Kum 1934-ah ka piang a. Ka nu leh pate chu Switzerland aṭanga Canada rama lung laih chhuahna khua Ontario, Timmins-a pêm an ni a. Kum 1939 vêlah ka nu chuan Vênnainsâng magazine chu chhiar ṭanin Jehova Thuhretute inkhâwmnaahte a tel ṭan a. Kan unau sarihin min hruai ṭhîn a. A hnu lawkah Jehova Thuhretu a ni ta a ni.

Ka nu Thuhretu a nih avângin ka pa chu lâwm vak lo mah se, ka nu chuan thutak a hmangaihin Jehova chunga rinawm tlat a tum a. Kum 1940 tîr lama Canada rama Jehova Thuhretute rawngbâwlna khapbeh a nih pawhin a rinawm tlat a ni. Ka pain ṭawngkam na tak takin ṭawngkhum ṭhîn mah se, ani chu ngilnei tak leh zah thiam takin a chhâng lêt a. A entawn tûr siam ṭha tak chuan kan unau zaa thutak pawm tûrin min ṭanpui bawk. A hnuah ka pa miziate chu inthlâk chhovin kan vaiin ngilnei takin min cheibâwl ṭan a, kan lâwm hle a ni.

Kum 1950 ṭhâl lai chuan New York Khawpuia neih Theocracy’s Increase Assembly-ah ka tel a. Khawvêl puma ka unaute hmuhna leh Gilead zir chhuakte thiltawn ropui tak tak ngaihthlâkna chuan Jehova rawngbâwlnaa tam lehzuala inpe tûrin min chêttîr a. Hunbi kima rawngbâwl chu ka tum nghet lehzual ta a ni. Ina ka thlen veleh regular pioneer thawh ka dîl nghâl a. Mahse, Canada branch office chuan baptisma ka chan phawt a ngai tih min hrilh a ni. Chuvângin, kum 1950, October 1-ah chuan ka chang ta a. Thla khat hnuah, regular pioneer nia ka chanvo hmasa ber atân Kapuskasing khuaa thawk tûra tih ka ni a. Chu khua chu chutih hun laia ka awmna aṭanga hla takah a awm a ni.

 Kum 1951 nipuiah, branch office chuan French ṭawng thiam Thuhretute chu French ṭawng hmangte awmna Quebec biala insawn tûrin a sâwm a. Chutah chuan mamawhna a nasa hle a ni. French leh English ka thiam avângin sâwmna chu ka pawm a. Rouyn khuaa rawngbâwl tûra tih ka ni ta a ni. Tu mah hmêlhriat ka nei lo va. A tîra ka sawi tâk in address chauh chu ka nei a ni. Mahse, thil chu a kal tluang hle a. Marcel-a nên chuan ṭhian ṭha tak kan rawn ni a, Quebec-ah chuan kum li chhûng rawng ka bâwl a. A hnuah, special pioneer ka rawn ni chho bawk a ni.

Quebec-a ka awm lai chuan New York, South Lansing-a Gilead School 26-na kal tûra sâwmna phûrawm tak ka dawng a. Kum 1956, February 12-ah kan zir zo va. Tichuan, West Africa-a awm Ghana-a b rawngbâwl tûra tih ka ni a. Mahse, chuta ka kal hma chuan zinna atâna lehkha pawimawhte tifel tûra Canada-a chawlhkâr rei lo te chhûng ka haw leh phawt a ngai a ni.

Toronto-ah chûng lehkha pawimawhte nghâkin thla sarih lai ka awm a. Chutih hun chhûng chuan Cripps chhûngkua chuan an inah min thlentîr a. Chuta ṭang chuan an fanu Sheila-i nên kan inhre chho a ni. Kan inhmangaih ta hle a. Innei tûra ka sâwm hmain visa ka hmu a. Sheila-i nên chumi chungchânga kan ṭawngṭai hnuah ka chanvo dawnna hmuna kal tûrin thu tlûkna ka siam ta a ni. Mahse, lehkhate inthawnin nakina kan inneih theih hun tûr nghâk tûrin thu tlûkna kan siam a. Kan thu tlûkna siam chu awlsam lo mah se, a hnuah thu tlûkna ṭha tak a ni tih kan hre leh a ni.

Rêl te, lawng te leh, thlawhna tea thla khat vêl ka zin hnuah, Ghana rama Accra-ah chuan ka thleng ta a. Chutah chuan district overseer nia rawngbâwl tûra tih ka ni a. Ghana mai bâkah a ṭhenawm ram Ivory Coast (tûna Côte d’Ivoire tia koh) leh, Togoland (tûna Togo tiha koh) te pawh ka fang a. Branch-in min pêk jeep hmangin ka zin tlângpui a. Chutianga unaute tlawh chu nuam ka ti ṭhîn hle!

Chawlhkâr tâwpahte chuan bial inkhâwmpuiahte chanvo ka nei a. Assembly hall-te kan  neih loh avângin, unaute chuan ni sa tak laka daihlim a awm theihna tûrin mau leh chhâwl hmangin hulhliapte an sa a. Ei leh in dahna hmuna thil dah vawhna a awm loh avângin, inkhâwma lo telte ei tûr atâna talh mai theih tûrin rante chu a bul hnai lawkah an dah bawk a ni.

Chûng inkhâwmpuiahte chuan thil hlimawm takte kan tawng a. Ṭum khat chu ka missionary-pui Herb Jennings-a’n  c thu a sawi laiin bâwng pakhat hi an dahna hmun aṭangin a rawn chhuak a. Dawhsân leh a ngaithlatu mipuite inkârah a rawn tlân a. Herb-a’n a thusawi a tihtâwp chuan bâwng chu a hrilhhai hmêl hle a. Mahse, unaupa chak tak palite chuan man betin a awmna hmunah chuan an kai lêt leh a. Mipuite chuan nasa takin an lo lâwm a ni.

Chawlhkâr chhûng chuan a bul hnaia awm khuaahte The New World Society in Action tih kan video chu ka chhuah a. Ṭhelrêt puan vâr chu hmawlh pahnih, a nih loh leh thingkûng pahniha zâr pharhin video chu ka chhuahsak ṭhîn a. A khaw mite chuan hmuhnawm an ti hle! An zînga tam tak tân video an en vawi khatna a ni a. Video-a mite baptisma chang lai an hmuh chuan phûr takin kut an bêng a. Chu video chuan a entute chu khawvêl pumhuap inawpna pâwl inlungrual tak kan ni tih hre tûrin a ṭanpui a ni.

Africa-a kum hnih vêl ka awm hnu chuan, kum 1958-ah New York Khawpuia khawvêl pumhuap inkhâwmpuiah ka tel theih dâwn avângin ka phûr hle a. Sheila-i chu special pioneer nia rawng a bâwlna Quebec aṭanga a rawn tel ve avângin ka lâwm hle. Lehkhate inthawn ṭhîn mah ila, kan inhmuh leh tâkah chuan innei tûrin ka sâwm a. Ani chuan a lo pawm a. Tichuan, Unau Knorr-a d hnêna lehkha ziakin Sheila-i’n Gilead school kalin Africa-a rawng min bâwlpui theih dâwn leh dâwn loh ka zâwt a. Ani chuan a lo remti a. A hnuah, Sheila-i chu Ghana-ah a rawn kal a. Tichuan, kum 1959, October 3-ah Accra-ah kan innei ta a ni. Kan nuna Jehova kan dah hmasak avângin nasa takin malsâwmna min pe tih kan hria a ni.

Kum 1961-ah Cameroon rama rawngbâwl tûra tih kan ni a. Branch office dinnaa ṭanpui tûra tih ka nih avângin tih tûr ka ngah hle a. Branch kaihruaitu thar ka nih angin zir tûr ka ngah hle  bawk. Tichuan, kum 1965-ah Sheila-i chuan nau a pai a. A tîr chuan, nu leh paa inchan chu kan thiam lo hle. Mahse, chu mawhphurhna thar avânga phûrna kan han neih ṭan a, Canada rama kîr leh tûra kan inruahman lai chuan thil lungchhiatthlâk tak a thleng a ni.

Sheila-i chuan nau a chhiat a. Doctor chuan kan naute la piang lo chu mipa a nih thu min hrilh a ni. Chu chu kum 50 kal taa thilthleng ni mah se, kan theihnghilh thei lo. Kan thiltawn avâng chuan lungchhe hle mah ila, kan ngainat tak kan rawngbâwlnaah chuan kan thawk chhunzawm zêl a ni.

Cameroon rama unaute chuan politics thila an tualdawihna avângin tihduhdahna an tâwk fo va. President thlanna neih a nih chhûng chuan dinhmun chu a khirh hle a ni. Kum 1970, May 13-ah kan hlauhthâwn ang ngeiin, Jehova Thuhretute rawngbâwlna chu khapbeh a ni a. Branch office thar thla nga chiah kan la luah chu sawrkârin min chhuhsak a ni. Chawlhkâr khat chhûngin Sheila-i leh kei pawh tiamin, missionary zawng zawngte chu ram chhûng aṭanga chhuahtîr kan ni a. Unaute kan hmangaih êm avâng leh an la hmachhawn tûrte kan ngaihtuah chuan anni kalsan chu a harsa tak zet a ni.

A hnu thla ruk chhûng chu France-a branch office-ah kan awm a. Chuta ṭang chuan Cameroon rama kan unaute mamawh tûr apiang chu theih tâwp chhuahin ka ngaihsak chhunzawm a. Chumi kum vêk, December thlaah chuan Nigeria branch-a thawk tûra tih kan ni a. Chuta chin chu, Nigeria branch chuan Cameroon rama rawngbâwlna chu a enkawl ṭan a ni. Nigeria rama unaute chuan hlim takin min lo lâwm a. Chutah chuan, kum eng emaw zât chhûng rawng kan bâwl ta a ni.

Kum 1973-ah chuan thu tlûkna harsa tak kan siam a ngai a. Sheila-i chuan natna khirh tak a tuar a. Inkhâwmpui chhim tûra New York-a kan awm lai chuan ṭap chungin, “Rawng ka bâwl chhunzawm thei tawh lo vang. Ka chau va. Ka dam lo reng bawk nên,” tiin min hrilh a. West Africa-ah kum 14 chuang rawng min lo bâwlpui tawh a. Rinawm taka a rawngbâwlna chu ka chhuang hle. Mahse, inthlâk danglamna ṭhenkhat kan siam a ngai a ni. Kan dinhmun chu kan sawi dûn a, hun rei tak chhûng nasa taka kan ṭawngṭai hnuah Canada-a kîr a, chuta ṭha lehzuala inenkawl tûrin thu tlûkna kan siam ta a. Kan missionary rawngbâwlna leh hunbi kima rawngbâwlna chawlhsan chu kan thu tlûkna siam tawh azawnga harsa ber leh lungchhiatthlâk ber a ni.

Canada-a kan va thlen chuan, Toronto hmâr lama awm khaw pakhata motor zuar ṭhîn, hun rei tak chhûng ka ṭhian lo ni tawh pa pakhatin hna min lo pe a. In kan luah a. Bungraw hluite kan lei a. Chutiang chuan, leiba nei lovin kan awm thei a ni. Engtikah emaw, hunbi kima rawngbâwlnaa tel leh thei tûra kan inbeisei avângin samkhai takin kan nung a. Mak tak maiin, chu kan beiseina chu kan rin aia hmain a lo thleng a ni.

Ontario-a awm Norval khuaah chuan Inrinni tin Assembly Hall thar saknaah mahnia inpein ka tel ṭan a. A hnuah chuan, Assembly Hall overseer  ni tûra tih ka ni a. Sheila-i hrisêlna pawhin hma a sâwn avângin, chu chanvo chu a thawh theih kan ring a. Chuvângin, kum 1974, June thlaah chuan Assembly Hall inah kan insawn lût ta a. Hunbi kima rawngbâwlnaa kan tel leh theih avângin kan hlim tak zet a ni!

Pathian zârah Sheila-i chu a hrisêl chho ve zêl a. Kum hnih hnuah chuan bial kan hna kan thawk thei a. Kan bial kanna chu thlasika khaw vawh vûtna hmun Canada biala Manitoba-ah a ni. Mahse, chuta unaute’n hmangaihna nei taka min lo lawm avângin nuam kan ti hle a. A pawimawh ber chu, kan rawngbâwlna hmun ni lovin, khawiah pawh awm ila Jehova rawngbâwl chhunzawm zêl hi a ni tih kan hre ta a ni.

Kum eng emaw zât chhûng bial kan hna kan thawh hnu, kum 1978-ah Canada Bethel-a rawngbâwl tûra sâwm kan ni a. A hnu rei vak lovah chuan, thil pawimawh tak, ka rilru tihreawmtu ni bawk chu ka zir a. Montreal-a a bîk taka buatsaih inkhâwmnaah French ṭawngin dârkâr khat leh a chanve thu sawi tûra tih ka ni a. Lungchhiatthlâk takin, ka thusawi chuan ngaithlatute ngaihven a hlawh lo va. Chuvângin, Service Department-a unaupa pakhat chuan zilhna min pe a ni. Dik taka sawi chuan, thusawi thiam tak ka ni lo tih lo inhre daih tawh tûr ka ni a. Mahse, min zilhna chu pawm harsa ka ti hle a. Kan mizia a inan lo êm avângin min fakna tûr pawh zawng lo va, nasa taka min sawisêl ang mai hian ka hria a. Zilhna min pêk dân leh zilhna min petu chunga ka rilru put hmang ṭanchhana zilhna ka lo dawngsawng chu ka ti dik lo hle.

Ni rei lo te hnuah, Branch Committe member pakhat chuan chumi chungchângah chuan min rawn bia a. Zilhna chu ṭha taka ka lo dawnsawn loh thu leh pawi ka tih thu ka lo hrilh a. Chumi hnuah, zilhna min petu unaupa chu ka va bia a. Ani chuan ngilnei takin min lo ngaidam a ni. Chu ka thiltawn chuan thuhnuairawlhna a pawimawhzia min zirtîr a, chu chu ka theihnghilh ngai lo vang. Chumi chungchângah chuan Jehova hnênah vawi tam tak ka ṭawngṭai a. Zilhna ka dawnte a ṭha lo zâwnga thlîr tawh loh chu ka tum nghet tlat a ni.

Canada Bethel-ah kum 40 chuang rawng ka lo bâwl tawh a. Kum 1985 aṭangin Branch Committe member anga rawngbâwl theihna chanvo ka nei bawk. Kum 2021, February thlaah, ka nupui duh tak Sheila-i chu a boral a. Chumi avânga ka tawrhna bâkah, dam lohnate ka hmachhawn a ngai bawk a. Jehova rawngbâwlnaah tih tûr tam tak neiin hlim taka ka tel avângin, ‘ka dam chhûng nite chu ka lungkham lo.’ (Thur. 5:20) Ka nunah harsatna ṭhenkhat lo hmachhawn tawh mah ila, ka hlimnate chu a tam zâwk a ni. Ka nuna Jehova dah hmasak a, kum 70 chhûng hunbi kima rawngbâwlnaa tel chu a lungawithlâk tak zet a ni. Nun lungawithlâk leh hlimawm tak chu Jehova rawngbâwlna aṭang chauhva neih theih a ni tih ka hriat chian tawh avângin, kan ṭhalai unaute pawhin an nuna Jehova an dah hmasak tlat theih nân ka ṭawngṭaisak ṭhîn a ni.