ZIR TUR THUZIAK 37
HLA 118 Kan Rinna Min Tihpunsak Rawh
A Tâwp Thlenga Chhel Taka Awm Tûra Min Ṭanpui Theitu Lehkhathawn
“Kan rinchhan ṭantirhna kha a tâwp thlengin nghet taka kan vawn tlat phawt chuan.”—HEB. 3:14.
A TUM BER
Hebrai mite hnêna lehkhathawn zir chianna chuan khawvêl tâwp thlenga chhel taka awm tûrin min ṭanpui ang.
1-2. (a) Tirhkoh Paula’n lehkha a thawn khân Judai ram dinhmun chu eng ang nge a nih? (b) Engvângin nge chu lehkhathawn chu a hun taka thawn a ni tia kan sawi theih?
ISUA thih aṭanga kum eng emaw zât chhûng chu Jerusalem leh Judai rama chêng Kristiante chuan harsatnate an tâwk a. Kristian kohhran din a nih aṭanga hun rei lo têah Kristiante chuan tihduhdahna an tâwk leh a ni. (Tirh. 8:1) Chumi hnu kum 20 vêlah, ṭâm a tlâk avângin Krista hnungzuitute chuan sum leh pai lamah harsatna nasa tak an tâwk a. (Tirh. 11:27-30) Mahse, C.E. 61-ah Kristiante chuan hun muanawm tak an chên lailâwk a. Chutih hun lai chuan tirhkoh Paula lehkhathawn, a hnua an tâna ṭangkai êm êm tûr thlarauva thâwk khum chu an dawng a ni.
2 Kristiante’n hun muanawm tak an chen chhûng chu a rei dâwn loh avângin, chu lehkhathawn chu a hun taka thawn a ni a. An hmachhawn mai tûr hrehawmna chu chhel taka an tawrh theih nân Paula chuan fuihna ṭangkai tak a pe a ni. Isua sawi lâwk Juda kalhmang tihchhiatna chu a lo thleng mai tawh dâwn a. (Lk. 21:20) Paula emaw, Judai rama Kristiante emaw pawhin chu chhiatna lo thlen hun tûr chu an hre lo ngei mai. Mahse, chûng Kristiante chuan rinna leh chhelna ang chi miziate neih chhoh nân chu hun chu an hmang thei a ni.—Heb. 10:25; 12:1, 2.
3. Engvângin nge tûn laia Kristiante chuan Hebrai bu chu kan ngaihven lehzual ang?
3 Hebrai Kristiante tawh aia nasa zâwk hrehawmna kan tâwk dâwn a. (Mt. 24:21; Thup. 16:14, 16) Chuvângin, Jehova’n chûng Kristiante hnêna fuihna ṭangkai tak a pêkte aṭanga kan hlâwkpui theih thilte chu i lo enho vang u.
“PUITLIN LAM I PAN ANG U”
4. Juda Kristiante chuan eng harsatnate nge an tawh? (Milem en bawk rawh.)
4 Juda Kristiante chuan harsatna lian tak an hmachhawn a. Hun eng emawti chhûng, Judate chu Jehova hnam thlan an ni a. Jerusalem chu Pathian Lalram lei lam pêng innghahna a nih bâkah, biak in chu biakna thianghlim hmunpui a ni bawk. Juda mi rinawmte chuan Mosia Dân leh an sakhaw hruaitute zirtîrna chu an zâwm a. Chûng zirtîrnate chuan ei leh in te, serhtan chungchâng an thlîr dân te leh, Jentail-te an cheibâwl dânte chu a thunun a ni. Mahse, Isua thih hnu chuan Jehova’n Judate inthawina chu a pawm tawh lo va. Chu chuan Dân zâwm ṭhîn Juda Kristiante tân harsatna a thlen a ni. (Heb. 10:1, 4, 10) Tirhkoh Petera anga Kristian mi puitlingte tân pawh chutianga inthlâk danglamna siam chu thil awlsam a ni lo va. (Tirh. 10:9-14; Gal. 2:11-14) Chu bâkah, an rin dân thar avângin chûng Kristiante chuan Juda sakhaw hruaitute tihduhdahna an tuar bawk a ni.
Kristiante chuan thutak an vawn ngheh tlat a, anmahni dodâltu Juda sakhaw betute ngaih dân dik lo chu an hnâwl a ngai (Paragraph 4-5-na en rawh)
5. Eng chungchângah nge Kristiante chu an invên a ngaih?
5 Hebrai Kristiante chuan kawng hnihin dodâlna an tâwk a. Kawng khat chu Juda sakhaw hruaitute’n kalpêng anga an cheibâwlna a ni a. Kawng dang leh chu, kohhrana mi ṭhenkhatin tihduhdahna pumpelh an duh avânga Kristiante’n Mosia Dân an zâwm chhunzawm tûr a ni tia an zirtîrna a ni. (Gal. 6:12) Engin nge Kristian mi rinawm takte chu thutak vuan tlat tûra ṭanpui ang?
6. Paula’n a unaute chu eng ti tûrin nge a fuih? (Hebrai 5:14–6:1)
6 Hebrai mite hnêna a lehkhathawnah, Paula chuan a unaute chu Pathian Thu chhiar a, chhût ngun tûrin a fuih a. (Hebrai 5:14–6:1 chhiar rawh.) Ani chuan Hebrai Pathian Lehkha Thu hmangin, Juda sakhua aiin Kristiante Pathian biak dân chu a chungnun zâwkzia a chhûtpui a ni. a Kristiante’n hriatna an neih belh a, thutak hriatthiamna thûk lehzual an neih chuan ngaih dân dik lote chu hriain an hnâwl thei ang a. Chumi hruaibo chuan an awm dawn lo tih a hria a ni.
7. Tûn laiah eng harsatnate nge kan hma chhawn?
7 Hebrai Kristiante ang bawkin, keini pawh Jehova tehna felte dodâltu thute leh ngaih dânte hual vêlin kan awm a. Nungchang lam nêna inkûngkaih Bible ṭanchhan kan thurinte avângin rilru zîm tak leh khawngaihna nei lo tak angin min puh a. Khawvêl mite rilru put hmang leh ngaih dânte chu Pathian Jehova thlîr dân nên chuan a inthlau tulh tulh a ni. Chuvângin, ngaih dân dik lote chu hriaa kan hnâwl chu a pawimawh hle a. (Thuf. 17:15) Min dodâltute’n min tihlunghnual a, Pathian Jehova rawngbâwl min bansantîr chu kan phal ngai tûr a ni lo.—Heb. 13:9.
8. Engtin nge thlarau lamah puitlin lam kan pan zêl theih ang?
8 Paula’n Hebrai Kristiante hnêna thlarau lama puitlin lam pan tûra a fuihna chu kan zâwm ve tûr a ni a. Chutah chuan thutak hriatthiamna thûk tak neiha, Pathian Jehova ngaihtuah anga ngaihtuahna a tel a ni. Chu chu inpumpêka baptisma chan zawh hnu pawha tih chhunzawm zêl tûr a ni. Thutakah kum tam tak chhûng lo awm tawh pawh ni mah ila, kan zavaiin Pathian Thu kan chhiar a, kan zir ziah a ngai a. (Sâm 1:2) Mi mal inzirna hun duan ṭha tak neihna chuan Paula’n Hebrai mite hnêna a lehkhathawna a târ lan mizia—rinna—chu tinghet lehzual tûrin min ṭanpui ang.—Heb. 11:1, 6.
‘I NUNNA HUMHIM TURIN RINNA NEI RAWH’
9. Engvângin nge Hebrai Kristiante chuan rinna nghet tak an neih a ngaih?
9 Hebrai Kristiante chuan Judai rama thleng tûr hrehawmna laka dam khawchhuak tûr chuan rinna nghet tak an neih a ngai a. (Heb. 10:37-39) Isua’n a hnungzuitute chu sipaite’n Jerusalem an hual hunah tlânchhe tûrin a hrilh a. (Lk. 21:20-24) Jerusalem khawpuiah an chêng emaw, Judai rama khaw eng emaw berah an chêng emaw pawh ni se, Kristian zawng zawngin chu chu an zawm a ngai a ni. Chûng hun lai chuan hmêlma sipaite’n an beih hunah, mite chu Jerusalem ang chi kulh nei khawpuiahte chuan inhumhimna zawngin an tlânchhe ṭhîn a. Tlânga tlânchhiat chu thiltih âwm lo tak angin a lang thei a ni. Chuvângin, chutianga ti tûr chuan rinna nghet tak an neih a ngai ngei ang.
10. Rinna nghet tak chuan Kristiante chu eng ti tûrin nge a chêttîr ang? (Hebrai 13:17)
10 Hebrai Kristiante chuan kohhran kaihruai tûra Isua mi ruatte chu an rin a ngai bawk a. Chûng hmahruaitute chuan Isua thupêk chu kohhrana mi zawng zawngin a hun taka ṭha taka an zawm theih nân chipchiar takin kaihhruaina an pêk a rinawm a. (Hebrai 13:17 chhiar rawh.) Hebrai 13:17-a “thuawih” tih Greek thu mal hian, tu emawin kaihhruaina petu a rinchhan avânga a thu a zawmna chu a kâwk a. Chutah chuan thuneitu an nih avânga an thu zawm mai aia tam a tel a ni. Chuvângin, Hebrai Kristiante chuan hrehawmna a lo thlen hma aṭangin hmahruaitute chunga rinna an neih a ngai a ni. Kristiante chuan hun muanawm tak chhûngin hmahruaitute kaihhhruaina an zâwm a nih chuan, hun harsa takah pawh chutianga tih chu a awlsam lehzual ang.
11. Tûn laiah, engvângin nge Kristiante tân rinna nghet tak neih a pawimawh?
11 Tûn laiah pawh Hebrai Kristiante ang bawkin rinna kan mamawh a. Mi a tam zâwk chuan khawvêl tâwpna chungchânga Bible vaukhânna chu an hnâwlin an nuihsawh hial a ni. (2 Pet. 3:3, 4) Chu bâkah, Bible chuan hrehawm nasa tak inṭanna chungchâng târ lang nual mah se, hriat loh tam tak kan la nei a. Chuvângin, khawvêl tâwpna chu a hun dik takah a lo thleng ang tih leh Jehova’n min ngaihsak ang tih chu kan rin ngheh tlat a ngai a ni.—Hab. 2:3.
12. Engin nge hrehawm nasa tak chhûnga dam khawchhuak tûra min ṭanpui ang?
12 Jehova’n tûn laia min kaihruai tûra a hman “bâwih rinawm fing tak” chunga rinna nghet tak kan neih a ngai bawk a. (Mt. 24:45) Hrehawm nasa tak a inṭan hunah, Rom sipaite’n Jerusalem an hual laia Hebrai Kristiante’n kaihhruaina an dawn ang bawkin nun chhanhim thei kaihhruaina chipchiar takte chu kan dawn a rinawm a. Tûn hun hi Jehova inawpna pâwla hmahruaitute hnên aṭanga kan dawn kaihhruainate chunga kan rinna tihngheh hun a ni. Tûnah pawh an kaihhruainate zawm harsa kan tih chuan, hrehawm nasa tak chhûnga zawm kan inbeisei thei lo vang.
13. Hebrai 13:5-a fuihna chu engvângin nge a ṭangkai tak zet?
13 Hebrai Kristiante chuan tlânchhe tûra kaihhruaina an nghah laiin, “tangka ngainatna” hnâwla samkhai taka an nun a ngai a. (Hebrai 13:5 chhiar rawh.) An zînga ṭhenkhat chuan ṭâmna leh retheihna an lo tuar tawh a. (Heb. 10:32-34) Chanchin ṭha avângin hrehawm tawrh chu inhuam mah se, an zînga ṭhenkhat chuan hausakna chu inhumhimna angin an ngai ṭan pawh a ni thei a ni. Mahse, hausakna chuan chhiatna lo thleng tûr lak ata tu mah a chhanhim thei lo. (Jak. 5:3) A nihna takah chuan, tisa lam thil ngainatute chuan an in leh thil neihte kalsan chu harsa an ti hle ang.
14. Engtin nge tûna rinna nghet tak kan neihna chuan sum leh pai chungchânga kan thlîr dân chu a nghawng ang?
14 Khawvêl tâwpna a hnai tih rinna nghet tak kan nei a nih chuan sum leh pai ngainatna chu kan hnâwl thei ang a. Mite chuan “LALPA thinur ni an chunga a lo thlen chuan, an tangka leh rangkachak chuan a chhan thei lo vang, tih an hriat avângin an tangkate chu khawlaiah an paih ang.” (Ezek. 7:19, C.L. Re-edited.) Chuvângin, pawisa tam tak hailuh aiin nun samkhai tak leh inbûk tâwk tak nei tûra min ṭanpui thei thu tlûknate kan siam a ngai a ni. Chutah chuan ṭûl lo taka leiba nei tûra thlêmna leh kan thil neihte enkawl tûra hun tam tak hman pumpelhte a tel a ni. (Mt. 6:19, 24) Kan thil neihte chu kan nuna thil pawimawh ber nihtîr lo tûra kan fîmkhur a ngai bawk. Khawvêl tâwpna kan hnaih zêl rual hian Jehova chungah nge, kan thil neihte chungah rinna kan nghah zâwk dâwn tih kan thlan a ngai ang.
“IN CHHEL A NGAI A NI”
15. Engvângin nge Hebrai Kristiante chuan chhelna an mamawh lehzual?
15 Judai ram dinhmun a chhiat zêl rualin Hebrai Kristiante chuan rinna fiahna an tâwk zêl dâwn a. (Heb. 10:36) An zînga ṭhenkhat chuan tihduhdahna nasa tak lo hmachhawn tawh mah se, tam tak chu hun a muanawm laia Kristian rawn ni tate an ni a. (Heb. 12:4) Chuvângin, Paula chuan tihduhdahna nasa zâwk hmachhawn tûr leh Isua angin thihna hial pawh tâwk dâwn mah se, rinawm reng tûrin a hriat nawntîr a ni. Amaherawhchu, Kristianna a darh zau zêl rualin, dodâltu Judate chu an thin a rimin an nun a râwng lehzual a. Kum rei lo te kalta khân Paula chuan Jerusalema thu a hrilh laiin mipuite beihna a tâwk a. Juda mi 40 chuang vêlin “Paula an thah hma loh zawng eng mah eia bâr lo tûrin chhia an chham” a ni. (Tirh. 22:22; 23:12-14) Chutiang sakhaw âtchilhna leh inhuatna kârah pawh Pathian be tûr te, chanchin ṭha hril tûr te leh, rinna nghet taka awm tûrtein an inhmuh khâwm a la ngai tho a ni.
16. Engtin nge Hebrai mite hnêna lehkhathawn chuan dodâlna kan tawhte chunga thlîr dân dik nei tûra min ṭanpui? (Hebrai 12:7)
16 Engin nge Hebrai Kristiante chu chhel taka dodâlna hmachhawn tûra ṭanpui? Paula chuan an fiahna tawhte chungah thlîr dân dik an neih a ngai tih a hria a. Kristiante’n fiahna an hmachhawn hian Pathianin anmahni zirtîrna atân chûngte chu a hmang thei tih a hrilhfiah a ni. (Hebrai 12:7 chhiar rawh.) Chutiang zirtîrna chuan Kristian mize ṭhate nei chho va, vawng reng tûrin a ṭanpui a. Chûng fiahnate’n rah chhuah ṭha a neih tûrte ngaihven tlatna chuan Hebrai Kristiante chu chhel tûrin a ṭanpui dâwn a ni.—Heb. 12:11.
17. Tihduhdahna tawrh chhuah dân chungchângah Paula’n eng nge a hriat?
17 Paula chuan Hebrai Kristiante chu beidawng lova fiahnate tuar chhuak tûrin a fuih a. Ani chu chumi chungchânga fuihna ṭha tak pe thei dinhmunah a ding a ni. Kristiante tiduhdahtu a lo nih ṭhin avângin an thil hmachhawn tûr chu a hria a. Tihduhdahna chhel taka tawrh chhuah dân pawh a hre bawk. Kristian a nih hnuah, amah ngei pawhin dodâlna chi hrang hrang a tâwk a ni. (2 Kor. 11:23-25) Chuvângin, rinnghehna nei takin Paula chuan tuar chhuak thei tûra an mamawh chu a hrilh thei a. Fiahna an tawh hunah mahni inrinchhan lo va, Jehova rinchhan tûrin a hriat nawntîr a. Ani chuan: “Lalpa chu mi ṭanpuitu a ni, ka hlau lo vang,” tiin huaisen takin a sawi thei a ni.—Heb. 13:6.
18. Engtin nge nakin hun tûr chungchâng hriatna chuan tihduhdahnate tuar chhuak tûra min ṭanpui theih?
18 Tûnah pawh kan unau ṭhenkhatte chuan tihduhdahna an tâwk mêk a. An tâna ṭawngṭaisak a, a theih huna ṭanpuina ṭangkai tak pêkna hmangin rinawm takin kan thlâwp thei a ni. (Heb. 10:33) Chutih rualin, Bible chuan “tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin chiang takin a sawi a. (2 Tim. 3:12) Chuvângin, kan zavai hian hun khirh tak lo thleng tûr atâna kan inbuatsaih a ngai a. Jehova chu rinchhan chhunzawm zêlin, fiahna eng pawh tuar chhuak tûrin min ṭanpui ang tih i ring nghet tlat ang u. Ani chuan a hun tiamah, amah betu rinawm zawng zawngte chu chawlh hahdamna a pe dâwn a ni.—2 Thes. 1:7, 8.
19. Hrehawm nasa tak atâna inbuatsaih tûrin eng nge kan tih theih? (Milem en bawk rawh.)
19 Hebrai mite hnêna Paula lehkhathawn chuan kum zabi khatnaa Kristiante chu an hmachhawn tûr hrehawmna atân a buatsaih ang tih a chiang hle a. A unaute chu Pathian Thu ngun taka zir a, hriatna thûk lehzual nei tûrin a fuih a. Chutianga tihna chuan an rinna tichhe thei zirtîrnate chu hria a, hnâwl tûrin a ṭanpui dâwn a ni. Isua leh kohhrana hmahruaitute kaihhruaina pêk zâwm vat thei tûra an rinna tichak tûrin a fuih bawk a. An fiahna tawhte chunga thlîr dân dik neiin, chûngte chu hmangaihna ngah tak an Pa hnên aṭanga zirtîrna anga thlîr a, chhelna nei chho tûrin Kristiante chu a ṭanpui bawk a ni. Keini pawhin hêng thâwk khuma pêk fuihnate hi i zâwm ang u. Chutianga kan tih chuan a tâwp thlengin chhel takin kan awm thei dâwn a ni.—Heb. 3:14.
Kristian rinawmte chu an chhelna avânga malsâwm an ni a. Judai ram aṭanga an tlânchhiat hnuah pawh an inkhâwm chhunzawm zêl a ni. Heta ṭang hian eng nge kan zir theih? (Paragraph 19-na en rawh)
HLA 126 Invêng leh Ding Nghetin, Chak Zual R’u
a Paula chuan Kristiante Pathian biak dân chu Juda mite biak dân aia a chungnun zâwkzia finfiah nân, bung khatnaah ringawt pawh Hebrai Pathian Lehkha Thu chu vawi sarih lai a sawi chhâwng a ni.—Heb. 1:5-13.
