ZIR TUR THUZIAK 43
HLA 90 Infuih Tawn Rawh U
Rinhlelhna Paih Bo Theih Dân
“Engkim fiah zâwk ula.”—1 THES. 5:21.
A TUM BER
Jehova rawng kan bâwlna tibuai thei rinhlelhna kan neihte paih bo theih dân.
1-2. (a) Jehova chhiahhlawhte’n eng rinhlelhnate nge an neih mai theih? (b) He thuziakah hian eng nge kan sawiho vang?
ṬHALAI kan ni emaw, kum upa kan ni emaw kan za hian rinhlelhna a neih châng kan nei ṭheuh va. Entîr nân, Jehova’n a ngaihven tak zet leh tak zet loh ngaihtuahtu Thuhretu ṭhalai pakhat chungchâng hi han ngaihtuah teh. Baptisma chan a hreh pawh a ni mai thei a ni. A nih loh leh, unaupa pakhat a ṭhat laia khawvêl hna aia Lalram rawngbâwlna dah hmasatu chungchâng hi han ngaihtuah bawk teh. A upat hnua a chhûngkaw châwmna tûr sum thawh chhuah a har tâkah chuan thu tlûkna fing a siam leh siam loh a ringhlel ṭan a ni. Tar chak vak tawh lo unaunu pakhat pawh hi han ngaihtuah teh. Tûn hmaa a thiltih ṭhinte a tih theih tawh loh avângin lunghnualna a nei pawh a ni mai thei a ni. Hêng zawhnate hi i inzâwt ngai em: ‘Jehova’n min ngaihven tak zet em? Jehova tâna inpêkna ka neihte chuan awmzia a nei tak zet em? Jehova tân ka la ṭangkai reng em?’ tihte hi.
2 Chûng zawhna chhânnate chu kan zawng lo a nih chuan, a hnuah Pathian kan biakna chu nasa takin a nghawng thei a. He thuziakah hian, (1) Jehova’n min ngaihven em? (2) Tûn hmaa kan thu tlûkna lo siam tawhte chu a finthlâk em? (3) Jehova tân kan la ṭangkai tak zet em? tih rinhlelhna kan neih huna Bible thubulte ngaihven tlatnain min ṭanpui theih dân kan sawiho vang.
RINHLELHNA I NEIHTE PAIH BO DAN
3. Rinhlelhna kan neih paih bo dân kawng khat chu eng nge ni?
3 Rinhlelhna kan neihte paih bo dân kawng khat chu Pathian Thua kan zawhna chhânnate zawn hi a ni a. Chutianga kan tih chuan kan rinna a nghet chho vanga, thlarau lamah kan ṭhang chhovin ‘rinnaa nghet taka ding’ tûra ṭha leh zuala thuam kan ni ang.—1 Kor. 16:13.
4. Engtin nge ‘engkim kan fiah’ theih? (1 Thessalonika 5:21)
4 Thessalonika thawn khat 5:21 chhiar rawh. Bible-in “engkim fiah” tûrin min fuih tih chhinchhiah reng ang che. Chu chu engtin nge kan tih theih ang? Rinhlelhna eng emaw kan nei a nih chuan, Bible sawi dân nêna khaikhinin a dik ngei a ni tih kan chian thei a ni. Entîr nân, Pathian mit hmuha hlutna a neih leh neih lo rinhlelhna neitu ṭhalai kha lo ngaihtuah ta ila. A chhânna zawng lovin a awm mai tûr a ni em? Ni lo ve, chumi chungchânga Jehova ngaihtuah dân hre tûra hma lain ‘engkim a fiah zâwk’ tûr a ni.
5. Engtin nge Jehova chhânna chu kan “hriat” theih?
5 Pathian Thu kan chhiar hian Jehova thusawite kan “hre” thei a. Mahse, thil eng emaw bîk chungchânga a ngaihtuah dân hre tûr chuan ṭan kan lâk a ngai a ni. Kan zawhna neih chungchânga Bible chângte chu kan zawna kan zir a ngai a. Jehova inawpna pâwlin min buatsaihsak hmanraw ṭangkai tak takte hmangin chumi chungchângah zir bingna kan nei thei a ni. (Thuf. 2:3-6) Jehova hnênah kan zir bingna chu min kaihhruaisak tûr leh kan zawhna neih chungchânga a ngaihtuah dânte hre thei tûra min ṭanpui tûrin kan dîl a ngai a. Tichuan, kan dinhmun nêna inkûngkaih Bible thubulte leh min ṭanpui theitu kaihhruainate chu kan zawng thei a. Kan dinhmun tawn ang tawngtu Bible-a mite chungchâng zirna pawh kan hlâwkpui thei bawk a ni.
6. Engtin nge inkhâwmnate’n rinhlelhna paih bo tûra min ṭanpui?
6 Jehova thusawi chu kan inkhâwmte aṭang pawhin kan “hre” thei bawk a. Inkhâwmnaahte kan tel ziah a nih chuan, thusawi aṭangin emaw, tu emaw chhânna aṭangin emaw kan rinhlelhna paih bo tûra kan mamawh tak chu kan hre thei a ni. (Thuf. 27:17) Tûnah rinhlelhna ṭhenkhat kan paih bo theih dân i lo ngaihtuah ang u.
JEHOVA’N A NGAIHVEN CHE TIH I RINHLELH HUNAH
7. Mi ṭhenkhatin eng zawhna nge an neih mai theih?
7 ‘Jehova’n min ngaihven tak zet em?’ tiin i ngaihtuah tawh ṭhîn em? Pawimawhna nei lo anga i inhriat chuan, lei leh vân Siamtu nêna ṭhian nih theihna chu thil âwihawm lo leh thil ni thei lo angin i ngai thei a. Chutiang ngaih dân chu Lal Davida pawhin a nei niin a lang. Jehova’n mihring ve maite min ngaihven chu mak a tih êm avângin: “LALPA, mihring hi eng nge maw a nih a, i hriat ṭhin ni? Mihring fapa pawh hi eng nge maw a nih a, i ngaihtuah ṭhin ni?” tiin a zâwt a ni. (Sâm 144:3) Chu zawhna chhânna chu khawiah nge i hmuh theih ang?
8. Samuela pakhatna 16:6, 7, 10-12 ṭanchhanin Jehova’n mihringtea a ngaihven chu eng nge ni?
8 Jehova’n mi dangte’n mi pawimawh lo anga an ngaihte chu a ngaihven tih Bible aṭangin kan hria a. Entîr nân, Samuela chu Jesaia fapate zînga pakhat Israel lal ni tûra hriak thih tûrin a tîr a. Jesaia chuan Samuela hmu tûrin a fapa naupang b ber Davida tiam lovin, a fapa dang pasarihte chu a ko va. Mahse, Jehova mi thlan chu Davida a ni. (1 Samuela 16:6, 7, 10-12 chhiar rawh.) Jehova chuan Davida nihna dik tak—thlarau lam thilte ngaihlutu ṭhalai a nihna chu a hmu a ni.
9. Jehova’n a ngaihven che tih engvângin nge i chian theih? (Milem en bawk rawh.)
9 Jehova’n i chunga ngaihvenna a lantîr tawh dân chu ngaihtuah ang che. I mamawhte nêna inmil thurâwnte a pe che a ni. (Sâm 32:8) Hre chiang lo che se la chuan, engtin nge chutiang chuan a tih theih ang? (Sâm 139:1) Jehova thurâwn pêkte i nunpuina aṭanga a hlâwknate i hmuh hunah a ngaihven che tih i ring nghet lehzual ang. (1 Chro. 28:9; Tirh. 17:26, 27) I ṭan lâknate chu a hria a. I chhûngrila i nihna dik tak a hriat avângin i Ṭhian nih a duh a. (Jer. 17:10) A ṭhian nih ve i duh chuan a hlim hle ang.—1 Joh. 4:19.
“[Jehova] i zawn chuan i hmu ang”—1 Chro. 28:9 (Paragraph 9-na en rawh) c
I THU TLUKNA SIAM TAWHTE CHUNGA RINHLELHNA I NEIH HUNAH
10. Tûn hmaa kan thu tlûkna siamte kan ngaihtuah lêt hian eng zawhnate nge lo awm thei?
10 Kum tam tak hnuah, mi ṭhenkhat chuan an thu tlûkna siamte an ngaihtuah lêt hian a dik leh dik loh rinhlelhna an nei thei a. Jehova rawng tam lehzuala an bâwl theih nân hna ṭha tak, a nih loh leh sum dâwnna hlawhtling tak chu an lo kalsan tawh a ni thei a ni. Kum sâwmbi têl a liam hnuah, an ṭhian ṭhenkhat chuan khawvêl hna thawkin sum leh pai lama ngialnghet taka an awm chu an hmu thei a. Chuvângin, heti hian an ngaihtuah mai thei: ‘Jehova tâna inpêkna ka lo neihte kha a fuh tak zet em? Nge ni a, hun remchâng ṭha tam tak min hmaihtîr zâwk?’ tiin.
11. Sâm 73-na ziaktu chu engin nge tibuai?
11 Chutiang zawhna chuan i rilru a tibuai a nih chuan, Sâm 73-na ziaktu chungchâng hi han ngaihtuah teh. Mi dangte’n hrisêlna ṭha neiin nun nuam tak leh hahdam tak an chên niin a hmu a. (Sâm 73:3-5, 12) An nun chu a kal tluang hle nia a hmuh chuan, Jehova rawngbâwl tûra ṭan a lâknate chu awmze nei lo niin a hria a. Chutiang ngaihtuahna chuan “nilêngin” a tibuai a ni. (Sâm 73:13, 14) Chumi chungchângah eng nge a tih tâk?
12. Sâm 73:16-18-a târ lan angin, fakna hla phuahtu chuan a thim zâwnga ngaihtuahna a neihte chu engtin nge a paih bo?
12 Sâm 73:16-18 chhiar rawh. Fakna hla phuahtu chu Jehova hmun thianghlim muanawm takah a kal a. Chutah chuan, fîm takin a ngaihtuah thei a ni. Mi ṭhenkhat chu nun nuam tak chên angin lang mah se, hma lam hun beiseina nghet tak an nei lo tih a hria a. Chumi hriatfiahna aṭang chuan thlarau lam thilte dah hmasakna chu thu tlûkna ṭha ber a ni tih a hria a, chu chuan rilru muanna a pe a ni. Chuvângin, Jehova rawngbâwl zawm a tum leh ta sauh a ni.—Sâm 73:23-28.
13. Duh thlanna i lo siam tawhte chungah inchhîrna i nei a nih chuan engtin nge rilru muanna i neih theih ang? (Milem en bawk rawh.)
13 Pathian Thu ṭanpuina hmangin chutiang rilru muanna chu kan nei ve thei a ni. Eng nge kan tih ngai? Pathian Jehova pawm hlawhna pawh tiamin, tûna i malsâwmna dawnte hlutna chu chhût ngun la; he khawvêlin lâwmman a pêk theihte chauh beiseitute dinhmun nên khaikhin ang che. Hma lam hun beiseina an neih loh avângin tûn huna an hlawhtlinnate chauh chu an rinchhan a ni thei a. Mahse, Jehova’n i mitthla theih aia ropui zâwk malsâwmnate pe tûr chein a tiam che a ni. (Sâm 145:16) Hei hi han ngaihtuah bawk teh: Duh thlanna dang lo siam teh rêng pawh ni i la, chumiin tûn thlenga kan nun a nghawng dân tûr chu chiang takin kan sawi thei em? Thil chiang tak chu: Pathian leh mite hmangaihna ṭanchhana thu tlûkna siamtute chuan thil ṭha eng mah an chân ngai lo tih hi a ni.
Jehova thutiam malsâwmna chu thlîr tlat rawh (Paragraph 13-na en rawh) d
JEHOVA TAN I ṬANGKAI TIH RINHLELHNA I NEIH HUNAH
14. Mi ṭhenkhatin eng dinhmun nge an tawh a, eng zawhna nge an neih mai theih?
14 Jehova chhiahhlawh ṭhenkhat chuan kum upatna avâng te, dam lohna avâng te leh, taksa chak lohna chi hrang hrang avângtein tûn hma angin thil an ti thei tawh lo va. Chu chuan Jehova tâna hlu tawh lo nia inhriatna a neihtîr thei a ni. Chuvângin, ‘Jehova tân ka la ṭangkai em?’ tih ngaihtuahna an nei pawh a ni thei.
15. Sâm 71-na ziaktu chuan eng nge a rinngheh tlat?
15 Sâm 71-na ziaktu pawhin chutiang ngaihtuahna chu a nei a. “Ka tha a ṭhum hunin mi kalsan suh ang che,” tiin a ṭawngṭai a ni. (Sâm 71:9, 18) Chuti chung chuan, Jehova rawng rinawm taka a bâwl chuan, a kaihruaiin a ṭanpui dâwn tih a ring nghet tlat a. Fakna hla phuahtu sawi angin, Jehova chuan an tih theihte a tlêm chung pawha theih tâwp chhuaha a rawngbâwltute chungah lâwmna a nei a ni.—Sâm 37:23-25.
16. Eng kawngin nge kum upate chu Jehova tâna ṭangkai tak an nih ? (Sâm 92:12-15)
16 Kum upate u, Jehova thlîrna aṭangin in dinhmun chu thlîr ang che u. Tisa lamah harsatna nei mah ula, thlarau lamah ṭhang duang zêl tûrin a ṭanpui thei che u a ni. (Sâm 92:12-15 chhiar rawh.) In thil tih theih tawh lote ni lovin, in thil tih theihte chauh ngaihtuah ang che u. Entîr nân, i rinawmna leh mi mal ngaihsakna lantîrna hmangin mi dangte chu i tichak thei a. Kum tam tak chhûng Jehova’n a lo ṭanpui tawh dân che leh, a thutiamte a lo thleng famkim ang tih beiseina nghet tak i neihte chu mi dangte hnênah i hrilh thei a ni. Chu bâkah, mi dangte tâna tih tak zeta i ṭawngṭainain thil a tihtheihzia pawh theihnghilh suh ang che. (1 Pet. 3:12) Eng dinhmunah pawh awm i la, kan zâ hian Jehova leh mi dangte tân thil eng emaw tih theih kan nei ṭheuh a ni.
17. Engvângin nge mi dangte nêna kan inkhaikhin loh vang?
17 Jehova rawngbâwlnaah i duh anga i tel tam theih loh avânga rilru hrehawmna i nei a nih chuan, i tih theih eng pawh a ngaihlu tih i chiang thei a ni. Mi dangte nêna inkhaikhin duhna i nei mai thei a. Mahse, chutiang chuan ti suh! Engvângin nge? Jehova’n chutianga mi a khaikhin ngai loh vâng a ni. (Gal. 6:4) Entîr nân, Mari chuan Isua chu hriak rimtui man to tak a chulh a. (Joh. 12:3-5) Chutih rualin, hmeithai rethei chuan biak inah dâr tangka dere pahnih a thlâk a ni. (Lk. 21:1-4) Mahse, Isua’n chûng thiltihte chu rinna târ lanna angin a thlîr ve ve a. A Pa, Jehova chuan thil tê tham tê anga i ngaih atâna i inpêkna leh, amah i hmangaihna avânga i thiltih eng pawh chu a ngaihlu tak zet a ni.
18. Engin nge rinhlelhna kan neihte paih bo tûra min ṭanpui ang? (“ Jehova Thuin I Rinhlelhnate Paih Bo Tûrin A Ṭanpui Thei Che,” tih bâwm chu en bawk rawh.)
18 Rinhlelhna neih châng kan nei ṭheuh va. Mahse, Pathian Thu, thutak rinchhan tlâk Bible chuan chumi paih bo tûr chuan min ṭanpui thei a ni. Chuvângin, rinhlelhna i neihte paih bo tûrin hma la la, inrintâwkna nei takin awm ang che. Jehova chuan mi mal takin a ngaihven che a. A tâna i thiltihte chu a ngaihluin lâwmman a pe ngei dâwn che a ni. Jehova’n a chhiahhlawh rinawm zawng zawngte chu a hmangaihna leh ngaihsakna dawn phû angin a thlîr tih ring tlat ang che.
HLA 111 Kan Hlim Chhante
a ṬAWNGKAM HRILHFIAHNA: He thuziaka kan sawiho tûr rinhlelhna hi Jehova tâna kan hlutna leh, tûn hmaa kan thu tlûkna siamte chunga kan neih theih rinhlelhnate a ni a. Hêngte hi Jehova leh a thutiamte chunga rinna tlâk chhamna avânga lo awm Bible-in a târ lan rinhlelhna nên a inang lo.
b Jehova’n a thlan laia Davida kum zât tak chu Bible-in târ lang lo mah se, tleirâwl a nih a rinawm.—Vênnainsâng (English) September 1, 2011, p. 29, par. 2 chu en rawh.
