ZIR TUR THUZIAK 40
HLA 30 Ka Pa, Ka Pathian leh Ka Ṭhian
Jehova’n “Lungchhiate Chu A Tidam”
“Lungchhiate chu a tidam a, an hliamte chu a tuam ṭhîn.” —SAM 147:3.
A TUM BER
Jehova’n rilru lama hliam tuarte chu a ngaihsak hle a. He thuziak hian nasa taka rilru hrehawmna kan neih huna min thlamuan dân leh mi dangte thlamuan tûra min ṭanpui dân a târ lang ang.
1. Jehova’n a chhiahhlawhte chu eng nge tihsak a duh?
JEHOVA’N leia a chhiahhlawhte a en hian eng nge a hmuh? Kan hlim laite leh lungngaih laite chu a hmu a ni. (Sâm 37:18) Rilru natna nasa tak nei chung pawha theih tâwp chhuaha a rawng kan bâwl tih a hmuh hian a va lâwm dâwn tak êm! Chu bâkah, min ṭanpui leh thlamuan a châk tak zet a ni.
2. Jehova’n lungchhiate chu eng nge a tihsak a, engtin nge a ngaihsakna chu kan hlâwkpui theih?
2 Sâm 147:3-na chuan Jehova’n lungchhiate “hliamnate chu a tuam ṭhîn,” tih a sawi a. He chângah hian Jehova chu rilru lama hliam tuarte duat taka ngaihsaktu anga târ lan a ni. Jehova ngaihsakna chu hlâwkpui tûrin eng nge kan tih ngai? Entîrna pakhat lo ngaihtuah ta ila. Doctor thiam tak chuan hliam tuar, tu emaw chu dam ṭha leh tûrin a enkawl thei a. Mahse, hliam tuartu chuan a dam chhuah leh nân doctor kaihhruaina pêk zawng zawng chu a zawm thlap a ngai ang. He thuziakah hian, Jehova’n rilru lama hliam tuarte tâna Bible-a thlamuanna thu a sawite leh hmangaihna nei taka thurâwn min pêkte kan nunpui theih dân kan sawiho vang.
JEHOVA’N A TAN KAN HLU TAK ZET TIH MIN HRIAT NAWNTIR
3. Engvângin nge mi ṭhenkhatin hlutna nei lo nia inhriatna an neih?
3 Hmangaihna tlâkchhamna khawvêlah kan nung a; chuvângin, mi tam tak chuan hlutna nei lo niin an inngai a ni. Unaunu Helen-i a chuan: “Hmangaihna awm lohna chhûngkuaah ka seilian a. Ka pa chuan kut min thlâk ṭhîn a, nî tin mai hian kan tlâktlai loh thu hlîr sawiin a âng ṭhîn,” tiin a sawi. Helen-i angin, kut tuara sawisêl hlawh fo leh hmangaihna dawng tlâk lo nia inhria i ni thei a. Chutiang a nih chuan, ngaihsak tak zettu che an awm tih rin chu i tân thil harsa tak a ni thei a ni.
4. Sâm 34:18-a sawi angin, Jehova’n eng nge min tiam?
4 Mi dangte’n ṭha lo takin cheibâwl che mah se, Jehova erawh chuan a hmangaih chein, a ngaihlu che tih i chiang thei a ni. “Thinlunga lungchhiate chu a hnaih ṭhîn” si a. (Sâm 34:18 chhiar rawh.) Hlutna nei lo nia inhriatna i nei a nih chuan, Jehova’n i mize ṭhate chu hmuin a lamah a hîp che tih hre reng ang che. (Joh. 6:44) A tâna i hlut êm avângin ṭanpui tûr chein a inpeih reng a ni.
5. Isua’n mi dangte hmuhsita awmte a cheibâwl dân aṭangin eng nge kan zir theih?
5 Isua chungchâng ngaihtuahna hmangin Jehova rilru put hmangte chu kan hre thei a. Leia rawng a bâwl chhûng khân, mi dangte hmuhsita awmte chu lainatna nei takin a cheibâwl a ni. (Mt. 9:9-12) Natna hrehawm tak tuar hmeichhe pakhatin tihdam beiseia Isua puan a deh khân, Isua chuan lo thlamuanin a rinna avângin a fak zâwk a. (Mk. 5:25-34) Isua’n a Pa miziate chu famkim takin a lantîr a ni. (Joh. 14:9) Chuvângin, Jehova’n a ngaihlu chein, i rinna leh amah i hmangaihna pawh tiamin, i mize ṭhate chu a hmu tih i chiang thei a ni.
6. Hlu lo nia inhriatna i nei a nih chuan eng nge i tih theih?
6 Hlu lo nia inhriatna i la nei reng emaw, i nei thar leh emaw a nih chuan eng nge i tih theih? Jehova’n a ngaihlu che tih târ langtu Bible chângte chu chhiarin chhût ngun ang che. b (Sâm 94:19) I thiltum i hlen thei lo emaw, mi dangte tih ang tluka i tih theih loh avânga lunghnualna i nei emaw a nih chuan, a lutukin inthiam lo suh. Jehova chuan i tih theih aia tam a phût lo che. (Sâm 103:13, 14) Kawng eng emawti taka ṭha lo taka cheibâwl i nih chuan chutianga cheibâwltu che thiltih avângin, inmawhchhiat suh. Chu chu i thiam loh a ni lo! Jehova chuan a tuartu ni lovin, a titu chungah ro a rêl dâwn tih hre reng ang che. (1 Pet. 3:12) A naupan laia ṭha lo taka cheibâwlna tâwk Sandra-i chuan: “Jehova min thlîr anga a ṭha zâwnga inthlîr thei tûrin a ṭanpuina dîlin ka ṭawngṭai fo ṭhîn,” tiin a sawi.
7. Engtin nge Jehova rawngbâwlnaah tûn hmaa kan thiltawnte chu kan hman ṭangkai theih?
7 Mi dangte ṭanpui tûrin Jehova’n a hmang thei che tih chu ringhlel ngai suh. Thu hrilh rawngbâwlnaah a thawhpui nih theihna chanvo hlu tak a pe che a. (1 Kor. 3:9) I nuna i thil lo tawn tawhte chuan mi dangte tawrhpui thiam tûr leh an rilru vei zâwngte hriatthiampui tûrin a ṭanpui ngei che ang a. An tân thil tam tak i tihsak thei a ni. Kan târ lan tâk Helen-i chuan ṭanpuina a dawng a, tûnah chuan mi dangte chu ṭha lehzualin a ṭanpui thei tawh a. “Jehova chuan kei, hlutna nei lo hi hmangaih nia inhria leh mi ṭangkai tak min nihtîr a ni,” tiin a sawi. Tûnah chuan, Helen-i chu regular pioneer niin hlim takin rawng a bâwl a ni.
JEHOVA’N A NGAIHDAMNA PAWM TURIN MIN DUH
8. Isaia 1:18-ah Pathian Jehova’n eng nge min tiam?
8 Jehova chhiahhlawh ṭhenkhat chu an baptisma chan hma, a nih loh leh chan hnua an thil tihsualte avângin, rilru hrehawm takin an awm a. Mahse, Pathian Jehova’n min hmangaih êm avângin tlanna a pe tih chu kan hre reng tûr a ni. Chuvângin, a thilpêk chu pawm tûrin min duh tih a chiang a. Jehova chuan amah nêna ‘kan ngaihtuah tlân’ c hnuah chuan kan sualnate chu a hre reng tawh lo tih min tiam a ni. (Isaia 1:18 chhiar rawh.) Jehova’n tûn hmaa kan thil tihsualte a chhinchhiah reng lo chu hmangaihna a va ni tak êm! Chutih rualin, kan thiltih ṭhatte chu a theihnghilh ngai lo a ni.—Sâm 103:9, 12; Heb. 6:10.
9. Engvângin nge hun kal tawh ni lovin, tûn hun leh hma lam hun thlîr tûra theih tâwp kan chhuah ang?
9 Tûn hmaa i thil tihsualin i rilru a la tihrehawm reng a nih chuan, hun kal tawh ni lovin, tûn hun leh hma lam hun chu theih tâwp chhuaha ngaihven tum tlat zâwk ang che. Tirhkoh Paula chungchâng hi han ngaihtuah teh. Kristiante chu tûn hmaa a lo tihduhdah ṭhin avângin pawi ti hle mah se, Jehova’n a ngaidam tawh tih a hria a ni. (1 Tim. 1:12-15) Paula chuan tûn hmaa a thil tihsualte chu a ngaihtuah reng em? Pharisai challang tak a nih laia a thil hlenchhuahte a ngaihtuah reng loh ang bawkin, chûngte chu a ngaihtuah reng lo vang tih a chiang hle. (Phil. 3:4-8, 13-15) Chu aiin, rawngbâwlnaah ṭhahnemngai taka thawkin, hma lam a thlîr tlat a ni. Paula ang bawkin hun kal tawh chu i thlâk danglam thei lo va. Mahse, tûna i dinhmun aṭangin Jehova i chawimawi thei a, hma lam hun atâna a thutiam ropui takte chu i thlîr tlat thei a ni.
10. Tûn hmaa kan thiltihin mi dangte a tinâ a nih chuan eng nge kan tih theih?
10 Tûn hmaa tu emaw i tihnat avângin rilru hrehawm takin i la awm pawh a ni thei a. Engin nge ṭanpui thei che? Tih tak zeta ngaihdam dîlna pawh tiamin, dinhmun siam ṭha leh tûrin i tih theih apiang ti ang che. (2 Kor. 7:11) Jehova hnênah i lo tihnat tawhte ṭanpui tûrin dîl la. Ani chuan nangmah leh i tihnat, tu emaw chu chhelna nei tûr leh thlamuanna nei leh tûrin a ṭanpui thei che u a ni.
11. Zâwlnei Jona hnên aṭangin eng nge kan zir theih? (A kâwma milem en bawk rawh.)
11 Tûn hmaa i thil tihsualte aṭangin inzir la, Jehova’n ṭha a tih ang apianga hman che inhuam rawh. Zâwlnei Jona chungchâng hi lo chhinchhiah ang che. Jehova thupêk anga Ninevi khuaa kal aiin, khaw dang daihah a tlânchhia a. Jehova zilh a tâwk a, a thil tihsual aṭangin a inzir a ni. (Jon. 1:1-4, 15-17; 2:7-10) Jehova chu Jona chungah a beidawng lo. Chuvângin, Ninevi khuaah chuan a tîr nawn leh a, tûn ṭumah chuan thuawih takin a kal vat a ni. A thil lo tihsual tawh avânga a inchhîrna chu Jehova mawhphurhna pêk hnâwl phah nân a hmang lo.—Jon. 3:1-3.
Zâwlnei Jona chu nghapui kawchhûng aṭanga a dam khawchhuah hnuah, Jehova’n Ninevi khuaa kala A thuchah puang tûrin a tîr nawn leh (Paragraph 11-na en rawh)
JEHOVA’N THLARAU THIANGHLIM HMANGIN MIN THLAMUAN
12. Engtin nge thil râpthlâk tak kan tawh hian Jehova’n min thlamuan? (Philippi 4:6, 7)
12 Thil râpthlâk tak kan tawh hunah pawh Jehova chuan a thlarau thianghlim hmangin min thlamuan a. Ron-a leh Carol-i te thiltawn hi han ngaihtuah teh. Lungchhiatthlâk takin an fapa chu a intihlum a. Anni chuan: “Tûn hmain hun khirh takte kan lo paltlang tawh a; mahse, tûn ṭum zet hi chu tawrh a hrehawm bîk hle. Zan tam tak mu thei lova kan awmin Jehova hnênah kan ṭawngṭai a; chuvângin, Philippi 4:6, 7-a târ lan thlamuanna chu kan dawng tak zet a ni,” tiin an sawi. (Chhiar rawh.) Lungchhiatna thlentu harsatna i hmachhawn mêk a nih chuan, i duh anga zingin leh i duh anga reiin i thinlung leih buain Jehova hnênah i ṭawngṭai thei a. (Sâm 86:3; 88:1) Jehova hnênah thlarau thianghlim dîl nawn fo vang che. I dîlnate chu a ngaihthlâksak reng dâwn si che a.—Lk. 11:9-13.
13. Engtin nge thlarau thianghlim chuan rinawm taka Jehova be chhunzawm zêl thei tûra min ṭanpui theih? (Ephesi 3:14-19)
13 Dinhmun harsa tak i tawhte chuan chau takin a siam che em? Thlarau thianghlim chuan rinawm taka Jehova be chhunzawm zêl tûrin a tichak thei che a ni. (Ephesi 3:14-19 chhiar rawh.) Unaunu Flora-i thiltawn hi lo ngaihtuah ta ila. A pasal nêna missionary nia rawng an bâwl laiin, a pasalin a rinawm lohsan avângin an inṭhen a. Ani chuan: “Ka pasalin min rinawm lohsan avângin eng lai pawhin rilru hrehawmin ka awm a, tuar chhuak thei tûrin Jehova hnênah thlarau thianghlim ka dîl a. Jehova chuan ka rilru dam leh thei tûr leh tawrh chhuah theih pawha ka inrin ngai loh chu tuar chhuak tûrin min ṭanpui a ni,” tiin a sawi. Pathianin amah rinchhan lehzual tûra a ṭanpui avângin a harsatna zawng zawngah a ṭanpui chhunzawm zêl ang tih a hre chiang a. “‘I thupêk kawngah chuan ka tlân ang, ka thinlung hi i tihzau hunah chuan,’ tih Sâm 119:32-a thute hi ka tân a dik tak zet,” tiin a sawi belh a ni.
14. Engtin nge Pathian thlarau chu keimahnia hna kan thawhtîr theih?
14 Thlarau thianghlim dîla i ṭawngṭaina milin engtin nge hma i lâk theih? Nangmaha Pathian thlarau hnathawhtîr theitu thiltihnaahte tel ang che. Chûngahte chuan inkhâwmte leh mi dangte hnêna thu hrilhte a tel a ni. Nî tin Jehova Thu chhiarin, a ngaihtuahnatein i rilru tikhat la. (Phil. 4:8, 9) Chutianga i chhiar hunah, Bible-a târ lan harsatna tâwkte chanchin chu chhinchhiahin, Jehova’n tuar chhuak tûra a ṭanpui dân chu chhût ngun ang che. Kan târ lan tâk Sandra-i chuan harsatna tam tak a tâwk a. “Josefa chanchin chuan min tichak hle a. Harsatna leh rorêl dik lohna a tawhte’n Jehova nêna an inlaichînna nghawngtîr a phal lohna chuan ka rilru a khawih lutuk,” tiin a sawi.—Gen. 39:21-23.
JEHOVA’N KAN RINPUITE HMANGIN MIN THLAMUAN
15. Tute hnên aṭangin nge thlamuanna kan hmuh theih a, anni chuan engtin nge min ṭanpui theih? (Milem en bawk rawh.)
15 Harsatna kan tawh hian kan unaute chu min “thlamuantute” an ni thei a. (Kol. 4:11) Anni chu Jehova’n min hmangaihzia a lan chhuahtîrna an ni tak zet a ni. Unaute chuan hriatthiamna nei taka min ngaihthlâksakin, hunte min hmanpuiin min thlamuan thei a; mi thlamuan thei tak Bible chângte min chhiarsakin min ṭawngṭaipui pawh a ni thei. d (Rom 15:4) A châng chuan, unau tu emawin Jehova ngaihtuah dân chu min hriat nawntîrin, chhel taka awm zêl tûrin min ṭanpui thei a. Kan Kristian unaute chuan kan mangan hunah kan rilru chhâwk zângkhai tûrin ei tûrte min siamsakin, ṭanpuina ṭangkai tak min pe pawh a ni thei a ni.
Ṭhian rin tlâk leh puitling takte chuan thlamuanna leh ṭanpuina min pe thei (Paragraph 15-na en rawh)
16. Ṭanpuina dawng tûrin eng nge kan tih theih?
16 Keimahni lam aṭanga ṭanpuina kan dîl hmasak a ngaih châng a awm thei a. Kan unaute chuan min hmangaih avângin ṭanpui min duh a ni. (Thuf. 17:17) Mahse, kan rilru awm dân emaw, kan mamawh emaw chu an hre lo pawh a ni thei a. (Thuf. 14:10) Rilru na taka i awm a nih chuan i rilru awm dân chu i ṭhian ṭhate hnênah hrilh hreh lo la. I mamawhte chu hriattîr ang che. Chu bâkah, kohhran upa i nêl tak pahnih khat hnênah i hrilh thei bawk. Unaunu ṭhenkhat chuan unaunu puitling takte nêna inkawmna aṭang pawhin thlamuanna an hmu a ni.
17. Engin nge fuihna kan dawnna tûr min dâl thei a, engtin nge chûngte chu kan hneh theih?
17 Inkulh hran duhna chu do vang che. Rilru natna nasa tak i neih avângin mi dangte nêna inbiak chu i châk lo pawh a ni thei a. I unaute’n hre thiam lo chein, i rilru tina thei thute an sawi châng a awm thei a ni. (Jak. 3:2) Mahse, chûngte chu i mamawh fuihna i dawnna tûr atân indâltîr suh. Rilru hahna nasa tak nei kohhran upa Gavin-a chuan: “Ṭhiante nêna inkawm chu ka châk lo hle ṭhîn,” tiin a sawi. Chuti chung chuan, a rilru awm dânte thununa awm lovin, mi dangte nêna inkawmna aṭangin hlâwkna a hmu a ni. Unaunu Amy-i chuan: “Tûn hmaa ka thiltawnte avângin mi dangte rin chu harsa ka ti a. Mahse, Jehova entawnin ka unaute hmangaih leh rin chu ka zir a. Chu chuan Jehova a tihlim tih ka hriat avângin kei pawh ka hlim a ni,” tiin a sawi.
JEHOVA TIHDAMNA THUTIAM AṬANGIN THLAMUANNA HMU ANG CHE
18. Hma lam hunah eng nge kan beisei theih a, tûnah eng nge kan tih theih?
18 Nakin lawkah, Jehova chuan tisa leh rilru lama kan natna zawng zawng min tihdamsak ang tih kan hriat avângin, inrin tâwkna nei takin hma lam hun kan thlîr thei a. (Thup. 21:3, 4) Chutih hunah chuan, min tinatu thilte chu “rilruah pawh a lût tawh hek lo vang.” (Is. 65:17) Kan hriat tawh angin, tûnah pawh Jehova chuan kan “hliamnate chu a tuam” a ni. Thlamuanna leh hahdamna pe tûr chea hmangaihna nei taka Jehova thil buatsaihte chu hmang ṭangkai ang che. “Ani’n a ngaihsak” che tih chu engtikah mah ringhlel ngai suh!—1 Pet. 5:7.
HLA 7 Jehova, Kan Chakna
a Hming ṭhenkhat chu thlâk a ni.
b “ Jehova’n A Ngaihlu Che,” tih bâwm chu en rawh.
c Jehova nêna “ngaihtuah tlâng” tûr chuan kan thil tihsual avânga a hnêna ngaihdam dîlin, kan nungchangte thlâk danglamin, kan inlamlêt tih kan lantîr a ngai a. Sual pawi tak kan ti a nih chuan, kohhran upate hnên aṭanga ṭanpuina kan dîl a ngai bawk a ni.—Jak. 5:14, 15.
d Entîr nân, Kristian Nun Atâna Bible Chângte tih bua “Lungkhamna,” tih leh “Thlamuanna,” tih hnuaia Bible châng târ lante chu en ang che.
