an inhmu ta a. Tichuan, an zavaiin khua chu an chhuahsan ta a ni.

Unaupa pakhat chuan: “Khua kan chhuahsan lai chuan church pathum chu kan tlân pêl a. Church tin hmaah chuan mi 50 bâwr vêl an ding a. Mi ṭhenkhatin tract chu an chhiar a. Mi dangte chuan thu hriltu hmuh theih nân an lek kâng a. Kan tlân chhuak hman ṭâwk a ni! Mahse, min vênhim avâng leh Lalram hmêlmate fin khalh tûra min ṭanpui avângin kan Pathian Jehova chungah kan lâwm a ni,” tiin a sawi.

Ram danga Bible Zirlaite pawhin chutiang tho chuan huaisenna lantîrin thu an hril a. France hmâr lamah, Józef Krett-a chuan Poland aṭanga lo kal lungalhthei lai chhuaktute hnênah thu a hril a. “Mitthite Chu Kaihthawh An Ni Thuai Ang” tih thupui hmanga thusawina nei tûra tih a ni a. Inkhâwm sâwmna chu a khaw mite hnêna sem a nih chuan tualchhûnga sakhaw hruaitu chuan a kohhran mi leh sate chu kal lo tûrin a vau va. Mahse, beisei loh tak thil a thleng. Amah pawh tiamin mi 5,000 aia tamin thusawi chu an va ngaithla a nih chu! Unau Krett-a chuan sakhaw hruaitu chu a thurinte humhim tûra ding chhuak tûrin a sâwm a. Mahse, a duh lo. Unau Krett-a chuan a thusawi ngaithlatute’n Pathian Thua tuihâlna nasa tak an nei tih a hriat avângin thu leh hla chhuah a kente chu a sem ta vek a ni.—Amosa 8:11.

Claude Brown-a chuan Africa-a Gold Coast, tûna Ghana tiha kohvah chuan chanchin ṭha a hril a. A thusawite leh thu leh hla chhuah a sem chhuahte chuan chu ramah thutak chu rang takin a darh zautîr a ni. Damdawi lam zir mêk John Blankson-a chuan Unau Brown-a thusawi chu a ngaithla a. Thutak a hmu tih a inhre ta thuai a ni. “Thutak chuan min tiphûr hle a. Chuvângin, damdawi lam zirna school-ah chuan mi tam tak  hnênah thutak chungchâng chu ka hrilh ta a ni,” tiin a sawi.

John-a chuan Trinity thurin chu Bible zirtîrna a ni lo tih a hre thiam tawh a. Chuvângin, ni khat chu Anglican church-a kalin sakhaw hruaitu chu a va zâwt a. “Kristian pawh i ni lo; Setana pâwl i nih kha. Chhuak vat rawh!” tiin sakhaw hruaitu chuan thinur takin a lo hnawt chhuak a ni.

In a thlen chuan, John-a chuan sakhaw hruaitu chu vântlâng hmaa Trinity thurin humhima sawifiah tûra chona lehkha a thawn a. A hnuah, sakhaw hruaitu chuan ani chu an school-a principal office-ah a ko va. Chutah chuan an zirtîrtu chuan sakhaw hruaitu hnêna chu lehkha chu a thawn leh thawn loh a lo zâwt a ni.

John-a chuan, “Aw, ka thawn alâwm,” tiin a chhâng a.

Chutah, zirtîrtu chuan sakhaw hruaitu hnênah ngaihdam dîlna lehkha ziak tûrin a lo ti a. Chuvângin, John-a chuan heti hian a ziak ta a ni:

“Ka pu, kan zirtîrtuin i hnêna ngaihdam dîlna lehkha ziak tûrin min ti a. Mahse, i thu zirtîr hi zirtîrna dik lo a ni tih i pawm chauhvin chu chu ka ziak ang,” tiin.

Zirtîrtu chuan mak ti takin: “Blankson, khatianga ziah kha i tum tak tak a maw?” a ti a.

“Aw. Heti bâk hian ka ziak thei lo.”

“A nih chuan, school aṭanga hnawh chhuah i ni ang. Sawrkâr thlâwp church hruaitu hnêna khatiang thil sawiin sawrkâr zirna inah i zir reng theih i ring em ni?”

“Mahse, Zirtîrtu, . . . thil min zirtîr laia hriatthiam loh kan neihin zawhna kan zâwt ṭhîn che tiraw?”

“Zâwt ṭhîn e.”

“Chu zawng chu a ni ka tih chu. Kha pu zahawm tak khân Bible min zirtîr a, zawhna ka zâwt a. Ka zawhna min chhânsak thei lo va, engvângin nge a hnêna ngaihdam dîlna lehkha ka ziah ang?”

Blankson-a chu hnawh chhuah a ni ta lo va. Ngaihdam dîlna lehkha pawh thawn a ni ta lo.

Chumi kuma thiltihte chu khaikhâwmin Vênnainsâng chuan: “Davida angin, ‘Nangin inbeihna atân chuan chaknain ka taiah mi hrêng si a,’ tiin dik takin kan sawi thei a. (Sâm 18:39) Jehova’n a rawngbâwlnaa min ṭanpui dân kan hmuh avângin kumin hi kum phûrawm tak a ni . . . A tihthianghlima awmte chuan . . . hlim takin thu an hril a ni,” tiin a sawi.

Chumi kum tâwp lamah chuan unaute chuan radio hmanga thu hrilhna chu zauh an tum a. Chicago khaw bulah radio station dang an din leh a. Chu station thar chu inâwm takin WORD (THU) tia koh a ni. WORD chuan current watt 5,000 hmang radio pêk chhuahna hmangin mêl za têla hla Canada hmâr lam thlengin Lalram thuchah chu a puang chhuak a ni.

Kum 1925 chuan Bible Zirlaite chungah thlarau lam êng mawi tak, Thu Puan bung 12 chungchânga hriatthiamna thar chu a pe a. Chu chu mi ṭhenkhat tân tlûk phahna a ni a. Mahse, a tam zâwk chuan hmuh theih loh vân lam nêna inkûngkaih thilthleng leh chumiin leia Pathian mite chunga nghawng a neih dân hriatthiamna chu lâwm takin an pawm a ni.