1-2. Thil dawnna aṭang ni lovin, thil pêkna aṭanga hlimna nei lehzual tûra siam kan nihna chu engtin nge kan hlâwkpui?

 JEHOVA’N mihringte chu thil dawnna aṭang ni lovin, thil pêkna aṭanga hlimna nasa lehzual nei thei tûrin min siam a. (Tirh. 20:35) Chu chu thilpêk dawnna aṭangin hlimna kan nei thei lo tihna a ni em? Ni lo ve. Kan zavaiin thilpêk kan dawn hian kan hlim a. Chutih rualin, a petu kan nih hian kan hlim lehzual a ni. Chutianga awm tûra Jehova’n min siam chu thil ṭha tak a ni. Engvângin nge?

² Chutianga Jehova’n min siam avâng chuan kan hlimna chu kan tipung thei a. Thil pêk theihna tûr hun remchângte zawngin chutiang chuan kan ti thei a ni. Chu chu Jehova min siam dân kawng ropui tak a ni lâwm ni?—Sâm 139:14.

3. Engvângin nge Jehova chu “Pathian hlim” tia koh a nih?

³ Bible chuan thil pêknain hlimna min thlen tih min tiam avângin Jehova chu “Pathian hlim” tia a ko hi thil mak a ni lo. (1 Tim. 1:10, 11, NWT.) Ani chu mi dangte hnêna thil Pe hmasa bertu leh pe nasa bertu a ni a. Tirhkoh Paula sawi angin, “amah avângin kan nung, kan che, kan awm a ni si a.” (Tirh. 17:28) Dik takin, “thilpêk ṭha leh thilpêk famkim zawng zawng chu” Jehova hnên aṭanga lo chhuak a ni.—Jak. 1:17.

4. Engin nge hlimna nasa lehzual nei tûra min ṭanpui ang?

⁴ Kan zavai hian thil pêkna aṭanga lo awm hlimna chu nasa lehzuala neih kan duh ngei ang a. Jehova thilphalna entawnin chutiang chuan kan ti thei a ni. (Eph. 5:1) Chumi chungchâng kan enho rualin mi dangte’n kan thilpêk an ngaihhlut loh hun pawha kan tih theih chu kan ngaihtuah bawk ang a. Chûngte  chuan, thil pêkna aṭanga lo awm hlimna chu vawnga tipung lehzual tûrin min ṭanpui ang.

JEHOVA THILPHALNA CHU ENTAWN RAWH

5. Jehova’n kan tisa lam mamawh engte nge min pêk?

⁵ Pathian Jehova’n thilphalna a lantîr dân kawng ṭhenkhat chu engte nge ni? Entîrna ṭhenkhat lo ngaihtuah ta ila. Ani chuan kan tisa lam mamawhte min pe. Thil ṭha ber berte chu nei kher lo mah ila, Jehova zârah kan mamawhte kan nei thei a. Entîr nân, ei leh in, thawmhnaw leh, chênna tûr inte kan neih theih nân min ṭanpui a ni. (Sâm 4:8; Mt. 6:31-33; 1 Tim. 6:6-8) Jehova’n kan tisa lam mamawhte min pêk chhan chu a tih tûr nia a ngaih vâng chauh a ni em? Ni lo ve! A nih leh, engvângin nge chûngte chu min pêk?

6. Matthaia 6:25, 26 aṭangin eng nge kan zir theih?

⁶ Jehova’n min hmangaih avângin kan tisa lam mamawhte chu min pe a. Matthaia 6:25, 26-a Isua thusawite hi han ngaihtuah teh. (Chhiar rawh.) Ani chuan thilsiamte aṭangin entîrna a pe a. Savate chungchângah: “Buh an tuh lo va, an ât hek lo, buh inah an seng lût hek lo,” tiin a sawi a ni. Mahse, a dawta a thusawi hi lo chhinchhiah ang che: “In Pa vâna mi chuan a châwm si a,” tiin a sawi a. Chumi hnuah Isua chuan: “Nangni chu anni ai chuan nasa takin in hlu zâwk lo vem ni?” tiin a zâwt a ni. Min zirtîr a duh chu eng nge ni? Jehova’n ramsate aiin amah betute chu a ngaihlu zâwk a ni. Ramsate mamawh a pêk chuan, kan mamawhte min pe ang tih kan chiang thei a! A chhûngte ngaihsaktu pa angin, Jehova chuan a chhûngkua chu a hmangaih avângin an mamawhte a pe a ni.—Sâm 145:16; Mt. 6:32.

7. Jehova thilphalna kan entawn theih dân kawng khat chu eng nge ni? (Milem en bawk rawh.)

⁷ Jehova angin, keini pawhin mi dangte tisa lam mamawh chu kan ṭanpui ve thei a. Entîr nân, unau tu emaw ei leh in tûr, a nih loh leh thawmhnaw hâk tûr mamawh hriat i nei em? Jehova chuan chu a mamawhna phuhru tûrin a hmang thei che a ni. A bîk takin, Jehova mite chu leilung chhiatna a thlen huna thilphalna an lantîr avânga hriat hlawh an ni a. Entîr nân, COVID-19 hripui a lên chhûng khân, unaute chuan ei tûrte, thawmhnawte leh, thil dangte chu a mamawhte hnênah an pe a. Mi dangte chuan khawvêl pumhuap rawngbâwlna atân thawhlâwmte an thawh bawk. Chu chuan, khawvêl puma chhawmdâwlna hna thawh a nih theih nân a ṭanpui a ni. Chûng unaute chuan, Hebrai 13:16-a: “Thiltih ṭhat leh thilphal hi theihnghilh  suh u; chutiang inthawina chungah chuan Pathian a lungni êm êm si a,” tih thu hi an nunpui a ni.

8. Eng kawngtein nge Jehova thiltihtheihna chu kan hlâwkpui? (Philippi 2:13)

⁸ Jehova’n chakna a pe. Ani chuan tiam chin awm lo a chakna chu amah betu rinawmte hnênah phal takin a pe a. (Philippi 2:13 chhiar rawh.) Thlêmna do thei tûrin emaw, fiahna khirh tak tuar chhuak thei tûrin emaw chakna dîlin i ṭawngṭai tawh em? Chumi nî atâna i tih ngaite ti tûra i mamawh chakna i neih theih nân i ṭawngṭai tawh mai thei bawk. Chakna dîla i ṭawngṭai tawh a nih chuan, tirhkoh Paula’n: “Mi tichaktuah chuan engkim ka ti thei a ni,” tia a ziah chu i pawmpui ngei ang.—Phil. 4:13.

9. Engtin nge Jehova’n phal taka a chakna a hman dân chu kan entawn theih? (Milem en bawk rawh.)

⁹ Mihring ṭha famkim lote ni mah ila, Jehova’n a thiltihtheihna phal taka a hman dân chu kan entawn thei a. Kan chakna chu mi dangte hnênah a ngial a nganin kan pe thei lo ngei mai. Mahse, an tân kan chakna chu kan hmang thei a ni. Entîr nân, Kristian kum upa, a nih loh leh dam lo tu emaw tân thil pawimawhte leh inchhûng khawsak nêna inkaihhnawih thilte chu kan tihsak thei a. Kan dinhmunin a zir chuan Kingdom Hall tihfai leh vawn ṭhatnaahte kan ṭanpui thei bawk a. Chutianga kan chakna kan hmanna chuan Jehova be duh mi dangte tân hlâwkna a thlen a ni.

10. Engtin nge kan thusawi hmangin mi dangte kan tihchak theih?

¹⁰ Thusawiin thil a tihtheihzia pawh hi theihnghilh lo vang che. Rilru taka fakna thu hlâwkpui thei tûr tu emaw hriat i neih em? Thlamuanna mamawh hriat i nei em? Hriat i nei a nih chuan ani chu i ngaihsakzia hriattîr tûrin engvângin nge hma i lâk loh vang? Ani chu i va tlawh thei a, phone hmangin i be thei a. A nih loh leh, card emaw, email emaw, SMS emaw i thawn thei bawk a ni. I sawi tûr chungchângah lungkham lutuk lo la. Thinlung taka i sawi thu mâwlmang tak chu rinawm zawm zêl tûr, a nih loh leh a ṭha zâwnga a dinhmun tawh mêk a thlîr theihna tûr atâna a mamawh tak a ni thei a ni.—Thuf. 12:25; Eph. 4:29.

11. Engtin nge Jehova’n a finna chu mi dangte hnêna a pêk?

¹¹ Jehova chuan finna a pe. Zirtîr Jakoba chuan: “In zîngah tu pawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se,” tiin a ziak a. (Jak. 1:5) Chûng thute’n a târ lan angin, Jehova’n a finna chu a roh tlat lo va. Mi dangte hnênah phal takin a pe ṭhîn a ni. Chu bâkah, a finna a pêk hunah, ‘hau lovin’  a pe ṭhîn tih chhinchhiah bawk ang che. A ṭanpuina kan mamawh tih pawm inthlahrung tûrin min siam ngai lo. Dik tak chuan, a ṭanpuina dîl tûrin min fuih zâwk a ni.—Thuf. 2:1-6.

12. Kan finna mi dangte hnêna pe chhâwng tûrin eng hun remchângte nge kan neih?

¹² Keini pawhin Jehova entawnin kan finna chu mi dangte hnênah kan pe chhâwng thei ang em? (Sâm 32:8) Jehova mite chuan an thil zir tawhte chu mi dangte hnêna hrilh theihna hun remchâng tam tak an nei a. Rawngbâwlnaa kan chhuah hunah mi tharte chu thu hrilh dân tûr kan zirtîr ṭhîn a. Upate chuan kohhranho rawngbâwltute leh baptisma chang tawh unaupate chu kohhrana an mawhphurhnate an hlen theih dân tûr dawhthei takin an zirtîr a. Chu bâkah, in sakna leh thawm ṭhatna lama tawnhriat nei tawhte chuan chutiang lama tawnhriat nei tlêm zâwkte chu Pathian biakna atâna hman in saknatea an thawh theih nân an ṭanpui a ni.

13. Mi dangte kan zirtîr hunah, engtin nge Jehova’n mite hnêna a finna a pêk dân chu kan entawn theih?

¹³ Zirtîrna petute chuan mi dangte an zirtîr hunah Jehova’n a finna a pêk dân chu an entawn tûr a ni a. Jehova’n phal takin a finna a pe tih hre reng ang che. Chutiang bawkin, keini pawhin kan tawnhriatte mi dangte phal taka hrilh a, kan thiamnate zirtîr chu kan duh a ni. Mi dangte’n kan chanvo min chhuhsak hlauvin kan thiamna ṭhenkhatte zirtîr lovin kan awm lo. “Tu ma’n min zirtîr hlei nêm! Amahin inzir ve mai rawh se,” tih ngaih dân neih chu kan duh lo bawk a ni. Jehova mite zînga tu mahin chutiang rilru put hmang chu an nei tûr a ni lo. Mi dangte kan zirtîr hunah kan thiamna mai bâkah, “keimahni nun pawh” pêk hial kan inhuam a ni. (1 Thes. 2:8) Chuvângin, “Mi dangte zirtîr chhâwng” theitu an nih chu kan duh a. (2 Tim. 2:1, 2) Kan zavai hian, kan finna chu mite hnêna kan pêk chhâwn chuan keimahni leh mi dangte chu kan hlim lehzualin finna kawngah kan ṭhang chho lehzual dâwn a ni.

MITE’N KAN THILPEK AN NGAIHLU LO NIA A LAN HUNAH

14. Engtin nge mi tam zâwkin kan thilphalna chu an chhân lêt ṭhin?

¹⁴ A bîk takin, kan unaute chunga thilphalna kan lantîr hian ngaihhlutna an lantîr tlângpui a. Lehkha ziakin emaw, kawng dangin emaw kan thiltih avânga an lâwmzia chu min hrilh ṭhîn a. (Kol. 3:15) Chûngte chuan, hlimna min neihtîr lehzual a ni.

15. Mi dangte’n ngaihhlutna an lantîr loh hunah eng nge kan hriat reng ngai?

¹⁵ A nihna takah chuan, mi ṭhenkhatin lâwmna an lantîr loh châng a awm thei a. A châng chuan, mi dangte tân kan hun leh tha, a nih loh leh kan thil neihte kan hman hnuah an tâna kan thiltih chu an ngaihlu lo niin kan hre thei a ni. Chutiang a nih chuan, kan hlimna hloh lo tûr leh lungni lova awm reng lo tûrin eng nge kan tih theih? Kan thupui atâna Bible châng thlan Tirhkohte 20:35-a thu chu hre reng ang che. Thil pêkna aṭanga kan dawn hlimna chu mite chhân lêt dânah a innghat lo. Mite’n an ngaihlu lo nia a lan hunah pawh hlim takin thil kan pe chhunzawm zêl thei a ni. Engtin nge? Kawng ṭhenkhat i lo ngaihtuahho vang u.

16. Hlim taka pe zêl thei tûrin engin nge min ṭanpui ang?

¹⁶ Jehova entawn tum tlat rawh. Ani chuan mite hnênah an ngaihlu emaw, ngaihlu lo emaw pawh ni se, thil ṭhate a pe a. (Mt. 5:43-48) Jehova chuan ‘a lêt leh eng mah beisei lova’ thil kan pêk chuan “lâwmman ropui” tak kan dawng ang tih min tiam a ni. (Lk. 6:35, NWT.) “Eng mah” tih ṭawngkam hian ngaihhlutna lantîrna pawh a huam tel thei a. Ngaihhlut kan ni emaw, ni lo emaw  mi dangte ṭanpuia “hlim taka petu” kan nih chuan Jehova’n min rûl leh zêl dâwn a ni.—Thuf. 19:17; 2 Kor. 9:7.

17. Mite chunga thilphalna kan lantîr tûr chhan pawimawh ber chu eng nge ni? (Luka 14:12-14)

¹⁷ Thil kan pêk huna kan ngaihven tlat tûr chungchângah Luka 14:12-14-ah thubul pawimawh tak kan hmu thei a. (Chhiar rawh.) Min pe lêt theitute hnêna khualchhâwn thiamna, a nih loh leh thilphalna lantîr chu thil sual a ni lo va. Mahse, eng emaw dawn lêt beisei avânga pe kan ni tih kan inhriat chuan engtin nge ni ang? Isua thurâwn hi zawm kan tum thei a ni. Min pe lêt thei lo tu emaw hnênah khualchhâwn thiamna kan lantîr thei a. Chutianga kan tih chuan, Jehova kan entawn avângin kan hlim ang. Chu thlîr dân chuan mite’n ngaihhlutna an lantîr loh hunah pawh hlimna vawng reng tûrin min ṭanpui dâwn a ni.

18. Mi dangte chunga hriatthiamna lantîr tûrin engin nge min ṭanpui thei?

¹⁸ Mi dangte rilru put hmang rinhlelh chu pumpelh rawh. (1 Kor. 13:7) Mi dangte’n ngaihhlutna an lantîr loh hunah heti hian kan inzâwt thei a: ‘An ngaihlu lo tak tak nge ni a, ngaihhlutna lantîr an theihnghilh mai zâwk?’ tiin. Kan beisei anga an chhân lêt loh chhan dangte pawh a awm thei bawk a. Mi ṭhenkhat chuan lâwm hle mah se, an lâwmzia lantîr chu harsa an ti thei a. A bîk takin, tûn hmaa mite ṭanpui ṭhîntu an nih chuan mi dangte ṭanpuina dawn chu an hreh pawh a ni thei a ni. Eng pawh chu ni se, Kristian hmangaihna chuan kan unaute chunga hriatthiamna lantîr tûr leh thilpêkna aṭanga hlimna hmu chhunzawm zêl tûrin min chêttîr ang.—Eph. 4:1-3.

19-20. Mi dangte chunga thilphalna kan lantîr hunah dawhtheihna neih chu engvângin nge a pawimawh? (Milem en bawk rawh.)

¹⁹ Dawhthei rawh. Thilphalna chungchângah Lal fing Solomona chuan: “I chhang paih la, tui chungah chuan, i hmu leh dâwn si, ni rei hnuah,” tiin a sawi a. (Thur. 11:1) Chûng thute’n a târ lan angin, mi tam tak chuan “ni rei hnuah” an lâwmzia an lantîr chauh pawh a ni  thei a ni. Chumi dikzia târ langtu thiltawn pakhat lo ngaihtuah ta ila.

²⁰ Kum tam tak kal ta khân, bial kantu nupui pakhat chuan baptisma chang hlim unaunu pakhat hnênah lehkha ziakin rinawm reng tûrin a fuih a. Kum riat dâwn hnuah, chu unaunu chuan lehkha thawn lêtin: “I hre lo mai thei a; mahse, kum tam tak chhûng min ṭanpuitu i ni tak zet a. I ṭawngkam ngilnei takte leh Bible châng i târ lan kha ka theihnghilh ngai lo,” tiin a ziak a ni. a A fiahna tawh ṭhenkhatte a târ lan hnuah, chu unaunu chuan: “A châng chuan ka bei a dawng a, Thuhretu nih tawh loh mai te hi ka châk ṭhîn a. Mahse, i Bible châng ziah kha ka thinlungah a châm reng a. Rinawm chhunzawm zêl tûrin chakna min neihtîr ṭhîn. Kum riat chhûng khân khatiang khawpa ka rilru khawihtu thil dang ka tawng lo,” tiin a ziak chhunzawm a ni. Bial kantu nupuiin “ni rei hnuah” chutiang lehkha a dawn avânga a lâwm tûrzia chu han mitthla teh! Keini pawhin, tu emaw tâna thil ṭha kan tihsak aṭanga rei tak hnuah chauh ngaihhlutna lantîrna kan dawng pawh a ni thei a ni.

21. Engvângin nge Jehova thilphalna chu entawn i tum tlat?

²¹ Kan hriat tawh angin, Jehova chuan theihna danglam tak neiin min siam a. Thilpêk dawn chu nuam ti mah ila, mi dangte hnêna thil pêkna aṭangin hlimna nasa zâwk kan nei a ni. Kan unaute kan ṭanpui theih hian nuam kan ti a. An lâwmzia an lantîr hian kan hlim a ni. Chutih rualin, mite’n lâwmna an lantîr emaw, lantîr lo emaw pawh ni se, thil dik kan tih avângin kan lâwm thei a. Thil i pêk eng pawh “LALPA chuan chu aia tam tak chu a pe thei che,” tih hre reng ang che. (2 Chro. 25:9) Thil pêk kawngah Jehova chu kan khûm thei ngai lo vang! Chu bâkah, Jehova ngeiin min rulh lêt aia hlimna nasa zâwk a awm lo. Chuvângin, kan Pa vâna mi thilphal tak chu entawn i tum tlat ang u.